ຂ່າວຫຼ້າສຸດ

“ໜ້າກາກເໝືອນຈິງ” ທີ່ຜະລິດໃນຍີ່ປຸ່ນ ກຳລັງເປັນທີ່ຕ້ອງການຂອງບໍລິສັດຕ່າງໆ

243 31 ມ.ກ. 2019 ຫົວຂໍ້ຂ່າວອື່ນໆ

    ໜ້າ​ກາກ​ເໝືອນ​ໃບ​ຫນ້າ​ຈິງ ທີ່​ຜະ­ລິດ​ໂດຍ​ບໍ­ລິ­ສັດ​ນ້ອຍໆ​ໃນ​ເຂດ​ຊົນ­ນະ­ບົດ​ຂອງ​ປະ­ເທດ​ຍີ່­ປຸ່ນ ກຳ­ລັງ​ເປັນ​ທີ່​ຕ້ອງ­ການ​ຂອງ​ອຸດ­ສາ­ຫະ­ກຳ​ດ້ານ​ເຕັກ​ໂນ​ໂລ​ຊີ ແລະ ຄວາມ​ບັນ­ເທີງ​ໃນ​ປະ­ເທດ ແລະ ຍັງ​ເປັນ​ທີ່​ຕ້ອງ­ການ​ຂອງ​ປະ­ເທດ​ອື່ນໆ ເຊັ່ນ: ປະ­ເທດ​ຊາ​ອຸ​ດີ​ອາ​ຣະ​ເບຍ.

    ໜ້າ​ກາກ​ເໝືອນ​ຈິງ ລາ­ຄາ 300.000 ເຢນ​ນີ້ ເຮັດ​ມາ​ຈາກ​ເຣ​ຊິ່ນ ແລະ ປຼັສ​ຕິກ ໂດຍ​ສີ­ມື​ຂອງ​ພະ­ນັກ­ງານ​ບໍ­ລິ­ສັດ REAL-f Co ຈຳ­ນວນ 5 ຄົນ ທີ່​ພະ­ຍາ­ຍາມ​ເຮັດ​ໜ້າ​ກາກ​ຮຽນ​ແບບ​ໃບ​ໜ້າ​ຂອງ​ບຸກ­ຄົນ ໂດຍ​ເກັບ​ລາຍ​ລະ­ອຽດ​ໄດ້​ທັງ​ໝົດ ບໍ່​ວ່າ​ຈະ​ເປັນ​ຮ່ອງ­ຮອຍ​ເທິງ​ໃບ​ໜ້າ ຫຼື ແມ່ນ​ແຕ່​ສະ­ພາບ​ຜິວ​ດ້ວຍ.

    ທ່ານ ໂອ­ຊາ​ມຸ ຄິ​ຕາ​ກາ​ວະ ຜູ້​ກໍ່​ຕັ້ງ​ບໍ­ລິ­ສັດ REAL-f Co. ເປັນ​ຜູ້​ລິ​ເລີ່ມ​ຄວາມ​ຄິດ​ນີ້ ໃນ​ຂະ­ນະ​ທີ່​ເຮັດ​ວຽກ​ຢູ່​ກັບ​ບໍ­ລິ­ສັດ​ຜູ້​ຜະ­ລິດ​ເຄື່ອງ­ພິມ ແຕ່​ເຂົາ​ຕ້ອງ​ໃຊ້​ເວ­ລາ​ເຖິງ​ສອງ​ປີ​ໃນ​ການ​ທົດ​ລອງ ກ່ອນ​ທີ່​ຈະ​ຄົ້ນ​ພົບ​ວິ­ທີ​ນຳ​ຂໍ້​ມູນ​ໃບ​ໜ້າ​ສາມ​ມິ​ຕິ​ຈາກ​ພາບ​ຖ່າຍ​ຄວາມ​ລະ­ອຽດ​ສູງ ເພື່ອ​ໃຊ້​ໃນ​ການ​ເຮັດ​ໜ້າ​ກາກ ແລະ ເລີ່ມ​ຈຳ­ໜ່າຍ​ເປັນ​ຄັ້ງ​ທຳ​ອິດ​ໃນ​ປີ 2011.

    ບໍ­ລິ­ສັດ REAL-f Co. ເຊິ່ງ​ຕັ້ງ​ຢູ່​ທາງ​ຕາ­ເວັນ­ຕົກ​ຂອງ​ແຂວງ​ຊິ​ງະ ໄດ້​ຮັບ​ໃບ​ສັ່ງ​ຜະ­ລິດ​ໜ້າ​ກາກ​ປະ­ມານ​ປີ​ລະ 100 ອັນ ຈາກ​ບໍ­ລິ­ສັດ​ດ້ານ​ຄວາມ​ບັນ­ເທີງ​ລົດ ເຕັກ​ໂນ​ໂລ​ຊີ ແລະ ການ​ຮັກ­ສາ​ຄວາມ​ປອດ​ໄພ ທີ່​ສ່ວນ​ໃຫຍ່​ຈະ​ຢູ່​ໃນ​ປະ­ເທດ​ຍີ່­ປຸ່ນ.

