ຫຼຸດຄວາມຕຸ້ຍ ດ້ວຍການກິນອາຫານໃຫ້ຖືກວິທີ

383 01 ກ.ພ. 2019 ຫົວຂໍ້ຂ່າວອື່ນໆ

    ທ່ານ​ເຊື່ອ​ບໍ່​ວ່າ­ການ​ກິນ​ອາ­ຫານ​ກໍ​ຊ່ວຍ​ຫຼຸດ​ນ້ຳ­ໜັກ​ໄດ້ ດັ່ງ​ເລື່ອງ​ທີ່​ພວກ​ເຮົາ​ຈະ​ນຳ​ສະ­ເໜີ​ຕໍ່​ທ່ານ​ຜູ້​ອ່ານ ມັນ​ເປັນ​ສິ່ງ​ທີ່​ຜູ້​ໃດ​ກໍ່​ສາ­ມາດ​ເຮັດ​ໄດ້ ແລະ ໄດ້­ຜົນ​ນຳ​ອີກ ພຽງ​ແຕ່​ປ່ຽນ​ວິ­ທີ​ການ​ກິນ​ອາ­ຫານ​ກໍ່​ຈະ​ຊ່ວຍ​ເຮັດ​ໃຫ້​ທ່ານ​ຫຼຸດ​ນ້ຳ­ໜັກ ແລະ ຮູ້­ສຶກ​ດີ​ໃນ​ທຸກໆ​ມື້.

    ເລືອກ​ກິນ​ອາ­ຫານ​ທີ່​ສົດ​ໃໝ່ ແລະ ສະ­ອາດ: ເຊິ່ງ​ເປັນ​ທີ່​ແນ່­ນອນ​ຢູ່​ແລ້ວ​ວ່າ​ຈະ​ອຸ­ດົມ​ໄປ​ດ້ວຍ​ສານ​ອາ­ຫານ​ທີ່​ດີ​ຕໍ່​ສຸ­ຂະ­ພາບ ລວມ​ໄປ​ເຖິງ​ອາ­ຫານ​ທີ່​ມີ​ໄຂ­ມັນ​ຕ່ຳ ເລືອກ​ກິນ​ອາ­ຫານ​ທີ່​ມີ​ເສັ້ນ​ໄຍ​ສູງ (ໄຟ​ເບີ): ເພາະ​ຈະ​ຊ່ວຍ​ເຮັດ​ໃຫ້​ເຮົາ​ຮູ້­ສຶກ​ອີ່ມ​ໄດ້​ດົນ​ນານ​ຂຶ້ນ ໂດຍ​ບໍ່​ຈຳ­ເປັນ​ຕ້ອງ​ໄປ​ກິນ​ຂະ​ໜົມ ທີ່​ບໍ່​ມີ​ປະ­ໂຫຍດ​ທີ່​ຈະ​ເຮັດ​ໃຫ້​ເຮົາ​ມີ​ຄວາມ​ອ້ວນ​ຂຶ້ນ​ຕື່ມ.

    ຫຼີກ​ລ່ຽງ​ການ​ດື່ມ­ນ້ຳ​ໝາກ​ໄມ້: ນ້ຳ­ໝາກ​ໄມ້​ແບບ​ເປັນ​ກ໋ອງ ຫຼື ຕຸກ ເບິ່ງ​ແລ້ວ​ກໍ່​ຄື​ວ່າ​ຈະ​ຊື່ນ​ໃຈ­ດີ ແຕ່​ແນ່­ນອນ​ວ່າ​ແຄ​ລໍ​ຣີ ມັນ​ບໍ່​ແມ່ນ​ໜ້ອຍໆ​ເລີຍ ສະ­ນັ້ນ ຄວນ​ຫັນ​ມາ​ກິນ​ໝາກ​ໄມ້​ທີ່​ກິນ​ໄດ້​ທັງ​ເປືອກ ໜ້າ​ຈະ​ເປັນ​ທາງ​ເລືອກ​ທີ່​ດີ ເຊັ່ນ: ໝາກ​ແອບ​ເປິນ ໝາກ­ມ່ວງ ໝາກ​ກີ​ວີ ເປັນ­ຕົ້ນ.

    ເລືອກ​ກິນ​ອາ­ຫານ​ທີ່​ມີ​ນ້ຳ​ຫຼາຍໆ: ຢ່າງ​ໝາກ​ໄມ້ ແລະ ຜັກ ຈາກ​ການ​ຄົ້ນ­ຄວ້າ​ພົບ​ວ່າ ຄົນ​ທີ່​ກິນ​ອາ­ຫານ​ທີ່​ມີ​ນ້ຳ​ເປັນ​ສ່ວນ​ປະ­ກອບ ຈະ​ເຮັດ​ໃຫ້​ມີ​ນ້ຳ­ໜັກ​ຕ່ຳ​ກວ່າ​ຄົນ​ອື່ນ ແລະ ນ້ຳ​ໃນ​ອາ­ຫານ ຈະ​ຊ່ວຍ​ເຮັດ​ໃຫ້​ເຮົາ​ອີ່ມ​ດົນ​ຂຶ້ນ ເຊິ່ງ​ຈະ​ເຮັດ​ໃຫ້​ເຮົາ​ກິນ​ໜ້ອຍ​ລົງ.

