ຂ່າວຫຼ້າສຸດ

ປະເມີນວຽກງານການພັດທະນາທ້ອງຖິ່ນ 4 ແຂວງເປົ້າໝາຍ

964 08 ກ.ພ. 2019 ຂ່າວໜ້າ​ໜຶ່ງ

    ວັນ​ທີ 07-08 ກຸມ­ພາ 2019 ຢູ່​ໂຮງ­ແຮມ​ຄຣາວ​ພາ​ຊາ ນະ­ຄອນ­ຫຼວງ​ວຽງ​ຈັນ ກົມ​ແຜນ­ການ ກະ­ຊວງ​ແຜນ­ການ ແລະ ການ​ລົງ­ທຶນ ຈັດ​ກອງ​ປະ­ຊຸມ​ປຶກ­ສາ​ຫາ­ລື​ສະ­ຫຼຸບ​ແຜນ​ວຽກ​ປະ­ຈຳ​ປີ 2018 ແລະ ກະ­ກຽມ​ແຜນ​ວຽກ​ປະ­ຈຳ​ປີ 2019 ໃນ​ການ­ຈັດ­ຕັ້ງ​ປະ­ຕິ­ບັດ​ແຜນ​ງານ​ພັດ­ທະ­ນາ​ທ້ອງ­ຖິ່ນ​ສຳ­ລັບ 4 ແຂວງ​ຄື: ແຂວງ​ວຽງ​ຈັນ ບໍ່​ແກ້ວ ບໍ​ລິ​ຄຳ​ໄຊ ແລະ ແຂວງ​ຄຳ​ມ່ວນ (ແຜນ​ງານ​ລາວ/030) ໂດຍ​ເປັນ​ປະ­ທານ​ຂອງ​ທ່ານ​ນາງ ພອນ​ວັນ ອຸ​ທະ​ວົງ ຫົວ­ໜ້າ​ກົມ​ແຜນ­ການ ມີ​ທ່ານ Olivier Hecguet ຫົວ­ໜ້າ​ຫ້ອງ­ການ​ພາກ​ພື້ນ​ອົງ­ການ​ລັກ​ເດບ ພ້ອມ​ດ້ວຍ​ຜູ້­ຕາງ­ໜ້າ​ຈາກ 4 ແຂວງ​ເປົ້າ​ໝາຍ​ເຂົ້າ​ຮ່ວມ.

    ເພື່ອ​ເປັນ​ການ​ທົບ​ທວນ­ຄືນ​ກ່ຽວ​ກັບ​ຂໍ້­ຄົງ­ຄ້າງ ແລະ ສິ່ງ​ທ້າ​ທາຍ​ການ­ຈັດ­ຕັ້ງ​ປະ­ຕິ­ບັດ​ກິດ­ຈະ­ກຳ​ທີ່​ຕິດ​ພັນ​ກັບ 3 ຂົງ­ເຂດ​ຕົ້ນ­ຕໍ​ເຊັ່ນ: ການ​ສົ່ງ­ເສີມ​ຂີດ​ຄວາມ​ສາ­ມາດ​ການ​ຄຸ້ມ​ຄອງ​ບໍ­ລິ­ຫານ​ພາກ​ລັດ ການ​ຄຸ້ມ​ຄອງ​ກອງ​ທຶນ​ພັດ­ທະ­ນາ​ບ້ານ ແລະ ການ​ສະ­ໜອງ​ໂຄງ​ລ່າງ​ທີ່​ຈຳ­ເປັນ ເພື່ອ​ສົ່ງ­ເສີມ​ການ​ພັດ­ທະ­ນາ​ຊົນ­ນະ­ບົດ ແລະ ລຶ­ບລ້າງ​ຄວາມ­ທຸກ​ຍາກ ພ້ອມ​ກັນ​ນັ້ນ ກໍ​ໄດ້​ມີ​ການ​ຜ່ານ​ເນື້ອ​ໃນ​ຂໍ້​ຕົກ­ລົງ​ການ­ຈັດ­ຕັ້ງ​ປະ­ຕິ­ບັດ (IA) ແຜນ​ປະ­ຕິ­ບັດ​ວຽກ​ງານ​ປະ­ຈຳ​ປີ 2019 ນຳ​ກັນ ໃຫ້​ເນື້ອ​ໃນ​ມີ​ຄວາມ​ສອດ­ຄ່ອງ ແລະ ເປັນ​ເອ­ກະ​ພາບ​ກັນ ເພື່ອ​ໃຫ້​ໄດ້​ເຊັນ​ອະ­ນຸ­ມັດ​ໂດຍ​ໄວ ແລະ ສາ­ມາດ​ນຳ­ໄປ​ຈັດ​ຕັ້ງ​ປະ­ຕິ­ບັດ​ຢ່າງ​ມີ​ປະ​ສິດ­ທິ​ຜົນ ແລະ ທ່ວງ​ທັນ​ຕາມ​ກຳ­ນົດ​ເວ­ລາ ໂດຍ​ສະ­ເພາະ​ແມ່ນ​ໄລ­ຍະ​ເວ­ລາ​ຂອງ​ການ­ຈັດ­ຕັ້ງ​ປະ­ຕິ­ບັດ​ແຜນ​ງານ​ລາວ/030 ຮອດ​ປີ 2020 ແລະ ຈະ​ໄດ້​ປິດ​ແຜນ​ງານ​ດັ່ງ­ກ່າວ​ປີ 2021.

    ສຳ­ລັບ​ແຜນ​ງານ​ລາວ/030 ເປັນ​ແຜນ​ງານ​ທີ່​ແນ­ໃສ່​ພັດ­ທະ­ນາ​ຊຸມ​ຊົນ​ໃນ​ເຂດ​ຊົນ­ນະ­ບົດ ແລະ ແກ້​ໄຂ​ຄວາມ­ທຸກ​ຍາກ ເຊິ່ງ​ປະ­ຊາ­ຊົນ​ໃນ​ເຂດ​ຊົນ­ນະ­ບົດ​ຂອງ 4 ແຂວງ​ເປົ້າ​ໝາຍ ໄດ້​ຮັບ​ຜົນ​ຈຳ­ນວນ 160.000 ຄົນ ສະ­ນັ້ນ ແຜນ​ງານ​ດັ່ງ­ກ່າວ​ນີ້ ຈຶ່ງ​ເປັນ​ແຜນ­ການ​ທີ່​ສະ­ໜັບ­ສະ­ໜູນ​ວຽກ​ງານ​ບຸ­ລິ​ມາ​ສິດ​ຂອງ​ລັດ­ຖະ­ບານ ແລະ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ 5 ປີ ຄັ້ງ​ທີ VIII ໃຫ້​ມີ​ຜົນ­ສຳ­ເລັດ ໂດຍ​ສະ­ເພາະ​ແມ່ນ​ຂົງ­ເຂດ​ວຽກ​ງານ​ພັດ­ທະ­ນາ​ຊົນ­ນະ­ບົດ ແລະ ລຶ­ບລ້າງ​ຄວາມ­ທຸກ​ຍາກ.

ຂ່າວທີ່ກ່ຽວຂ້ອງ