LAP ມອບປະກັນໄພໃຫ້ປະຊາຊົນຫຼາຍກວ່າ 4.500 ຄົນ

276 11 ກ.ພ. 2019 ຂ່າວໜ້າ​ໜຶ່ງ
LAP ມອບປະກັນໄພໃຫ້ປະຊາຊົນຫຼາຍກວ່າ 4.500 ຄົນ

    ເພື່ອ​ແນ­ໃສ່​ຊ່ວຍ­ເຫຼືອ​ປະ­ຊາ­ຊົນ ໃນ​ການ​ຍົກ​ສູງ​ຄຸນ​ນະ​ພາບ​ຊີ­ວິດ​ຂອງ​ເຂົາ­ເຈົ້າ ໃຫ້​ນັບ​ມື້​ດີ​ຂຶ້ນ​ຕາມ​ແນວ­ທາງ​ນະ­ໂຍ­ບາຍ​ຂອງ​ພັກ-ລັດ­ຖະ­ບານ ດັ່ງ­ນັ້ນ ໃນ​ທ້າຍ​ເດືອນ​ມັງ­ກອນ 2019 ຜ່ານ​ມາ ບໍ­ລິ­ສັດ ລ້ານ​ຊ້າງ​ປະ­ກັນ​ໄພ ມະ­ຫາ­ຊົນ (LAP) ແລະ ກອງ​ທຶນ​ວັດ­ທະ­ນະ­ທຳ DBKim Jun Ki ໄດ້​ມອບ​ປະ­ກັນ​ໄພ​ອຸ­ບັດ­ເຫດ​ໃຫ້​ປະ­ຊາ­ຊົນ​ລ້າໆ ຫຼາຍ​ກວ່າ 4.500 ຄົນ ທີ່​ນອນ​ຢູ່​ໃນ 901 ຄົວ​ເຮືອນ​ໃນ​ສອງ​ບ້ານ​ຄື: ບ້ານ​ປາກ​ຊ່ອງ ແລະ ບ້ານ​ວັດ​ຫຼວງ ເມືອງ​ປາກ​ຊ່ອງ ແຂວງ​ຈຳ­ປາ​ສັກ ລວມ​ມູນ​ຄ່າ​ຂອງ​ການ​ປະ­ກັນ​ໄພ​ສຳ­ລັບ​ໂຄງ­ການ​ນີ້ ປະ­ມານ 170 ລ້ານ​ກີບ ຫຼື 20.000 ໂດ​ລາ​ສະ­ຫະ­ລັດ ເຊິ່ງ​ເຂົ້າ​ຮ່ວມ​ພິ­ທີ​ມອບ​ຄັງ​ນີ້​ມີ​ທ່ານ ໂດ ດັງ ຄາງ ຜູ້­ອຳ­ນວຍ­ການ​ບໍ­ລິ­ສັດ ລ້ານ​ຊ້າງ​ປະ­ກັນ​ໄພ​ມະ­ຫາ­ຊົນ ທ່ານ ກີມ ກາງ ວຸກ ຕາງ­ໜ້າ​ກອງ​ທຶນ​ວັດ­ທະ­ນະ­ທຳ DB Kim Jun Ki ຜູ້­ຕາງ­ໜ້າ​ອຳ­ນາດ​ການ​ປົກ­ຄອງ​ເມືອງ​ປາກ​ຊ່ອງ ແລະ ປະ­ຊາ­ຊົນ 10 ຄອບ­ຄົວ​ດີ­ເດັ່ນ.

    ທ່ານ ໂດ ດັງ ຄາງ ໃຫ້​ຮູ້​ວ່າ: ນີ້​ແມ່ນ​ຂອງ­ຂວັນ​ໃນ​ຕົ້ນ​ປີ​ໃໝ່​ສາ­ກົນ 2019 ທີ່​ບໍ­ລິ­ສັດ ລ້ານ​ຊ້າງ​ປະ­ກັນ​ໄພ ມະ­ຫາ­ຊົນ ໄດ້​ມອບ​ໃຫ້​ປະ­ຊາ­ຊົນ​ສອງ​ບ້ານ ດ້ວຍ​ຄວາມ​ຫວັງ​ສະ­ໜອງ​ຄວາມ​ຮັບ­ປະ­ກັນ​ທາງ​ດ້ານ​ການ​ເງິນ ເພື່ອ​ປະ­ຊາ­ຊົນ​ໝັ້ນ​ໃຈ​ເຮັດ​ວຽກ ກໍ​ຄື ການ​ຜ່ານ​ຜ່າ​ເວ­ລາ​ທີ່​ມີ​ຄວາມ​ຫຍຸ້ງ­ຍາກ​ໃນ​ຊີ­ວິດ ລາຍ​ລະ­ອຽດ​ແມ່ນ​ປະ­ຊາ­ຊົນ​ທຸກ​ຄົນ​ທີ່​ຂຶ້ນ​ສຳ­ມະ­ໂນ​ຄົວ​ຢູ່​ສອງ​ບ້ານ​ຂ້າງ​ເທິງ ຖ້າ​ໂຊກ​ບໍ່​ດີ​ຫາກ​ເກີດ​ອຸ­ບັດ­ເຫດ​ປະ­ກັນ​ໄພ​ຈ່າຍ​ເງິນ​ຄຸ້ມ​ຄອງ​ດ້ວຍ​ວົງ​ເງິນ​ສູງ​ສຸດ 10 ລ້ານ​ກີບ​ຕໍ່​ຄົນ​ຕໍ່​ເຫດ­ການ ນອກ­ຈາກ​ນັ້ນ ບໍ­ລິ­ສັດ ລ້ານ​ຊ້າງ​ປະ­ກັນ​ໄພ ມະ­ຫາ­ຊົນ ແລະ ກອງ​ທຶນ​ວັດ­ທະ­ນະ­ທຳ DB Kim Jun Ki ຍັງ​ໄດ້​ມອບ​ເຂົ້າ­ສານ​ຈຳ­ນວນ 5.000 ກິ​ໂລ ໃຫ້​ປະ­ຊາ­ຊົນ​ໃນ​ສອງ​ບ້ານ​ດັ່ງ­ກ່າວ​ຕື່ມ​ອີກ ດ້ວຍ​ຄວາມ​ປາ­ຖະ­ໜາ​ທີ່​ຈະ​ນຳ​ເອົາ​ການ​ຊ່ວຍ­ເຫຼືອ ແທດ­ເໝາະ​ກັບ​ຄວາມ​ເປັນ​ຈິງ​ຊ່ວຍ​ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໃນ​ເຂດ​ທີ່​ທຸກ​ຍາກ.

ຂ່າວທີ່ກ່ຽວຂ້ອງ