ເບິ່ງບ້ານເຂົາເອົາບົດຮຽນ 05/02/2019

330 05 ກ.ພ. 2019 ຫົວຂໍ້ຂ່າວອື່ນໆ

    ພົບ​ກັນ​ວັນ​ນີ້ ທ່ານ​ຜູ້​ອ່ານ​ຈະ​ໄດ້​ຮູ້​ກ່ຽວ​ກັບ​ນະ­ໂຍ­ບາຍ​ຮັບ­ປະ­ກັນ​ຄຸນ​ນະ​ພາບ​ຂອງ​ອາ­ຫານ ໃນ​ສະ­ຫະ­ພາບ​ເອີ​ຣົບ ແລະ ເລື່ອງ​ເງິນ​ຄ່າ​ແຮງ​ງານ​ຂັ້ນ​ຕ່ຳ​ຢູ່ ມຽນ​ມາ.

    ທີ່ ສະ­ຫະ­ພາບ​ເອີ​ຣົບ: ມີ​ຂ່າວ​ອອກ​ມາ​ຈາກ​ສະ­ຫະ­ພາບ​ເອີ​ຣົບ ເມື່ອ​ເດືອນ​ສອງ​ປີ­ຜ່ານ­ມາ​ວ່າ ທາງ​ກຸ່ມ​ປະ­ເທດ​ນີ້ ໄດ້​ກຳ­ນົດ​ມາດ​ຕະ­ການ​ລົງ­ໂທດ​ຢ່າງ​ໜັກ ກັບ​ບັນ­ດາ​ບໍ­ລິ­ສັດ​ຜະ­ລິດ​ສະ­ບຽງ​ອາ­ຫານ ທີ່​ຈຳ­ໜ່າຍ​ຜະ­ລິດ​ຕະ​ພັນ ທີ່​ມີ​ຄຸນ​ນະ​ພາບ​ຫຼຸດ​ໂຕນ​ບໍ່​ເປັນ​ເອ­ກະ​ພາບ​ກັນ ຢູ່​ຫຼາຍ​ປະ­ເທດ​ສະ­ມາ­ຊິກ​ຂອງ​ສະ­ຫະ­ພາບ​ເອີ​ຣົບ ຫຼື ອີ​ຢູ (EU) ນັ້ນ ມີ​ສິນ­ຄ້າ​ຫຼາຍ​ປະ­ເພດ​ທີ່​ມີ​ການ​ຫຸ້ມ​ຫໍ່ ແລະ ເປັນ​ຍີ່​ຫໍ່​ດຽວ​ກັນ​ອ້ອຍ­ຕ້ອຍ ແຕ່​ຄຸນ​ນະ​ພາບ​ທາງ​ດ້ານ​ໃນ​ຜັດ​ຫຼຸດ​ໂຕນ​ກັນ ປາ­ກົດ­ການ​ດັ່ງ­ກ່າວ​ນີ້ ມັນ​ຈະ​ພົບ​ເຫັນ​ຢູ່​ບັນ­ດາ​ປະ­ເທດ​ເອີ​ຣົບ​ຕາ­ເວັນ​ອອກ​ທີ່​ເປັນ​ນ້ອງ​ໃໝ່​ໃນ​ກຸ່ມ ເຊັ່ນ: ຜະ­ລິດ​ຕະ​ພັນ​ກາ­ເຟ ແທນ​ທີ່​ຈະ​ມີ​ທາດ​ກາ­ເຟ​ອິນ​ຫຼາຍ​ກວ່າ ແຕ່​ໃນ​ຕົວ​ຈິງ​ຜັດ​ມີ​ປະ­ລິ­ມານ​ນ້ຳ­ຕານ​ຫຼາຍ​ກວ່າ ສ່ວນ​ປາ­ສົດ ຫຼື ປາ​ປຸງ​ແຕ່ງ​ໂອບ​ແປ້ງ​ນັ້ນ​ກໍ່​ພົບ​ວ່າ ມີ​ຕາຍ​ແຕ່​ແປ້ງ ສ່ວນ​ເນື້ອ​ປາ​ນັ້ນ​ມີ​ໜ້ອຍ​ໜຶ່ງ ເຂົ້າ­ໜົມ​ປະ­ເພດ​ໂຊ​ໂກ​ແລັດ​ນັ້ນ ກໍ່​ມີ​ສ່ວນ​ປະ­ສົມ​ອື່ນໆ​ຫຼາຍ​ກວ່າ​ປະ­ລິ­ມານ​ຂອງ​ກາ​ກາວ ທີ່​ເປັນ​ສ່ວນ​ປະ­ກອບ​ຕົ້ນ­ຕໍ ເພື່ອ​ແກ້​ໄຂ​ສະ­ພາບ​ຫຼຸດ​ໂຕນ​ດ້ານ​ຄຸນ​ນະ​ພາບ​ຂອງ​ສະ­ບຽງ​ອາ­ຫານ​ພາຍ​ໃນ​ກຸ່ມ ທາງ​ຄະ­ນະ​ກຳ­ມະ­ການ​ອີ​ຢູ ໄດ້​ສະ­ໜອງ​ເປັນ​ຈຳ­ນວນ 1 ລ້ານ​ເອີ​ໂຣ (ເທົ່າ​ກັບ 1,1 ລ້ານ​ໂດ​ລາ​ສະ­ຫະ­ລັດ) ໃຫ້​ແຕ່​ລະ​ປະ­ເທດ​ສະ­ມາ­ຊິກ​ທີ່​ມີ​ບັນ­ຫາ​ເລື່ອງ​ນີ້ ນຳ​ໃຊ້​ເພື່ອ​ຊຸກ­ຍູ້​ມາດ​ຕະ­ການ​ກວດ­ກາ ເພື່ອ​ຊອກ​ໃຫ້​ເຫັນ​ຂອດ​ຫຼຸດ​ໂຕນ​ຂອງ​ປະ­ເພດ​ສິນ­ຄ້າ ແລ້ວ​ສະ­ຫຼຸບ​ຜົນ​ການ​ກວດ­ກາ ເພື່ອ​ຢືນ­ຢັນ​ກ່ຽວ​ກັບ​ຮູບ​ການ​ສໍ້​ໂກງ​ດັ່ງ­ກ່າວ ປະ­ເທດ​ສະ­ມາ­ຊິກ​ນ້ອງ​ໃໝ່​ຂອງ ອີ​ຢູ ເຊັ່ນ: ເຊັກ ສະ​ໂລ​ວາ​ກີ ແລະ ຮົງ​ກາ​ຣີ ໄດ້​ສະ­ແດງ​ຄວາມ​ບໍ່​ພໍ­ໃຈ​ຕໍ່​ມາດ​ຕະ­ການ​ດັ່ງ­ກ່າວ​ຂອງ​ອີ​ຢູ ເພາະ​ຮູ້­ສຶກ​ວ່າ ຖືກ​ຈຳ­ແນກ​ວ່າ ເປັນ​ປະ­ເທດ​ລະ­ດັບ​ສອງ ທີ່​ບໍ­ລິ­ໂພກ​ອາ­ຫານ​ຄຸນ​ນະ​ພາບ​ຕ່ຳ​ກວ່າ ເພື່ອ​ບັນ­ເທົາ​ຄວາມ​ບໍ່​ພໍ­ໃຈ​ດັ່ງ­ກ່າວ ທ່ານ ຊັງ​ກະ​ໂລດ ຢັງ​ເກີ ປະ­ທານ​ຄະ­ນະ​ກຳ­ມະ­ການ​ອີ​ຢູ ຈຶ່ງ​ໄດ້​ອອກ​ມາ​ເວົ້າ​ອອຍ​ໃຈ​ວ່າ “ຢູ່​ໃນ​ສະ­ຫະ­ພາບ​ເອີ​ຣົບ ບໍ່​ມີ​ຜູ້​ບໍ­ລິ­ໂພກ​ລະ­ດັບ​ສອງ”.

