ຂ່າວຫຼ້າສຸດ

ປູກຜັກກ້ານຈອງຂາຍ ສ້າງລາຍຮັບໄດ້ດີສົມຄວນ

642 08 ກ.ພ. 2019 ຂ່າວໜ້າ​ໜຶ່ງ
ປູກຜັກກ້ານຈອງຂາຍ ສ້າງລາຍຮັບໄດ້ດີສົມຄວນ

    ຜັກ​ກ້ານ­ຈອງ ເປັນ​ພືດ​ລົ້ມ​ລຸກ​ທີ່​ມີ​ຕາມ​ທຳ​ມະ​ຊາດ ແລະ ມັກ​ເກີດ​ຕາມ​ບ່ອນ​ທີ່​ມີ​ນ້ຳ​ຂັງ ປັດ­ຈຸ­ບັນ ຜັກ​ດັ່ງ­ກ່າວ​ໄດ້​ຮັບ​ຄວາມ​ນິ­ຍົມ​ກິນ​ເປັນ​ອາ­ຫານ ແລະ ເປັນ​ສິນ­ຄ້າ​ຈຳ­ໜ່າຍ​ສ້າງ​ລາຍ​ຮັບ​ໃຫ້​ກັບ​ຄອບ­ຄົວ ຄື​ດັ່ງ​ຄອບ­ຄົວ​ນາງ ພູ​ທອງ ພິມ​ມະ​ສອນ ບ້ານ​ເປີກ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ທີ່​ໄດ້​ຖື​ເອົາ​ການ​ປູກ​ຜັກ​ກ້ານ­ຈອງ​ເປັນ​ອາ­ຊີບ​ເສີມ​ຈາກ​ການ​ເຮັດ​ນາ ສາ­ມາດ​ສ້າງ​ລາຍ​ຮັບ​ໄດ້​ເດືອນ​ລະ 3 ລ້ານ​ກີບ.

    ນາງ ພູ​ທອງ ພິມ​ມະ​ສອນ ໃຫ້​ສຳ­ພາດ​ວັນ​ທີ 6 ກຸມ­ພາ 2019 ວ່າ: ຕົນ​ມີ​ອາ­ຊີບ​ເຮັດ​ນາ​ປູກ​ເຂົ້າ​ແຕ່​ໃດ​ມາ ພາຍ­ຫຼັງ​ປັກ​ດຳ­ນາ​ແລ້ວ ແມ່ນ​ບໍ່​ມີ​ວຽກ​ຫຍັງ ຈຶ່ງ​ໄດ້​ສຶກ​ສາ​ການ​ປູກ​ຜັກ​ກ້ານ­ຈອງ ເຊິ່ງ​ເປັນ​ພືດ​ທີ່​ປູກ​ງ່າຍ ມັກ​ດິນ​ຕົມ ແລະ ມີ​ນ້ຳ​ຂັງ ການ​ບົວ­ລະ­ບັດ​ຮັກ­ສາ​ສະ­ດວກ​ສະ­ບາຍ ພິ­ເສດ​ບໍ່​ໄດ້​ໃຊ້​ຕົ້ນ​ທຶນ ພຽງ​ແຕ່​ໃຊ້​ແຮງ​ງານ​ເທົ່າ​ນັ້ນ ປັດ­ຈຸ­ບັນ ຜັກ​ດັ່ງ­ກ່າວ​ກຳ­ລັງ​ເປັນ​ທີ່​ນິ­ຍົມ​ຂອງ​ຕະ­ຫຼາດ ກໍ​ຄື ຜູ້​ບໍ­ລິ­ໂພກ​ຈຳ­ນວນ​ຫຼາຍ ໂດຍ​ອີງ­ໃສ່​ດິນ​ນາ​ຂອງ​ຕົນ​ໃນ​ເນື້ອ­ທີ່ 5 ໄລ່ ເຊິ່ງ​ເປັນ​ນາ­ທາມ ເພື່ອ​ໃຊ້​ພື້ນ​ທີ່​ຫວ່າງ​ໃຫ້​ເກີດ​ປະ­ໂຫຍດ ຕົ້ນ​ປີ 2018 ຈຶ່ງ​ໄດ້​ຕັດ­ສິນ​ໃຈ​ເອົາ​ເບ້ຍ​ຜັກ​ກ້ານ­ຈອງ​ທີ່​ເກີດ​ຕາມ​ທຳ​ມະ​ຊາດ ຢູ່​ບໍ­ລິ­ເວນ​ໃກ້​ຄຽງ​ມາ​ປູກ​ໃສ່ ໂດຍ​ໃຊ້​ເວ­ລາ​ພຽງ​ແຕ່​ເດືອນ​ປາຍ ກໍ​ສາ­ມາດ​ເກັບ​ຜົນ​ຜະ­ລິດ​ໄປ​ຈຳ­ໜ່າຍ​ໄດ້​ແລ້ວ.

    ສຳ­ລັບ​ປີ 2019 ຫຼັງ​ຈາກ​ສຳ­ເລັດ​ການ​ປັກ​ດຳ​ເຂົ້າ­ນາ­ແຊງ ຕົນ​ກໍ​ໄດ້​ເລີ່ມ​ລົງ­ມື​ປູກ​ຜັກ​ກ້ານ­ຈອງ ເຊິ່ງ​ເລີ່ມ​ປູກ​ມາ​ແຕ່​ເດືອນ​ມັງ­ກອນ​ເປັນ­ຕົ້ນ​ມາ ປັດ­ຈຸ­ບັນ​ຜັກ​ດັ່ງ­ກ່າວ​ໃຫຍ່ ແລະ ຢູ່​ໃນ​ຂັ້ນ​ຕອນ​ການ​ເກັບ​ກູ້ ໃນ​ນີ້​ເກັບ​ໄດ້ 5-6 ເປົາ​ປຸ໋ຍ ຫຼື​ປະ­ມານ 6-7 ໝື່ນ​ຕໍ່​ວັນ ພາຍ­ຫຼັງ​ເກັບ​ແລ້ວ​ຈະ​ມີ​ແມ່​ຄ້າ​ມາ​ຊື້​ເອົາ​ກັບ​ທີ່ ໂດຍ​ຂາຍ 2 ກິ​ໂລ 5 ພັນ​ກີບ ຫຼື ໝື່ນ​ໜຶ່ງ 30.000 ກີບ ສະ­ເລ່ຍ​ລາຍ​ຮັບ 100.000-150.000 ກີບ​ຕໍ່​ວັນ ຫຼື 3 ລ້ານ​ກີບ​ຕໍ່​ເດືອນ ການ​ປູກ​ຜັກ​ດັ່ງ­ກ່າວ ແມ່ນ​ປູກ​ຄື​ກັບ​ການ​ດຳ­ນາ ແລະ ການ​ບົວ­ລະ­ບັດ​ຮັກ­ສາ​ກໍ​ບໍ່​ຍາກ ເພາະ​ບໍ່​ໄດ້​ໃສ່​ຝຸ່ນ ຫຼື ສານ​ເຄ​ມີ​ໃດໆ ໝາຍ​ຄວາມ​ວ່າ​ປູກ​ລົງ​ດິນ​ແລ້ວ ມີ​ແຕ່​ລໍ­ຖ້າ​ຜັກ​ໃຫຍ່ ກໍ​ສາ­ມາດ​ເກັບ​ມາ​ຈຳ­ໜ່າຍ​ໄດ້ ເຊິ່ງ​ການ​ບໍ­ລິ­ໂພກ ແມ່ນ​ລວກ​ກິນ​ກັບ​ປົ່ນ ຈີ່​ຕຳ​ແຈ່ວ ແລະ ອື່ນໆ.

ຂ່າວທີ່ກ່ຽວຂ້ອງ