ຂ່າວຫຼ້າສຸດ

ສີໂຄດຕະບອງ ປູກພືດຜັກໄດ້ 70% ຂອງແຜນການ

361 07 ກ.ພ. 2019 ຂ່າວໜ້າ​ໜຶ່ງ
ສີໂຄດຕະບອງ ປູກພືດຜັກໄດ້ 70% ຂອງແຜນການ

    ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ມີ 6 ບ້ານ​ມີ​ເນື້ອ­ທີ່​ການ​ຜະ­ລິດ​ກະ­ສິ­ກຳ​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ ເນື້ອ­ທີ່ 272 ເຮັກ­ຕາ 257 ຄອບ­ຄົວ ໃນ​ນີ້​ເສຍ​ຫາຍ​ຕົວ​ຈິງ 147 ເຮັກ­ຕາ ແລະ ເນື້ອ­ທີ່​ນາ 54 ເຮັກ­ຕາ ພືດ​ຜັກ 67,7 ເຮັກ­ຕາ ລວມ 209 ຄອບ­ຄົວ.

    ທ່ານ ຄຳ​ມະ­ນີ ຊົງ​ວຽງ​ໄຊ ຮອງ​ຫົວ­ໜ້າ​ຫ້ອງ­ການ​ກະ­ສິ­ກຳ ແລະ ປ່າ­ໄມ້ ເມືອງ​ສີ​ໂຄດ​ຕະ­ບອງ ກ່າວ ວັນ​ທີ 5 ກຸມ­ພາ 2019 ວ່າ: ໂດຍ​ປະ­ຕິ­ບັດ​ຕາມ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ລະ­ດູ​ການ​ຜະ­ລິດ ໂດຍ​ສະ­ເພາະ ການ​ຄ້ຳ­ປະ­ກັນ​ສະ­ບຽງ​ອາ­ຫານ ເພື່ອ​ຟື້ນ​ຟູ​ຫຼັງ​ນ້ຳ​ຖ້ວມ ເມືອງ​ສີ​ໂຄດ​ຕະ­ບອງ ໄດ້​ສຸມ​ໃສ່​ອະ­ນາ­ໄມ​ລວງ​ຄອງ­ເໝືອງ​ຊົນ­ລະ­ປະ­ທານ 3 ສະ­ຖາ­ນີ ເພື່ອ​ຮອງ​ຮັບ​ການ​ສະ­ໜອງ​ນ້ຳ​ໃຫ້​ເນື້ອ­ທີ່​ການ​ຜະ­ລິດ​ລະ­ດູ­ແລ້ງ ໃນ​ນີ້ ແຜນ​ສູ້​ຊົນ​ການ​ປູກ​ເຂົ້າ­ນາ­ແຊງ 200 ເຮັກ­ຕາ ປັດ­ຈຸ­ບັນ​ປັກ​ດຳ​ໄດ້ 95 ເຮັກ­ຕາ ເທົ່າ​ກັບ 47,7% ຍ້ອນ​ລະ­ບົບ​ຊົນ­ລະ­ປະ­ທານ​ເກົ່າ ການ​ສະ­ໜອງ​ນ້ຳ​ບໍ່​ໄດ້​ເຕັມ​ສ່ວນ ພືດ​ຜັກ​ແຜນ­ການ​ແມ່ນ 890 ເຮັກ­ຕາ ປັດ­ຈຸ­ບັນ​ປະ­ຕິ­ບັດ​ໄດ້ 620 ເຮັກ­ຕາ ເທົ່າ​ກັບ 70% ໃນ​ນີ້ ມີ​ຜັກ​ກິນ​ໃບ ຜັກ​ກິນ​ດອກ ຜັກ​ກິນ​ໝາກ ແລະ ຜັກ​ກິນ​ຫົວ.

    ຄຽງ​ຄູ່​ກັນ​ນີ້ ເມືອງ​ສີ​ໂຄດ​ຕະ­ບອງ​ຍັງ​ໄດ້​ສະ­ໜອງ​ແນວ​ພັນ​ເຂົ້າ 3.294 ກິ​ໂລ ແນວ​ພັນ​ພືດ​ຜັກ 338,5 ກິ​ໂລ ໂດຍ​ມີ​ຈຸດ​ສຸມ​ເປົ້າ​ໝາຍ​ກຸ່ມ​ກະ­ສິ­ກຳ​ອິນ​ຊີ ແລະ ກຸ່ມ​ກະ­ສິ­ກຳ​ທີ່​ດີ ເຂດ​ທີ່​ໄດ້​ຮັບ​ຜົນ​ກະ­ທົບ​ປູກ​ພືດ​ຕາມ​ລະ­ດູ​ການ​ສຸມ​ໃສ່​ພືດ​ອາ­ຍຸ​ສັ້ນ ວາງ​ແຜນ­ການ​ຜະ­ລິດ​ພ້ອມ​ທັງ​ຊຸກ­ຍູ້​ຕິດ­ຕາມ ຈັດ​ເຝິກ­ອົບ­ຮົມ​ບ່ອນ​ທີ່​ມີ​ເງື່ອນ­ໄຂ ແລະ ສະ­ໜອງ​ແນວ​ພັນ​ທີ່​ຈຳ­ເປັນ ເຊິ່ງ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ ໄດ້​ຊຸກ­ຍູ້​ຕິດ­ຕາມ​ການ​ຜະ­ລິດ​ໃນ​ຂອບ​ເຂດ​ຄວາມ​ຮັບ­ຜິດ­ຊອບ​ຂອງ​ຕົນ ຈັດ​ເຝິກ­ອົບ­ຮົມ​ໃຫ້​ກຸ່ມ​ເປົ້າ​ໝາຍ 2 ບ້ານ​ກ່ຽວ​ກັບ​ການ​ຜະ­ລິດ​ກະ­ສິ­ກຳ​ສະ­ອາດ ແຈກ​ຢາຍ​ແນວ​ພັນ ແລະ ອຸ­ປະ­ກອນ​ຈຳ­ນວນ​ໜຶ່ງ ທີ່​ໄດ້​ຮັບ​ການ​ຊ່ວຍ­ເຫຼືອ​ຈາກ​ອົງ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ແນວ​ພັນ​ພືດ 17 ຊະ­ນິດ ມູນ​ຄ່າ 18 ລ້ານ​ກວ່າ​ກີບ ໄດ້​ແຈກ​ຢາຍ​ຄົບ 6 ບ້ານ ຕາມ​ຄອບ­ຄົວ​ທີ່​ໄດ້​ຮັບ​ຜົນ​ກະ­ທົບ ໄດ້​ຮັບ​ການ​ຊ່ວຍ­ເຫຼືອ​ຈາກ​ໂຄງ­ການ​ພັດ­ທະ­ນາ​ກະ­ສິ­ກຳ​ສະ­ອາດ​ຂອງ​ອົງ­ການ​ໄຈ​ກາ ມີ​ແນວ​ພັນ​ພືດ ແລະ ອຸ­ປະ­ກອນ​ຈຳ­ນວນ​ໜຶ່ງ ມູນ​ຄ່າ 9 ລ້ານ​ກວ່າ​ກີບ ໂດຍ​ມອບ​ໃຫ້​ກຸ່ມ​ກະ­ສິ­ກຳ​ອິນ​ຊີ​ບ້ານ​ໜອງ​ດາ 9 ຄອບ­ຄົວ.

ຂ່າວທີ່ກ່ຽວຂ້ອງ