    ທີ່ ມຽນ​ມາ: ທ່າມ­ກາງ​ບັນ­ຍາ­ກາດ​ການ​ເປີດ​ກວ້າງ​ການ​ລົງ­ທຶນ​ຕ່າງ­ປະ­ເທດ​ໃນ ມຽນ​ມາ ທາງ​ການ​ຮັບ­ປະ­ກັນ​ຄ່າ​ແຮງ​ງານ​ທີ່​ຍຸ­ຕິ​ທຳ ໂດຍ​ສະ­ເພາະ​ແມ່ນ​ຄ່າ​ແຮງ​ງານ​ຂັ້ນ​ຕ່ຳ ໂດຍ​ໄດ້​ມີ​ການ​ຕົກ­ລົງ​ເຫັນ​ດີ​ກັບ​ບັນ­ດາ​ນາຍ​ຈ້າງ ແລະ ເຫຼົ່າ​ກຳ­ມະ­ກອນ ເພື່ອ​ເຮັດ​ໃຫ້​ອັດ­ຕາ​ຄ່າ​ແຮງ​ງານ​ເປັນ​ທີ່​ຍອມ­ຮັບ ໂດຍ​ຝ່າຍ​ນາຍ​ຈ້າງ ແລະ ຜູ້​ອອກ­ແຮງ​ງານ ຂ່າວ​ກ່ຽວ​ກັບ​ບັນ­ຫາ​ນີ້ ອອກ​ມາ​ແຕ່​ທ້າຍ​ປີ 2017 ພຸ້ນ ໂດຍ​ບອກ​ວ່າ ທາງ​ການ​ມຽນ​ມາ​ໄດ້​ມີ​ການ​ກຳ­ນົດ​ອັດ­ຕາ​ຄ່າ​ແຮງ​ງານ​ຂັ້ນ​ຕ່ຳ ໃນ​ລະ­ດັບ 4.000-4.800 ຈາດ ສຳ­ລັບ​ຜູ້​ອອກ­ແຮງ​ງານ 8 ຊົ່ວ­ໂມງ​ຕໍ່​ວັນ ເງິນ​ຄ່າ​ແຮງ​ງານ​ຂັ້ນ​ຕ່ຳ​ໃນ​ເມື່ອ​ກ່ອນ​ທີ່​ປະ­ຕິ­ບັດ​ມາ​ແຕ່​ປີ 2015 ນັ້ນ ແມ່ນ 3.600 ຈາດ ມຽນ​ມາ ມີ​ກົດ­ໝາຍ​ກ່ຽວ​ກັບ​ເງິນ­ເດືອນ​ຂັ້ນ​ຕ່ຳ ທີ່​ກຳ­ນົດ​ໃຫ້​ມີ​ການ​ພິ­ຈາ­ລະ­ນາ​ເປັນ​ຄ່າ​ແຮງ​ງານ​ຂັ້ນ​ຕ່ຳ ໃນ​ແຕ່​ລະ 2 ປີ ຂັ້ນ​ຕອນ​ການ​ພິ­ຈາ­ລະ­ນາ​ກ່ຽວ​ກັບ​ເງິນ​ຄ່າ​ແຮງ​ງານ​ຂັ້ນ​ຕ່ຳ​ຂອງ​ມຽນ​ມາ​ນັ້ນ ມີ​ຄື​ແນວ​ນີ້: ຄັ້ງ​ທີ 1 ແມ່ນ​ຜ່ານ​ການ​ພົບ​ປະ​ຕົກ­ລົງ​ເຫັນ​ດີ​ລະ­ຫວ່າງ ຕົວ​ແທນ​ນາຍ​ຈ້າງ​ກັບ​ຜູ້​ຂາຍ​ແຮງ​ງານ ຂັ້ນ​ທີ​ສອງ ແມ່ນ​ຜ່ານ​ກອງ​ປະ­ຊຸມ​ວົງ​ກວ້າງ ໂດຍ​ການ​ເຂົ້າ​ຮ່ວມ​ຂອງ​ເຈົ້າ​ໜ້າ­ທີ່​ລັດ­ຖະ­ບານ ກຳ­ມະ­ກອນ ນາຍ​ຈ້າງ ແລະ ເຈົ້າ​ໜ້າ­ທີ່​ຮັບ­ຜິດ­ຊອບ​ກິດ­ຈະ­ການ​ແຮງ​ງານ​ໂດຍ​ສະ­ເພາະ.

ຂ່າວທີ່ກ່ຽວຂ້ອງ