ການດຳເນີນທຸລະກິດ JDB ມີຜົນກຳໄລຢ່າງໜ້າເພິ່ງພໍໃຈ

611 06 ກ.ພ. 2019 ຂ່າວໜ້າ​ໜຶ່ງ
ການດຳເນີນທຸລະກິດ JDB ມີຜົນກຳໄລຢ່າງໜ້າເພິ່ງພໍໃຈ

    ທະ­ນາ­ຄານ​ຮ່ວມ​ພັດ­ທະ­ນາ (JDB) ຈັດ​ກອງ​ປະ­ຊຸມ​ສະ­ຫຼຸບ​ຜົນ­ງານ​ປີ 2018 ແລະ ແຜນ­ການ​ປີ 2019 ຂຶ້ນ​ວັນ​ທີ 2 ກຸມ­ພາ 2019 ຢູ່​ໂຮງ­ແຮມ​ແລນ​ມາກ ໂດຍ​ເປັນ​ປະ­ທານ​ຂອງ​ທ່ານ ເອ­ກະ​ພັນ ພະ​ພິ​ທັກ ປະ­ທານ​ສະ­ພາ​ບໍ­ລິ­ຫານ JDB ມີ​ທ່ານ ສອນ​ໄຊ ສິດ​ພະ​ໄຊ ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ທ່ານ ບຸນ​ສະ­ຫວ່າງ ພິ­ລາ​ໄຊ​ພິ​ທັກ ອຳ­ນວຍ​ການ​ໃຫຍ່ JDB ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ປີ 2018 ເປັນ​ປີ​ທີ່ JDB ມີ​ຜົນ­ງານ​ພົ້ນ​ເດັ່ນ​ຫຼາຍ​ດ້ານ ແລະ ເປັນ​ປີ​ທີ່​ມີ​ຄວາມ​ໝາຍ​ສຳ­ຄັນ ເນື່ອງ​ຈາກ​ເປັນ​ການ​ຄົບ­ຮອບ 30 ປີ ການ​ສ້າງ­ຕັ້ງ JDB ແລະ ໄດ້​ເປີດ​ໜ່ວຍ​ບໍ­ລິ­ການ​ເພີ່ມ​ຕື່ມ 5 ໜ່ວຍ​ບໍ­ລິ­ການ​ຢູ່​ເຂດ​ຊຸມ​ຊົນ​ຕ່າງໆ​ໃນ​ທົ່ວ​ປະ­ເທດ ນອກ​ນີ້ ການ​ດຳ­ເນີນ​ທຸ­ລະ​ກິດ​ກໍ​ມີ​ຜົນ​ກຳ­ໄລ​ຢ່າງ​ໜ້າ​ເພິ່ງ​ພໍ­ໃຈ ປັດ­ຈຸ­ບັນ JDB ມີ​ໜ່ວຍ​ບໍ­ລິ­ການ​ທີ່​ເປີດ​ບໍ­ລິ­ການ 58 ແຫ່ງ ອອກ​ຜະ­ລິດ​ຕະ​ພັນ​ໃໝ່​ເພື່ອ​ຕອບ​ສະ­ໜອງ​ການ​ບໍ­ລິ­ການ​ໃຫ້​ລູກ​ຄ້າ​ຢ່າງ​ຫຼວງ­ຫຼາຍ ເຊັ່ນ: ເງິນ​ກູ້​ເພື່ອ​ພະ­ນັກ­ງານ ເງິນ​ກູ້​ເພື່ອ​ການ​ສຶກ​ສາ​ພາຍ​ໃນ ແລະ ຕ່າງ­ປະ­ເທດ ສຳ­ເລັດ​ໃນ​ການ​ອອກ​ຜະ­ລິດ​ຕະ​ພັນ​ເຮັດ​ທຸ­ລະ​ກຳ​ການ​ເງິນ​ຜ່ານ​ມື​ຖື “JDB Yes ແລະ Yes pay (QR Code)” ອອກ​ບັດ UnionPay ແລະ ອື່ນໆ ເພື່ອ​ພັດ­ທະ­ນາ​ໃຫ້​ເປັນ Digital Banking ເທື່ອ​ລະ​ກ້າວ ແລະ ໄດ້​ເຂົ້າ​ຮ່ວມ​ຫຼາຍ​ໂຄງ­ການ​ກັບ​ທະ­ນາ­ຄານ​ອື່ນ​ເຊັ່ນ: ການ​ຊຳ­ລະ​ພາ­ສີ​ທີ່​ດິນ ເສຍ​ຄ່າ​ທາງ​ລົດ​ປະ­ຈຳ​ປີ ແລະ ອື່ນໆ ພ້ອມ​ນີ້ ຍັງ​ໄດ້​ປະ­ກອບ­ສ່ວນ​ແກ້​ໄຂ​ຊີ­ວິດ​ການ​ເປັນ​ຢູ່​ຂອງ​ພະ­ນັກ­ງານ-ລັດ­ຖະ­ກອນ​ໃຫ້​ດີ​ຂຶ້ນ ໂດຍ​ການ​ຕອບ​ສະ­ໜອງ​ສິນ​ເຊື່ອ ບໍ່​ມີ​ຫຼັກ​ຊັບ​ຄ້ຳ­ປະ­ກັນ 15 ເທົ່າ​ຂອງ​ເງິນ­ເດືອນ ທີ່​ເບີກ​ຈ່າຍ​ເງິນ­ເດືອນ ຜ່ານ JDB ແລະ ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ​ມະ­ຫາ­ຊົນ.

