ເບິ່ງບ້ານເຂົາເອົາບົດຮຽນ 31/01/2019

276 31 ມ.ກ. 2019 ຫົວຂໍ້ຂ່າວອື່ນໆ

    ບົດ​ປະ­ຈຳ​ວັນ​ນີ້ ນຳ​ສະ­ເໜີ​ຂ່າວ​ການ​ປາບ​ປາມ​ອາ​ຊະ​ຍາ​ກຳ​ຄ້າ​ມະ­ນຸດ ຢູ່ ກຳ­ປູ­ເຈຍ ຕໍ່​ໃສ່​ຂ່າວ​ການ​ບຸກ​ກວດ​ຄົ້ນ​ຮ້ານ​ອາ­ຫານ​ສັດ­ປ່າ​ຢູ່​ໄທ.

    ທີ່ ກຳ­ປູ­ເຈຍ: 2018 ເປັນ​ປີ​ແຫ່ງ​ຜົນ­ສຳ­ເລັດ​ຄັ້ງ​ສຳ­ຄັນ​ຂອງ​ກຳ­ປູ­ເຈຍ ໃນ​ການ​ປາບ​ປາມ​ອາ​ຊະ​ຍາ​ກຳ​ຄ້າ​ມະ­ນຸດ ນັບ​ແຕ່​ເດືອນ​ມັງ­ກອນ​ຮອດ​ໝົດ​ເດືອນ​ຕຸ­ລາ ປີ 2018 ທາງ​ການ​ກຳ­ປູ­ເຈຍ ສາ­ມາດ​ແກ້​ໄຂ​ຄະ­ດີ​ອາ​ຊະ​ຍາ​ກຳ​ຄ້າ​ມະ­ນຸດ​ໄດ້ 109 ເລື່ອງ ຫຼຸດ​ລົງ 15,5% ທຽບ­ໃສ່​ໄລ­ຍະ​ດຽວ​ກັນ​ຂອງ​ປີ 2017 ໃນ​ປີ 2017 ຄະ­ດີ​ປະ­ເພດ​ດຽວ​ກັນ​ນີ້ ໄດ້​ຮັບ​ການ​ແກ້​ໄຂ 129 ເລື່ອງ ໃນ 109 ຄະ­ດີ ທີ່​ແກ້​ໄດ້ ພາຍ​ໃນ​ປີ 2018 ນັ້ນ 75% ແມ່ນ​ກ່ຽວ​ກັບ​ອາ​ຊະ​ຍາ​ກຳ​ຄ້າ​ມະ­ນຸດ​ເພື່ອ​ຈຸດ­ປະ­ສົງ​ທາງ​ເພດ 69 ຄົນ ໃນ 189 ຄົນ ທີ່​ໄດ້​ຮັບ​ການ​ຊ່ວຍ­ເຫຼືອ​ນັ້ນ ຈາກ​ການ​ຄ້າ​ມະ­ນຸດ​ທາງ​ເພດ​ນັ້ນ ມີ​ອາ­ຍຸ​ຕ່ຳ​ກວ່າ 15 ປີ ທຽບ​ກັບ 253 ຄົນ ໃນ​ປີ 2017 ໃນ​ຂະ­ນະ​ທີ່​ຈຳ­ນວນ​ອາ​ຊະ​ຍາ​ກຳ​ຫຼຸດ​ລົງ​ນັ້ນ ຈຳ­ນວນ​ຜູ້​ຕິດ​ຄະ­ດີ​ຜັດ​ເພີ່ມ​ຂຶ້ນ​ເປັນ​ຈຳ­ນວນ 185 ຄົນ ທຽບ​ກັບ 158 ຄົນ ໃນ​ປີ 2017 ບົດ​ສະ­ຫຼຸບ​ລາຍ​ງານ​ກ່ຽວ​ກັບ​ການ​ຄ້າ​ມະ­ນຸດ​ຂອງ​ກຳ­ປູ­ເຈຍ ປະ­ຈຳ​ປີ 2018 ນີ້ ສັງ​ລວມ​ມາ​ຈາກ​ສະ​ຖາ​ບັນ​ຕຳ­ຫຼວດ 17 ແຫ່ງ ສຳ­ນັກ­ງານ​ຕຳ­ຫຼວດ​ແຫ່ງ​ຊາດ ສຳ­ນັກ­ງານ​ສາ­ລະ­ວັດ​ທະ­ຫານ​ແຫ່ງ​ຊາດ ສຳ­ນັກ­ງານ​ຕຳ­ຫຼວດ​ນະ­ຄອນ­ຫຼວງ​ພະ­ນົມ​ເປັນ ສຳ­ນັກ­ງານ​ຕຳ­ຫຼວດ 5 ແຂວງ​ຕົ້ນ­ຕໍ ແລະ ອີກ 10 ແຂວງ ພ້ອມ​ດຽວ​ກັນ​ນັ້ນ ທາງ​ກະ­ຊວງ​ການ​ຕ່າງ­ປະ­ເທດ ແລະ ຮ່ວມ​ມື​ສາ­ກົນ​ຂອງ​ກົດ­ໝາຍ ກໍ​ໄດ້​ຮັບ​ເອົາ​ຜູ້​ທີ່​ຕົກ​ເປັນ​ເຫຍື່ອ​ການ​ຄ້າ​ມະ­ນຸດ​ກັບ​ຄືນ​ປະ­ເທດ​ຈາກ ມາ​ເລ​ເຊຍ ຈີນ ຫວຽດ­ນາມ ໄທ ສິງ­ກະ­ໂປ ອາ​ຣາ​ບີ​ຊາ​ອຸ​ດິດ ແລະ ອິນ​ໂດ​ເນ​ເຊຍ ທ່ານ​ນາງ ຊູ ບຸນ​ເອັງ ຮອງ​ປະ­ທານ​ຄະ­ນະ​ກຳ­ມາ​ທິ​ການ​ລະ­ດັບ​ຊາດ​ຕ້ານ​ການ​ຄ້າ​ມະ­ນຸດ ກໍ​ໄດ້​ມີ​ຄຳ​ເຫັນ​ວ່າ ໃນ­ຕໍ່­ໜ້າ​ທາງ​ຄະ­ນະ​ກຳ­ມາ​ທິ​ການ ຈະ​ເພີ່ມ​ຄວາມ​ເຂັ້ນ​ແຂງ​ໃນ​ການ​ປະ­ຕິ­ບັດ​ກົດ­ໝາຍ​ຕ້ານ​ອາ​ຊະ​ຍາ​ກຳ​ຄ້າ​ມະ­ນຸດ ໂດຍ​ສະ­ເພາະ​ແມ່ນ​ການ​ຄ້າ​ມະ­ນຸດ ເພື່ອ​ເປົ້າ​ໝາຍ​ຂູດ​ຮີດ​ແຮງ​ງານ ແລະ ທາງ​ເພດ ການ​ຄ້າ​ອະ​ໄວ​ຍະ​ວະ​ມະ­ນຸດ ການ​ຄ້າ​ເດັກ­ນ້ອຍ ແລະ ການ​ຖື­ພາ​ມານ​ແທນ (ອູ້ມ​ບຸນ) ແລະ ວ່າ​ຈະ​ເຮັດ​ເອ­ກະ­ສານ​ບັນ­ທຶກ​ຄວາມ​ຈຳ​ກັບ​ບັນ­ດາ​ປະ­ເທດ​ເຈົ້າ­ພາບ​ຕ່າງໆ ເພື່ອ​ປົກ​ປ້ອງ​ສິດ​ຂອງ​ຊາວ​ປະ­ມົງ ແລະ ແຮງ​ງານ​ເຄື່ອນ​ຍ້າຍ​ກຳ­ປູ­ເຈຍ.

