ແມັກເກຣເກີ-ຄາບິບ ຖືກລົງໂທດ ກໍລະນີຕີກັນນອກວົງ

203 04 ກ.ພ. 2019 ວົງຈອນກີລາ
ແມັກເກຣເກີ-ຄາບິບ ຖືກລົງໂທດ ກໍລະນີຕີກັນນອກວົງ

    ຄໍ​ເນີ ແມັກ​ເກຣ​ເກີ ແລະ ຄາ​ບິບ ນູ​ຣ​ມາ​ໂກ​ເມດັອຟ 2 ນັກ​ມວຍ​ຄົບ​ເຄື່ອງ MMA ແລະ Kick Boxing ຖືກ​ຄະ­ນະ​ກຳ­ມະ­ການ​ດ້ານ​ກີ­ລາ ລັດ​ເນ​ວາ­ດາ ສ ອາ​ເມ​ຣິ​ກາ ໃນ​ນາມ​ເປັນ​ສັງ­ວຽນ​ເຈົ້າ­ພາບ​ມວຍ​ຄູ່​ນີ້ ລົງ­ໂທດ​ຫ້າມ​ເຄື່ອນ​ໄຫວ 6 ເດືອນ ແລະ 9 ເດືອນ ຕາມ​ລຳ­ດັບ ຫຼັງ​ຈາກ​ທັງ 2 ແລະ ທີມ​ງານ​ກໍ່​ເຫດ​ຕີ​ກັນ​ນອກ​ວົງ ຂະ­ນະ​ສຳ­ເລັດ​ການ​ແຂ່ງ­ຂັນ​ນັດ​ຫຼ້າ​ສຸດ ທີ່​ທັງ 2 ພົບ​ກັນ ວັນ​ທີ 6 ຕຸ­ລາ 2018 ເຊິ່ງ​ນັດ​ນັ້ນ ຄາ​ບິບ ນູ​ຣ​ມາ​ໂກ​ເມດັອຟ ຊະ­ນະ Submission ຄໍ​ເນີ ແມັກ​ເກຣ​ເກີ ດ້ວຍ​ການ ລ໊ອກ​ຄໍ ໃນ​ຍົກ 4 ຈາກ​ນັ້ນ ມີ​ການ​ເຢາະ​ເຢີ້ຍ​ປະ​ທະ​ຄາ­ລົມ​ກັນ​ລະ­ຫວ່າງ​ນັກ­ກີ­ລາ ແລະ ທີມ​ງານ ເຮັດ​ໃຫ້ 2 ຝ່າຍ​ຄຸມ​ອາ­ລົມ​ບໍ່​ຢູ່.

    ເຫດ­ການ​ດັ່ງ­ກ່າວ ເຮັດ​ໃຫ້ ຄໍ​ເນີ ຖືກ​ລົງ­ໂທດ 6 ເດືອນ ພ້ອມ​ປັບ​ໃໝ​ເງິນ 50.000 ໂດ​ລາ​ສະ­ຫະ­ລັດ ຫຼື ປະ­ມານ 428 ລ້ານ​ກີບ ຂະ­ນະ​ທີ່ ຄາ​ບິບ ຖືກ​ລົງ­ໂທດ 9 ເດືອນ ແລະ ປັບ​ໃໝ​ເງິນ 500.000 ໂດ​ລາ​ສະ­ຫະ­ລັດ ຫຼື ປະ­ມານ 4,28 ຕື້​ກີບ ເພາະ​ສະ­ແດງ​ອາ­ການ​ໜັກ​ກວ່າ ແມັກ​ເກຣ​ເກີ ສະ­ເພາະ ຄາ​ບິບ ໂທດ​ສາ­ມາດ​ຫຼຸດ​ລົງ​ເຫຼືອ 6 ເດືອນ ຖ້າ​ເຂົ້າ​ຮ່ວມ​ໂຄງ­ການ​ກິດ­ຈະ­ກຳ​ເພື່ອ​ສັງ­ຄົມ ເຊັ່ນ: ການ​ປະ­ຊາ­ສຳ­ພັນ​ການ​ຕໍ່­ຕ້ານ​ການ​ໃຊ້​ຄວາມ​ຮຸນ​ແຮງ​ໃນ​ສັງ­ຄົມ ທີ່​ລັດ​ເນ​ວາ­ດາ ສ ອາ​ເມ​ຣິ​ກາ.

    ສ່ວນ Abubakar Nurmagomedov ແລະ Zubaira Tukhugov ທີມ​ງານ​ຂອງ ຄາ​ບິບ ກໍ​ຖືກ​ລົງ­ໂທດ 1 ປີ ພ້ອມ​ປັບ​ໃໝ​ເງິນ 25.000 ໂດ​ລາ​ສະ­ຫະ­ລັດ ຫຼື ປະ­ມານ 214 ລ້ານ​ກີບ ເຊິ່ງ​ຄາດ​ວ່າ​ຄູ່​ນີ້​ຕ້ອງ​ມີ​ການ​ຂຶ້ນ​ຊົກ​ກັນ​ອີກ​ຄັ້ງ.

ຂ່າວທີ່ກ່ຽວຂ້ອງ