ອິດ​ສະ​ຣາ​ແອນ​ເລີ່ມ​ກໍ່ສ້າງ​ກຳແພງ​ກັ້ນ​ເຂດ​ກາ​ຊາ

977 07 ກ.ພ. 2019 ຂ່າວຕ່າງປະເທດ
ອິດ​ສະ​ຣາ​ແອນ​ເລີ່ມ​ກໍ່ສ້າງ​ກຳແພງ​ກັ້ນ​ເຂດ​ກາ​ຊາ

      ທ່ານ ເບນ​ຈາ​ມິນ ເນ​ຕັນ​ຢາ​ຮູ ນາຍົກລັດຖະມົນຕີ​ອິ​ສຣາ​ແອນ ກ່າວ​ເຕືອນ​ອອກ​ມາ​ເມື່ອ​ວັນ​ທີ 3 ກຸມພາ​ນີ້ ວ່າ​ຖ້າ​ຫາ​ກວ່າ​ການເຄື່ອນໄຫວ​ປະ​ຖ້ວງ​ຢູ່​ເຂດ​ກາ​ຊາ​ຍັງ​ມີ​ຢູ່ ອິດ​ສະ​ຣາ​ແອນ ກໍ​ຈະ​ໃຊ້​ກຳລັງ​ອາວຸດ​ໂດຍ​ບໍ່​ລັ່ງເລ​ໃຈ.

    ທ່ານ ເນ​ຕັນ​ຢາ​ຮູ ໄດ້​ໃຫ້​ຄວາມ​ຄິດ​ເຫັນ​ດັ່ງກ່າວ​ໃນ​ກອງ​ປະຊຸມ​ສະໄໝ​ສາມັນ ຂອງ​ຄະນະ​ລັດຖະບານ ທີ່​ຈັດ​ຂຶ້ນ​ໃນ​ມື້​ດຽວ​ກັນ ໂດຍ​ທ່ານ​ຍັງ​ກ່າວ​ຕື່ມ​ວ່າ ອິດ​ສະ​ຣາ​ແອນ​ໄດ້​ເລີ່ມ​ກໍ່ສ້າງ​ກຳແພງ​ກັ້ນ​ຊາຍ​ແດນ​ຕາມ​ເຂດ​ກາ​ຊາ ເພື່ອ​ສະກັດ​ກັ້ນ​ບໍ່​ໃຫ້​ຜູ້​ກໍ່​ການ​ຮ້າຍ​ທີ່​ມາ​ຈາກ​ເຂດ​ກາ​ຊາ ຂ້າມ​ຊາຍ​ແດນ​ເຂົ້າ​ສູ່​ອິ​ສຣາ​ແອນ.
    ວັນ​ທີ 4 ກຸມພາ​ນີ້ ກະຊວງ​ປ້ອງ​ກັນ​ປະເທດ​ອິດ​ສະ​ຣາ​ແອນ ກໍ​ໄດ້​ອອກ​ຖະແຫຼງການ​ລະບຸ​ວ່າ ອິດ​ສະ​ຣາ​ແອນ ໄດ້​ເລີ່ມ​ກໍ່ສ້າງ​ກຳແພງ​ກັ້ນ​ຕາມ​ຊາຍ​ແດນ​ລະຫວ່າງ​ອິດ​ສະ​ຣາ​ແອນ ກັບ​ເຂດ​ກາ​ຊາ. ກຳແພງ​ກັ້ນ ມີ​ຄວາມ​ຍາວ​ຍາມ​ປະມານ 65 ກິໂລແມັດ ສູງ 6 ແມັດ ມີ​ນ້ຳໜັກ​ປະມານ 2 ໝື່ນ​ໂຕນ

    ແຫຼມ​ກາ​ຊາ ເປັນ​ເຂດ​ທີ່​ຕ້ອງ​ໄດ້​ປະ​ເຊີນ​ຄວາມ​ສັບສົນ​ວຸ້ນວາຍ​ແກ່ຍາວ ຍ້ອນ​ອິດ​ສະ​ຣາ​ແອນ​ປິດ​ລ້ອມ​ເປັນ​ເວລາ​ຫຼາຍ​ປີ ແບ່ງ​ແຍກ​ລະຫວ່າງ​ຝ່າຍ​ການເມືອງ​ຕ່າງໆ ໃນ​ປາ​ແລັດ​ສະ​ຕິນ ແລະ​ກໍ່​ເຫດ​ຮຸນ​ແຮງ​ເຮັດ​ໃຫ້​ເກີດ​ມີ​ຜູ້​ບາດເຈັບ​ລົ້ມ​ຕາຍ​ຈຳນວນ​ຫຼາຍ.

    ສະຖິຕິ ຊີ້​ໃຫ້​ເຫັນ​ວ່າ ມີ​ຊາວ​ປາ​ແລັດ​ສະ​ຕິນ ເສຍ​ຊີວິດ​ປະມານ 240 ຄົນ ນັບ​ແຕ່​ເກີດ​ມີ​ການ​ປະ​ທ້ວງ​ຢູ່​ລຽບ​ຕາມ​ແຫຼມ​ກາ​ຊາ ຊຶ່ງ​ເລີ່ມ​ຂຶ້ນ​ມາ​ຕັ້ງແຕ່​ວັນ​ທີ 30 ມີນາ​ປີ​ກາຍ ເພື່ອ​ສະເໜີ​ໃຫ້​ຝ່າຍ​ອິດ​ສະ​ຣາ​ແອນ ອະນຸຍາດ​ໃຫ້​ຜູ້​ລີ້​ໄພ​ຊາວ​ປາ​ແລັດ​ສະ​ຕິນ ໄດ້​ກັບ​ເມືອ​ເຮືອນ. ໃນ​ໄລຍະ​ເວລາ​ດຽວ​ກັນ ຝ່າຍ​ອິດ​ສະ​ຣາ​ແອນ ມີ​ພົນທະຫານ​ເສຍ​ຊີວິດ ຈາກ​ເຫດການ​ດັ່ງກ່າວ.

 

ຂ່າວທີ່ກ່ຽວຂ້ອງ