ລາວ-ໄທ ຮ່ວມມືພັດທະນາ ອຸດສາຫະກຳການກະເສດຄົບວົງຈອນ

554 07 ກ.ພ. 2019 ຂ່າວໜ້າ​ໜຶ່ງ
ລາວ-ໄທ ຮ່ວມມືພັດທະນາ ອຸດສາຫະກຳການກະເສດຄົບວົງຈອນ

    ພິ­ທີ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ ໂຄງ­ການ​ຮ່ວມ​ມື​ພັດ­ທະ­ນາ​ອຸດ­ສາ­ຫະ­ກຳ​ຄົບ​ວົງ​ຈອນ ລາວ-ໄທ ຈັດ​ຂຶ້ນ​ວັນ​ທີ 2 ກຸມ­ພາ 2019 ຢູ່​ນະ­ຄອນ­ຫຼວງ​ວຽງ​ຈັນ ລະ­ຫວ່າງ​ທ່ານ ຂັນ​ທອງ ສີ​ປະ­ເສີດ ຜູ້​ອຳ­ນວຍ​ບໍ­ລິ­ສັດ ເຄ​ທີ​ຟາມ ຂາ​ອອກ-ຂາ​ເຂົ້າ ຈຳ­ກັດ​ຜູ້​ດຽວ ແລະ ທ່ານ ທຳ​ມະ​ລັດ ການ​ຈະ​ນະ ປະ­ທານ​ບໍ­ລິ­ສັດ ເອ​ສ​ເອັມ​ອີ​ຊັບ​ພຣາຍ​ແອນ​ເດ​ເວ​ລອປ​ເມັ້ນ ຈຳ­ກັດ ໂດຍ​ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ການ​ຮ່ວມ​ມື​ຄັ້ງ​ນີ້ ເປັນ​ການ​ຮ່ວມ​ມື​ທາງ​ທຸ­ລະ​ກິດ​ລະ­ຫວ່າງ​ບໍ­ລິ­ສັດ ເອ­ກະ​ຊົນ ລາວ-ໄທ ເພື່ອ​ສົ່ງ­ເສີມ ແລະ ເພີ່ມ​ມູນ​ຄ່າ​ການ​ຄ້າ-ຂາຍ​ຊາຍ​ແດນ​ລະ­ຫວ່າງ​ສອງ​ປະ­ເທດ ເຊິ່ງ​ເປັນ​ພື້ນ­ຖານ​ເສດ​ທະ​ກິດ​ໃນ​ປະ­ຊາ​ຄົມ​ເສດ­ຖະ­ກິດ​ອາ​ຊຽນ (AEC) ໃຫ້​ເຂັ້ມ­ແຂງ ສົ່ງ­ເສີມ​ການ​ໃຊ້​ຂໍ້​ມູນ​ວິ­ໄຈ​ທາງ​ວິ­ຊາ​ການ​ອຸດ­ສາ­ຫະ­ກຳ ກະ­ສິ­ກຳ ຈາກ​ປະ­ເທດ​ໄທ ຈີນ ຍີ່­ປຸ່ນ ເອີ​ຣົບ ມາ​ພັດ­ທະ­ນາ​ອຸດ­ສາ­ຫະ­ກຳ ກະ­ສິ­ກຳ ໃນ​ບໍ­ລິ­ສັດ KT FARM ສົ່ງ­ເສີມ​ພື້ນ​ທີ່​ປະ­ເທດ ສປປ ລາວ ແລະ ໄທ ເປັນ​ຖານ​ຜະ­ລິດ​ສິນ­ຄ້າ​ອຸດ­ສາ­ຫະ­ກຳ ກະ­ສິ­ກຳ ແລະ ແປ​ຮູບ​ຜົນ​ຜະ­ລິດ​ຄົບ​ວົງ​ຈອນ ພ້ອມ​ທັງ​ສົ່ງ­ເສີມ​ໃຫ້​ສອງ​ປະ­ເທດ ເປັນ​ເສັ້ນ­ທາງ​ຜ່ານ​ຂອງ​ສິນ­ຄ້າ​ໄປ​ຍັງ​ປະ­ເທດ​ທີ 3 ເຊັ່ນ: ເອີ​ຣົບ ຈີນ ຍີ່­ປຸ່ນ ເພື່ອ​ເພີ່ມ​ມູນ​ຄ່າ​ທາງ​ເສດ​ທະ​ກິດ ໃນ AEC ສົ່ງ­ເສີມ​ການ​ໃຊ້​ປະ­ໂຫຍດ​ຮ່ວມ​ມື​ກັບ​ເຄືອ​ຄ່າຍ​ໂຄງ­ການ one belt one road ຂອງ​ປະ­ເທດ​ຈີນ.

