ນັກຮຽນ ຢູ-18 ປາກງື່ມ ຄອງຂັນລັດຖະມົນຕີ ສສກ

    ການ​ແຂ່ງ­ຂັນ​ເຕະ­ບານ​ນັກ­ຮຽນ​ຊາຍ 7 ຄົນ ຮຸ່ນ​ອາ­ຍຸ​ບໍ່​ເກີນ 18 ປີ ຫຼື ຢູ-18 ຊີງ​ຂັນ​ທ່ານ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ຄັ້ງ​ທີ I ປະ­ຈຳ​ສົກ­ຮຽນ 2018-2019 ໄດ້​ສຳ­ເລັດ​ລົງ​ວັນ​ທີ 8 ກຸມ­ພາ 2019 ທີ່​ສະ­ໜາມ​ກີ­ລາ​ເຈົ້າ​ອະ­ນຸ­ວົງ ນະ­ຄອນ­ຫຼວງ​ວຽງ​ຈັນ (ນວ) ມີ​ທ່ານ​ນາງ ຂັນ​ທະ​ລີ ສີ​ຣິ​ພົງ­ພັນ ຫົວ­ໜ້າ​ຫ້ອງ­ການ ສສກ ທ່ານ ບຸນ​ສຸກ ທິ​ລະ​ສັກ ຫົວ­ໜ້າ​ກົມ​ພະ­ລະ ແລະ ສິ­ລະ​ປະ​ສຶກ​ສາ ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ທ່ານ ກະ­ເສມ ອິນ​ທະ­ລາ ຮອງ​ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ພ້ອມ​ດ້ວຍ​ບັນ­ດາ​ເຈົ້າ­ເມືອງ ຮອງ​ເຈົ້າ­ເມືອງ ຜູ້​ໃຫ້­ການ​ສະ­ໜັບ­ສະ­ໜູນ​ຄູ​ເຝິກ ນັກ­ກີ­ລາ ແລະ ນັກ­ຮຽນ​ເຂົ້າ​ຮ່ວມ​ຊົມ​ຮ່ວມ​ເຊຍ​ຢ່າງ​ເປັນ​ຂະ​ບວນ​ການ​ຟົດ­ຟື້ນ.

    ໂອ­ກາດ​ນີ້ ທ່ານ ສົມ​ພອນ ສອນ​ດາ­ລາ ກ່າວ​ວ່າ: ການ​ແຂ່ງ­ຂັນ​ຄັ້ງ​ນີ້​ມີ​ບັນ­ດາ​ໂຮງ­ຮຽນ​ທີ່​ມາ​ຈາກ 9 ຕົວ​ເມືອງ​ທົ່ວ ນວ ເຂົ້າ​ຮ່ວມ 24 ທີມ ໄດ້​ດຳ­ເນີນ​ແຕ່​ວັນ​ທີ 26 ພະ­ຈິກ 2018 ເປັນ­ຕົ້ນ​ມາ ການ​ແຂ່ງ­ຂັນ​ມີ​ຂະ​ບວນ​ການ​ຟົດ­ຟື້ນ ແລະ ມ່ວນ­ຊື່ນ ນັກ­ກີ­ລາ​ມີ​ຄວາມ​ຫ້າວ­ຫັນ ແຂ່ງ­ຂັນ​ກັນ​ບົນ​ພື້ນ­ຖານ ຄວາມ​ສາ­ມັກ­ຄີ​ຮັກ­ແພງ​ເຊິ່ງ​ກັນ ແລະ ກັນ ແລະ ປະ­ຕິ­ບັດ​ລະ­ບຽບ​ວິ­ໄນ​ການ​ແຂ່ງ­ຂັນ​ໄດ້​ເປັນ​ຢ່າງ​ດີ ທັງ​ນີ້ ເພື່ອ​ສ້າງ​ຂະ​ບວນ​ການ​ຊົມ­ເຊີຍ​ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 70 ປີ ແລະ ຕ້ອນ­ຮັບ​ວັນ​ສ້າງ­ຕັ້ງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ຄົບ­ຮອບ 64 ປີ.

    ສຳ­ລັບ​ການ​ແຂ່ງ­ຂັນ​ໃນ​ຮອບ​ຊີງ​ຊະ­ນະ​ເລີດ​ເປັນ​ການ​ພົບ​ກັນ​ລະ­ຫວ່າງ​ທີມ​ເມືອງ​ປາກ​ງື່ມ I (ມສ ສົມ​ສະ­ຫວາດ) ແລະ ທີມ​ເມືອງ​ສີ​ໂຄດ​ຕະ­ບອງ (ໂຮງ­ຮຽນ​ມັດ­ທະ­ຍົມ​ສຶກ​ສາ​ຕອນ​ປາຍ​ວຽງ​ຈັນ-ໂຮ່​ຈີ​ມິງ) ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ​ທີມ​ເມືອງ​ປາກ​ງື່ມ I ຊະ­ນະ ທີມ​ເມືອງ​ສີ​ໂຄດ​ຕະ­ບອງ 4-0 ຄວ້າ​ຂັນ​ຊະ­ນະ​ເລີດ ພ້ອມ​ເງິນ­ສົດ 5 ລ້ານ​ກີບ​ໄປ​ຄອງ ອັນ​ດັບ 2 ໄດ້​ຂັນ 1 ໜ່ວຍ ພ້ອມ​ເງິນ­ສົດ 3 ລ້ານ​ກີບ ອັນ​ດັບ 3 ທີມ​ເມືອງ​ປາກ​ງື່ມ II ໄດ້​ຮັບ​ຂັນ 1 ໜ່ວຍ ພ້ອມ​ເງິນ­ສົດ 2 ລ້ານ​ກີບ ແລະ ອັນ​ດັບ 4 ເມືອງ​ຫາດ​ຊາຍ​ຟອງ.