    ເລືອກ​ກິນ​ອາ­ຫານ​ທີ່​ຊ່ວຍ​ເຜົາ​ຜານ​ໄຂ­ມັນ​ໃຫ້​ກັບ​ຕົນ​ເອງ: ການ​ເລືອກ​ກິນ​ຢ່າງ​ລະ­ມັດ­ລະ­ວັງ ຈະ​ຊ່ວຍ​ຫຼຸດ​ນ້ຳ­ໜັກ​ໂດຍ​ບໍ່​ຮູ້­ສຶກ​ຫິວ​ເລີຍ ມີ​ສານ​ອາ­ຫານ​ຫຼາຍ​ປະ­ເພດ​ທີ່​ພິ­ສູດ​ແລ້ວ ວ່າ​ຊ່ວຍ​ຫຼຸດ​ນ້ຳ­ໜັກ​ໄດ້​ບໍ່​ວ່າ​ຈະ​ເປັນ​ໝາກ­ເຜັດ ຊາ​ຂຽວ ເບີ​ຣີ ຊະ­ນິດ​ຕ່າງໆ ລວມ​ໄປ​ເຖິງ​ຈຳ­ພວກ​ທັນ​ຍາ​ພືດ​ນາໆ​ຊະ­ນິດ.

    ເພີ່ມ​ໄຂ­ມັນ​ດີ​ໃນ​ອາ­ຫານ​ເພື່ອ​ການ​ຫຼຸດ​ນ້ຳ­ໜັກ: ໄຂ­ມັນ​ບໍ່​ອີ່ມ​ຕົວ​ນັ້ນ​ໄດ້​ຮັບ​ການ​ພິ­ສູດ​ທາງ​ການ​ແພດ​ແລ້ວ​ວ່າ ຊ່ວຍ​ເຮັດ​ໃຫ້​ຮ່າງ­ກາຍ​ເຜົາ​ຜານ​ໄຂ­ມັນ​ໄດ້​ເປັນ​ຢ່າງ​ດີ ໂດຍ​ສະ­ເພາະ ຊ່ວງ​ໜ້າ​ທ້ອງ​ຂອງ​ເຮົາ ອາ­ຫານ​ທີ່​ມີ​ສ່ວນ​ປະ­ກອບ​ຂອງ​ໄຂ­ມັນ​ບໍ່​ອີ່ມ​ຕົວ​ນັ້ນ ໄດ້­ແກ່​ອາ​ໂວ​ກາ​ໂດ ນ້ຳ­ມັນ​ໝາກ­ກອກ ອາວ​ມອນ ວໍ​ນັດ ເປັນ­ຕົ້ນ.

    ກິນ​ແກງ​ໃຫ້​ຫຼາຍ​ຂຶ້ນ: ເພາະ­ວ່າ​ແກງ​ນັ້ນ​ຈະ​ມີ​ແຄ​ລໍ​ຣີ​ຂ້ອນ​ຂ້າງ​ຕ່ຳ ແລະ ຍິ່ງ​ໄປ​ກວ່າ​ນັ້ນ ຖ້າ​ຫາກ​ກິນ​ແກງ​ກ່ອນ​ອາ­ຫານ​ຫຼັກ ຈະ​ຊ່ວຍ​ເຮັດ​ໃຫ້​ເຮົາ​ກິນ​ອາ­ຫານ​ໜ້ອຍ​ລົງ​ກວ່າ​ເດີມ ແລະ ໄດ້​ຮັບ​ພະ­ລັງ­ງານ​ໜ້ອຍ​ລົງ​ຕາມ​ໄປ ຄວນ​ຫຼີກ​ລ່ຽງ​ກິນ​ອາ­ຫານ​ທີ່​ບໍ່​ມີ​ປະ­ໂຫຍດ ອາ­ຫານ​ບໍ່​ມີ​ແຄ​ລໍ​ຣີ ຈາກ​ນ້ຳ­ຕານ ຫຼື ນ້ຳ­ຕານ​ໜ້ອຍ​ຈະ​ບໍ່​ມີ​ຄຸນ­ຄ່າ​ທາງ​ອາ­ຫານ​ປານ­ໃດ.

    ກິນ​ອາ­ຫານ​ຕາມ­ໃຈ​ປາກ: ເພື່ອ​ໃຫ້​ລາ­ງວັນ​ຕົນ​ເອງ​ແດ່ ຫຼັງ​ຈາກ​ທີ່​ຄວບ​ຄຸມ​ການ​ກິນ​ໄດ້​ໃນ​ຫຼາຍໆ​ມື້ ການ​ກິນ​ໂດ​ນັດ ຫຼື ພິດ​ຊ່າ ແດ່​ໃນ​ມື້​ພັກ ເພື່ອ​ຕອບ​ສະ­ໜອງ​ຄວາມ​ຢາກ​ບໍ່​ແມ່ນ​ເລື່ອງ​ທີ່​ຜິດ​ດອກ ເພາະ​ຖ້າ​ເຮົາ​ມົວ​ແຕ່​ບັງ­ຄັບ​ຕົນ​ເອງ​ຢູ່​ທຸກ​ມື້ ມັນ​ຈະ​ກາຍ​ເປັນ­ຄວາມ​ຕຶງ​ຄຽດ ເຊິ່ງ​ຈະ​ສົ່ງ​ຜົນ​ເສຍ​ໃຫ້​ກັບ​ຮ່າງ­ກາຍ​ນັ້ນ​ເອງ.

ຂ່າວທີ່ກ່ຽວຂ້ອງ