ສົ່ງເສີມສິນຄ້າທີ່ເປັນເອກະລັກຂອງທ້ອງຖິ່ນໃຫ້ມີຄວາມຍືນຍົງ

331 07 ກ.ພ. 2019 ຂ່າວໜ້າ​ໜຶ່ງ
ສົ່ງເສີມສິນຄ້າທີ່ເປັນເອກະລັກຂອງທ້ອງຖິ່ນໃຫ້ມີຄວາມຍືນຍົງ

    ປັດ­ຈຸ­ບັນ​ພັກ ແລະ ລັດ­ຖະ­ບານ ໄດ້​ເອົາ­ໃຈ­ໃສ່​ຊຸກ­ຍູ້-ສົ່ງ­ເສີມ​ສິນ­ຄ້າ​ທີ່​ເກີດ​ຈາກ​ພູມ​ປັນ­ຍາ​ທ້ອງ­ຖິ່ນ ຈາກ​ຫົວ­ຄິດ​ປະ­ດິດ​ສ້າງ​ຂອງ​ຄົນ​ລາວ ຄວາມ​ດຸ­ໝັ່ນ​ຂະ­ຫຍັນ​ພຽນ​ໃນ​ການ​ຄົ້ນ­ຄວ້າ ປຸງ​ແຕ່ງ ຜະ­ລິດ​ເປັນ​ເຄື່ອງ​ອຸ­ປະ­ໂພກ-ບໍ­ລິ­ໂພກ​ທີ່​ເປັນ​ເອ­ກະ­ລັກ​ຂອງ​ທ້ອງ­ຖິ່ນ ແຕ່​ລະ​ປີ ຫຼື ເທ​ສະ­ການ​ງານ​ບຸນ​ປະ­ເພ­ນີ​ຕ່າງໆ ກໍ​ຈະ​ມີ​ງານ​ວາງ­ສະ­ແດງ ແລະ ຈຳ­ໜ່າຍ​ສິນ­ຄ້າ ເພື່ອ​ເປັນ​ການ​ແລກ­ປ່ຽນ ແລະ ສົ່ງ­ເສີມ​ການ​ຜະ­ລິດ​ເປັນ​ສິນ­ຄ້າ​ໃຫ້​ມີ​ຄວາມ​ຍືນ​ຍົງ ກ້າວ​ໄປ​ເຖິງ​ການ​ສ້າງ​ສິນ­ຄ້າ​ທີ່​ເປັນ​ເອ­ກະ­ລັກ ສິນ­ຄ້າ​ແຫ່ງ​ພູມ​ປັນ­ຍາ​ທີ່​ສືບ​ທອດ​ມູນ­ເຊື້ອ​ຈາກ​ການ​ຜະ­ລິດ​ຈາກ​ຄົນ​ຮຸ່ນ​ເກົ່າ​ສູ່​ຄົນ​ຮຸ່ນ​ໃໝ່ ເຮັດ​ໃຫ້​ມີ​ຜູ້​ປະ­ກອບ​ການ​ໃນ​ທົ່ວ​ປະ­ເທດ​ເຂົ້າ​ຮ່ວມ​ເປັນ​ຈຳ­ນວນ​ຫຼວງ­ຫຼາຍ.