    ເມື່ອ​ບໍ່​ດົນ​ມາ​ນີ້ JDB ໄດ້​ອອກ​ຜະ­ລິດ​ຕະ​ພັນ​ໃໝ່ ເງິນ​ຝາກ​ດອກ​ເບ້ຍ X2 ຮັບ​ໃຊ້​ລູກ​ຄ້າ ພ້ອມ​ນີ້​ຍັງ​ມີ​ຫຼາຍ​ໂຄງ­ການ​ກ່ຽວ​ກັບ​ການ​ອອກ​ຜະ­ລິດ​ຕະ​ພັນ ເພື່ອ​ຮັບ​ໃຊ້​ສັງ­ຄົມ ເຮັດ​ໃຫ້​ລູກ​ຄ້າ​ໄດ້​ຮັບ​ຜົນ​ປະ­ໂຫຍດ​ສູງ​ສຸດ ປະ­ກອບ­ສ່ວນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ຊາດ ຕາມ​ຄຳ​ຂວັນ​ຂອງ JDB ທີ່​ວ່າ “ເຕີບ​ໃຫຍ່​ໄປ​ພ້ອມ​ກັນ”.

    ໂອ­ກາດ​ດັ່ງ­ກ່າວ ຍັງ​ມີ​ການ​ຍ້ອງ­ຍໍ​ພະ­ນັກ­ງານ​ທີ່​ມີ​ຜົນ­ງານ​ດີ­ເດັ່ນ​ປະ­ກອບ­ສ່ວນ​ໃນ​ວຽກ​ງານ ແລະ ປັບ­ປຸງ​ການ­ຈັດ­ຕັ້ງ​ຂອງ JDB ເພື່ອ​ໃຫ້​ມີ​ກຳ­ລັງ​ໃຈ ແລະ ຕັ້ງ­ໜ້າ​ປະ­ຕິ­ບັດ​ວຽກ​ງານ​ໃຫ້​ດີ​ກວ່າ​ເກົ່າ ເຊິ່ງ​ໄດ້​ມອບ​ລາ­ງວັນ​ໂລ້​ຄຳ 7 ທ່ານ ແລະ ລາ­ງວັນ​ໂລ້​ເງິນ 8 ທ່ານ.

ຂ່າວທີ່ກ່ຽວຂ້ອງ