ຂ່າວຫຼ້າສຸດ

ມາ​ເຊດ​ວານ ປ່ຽນ​ຊື່​ປະເທດ​ເປັນ ສາທາລະນະ​ລັດ ມາ​ເຊດ​ວານ​ເໜືອ

646 14 ກ.ພ. 2019 ຂ່າວຕ່າງປະເທດ
ມາ​ເຊດ​ວານ ປ່ຽນ​ຊື່​ປະເທດ​ເປັນ ສາທາລະນະ​ລັດ ມາ​ເຊດ​ວານ​ເໜືອ

    ລັດຖະບານ​ຂອງ​ມາ​ເຊດ​ວານ (Macedonia) ຖະແຫຼງ​ວ່າ ຂໍ້​ຕົກລົງ​ລະຫວ່າງ ມາ​ເຊດ​ວານ ກັບ​ເກ​​ັຣກ ວ່າ​ດ້ວຍ​ການ​ປ່ຽນ​ຊື່​ປະເທດ ມາ​ເຊດ​ວານ ເປັນ​ສາທາລະນະ​ລັດ ມາ​ເຊດ​ວານ​ເໜືອ ເລີ່ມ​ມີ​ຜົນ​ບັງຄັບ​ໃຊ້ ນັບ​ແຕ່​ວັນ​ທີ 12 ກຸມພາ​ນີ້​ເປັນຕົ້ນ​ໄປ ຫຼັງ​ຈາກ​ທີ່​ການ​ປ່ຽນແປງ​ກ່ຽວ​ກັບ ລັດ​ຖະ​ທຳ​ມະນູນ ໄດ້​ຮັບ​ການ​ປະກາດ​ຢູ່​ໃນ​ໜ້າ​ໜັງສືພິມ​ຂອງ​ລັດ.

   ໂຄສົກ​ກະຊວງ​ການ​ຕ່າງປະເທດ​ຂອງ​ມາ​ເຊດ​ວານ ແຈ້ງ​ໃຫ້​ຮູ້​ວ່າ ມາ​ເຊດ​ວານ ຈະ​ໄດ້​ແຈ້ງ​ຕໍ່ ສະຫະ​ປະຊາ​ຊາດ ກ່ຽວ​ກັບ​ການ​ປ່ຽນ​ຊື່​ປະເທດ​ນັ້ນ ພາຍ​ໃນ​ຫຼາຍ​ມື້​ຂ້າງ​ໜ້າ ເມື່ອ​ຊື່​ໃໝ່​ເລີ່ມ​ໄດ້ ຮັບ​ການ​ນຳ​ໃຊ້​ໃນ​ທົ່ວ​ໂລກ.

    ຂໍ້​ຕົກ​ທີ່​ມາ​ເຊດ​ວານ ແລະ​ເກ​​ັຣກ ລົງ​ນາມ​ເມື່ອ​ເດືອນ​ມິຖຸນາ​ປີ​ກາຍ ລະບຸ​ວ່າ ມາ​ເຊດ​ວານ ຈະ​ປ່ຽນ​ຊື່​ປະເທດ​ເປັນ ສາທາລະນະ​ລັດ ມາ​ເຊດ​ວານ​ເໜືອ ແລະ​ເກ​​ັຣກ ຈະ​ໃຫ້ການ​ສະໜັບສະໜູນ ຄວາມ​ພະຍາຍາມ​ຂອງ​ມາ​ເຊດ​ວານ ໃນ​ການ​ກາຍເປັນ​ສະມາຊິກ​ຂອງ​ສະຫະພາບ​ເອີ​ຣົບ (EU) ແລະ ອົງການ​ສົນທິສັນຍາ ປ້ອງ​ກັນ​ອັດ​ລັງ​ຕິກ​ເໜືອ  (NATO).

    ເມື່ອ​ວັນ​ທີ 6 ກຸມພາ​ນີ້ ມາ​ເຊດ​ວານ ໄດ້​ລົງ​ນາມ​ອະນຸ​ສັນຍາ ວ່າ​ດ້ວຍ​ການ​ເຂົ້າ​ຮ່ວມ NATO ຊຶ່ງ​ມີ​ຂຶ້ນ​ທີ່​ນະຄອນຫຼວງ​ບຣຸກ​ແຊນ (ປະເທດ​ແບນ​ຊິກ) ເປັນ​ບາດກ້າວ​ທີ່​ສຳຄັນ​ໃນ​ຂະ​ບວນ​ການ ກາຍເປັນ​ສະມາຊິກ NATO ຢ່າງ​ເປັນ​ທາງ​ການ. ເພື່ອ​ໃຫ້​ມາ​ເຊດ​ວານ ກາຍເປັນ​ສະມາຊິກ​ຢ່າງ​ຄົບ​ຖ້ວນ​ຂອງ NATO ນັ້ນ 29 ປະເທດ​ທີ່​ເປັນ​ສະມາຊິກ​ຂອງ​ອົງການ​ນີ້ ຈະ​ຕ້ອງ​ໄດ້​ດຳເນີນ​ການ​ເຮັດ​ເອກະສານ​ການ​ຮັບຮອງ ຊຶ່ງ​ໃນ​ກໍລະນີ​ຂອງ​ມົນ​ເຕ​ເນ​ໂກຣ ເມື່ອ​ປີ 2017 ຂະ​ບວນ​ການ​ດັ່ງກ່າວ​ໄດ້ແກ່​ຍາວ ເປັນ​ເວລາ​ປະມານ 1 ປີ.

 

ຂ່າວທີ່ກ່ຽວຂ້ອງ