    ທ່ານ​ນາງ ອ່ອນ​ແກ້ວ ຕາງ­ໜ້າ​ກຸ່ມ​ຜະ­ລິດ​ໄຄ​ແຜ່ນ ບ້ານ​ລີ ເມືອງ​ນ້ຳ​ບາກ ແຂວງ​ຫຼວງ​ພະ​ບາງ ໃຫ້​ສຳ­ພາດ​ໃນ​ໂອ­ກາດ​ເຂົ້າ​ຮ່ວມ​ງານ​ເທ​ສະ­ການ​ອາ­ຫານ​ລາວ ຄັ້ງ​ທີ 14 ປີ 2019 ວ່າ: ການ​ເຂົ້າ​ຮ່ວມ​ງານ​ຄັ້ງ​ນີ້ ແມ່ນ​ເປັນ​ຄັ້ງ​ທີ 3 ໂດຍ​ໄດ້​ນຳ​ເອົາ​ສິນ­ຄ້າ​ທີ່​ເປັນ​ເອ­ກະ­ລັກ​ຂອງ​ບ້ານ​ມາ​ວາງ​ຂາຍ ເປັນ­ຕົ້ນ ໄຄ​ແຜ່ນ ແຈ່ວ​ບອງ ແລະ ອາ­ຫານ​ພື້ນ​ບ້ານ​ຈຳ­ນວນ​ໜຶ່ງ ມູນ​ຄ່າ​ປະ­ມານ 10 ລ້ານ​ກີບ ການ​ເຂົ້າ​ຮ່ວມ​ແຕ່​ລະ​ຄັ້ງ​ແມ່ນ​ໄດ້​ຂາຍ​ດີ​ສົມ­ຄວນ ແລະ ປີ​ນີ້​ບັນ­ດາ​ສິນ­ຄ້າ​ທີ່​ນຳ​ມາ ກໍ​ໄດ້​ຮັບ​ຄວາມ​ນິ­ຍົມ​ຊົມ​ຊອບ​ຈາກ​ລູກ​ຄ້າ​ດີ​ເຊັ່ນ​ດຽວ​ກັນ.

    ສຳ­ລັບ​ການ​ຜະ­ລິດ​ໄຄ​ແຜ່ນ ແມ່ນ​ໄດ້​ຜະ­ລິດ​ເປັນ​ກຸ່ມ​ປະ­ກອບ​ມີ 10 ຄອບ­ຄົວ ເມື່ອ​ກ່ອນ​ແມ່ນ​ຜະ­ລິດ​ດ້ວຍ​ມື​ທຸກ​ຢ່າງ​ນັບ​ທັງ​ຄັດ​ເລືອກ ຕາກ­ແດດ ການ​ຫຸ້ມ​ຫໍ່​ຕ່າງໆ ການ​ຕາກ​ແມ່ນ​ອາ­ໄສ​ແສງ​ແດດ​ພຽງ​ຢ່າງ​ດຽວ ຈຶ່ງ​ເຮັດ​ໃຫ້​ໄຄ​ແຜ່ນ​ບາງ​ຄັ້ງ​ບໍ່​ສາ­ມາດ​ຕອບ​ສະ­ໜອງ​ກັບ​ຄວາມ​ຕ້ອງ­ການ​ຂອງ​ລູກ​ຄ້າ ມາ​ຮອດ​ປີ 2016 ຈຶ່ງ​ໄດ້​ມີ​ໂຄງ­ການ​ຈາກ​ຕ່າງ­ປະ­ເທດ​ເຂົ້າ​ມາ​ຊ່ວຍ­ເຫຼືອ​ດ້ານ​ເຄື່ອງ­ມື​ເຊັ່ນ: ຈັກ​ລ້າງ​ໄຄ ໂຮງ​ອົບ​ທີ່​ທັນ​ສະ­ໄໝ ຂ້າ​ເຊື້ອ​ແຜ່ນ​ທີ່​ນຳ​ມາ​ຫຸ້ມ​ຫໍ່ ຈຶ່ງ​ເຮັດ​ໃຫ້​ສິນ­ຄ້າ​ໄດ້​ຮັບ​ຄວາມ​ນິ­ຍົມ​ຫຼາຍ​ຂຶ້ນ ຜະ­ລິດ​ໄດ້​ໄວ ສາ­ມາດ​ຕອບ​ສະ­ໜອງ​ຄວາມ​ຕ້ອງ­ການ​ລູກ​ຄ້າ ປັດ­ຈຸ­ບັນ​ແມ່ນ​ຂາຍ​ສົ່ງ-ຍ່ອຍ​ພາຍ​ໃນ​ແຂວງ ຕ່າງ​ແຂວງ ບາງ​ຄັ້ງ​ກໍ​ສົ່ງ​ໄປ​ຕ່າງ­ປະ­ເທດ ການ​ຜະ­ລິດ​ໄຄ​ແຜ່ນ​ຂາຍ​ນີ້ ສາ­ມາດ​ສ້າງ​ລາຍ​ຮັບ​ໃຫ້​ສະ­ມາ­ຊິກ​ໄດ້ 3 ລ້ານ​ກີບ​ຕໍ່​ເດືອນ.

ຂ່າວທີ່ກ່ຽວຂ້ອງ