ສັງທອງ ເປີດບໍລິການຜ່ານປະຕູດຽວ

551 07 ກ.ພ. 2019 ຂ່າວໜ້າ​ໜຶ່ງ

    ພິ­ທີ​ເປີດ​ບໍ­ລິ­ການ​ຜ່ານ​ປະ­ຕູ​ດຽວ​ຂອງ​ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 5 ກຸມ­ພາ 2019 ຢູ່​ເມືອງ​ດັ່ງ­ກ່າວ ໂດຍ​ມີ​ທ່ານ ດາວ​ເພັດ ອາ​ລຸນ ເຈົ້າ­ເມືອງ​ສັງ​ທອງ ທ່ານ ບຸນ​ໜາ ຜາ​ທຸມ​ມະ​ວົງ ຫົວ­ໜ້າ​ພະ​ແນກ​ພາຍ​ໃນ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຫ້ອງ­ການ​ບໍ­ລິ­ການ​ຜ່ານ​ປະ­ຕູ​ດຽວ​ຢູ່​ເມືອງ​ສັງ​ທອງ ປະ­ກອບ​ມີ 8 ຫ້ອງ­ການ ຄື: ຫ້ອງ​ວ່າ­ການ​ປົກ­ຄອງ​ເມືອງ​ສັງ​ທອງ ຫ້ອງ­ການ​ພາຍ​ໃນ ຫ້ອງ­ການ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ຫ້ອງ­ການ​ກະ­ສິ­ກຳ ແລະ ປ່າ­ໄມ້ ຫ້ອງ­ການ​ໂຍ­ທາ​ທິ​ການ ແລະ ຂົນ­ສົ່ງ ຫ້ອງ­ການ​ອຸດ­ສາ­ຫະ­ກຳ ແລະ ການ​ຄ້າ ຫ້ອງ­ການ​ພະ­ລັງ­ງານ ແລະ ບໍ່​ແຮ່ ແລະ ຫ້ອງ­ການ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ.

    ຫ້ອງ­ການ​ບໍ­ລິ­ການ​ຜ່ານ​ປະ­ຕູ​ດຽວ​ຢູ່​ເມືອງ​ສັງ​ທອງ ໄດ້​ກຳ­ນົດ​ເອົາ 20 ໜ້າ​ວຽກ ເພື່ອ​ຈັດ​ຕັ້ງ​ປະ­ຕິ­ບັດ​ການ​ແກ້​ໄຂ​ວຽກ​ງານ​ໃຫ້​ການ­ຈັດ­ຕັ້ງ ແລະ ປະ­ຊາ­ຊົນ​ທີ່­ຢູ່​ຂອບ​ເຂດ​ສິດ​ຂອງ​ອົງ­ການ​ບໍ­ລິ­ຫານ​ລັດ ໂດຍ​ສະ­ເພາະ ການ​ຮັບ​ເອົາ​ຄຳ​ສະ­ເໜີ ແລະ ເອ­ກະ­ສານ​ຂອງ​ອົງ​ການ­ຈັດ­ຕັ້ງ ແລະ ປະ­ຊາ­ຊົນ​ໃຫ້​ມີ​ຄວາມ​ຖືກ­ຕ້ອງ ຄົບ​ຖ້ວນ​ຕາມ​ລະ­ບຽບ​ຫຼັກ­ການ ແນ­ໃສ່​ເຮັດ​ໃຫ້­ການ​ປັບ­ປຸງ ແກ້​ໄຂ ແລະ ແບບ­ແຜນ​ວິ­ທີ​ການ​ເຮັດ​ວຽກ​ໃຫ້​ມີ​ຄວາມ​ສະ­ດວກ ວ່ອງ­ໄວ ແລະ ມີ​ຄວາມ​ໂປ່ງ​ໃສ​ຫຼາຍ​ຂຶ້ນ ຫຼຸດ­ຜ່ອນ​ບັນ­ຫາ​ຄວາມ​ຫຍຸ້ງ­ຍາກ​ໃຫ້​ປະ­ຊາ­ຊົນ ແລະ ອົງ​ການ­ຈັດ­ຕັ້ງ​ຜູ້​ທີ່​ມາ​ພົວ­ພັນ​ວຽກ ແກ້​ໄຂ​ບັນ­ຫາ​ປາ­ກົດ­ການ​ຫຍໍ້­ທໍ້​ທີ່​ເກີດ​ຂຶ້ນ​ໃນ​ຖັນ​ແຖວ​ພະ­ນັກ­ງານ-ລັດ­ຖະ­ກອນ ແລະ ເພີ່ມ​ທະ­ວີ​ຄວາມ​ສັກ­ສິດ​ໃນ​ການ­ເຄື່ອນ­ໄຫວ​ວຽກ​ງານ​ຂອງ​ອົງ­ການ​ປົກ­ຄອງ​ເມືອງ ໃຫ້​ມີ​ປະ​ສິດ­ທິ​ຜົນ​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