    ຂອບ​ການ​ຮ່ວມ​ມື​ແມ່ນ​ກ່ຽວ​ກັບ​ອຸດ­ສາ­ຫະ­ກຳ ກະ­ສິ­ກຳ​ແບບ​ຄົບ​ວົງ​ຈອນ ທີ່​ມີ​ຄວາມ​ຍືນ​ຍົງ ແລະ ກ່ຽວ​ກັບ​ພືດ​ພະ­ລັງ­ງານ ພະ­ລັງ­ງານ​ທົດ​ແທນ​ຕ່າງໆ ໂດຍ​ສອງ​ຝ່າຍ​ຕົກ­ລົງ​ກຳ­ນົດ​ຫົວ­ຂໍ້​ທຸ­ລະ​ກິດ​ໄວ້ ຄື: ອຸດ­ສາ­ຫະ­ກຳ​ຟາມ​ລ້ຽງ­ສັດ ເຊັ່ນ: ໝູ ໄກ່ ງົວ ແລະ ສັດ​ນ້ຳ ອຸດ­ສາ­ຫະ­ກຳ​ອາ­ຫານ​ສັດ​ສຳ­ເລັດ​ຮູບ ອຸດ­ສາ­ຫະ­ກຳ​ຟາມ​ລ້ຽງ­ສັດ ເຄືອ​ຄ່າຍ​ກະ­ສິ­ກຳ ອຸດ­ສາ­ຫະ­ກຳ​ການ​ຄ້າ ຈຳ­ໜ່າຍ​ຊີ້ນ​ສັດ ແລະ ຊິ້ນ​ສ່ວນ​ສັດ ອຸດ­ສາ­ຫະ­ກຳ​ປຸງ​ແຕ່ງ​ສັດ ແລະ ຊີ້ນ​ສ່ວນ​ສັດ ຂະ​ບວນ​ການ​ທີ່​ໃຊ້​ຄວາມ​ເຢັນ ແລະ ຂະ​ບວນ​ການ​ທີ່​ໃຊ້​ຄວາມ​ຮ້ອນ ອຸດ­ສາ­ຫະ­ກຳ​ອາ­ຫານ​ເສີມ ຢາ​ປົວ​ພະ­ຍາດ ແລະ ວັກ​ແຊັງ​ສຳ­ລັບ​ສັດ ອຸດ­ສາ­ຫະ­ກຳ​ການ​ປູກ ແລະ ປຸງ​ແຕ່ງ​ພືດ​ອາ­ຫານ​ສັດ ເຊັ່ນ: ສາ­ລີ ຖົ່ວ­ເຫຼືອງ ແລະ ມັນ­ຕົ້ນ ອຸດ­ສາ­ຫະ­ກຳ​ກະ­ສິ­ກຳ​ອິນ​ຊີ​ແບບ​ມາດ­ຕະ­ຖານ​ສາ­ກົນ ທີ່​ມີ​ການ​ຮັບ­ປະ­ກັນ​ຄຸນ​ນະ​ພາບ ອຸດ­ສາ­ຫະ­ກຳ​ປຸງ​ແຕ່ງ​ຜະ­ລິດ​ສິນ­ຄ້າ​ຈາກ​ກະ­ສິ­ກຳ​ອິນ​ຊີ ອຸດ­ສາ­ຫະ­ກຳ​ຜະ­ລິດ​ຝຸ່ນ​ອິນ​ຊີ​ຈາກ​ມູນ​ສັດ ອຸດ­ສາ­ຫະ­ກຳ​ປູກ​ພືດ​ສະ​ໝຸນ​ໄພ ແລະ ການ​ເກັບ​ກ່ຽວ​ອຸດ­ສາ­ຫະ­ກຳ​ການ​ປຸງ​ແຕ່ງ​ສະ­ກັດ​ຕົວ​ຢາ​ພືດ​ສະ​ໝຸນ​ໄພ​ເຮັດ​ຢາ ອາ­ຫານ​ເສີມ ເຄື່ອງ​ສຳ­ອາງ ເຄື່ອງ​ຫອມ ແລະ ເຄື່ອງ​ເບິ່ງ­ແຍງ​ບຳ­ລຸງ​ຜິວ​ພັນ ອຸດ­ສາ­ຫະ­ກຳ​ປິ່ນ­ປົວ ສູນ​ສົ່ງ­ເສີມ​ສຸ­ຂະ­ພາບ ແລະ ແພດ​ທາງ​ເລືອກ​ໃຊ້​ສະ​ໝຸນ​ໄພ ແລະ ທຳ​ມະ​ຊາດ​ບຳ­ບັດ ອຸດ­ສາ­ຫະ­ກຳ​ການ­ທ່ອງ­ທ່ຽວ​ຮູບ​ແບບ​ຮັກ­ສາ​ສຸ­ຂະ­ພາບ ແລະ ສະ​ໝຸນ​ໄພ ເຊັ່ນ: ສະ​ປາ ແລະ ການ​ນວດ ອຸດ­ສາ­ຫະ­ກຳ​ການ­ທ່ອງ­ທ່ຽວ​ຮູບ​ແບບ​ກະ­ສິ­ກຳ​ອິນ​ຊີ ອາ­ຫານ​ຊີ­ວະ​ພາບ​ອະ­ນາ­ໄມ ອຸດ­ສາ­ຫະ­ກຳ​ການ­ທ່ອງ­ທ່ຽວ​ຮູບ​ແບບ​ນິ­ເວດ ແລະ ສິ່ງ­ແວ­ດລ້ອມ​ແບບ​ຍືນ​ຍົງ ອຸດ­ສາ­ຫະ­ກຳ​ການ­ຄັງ​ສິນ­ຄ້າ ການ​ຂົນ­ສົ່ງ ການ​ເກັບ ແລະ ກະ­ຈາຍ​ສິນ­ຄ້າ​ຈາກ​ອຸດ­ສາ­ຫະ­ກຳ ກະ­ສິ­ກຳ​ອາ­ຫານ​ພາຍ​ໃນ ແລະ ຕ່າງ­ປະ­ເທດ ອຸດ­ສາ­ຫະ­ກຳ​ສື່​ໂຄ­ສະ­ນາ​ປະ­ຊາ­ສຳ­ພັນ ແລະ ການ​ບໍ­ລິ­ການ ອຸດ­ສາ­ຫະ­ກຳ​ເຄື່ອງ­ມື ເຄື່ອງ​ຈັກ ລະ­ບົບ​ອັດ­ຕະ­ໂນ­ມັດ​ດ້ານ​ອຸດ­ສາ­ຫະ­ກຳ​ກະ­ສິ­ກຳ ແລະ ວິ​ສາ​ຫະ​ກິດ​ຂະ­ໜາດ​ກາງ ແລະ ຂະ­ໜາດ​ນ້ອຍ ເຊິ່ງ​ໂຄງ­ການ​ນີ້​ມີ​ໄລ­ຍະ​ຮ່ວມ​ມື​ກັນ 7 ປີ.

ຂ່າວທີ່ກ່ຽວຂ້ອງ