ແຂ່ງຂັນມວຍປ້ຳ ຊີງຂັນມິດຕະພາບ ຄັ້ງທີ l

    ໂຮງ­ຮຽນ​ພອນ​ສະ­ຫວັນ​ກີ­ລາ-ກາຍ­ຍະ­ກຳ (ຮພກ) ຮ່ວມ​ກັບ​ສະ­ຫະ­ພັນ​ກີ­ລາ​ມວຍ​ປ້ຳ​ແຫ່ງ​ຊາດ​ລາວ ຈັດ­ການ​ແຂ່ງ­ຂັນ​ກີ­ລາ​ມວຍ​ປ້ຳ​ລາຍ­ການ​ພິ­ເສດ ຊີງ​ຂັນ​ມິດ­ຕະ­ພາບ ຄັ້ງ​ທີ l ປະ­ຈຳ​ປີ 2019 ຂຶ້ນ​ວັນ​ທີ 2 ກຸມ­ພາ 2019 ຢູ່ ຮພກ ບ້ານ​ສີ​ເກີດ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ສົມ​ພູ ພົງ­ສາ ຜູ້​ຊ່ວຍ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ຮອງ​ປະ­ທານ ແລະ ເລ­ຂາ­ທິ­ການ ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ທ່ານ ແສງ​ພອນ ພົນ​ອາ­ມາດ ຫົວ­ໜ້າ​ກົມ​ກີ­ລາ​ລະ­ດັບ​ສູງ ກະ­ຊວງ ສສກ ທ່ານ ຄຳ​ແສນ ສີ­ສະ​ວົງ ປະ­ທານ​ສະ­ຫະ­ພັນ​ມວຍ​ປ້ຳ​ແຫ່ງ​ຊາດ​ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ເປັນ​ການ​ສ້າງ​ຂະ​ບວນ​ການ​ກີ­ລາ​ມວຍ​ປ້ຳ​ໃຫ້​ມີ​ຄວາມ​ຟົດ­ຟື້ນ ສ້າງ​ໂອ­ກາດ​ໃຫ້​ນັກ­ກີ­ລາ​ຮຸ່ນ​ສືບ​ທອດ​ມີ​ເວ­ທີ​ແຂ່ງ­ຂັນ​ທັງ​ເປັນ​ການ​ທົດ​ສອບ ແລະ ເລືອກ­ເຟັ້ນ​ນັກ­ກີ­ລາ​ໜຸ່ມ​ນ້ອຍ​ທີ່​ມີ​ພອນ​ສະ­ຫວັນ​ດີ­ເດັ່ນ ພັດ­ທະ­ນາ​ຕົນ​ເອງ​ກ້າວ​ຂຶ້ນ​ໄປ​ທົດ​ແທນ​ນັກ­ກີ­ລາ​ຮຸ່ນ​ອ້າຍ ແລະ ເອື້ອຍ ຮັບ​ໃຊ້​ທີມ​ຊາດ​ກຽມ​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ຕ່າງໆ ລະ­ດັບ​ອະ­ນຸ​ພາກ​ພື້ນ ແລະ ສາ­ກົນ ທີ່​ຈະ​ຈັດ​ຂຶ້ນ​ໃນ​ປີ 2019 ໂດຍ​ສະ­ເພາະ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ຢູ່​ປະ­ເທດ​ຟີ​ລິບ​ປິນ.

    ການ​ແຂ່ງ­ຂັນ​ຄັ້ງ​ນີ້ ມີ​ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ 46 ຄົນ ມາ​ຈາກ 4 ສະ­ໂມ­ສອນ ແຂ່ງ­ຂັນ 14 ລາຍ­ການ ຍິງ 4 ລາຍ­ການ ໃນ​ນີ້​ທັບ​ນັກ­ກີ­ລາ ຮພກ ຊະ­ນະ 7 ລາຍ­ການ ຄອງ​ອັນ​ດັບ​ທີ 1 ກີ­ລາ​ມວຍ​ປ້ຳ​ລາວ ສະ­ໄໝ​ທຳ​ອິດ ທີ 2 ແມ່ນ​ກະ­ຊວງ​ປ້ອງ​ກັນ​ປະ­ເທດ ຊະ­ນະ 4 ລາຍ­ການ ທີ 3 ແຂວງ​ຊຽງ​ຂວາງ ຊະ­ນະ 1 ລາຍ­ການ ທີ 4 ກະ­ຊວງ ປກສ ຊະ­ນະ 1 ລາຍ­ການ ໂດຍ​ອັນ​ດັບ 1 ໄດ້​ຮັບ​ຂັນ 1 ໜ່ວຍ ເງິນ​ລາ­ງວັນ 1 ລ້ານ​ກີບ ແລະ ໃບ­ຢັ້ງ­ຢືນ ທີ 2 ໄດ້​ຮັບ​ເງິນ​ລາ­ງວັນ 700.000 ກີບ ພ້ອມ​ໃບ­ຢັ້ງ­ຢືນ ທີ 3 ໄດ້​ຮັບ​ເງິນ​ລາ­ງວັນ 500.000 ກີບ ພ້ອມ​ໃບ­ຢັ້ງ­ຢືນ ທີ 4 ໄດ້​ຮັບ​ເງິນ​ລາ­ງວັນ 200.000 ກີບ ພ້ອມ​ໃບ­ຢັ້ງ­ຢືນ.