    ທີ່​ປະ­ເທດ ໄທ: ລົດ​ນິ­ຍົມ​ກິນ​ອາ­ຫານ​ແປກໆ​ແບບ​ສຸດ​ຂົ້ວ​ໃນ​ປະ­ເທດ​ໄທ ໄດ້​ໃຫ້​ກຳ­ເນີດ​ຮ້ານ​ອາ­ຫານ​ບໍ­ລິ­ການ​ຊີ້ນ​ງູ ແລະ ສັດ​ປະ­ເພດ​ຫວງ​ຫ້າມ​ອື່ນໆ​ຫຼາຍ​ແຫ່ງ ແຕ່​ສຸດ​ທ້າຍ​ກໍ​ໄປ​ບໍ່​ລອດ​ເງື່ອມ​ມື​ເຈົ້າ​ໜ້າ­ທີ່​ຕຳ­ຫຼວດ ດັ່ງ​ຂ່າວ​ທີ່​ອ່ານ​ພົບ​ໃນ​ໜັງ­ສື­ພິມ ເດິ​ເນ​ເຊິນ (The Nation) ສະ­ບັບ​ວັນ​ທີ 11 ສິງ­ຫາ 2017 ທີ່​ໃຫ້​ຮູ້​ວ່າ ເຈົ້າ​ໜ້າ­ທີ່​ຕຳ­ຫຼວດ ແລະ ພາກ­ສ່ວນ​ກ່ຽວ­ຂ້ອງ ໄດ້​ບຸກ​ເຂົ້າ​ກວດ​ຄົ້ນ​ຮ້ານ​ອາ­ຫານ​ແຫ່ງ​ໜຶ່ງ​ຢູ່​ຖະ­ໜົນ ສີ​ວາ​ຣາ ເຂດ​ວັງ​ທອງ​ຫຼັງ ບາງ­ກອກ ແລະ ໄດ້​ກິນ​ອາ­ຫານ​ຈານ​ພິ­ເສດ​ຄົວ​ດ້ວຍ​ຊີ້ນ​ງູ ຕັ້ງ​ບໍ­ລິ­ການ​ຢູ່​ໂຕະ​ອາ­ຫານ ນອກ​ນັ້ນ​ຍັງ​ໄດ້​ພົບ​ຊີ້ນ​ງູ​ຕັດ​ເປັນ​ຕ່ອນ ແຊ່​ເຄື່ອງ­ປຸງ​ໄວ້​ໃນ​ຖັງ​ໃຫຍ່ 9 ໜ່ວຍ ໄດ້​ພົບ​ງູ​ເປັນໆ 2 ໂຕ ເຕົ່າ​ວັດ​ຫົວ​ເຫຼືອງ 1 ໂຕ ເຕົ່າ​ກາ 21 ໂຕ ຊາກ​ຫຼິ່ນ 1 ໂຕ ແລະ ເກັດ​ຫຼິ່ນ 90 ກຼາມ ເຈົ້າ​ຂອງ​ຮ້ານ​ຊື່ ທ້າວ ຈາ​ມູ​ແຊ​ຢີ ອາ­ຍຸ 66 ປີ ຈາກ​ຊຽງ​ຣາຍ ຖືກ​ຈັບ​ກຸມ​ໃນ​ຂໍ້​ຫາ​ລະ­ເມີດ​ກົດ­ໝາຍ​ອະ­ນຸ​ຮັກ​ສັດ­ປ່າ ປີ 1992 ຂ່າວ​ບອກ​ວ່າ ຖ້າ​ພົບ​ວ່າ​ມີ​ຄວາມ​ຜິດ​ຈິງ​ຜູ້­ກ່ຽວ​ກໍ​ຈະ​ໄດ້​ຮັບ​ໂທດ​ຕິດ​ຄຸກ 4 ປີ ແລະ ເສຍ​ຄ່າ​ປັບ​ໃໝ 40.000 ບາດ ກ່ອນ​ໜ້າ​ນັ້ນ ຮ້ານ​ອາ­ຫານ​ແຫ່ງ​ນີ້ ເຄີຍ​ຖືກ​ບຸກ​ຄົ້ນ​ມາ ແລະ ສັ່ງ​ປິດ​ມາ​ແລ້ວ ໃນ​ວັນ​ທີ 6 ມັງ­ກອນ 2017 ຍ້ອນ​ມີ​ເຕົ່າ​ເປັນໆ 1 ໂຕ​ໄວ້​ໃນ​ຄອບ​ຄອງ ແຕ່​ຫຼັງ​ຈາກ​ນັ້ນ ຮ້ານ​ໄດ້​ລັກ­ລອບ​ສືບ­ຕໍ່​ເປີດ​ບໍ­ລິ­ການ​ຄືນ ດັ່ງ­ນັ້ນ ເຈົ້າ​ໜ້າ­ທີ່​ຕຳ­ຫຼວດ​ຈຶ່ງ​ໄດ້​ປະ­ຕິ­ບັດ​ການ​ຄືນ­ໃໝ່ ທ້າວ ຈາມ ເຈົ້າ​ຂອງ​ຮ້ານ​ແຈ້ງ​ໃຫ້​ເຈົ້າ​ໜ້າ­ທີ່​ຕຳ­ຫຼວດ​ຊາບ​ວ່າ: ຕົນ​ໄດ້​ເປີດ​ບໍ­ລິ­ການ​ຮ້ານ​ອາ­ຫານ​ແຫ່ງ​ນີ້​ມາ​ໄດ້ 7-8 ປີ​ແລ້ວ ແລະ ກາຍ­ເປັນ​ທີ່​ນິ­ຍົມ​ໃຊ້​ບໍ­ລິ­ການ​ນັກ​ທ່ອງ​ທ່ຽວ​ຈີນ ທີ່​ຊອກ​ກິນ​ອາ­ຫານ​ເຍື່ອງ​ແປກໆ ຮ້ານ​ອາ­ຫານ​ເອງ ກໍ​ໄດ້​ໂຄ­ສະ­ນາ​ວ່າ ອາ­ຫານ​ຈານ​ແປກ​ຂອງ​ຕົນ​ນັ້ນ ມີ​ສັບ­ພະ​ຄຸນ​ທາງ​ການ​ຢາ​ກິນ​ແລ້ວ​ມີ​ກຳ­ລັງ­ວັງ­ຊາ ອຸດ­ສາ­ຫະ­ກຳ​ທ່ອງ​ທ່ຽວ​ນັ້ນ ຖ້າ​ຄວບ​ຄຸມ​ດີ​ກໍ​ຈະ​ໃຫ້​ປະ­ໂຫຍດ​ມະ­ຫາ­ສານ ແຕ່​ຖ້າ​ຕາມ​ແຕ່​ໃຈ​ແຂກ​ໂພດ ເພື່ອ​ດຶງ​ດູດ​ນັກ​ທ່ອງ​ທ່ຽວ​ໃຫ້​ໄດ້​ຫຼາຍ​ແລ້ວ ກໍ​ອາດ​ເຮັດ​ໃຫ້​ເປົ້າ​ໝາຍ​ການ­ທ່ອງ­ທ່ຽວ​ເວ​ໄປ​ທາງ​ອີ່​ເຕືອກ.

ຂ່າວທີ່ກ່ຽວຂ້ອງ