    ທ່ານ ຄິ​ຕາ​ກາ​ວະ ຍົກ​ຕົວ­ຢ່າງ​ຂອງ​ການ​ໃຊ້​ງານ​ໜ້າ​ກາກ​ເຫຼົ່າ​ນີ້ ເຊັ່ນ: ບໍ­ລິ­ສັດ​ລົດ​ໃຫຍ່​ຂອງ​ຍີ່­ປຸ່ນ ສັ່ງ​ໜ້າ​ກາກ​ໃບ​ໜ້າ​ໃນ​ຂະ­ນະ​ນອນ​ຫຼັບ ເພື່ອ​ນຳ­ໄປ​ປັບ­ປຸງ​ເຕັກ​ໂນ​ໂລ​ຊີ​ລະ­ບົບ​ຈົດ​ຈຳ​ໃບ​ໜ້າ​ຂອງ​ທາງ​ບໍ­ລິ­ສັດ ເພື່ອ​ກວດ​ສອບ​ວ່າ​ຜູ້​ຂັບ​ຂີ່​ມີ​ອາ­ການ​ຫຼັບ​ໃນ​ຫຼື​ບໍ່.

    ນອກ­ຈາກ​ນີ້ ທ່ານ ຄິ​ຕາ​ກາ​ວະ ຊຶ່ງ​ມີ​ອາ­ຍຸ 60 ປີ​ແລ້ວ ກ່າວ​ວ່າ ເຂົາ​ຍັງ​ໄດ້​ຮັບ​ໃບ​ສັ່ງ​ຊື້​ສິນ­ຄ້າ​ຈາກ​ໜ່ວຍ​ງານ​ຕ່າງໆ​ທີ່​ກ່ຽວ­ຂ້ອງ​ກັບ​ລັດ­ຖະ­ບານ ຊາ​ອຸ​ດີ​ອາ​ຣະ​ເບຍ ໃນ​ການ​ຜະ­ລິດ​ໜ້າ​ກາກ​ສຳ­ລັບ​ກະ­ສັດ ແລະ ບັນ­ດາ​ເຈົ້າ​ຊາຍ ເພື່ອ​ນຳ­ໄປ​ສະ­ແດງ​ໃນ​ທີ່​ສາ­ທາ­ລະ­ນະ​ອີກ​ດ້ວຍ.

    ທ່ານ ຄິ​ຕາ​ກາ​ວະ ກ່າວ​ວ່າ ເຂົາ​ເຮັດ​ວຽກ​ຮ່ວມ​ກັບ​ລູກ​ຄ້າ​ທຸກ​ຄົນ​ຢ່າງ​ຮອບ​ຄອບ ເພື່ອ​ໃຫ້​ແນ່​ໃຈ​ວ່າ ຜະ­ລິດ​ຕະ​ພັນ​ຂອງ​ເຂົາ​ຈະ​ບໍ່​ຖືກ​ນຳ​ມາ​ໃຊ້​ໃນ​ທາງ​ທີ່​ຜິດ​ກົດ­ໝາຍ ແລະ ກໍ່­ໃຫ້­ເກີດ​ຄວາມ​ສ່ຽງ​ໃນ​ດ້ານ​ຄວາມ​ປອດ​ໄພ ແຕ່​ກໍ​ຍອມ­ຮັບ​ວ່າ ບັນ­ຫາ​ດັ່ງ­ກ່າວ​ກໍ​ຍັງ​ອາດ​ເກີດ​ຂຶ້ນ​ໄດ້.

  ເປົ້າ​ໝາຍ​ຂອງ​ທ່ານ ຄິ​ຕາ​ກາ​ວະ ກໍ​ຄື ການ​ຜະ­ລິດ​ໜ້າ​ກາກ​ທີ່​ເໝືອນ​ໃບ​ໜ້າ​ຈິງ 100% ແລະ ເຂົາ​ຫວັງ​ວ່າ​ຈະ​ສາ­ມາດ​ໃຊ້​ວັດ​ສະ​ດຸ​ທີ່​ອ່ອນ​ນຸ່ມ ເຊັ່ນ: ຊິ​ລິ​ຄອນ ມາ​ຜະ­ລິດ​ໜ້າ​ກາກ​ໄດ້​ໃນ​ອະ­ນາ­ຄົດ.

    ທ່ານ ໂອ­ຊາ​ມຸ ຄິ​ຕາ​ກາ​ວະ ຜູ້​ກໍ່​ຕັ້ງ​ບໍ­ລິ­ສັດ REAL-f Co. ກ່າວ​ສົ່ງ​ທ້າຍ​ວ່າ ເຂົາ​ຕ້ອງ­ການ​ໃຫ້​ໜ້າ​ກາກ​ເຫຼົ່າ​ນີ້​ຖືກ​ນຳ­ໄປ​ໃຊ້ ເພື່ອ​ປະ­ໂຫຍດ​ທາງ​ດ້ານ​ການ​ແພດ ເຊິ່ງ​ເລື່ອງ​ນີ້​ຈະ​ສາ­ມາດ​ເປັນ​ໄປ​ໄດ້ ຫາກ​ຜະ­ລິດ​ໜ້າ​ກາກ​ເໝືອນ​ໃບ​ໜ້າ​ຈິງ​ດ້ວຍ​ວັດ​ສະ​ດຸ​ທີ່​ອ່ອນ​ນຸ່ມ ແລະ ຫວັງ​ວ່າ​ໜ້າ​ກາກ​ເຫຼົ່າ​ນີ້ ຈະ​ສາ­ມາດ​ຊ່ວຍ​ໃນ​ການ​ຜະ­ລິດ​ຫຸ່ນ​ຍົນ​ທີ່​ເບິ່ງ ເໝືອນ​ມະ­ນຸດ​ຢ່າງ​ແທ້​ຈິງ​ໄດ້​ໃນ​ລາ­ຄາ​ຖືກ​ອີກ​ດ້ວຍ.

ຂ່າວທີ່ກ່ຽວຂ້ອງ