ຂ່າວຫຼ້າສຸດ

ປະລິມານ​ການ​ຜະລິດ​ເຫຼັກ​ກ້າ​ທົ່ວ​ໂລກ ເພີ່ມ​ຂຶ້ນ 4,6% ໃນ​ປີ 2018

1.017 07 ກ.ພ. 2019 ຂ່າວຕ່າງປະເທດ
ປະລິມານ​ການ​ຜະລິດ​ເຫຼັກ​ກ້າ​ທົ່ວ​ໂລກ ເພີ່ມ​ຂຶ້ນ 4,6% ໃນ​ປີ 2018

   ຂ່າວສານ​ຢອນ​ຮັບ ຂອງ ສ ເກົາຫຼີ ລາຍ​ງານ​ເມື່ອ​ວັນ​ທີ 4 ກຸມພາ​ນີ້​ວ່າ ສະມາຄົມ​ເຫຼັກ​ກ້າ​ໂລກ ແຈ້ງ​ໃຫ້​ຮູ້​ວ່າ ຍອດ​ຜະ​ລິ​ມານ​ການ​ຜະລິດ​ເຫຼັກ​ກ້າ​ໃນ​ທົ່ວ​ໂລກ ບັນລຸ  1,88 ຕື້ ໂຕນ ໃນ​ປີ 2018 ເພີ່ມ​ຂຶ້ນ 4,6% ເມື່ອ​ທຽບໃສ່​ປີ 2017.

    ໃນ​ນັ້ນ ຈີນ​ຍັງ​ສືບຕໍ່​ຢູ່​ໃນ​ອັນ​ດັບ​ແຖວ​ໜ້າ ໂດຍ​ຜະລິດ​ເຫຼັກ​ກ້າ​ໄດ້ 928,3 ລ້ານ​ໂຕນ ໃນ​ປີ 2018 (ເພີ່ມ​ຂຶ້ນ 6,6%) ແລະ ກວມ​ເອົາ​ມາດຕາ​ສ່ວນ​ນ້ຳໜັກ 51,3% ຂອງ​ຍອດ​ປະລິມານ​ການ ຜະລິດ​ເຫຼັກ​ກ້າ​ທົ່ວ​ໂລກ ເພີ່ມ​ຂຶ້ນ​ໜ້ອຍ​ໜຶ່ງ​ເມື່ອ​ທຽບໃສ່​ຕົວ​ເລກ  50,3% ຂອງ​ປີ 2017. ຮອງ​ລົງ​ມາ​ຈາກ​ຈີນ ຕາມ​ລຳດັບ​ກໍ​ແມ່ນ ອິນ​ເດຍ (106,5 ລ້ານ​ໂຕນ) ຍີ່ປຸ່ນ  (104,23 ລ້ານ​ໂຕນ) ແລະ ສ ອາ​ເມ​ຣິ​ກາ (86,7 ລ້ານ​ໂຕນ). ສຳລັບ ສ ເກົາຫຼີ ຜະລິດ​ເຫຼັກ​ກ້າ​ໄດ້  72,5 ລ້ານ​ໂຕນ ໃນ​ປີ 2018 ເພີ່ມ​ຂຶ້ນ 2% ແລະ​ກວມ​ເອົາ 4% ຂອງ​ຍອດ​ປະລິມານ​ການ​ຜະລິດ​ເຫຼັກ​ກ້າ​ທົ່ວ​ໂລກ.

    ໃນ​ບົດ​ລາຍ​ງານ​ທີ່​ໄດ້​ເປີດເຜີຍ ຢູ່​ໃນ​ເວທີ​ປາ​ໄສ​ເຫຼັກ​ກ້າ​ທົ່ວ​ໂລກ ຊຶ່ງ​ຈັດ​ຂຶ້ນ​ເມື່ອ​ເດືອນ​ກັນຍາ ປີ 2018 ນັ້ນ ອົງການ​ຮ່ວມ​ມື ແລະ​ພັດທະນາ​ເສດຖະກິດ (OECD) ໃຫ້​ຮູ້​ວ່າ ການ​ຜະລິດ​ເຫຼັກ​ກ້າ ຂອງ​ໂລກ ໄດ້​ຫຼຸດ​ລົງ​ເປັນ​ເວລາ​ສອງ​ປີ​ຕິດຕໍ່​ກັນ ແຕ່​ກໍ​ຍັງ​ບໍ່​ພໍ​ເພື່ອ​ແກ້​ໄຂ​ສະພາບ​ແຫຼ່ງ​ສະໜອງ ມີ​ເຫຼືອ​ເຟືອ. OECD ໃຫ້ການ​ຄາດ​ຄະເນ​ວ່າ ນັບ​ແຕ່​ປີ 2018 ຮອດ​ປີ 2020 ກຳລັງ​ການ​ຜະລິດ​ເຫຼັກ ກ້າ​ທົ່ວ​ໂລກ ຈະ​ເພີ່ມ​ຂຶ້ນ​ຕື່ມ 52 ລ້ານ​ໂຕນ ຍ້ອນ​ວ່າ​ຈະ​ມີ​ຫຼາຍ​ປະເທດ ເປີດ​ກວ້າງ​ກຳລັງ ຄວາມ​ສາມາດ​ໃນ​ການ​ຜະລິດ.

 

ຂ່າວທີ່ກ່ຽວຂ້ອງ