ລົດແກ້ວ ໄດ້ອັນດັບ 3 ແລ່ນມາຣາທອນ ອາເມຊິງ ໄທແລນ

468 06 ກ.ພ. 2019 ວົງຈອນກີລາ
ລົດແກ້ວ ໄດ້ອັນດັບ 3 ແລ່ນມາຣາທອນ ອາເມຊິງ ໄທແລນ

    ນາງ ລົດ​ແກ້ວ ອິນ​ທະ​ກຸມ­ມານ ນັກ​ແລ່ນ-ລານ​ທີມ​ຊາດ​ລາວ ຍາດ​ໄດ້​ອັນ​ດັບ​ທີ 3 ລາຍ­ການ ແລ່ນ​ມາ​ຣາ​ທອນ​ອາ​ເມ​ຊິງ ໄທ​ແລນ (Amazing Thailand Marathon) ຢູ່​ບາງ­ກອກ ປະ­ເທດ​ໄທ ເຮັດ​ໃຫ້​ໃນ​ປີ​ນີ້ ລົດ​ແກ້ວ ສາ­ມາດ​ຍາດ​ຫຼຽນ​ມາ​ໄດ້​ແລ້ວ 4 ຫຼຽນ ແລະ 1 ຂັນ.

    ການ​ແຂ່ງ­ຂັນ​ດັ່ງ­ກ່າວ ຈັດ​ຂຶ້ນ​ວັນ​ທີ 3 ກຸມ­ພາ 2019 ໂດຍ​ນາງ ລົດ​ແກ້ວ ນັກ​ແລ່ນ-ລານ​ຂອງ​ທີມ​ຊາດ​ລາວ ໄດ້​ລົງ​ແຂ່ງ­ຂັນ​ປະ­ເພດ​ທົ່ວ​ໄປ​ຍິງ 10 ກິ­ໂລ­ແມັດ ມີ​ນັກ​ແລ່ນ​ຈາກ​ທົ່ວ​ໂລກ 5.000 ກວ່າ​ຄົນ​ເຂົ້າ​ຮ່ວມ ຜ່ານ​ການ​ແຂ່ງ­ຂັນ ລົດ​ແກ້ວ ອິນ​ທະ​ກຸມ­ມານ ສາ­ມາດ​ຍາດ​ມາ​ໄດ້​ອັນ​ດັບ 3 ດ້ວຍ​ເວ­ລາ 37 ນາ­ທີ 1 ວິ­ນາ­ທີ ຂະ­ນະ​ທີ່​ອັນ​ດັບ 1 ຕົກ​ເປັນ​ຂອງ​ນາງ Alemu Addisaiem 36 ນາ­ທີ 11 ວິ­ນາ­ທີ ອັນ​ດັບ 2 ນາງ Martha Tinsae Birehan 36 ນາ­ທີ 58 ວິ­ນາ­ທີ ນັກ­ກີ­ລາ​ຈາກ​ປະ­ເທດ​ເອ​ທີ​ໂອ​ປີ.

    ກ່ອນ​ໜ້າ​ນີ້ ລົດ​ແກ້ວ ສາ­ມາດ​ຍາດ​ໄດ້ 2 ຫຼຽນ​ຄຳ 2 ຫຼຽນ​ເງິນ ໃນ​ງານ​ກີ­ລາ​ມະ­ຫາ­ວິ­ທະ­ຍາ­ໄລ ທົ່ວ​ປະ­ເທດ​ໄທ ໃຫ້​ມະ­ຫາ­ວິ­ທະ­ຍາ­ໄລ​ກຸງ​ເທບ​ທົນ​ບູ​ລີ​ເຊິ່ງ​ນາງ ລົດ​ແກ້ວ ຈະ​ລົງ​ແຂ່ງ­ຂັນ​ລາຍ­ການ​ຕໍ່​ໄປ​ຢູ່ ສປປ ລາວ ກໍ​ຄື​ລາຍ­ການ Vientiane International Half marathon 2019 ເຊິ່ງ​ຈະ​ເລີ່ມ​ຂຶ້ນ​ໃນ​ເດືອນ​ມີ­ນາ 2019.

ຂ່າວທີ່ກ່ຽວຂ້ອງ