ຂ່າວຫຼ້າສຸດ

ເສດຖະກິດ ສ ອາ​ເມ​ຣິ​ກາ ເສຍ​ຫາຍ​ຢ່າງ​ໜັກ​ຍ້ອນ​ລັດຖະບານ​ປິດ​ການ​ເຮັດ​ວຽກ​ສ່ວນ​ໜຶ່ງ

432 30 ມ.ກ. 2019 ຂ່າວຕ່າງປະເທດ
ເສດຖະກິດ ສ ອາ​ເມ​ຣິ​ກາ ເສຍ​ຫາຍ​ຢ່າງ​ໜັກ​ຍ້ອນ​ລັດຖະບານ​ປິດ​ການ​ເຮັດ​ວຽກ​ສ່ວນ​ໜຶ່ງ

    Standard & Poor (S&P) ຊຶ່ງ​ເປັນ​ອົງການ​ຈັດ​ອັນ​ດັບ​ຄວາມ​ເຊື່ອ​ຖື​ລະດັບ​ແຖວ​ໜ້າ​ຂອງ​ໂລກ ໄດ້​ເປີດເຜີຍ​ບົດ​ລາຍ​ງານ​ອອກ​ມາ​ເມື່ອ​ບໍ່​ດົນ​ມາ​ນີ້ ຊີ້​ໃຫ້​ເຫັນ​ວ່າ ພື້ນຖານ​ເສດຖະກິດ ສ ອາ​ເມ​ຣິ​ກາ ໄດ້​ເສຍ​ຫາຍ​ໄປ​ຢ່າງ​ໜ້ອຍ 6 ຕື້​ໂດ​ລາ​ສະຫະລັດ ພາຍ​ໃນ 35 ວັນ ທີ່​ລັດຖະບານ​ປິດ​ການ​ເຮັດ​ວຽກ​ໄປ​ສ່ວນ​ໜຶ່ງ. ນີ້​ເປັນ​ການ​ປິດ​ລັດຖະບານ ທີ່​ເກີດ​ຄວາມ​ເສຍ​ຫາຍ​ຫຼາຍ​ທີ່​ສຸດ​ໃນ​ປະວັດ​ສາດ​ຂອງ ສ ອາ​ເມ​ຣິ​ກາ.

    ທີ່​ໜ້າ​ເອີ່ຍ​ເຖິງ​ກໍ​ຄື​ວ່າ ຕົວ​ເລກ​ຄວາມ​ເສຍ​ຫາຍ​ດັ່ງກ່າວ ສູງ​ກວ່າ​ລະດັບ​ໃຊ້​ຈ່າຍ​ທີ່​ເກີດ​ການ​ຖົກ​ຖຽງ​ທີ່ 5,7 ຕື້​ໂດ​ລາ​ສະຫະລັດ ຊຶ່ງ​ປະທານາທິບໍດີ ໂດ​ນາ​​ລ ທຣຳ ນຳ​ສະເໜີ ເພື່ອ​ນຳໄປ​ສ້າງ​ກຳແພງ​ຕາມ​ຊາຍ​ແດນ​ຕິດ​ກັບ​ປະເທດ​ເມັກ​ຊິກ ທີ່​ເປັນ​ສາເຫດ​ນຳໄປ​ສູ່​ການ​ທີ່​ລັດຖະບານ ສ ອາ​ເມ​ຣິ​ກາ ຕ້ອງ​ປິດ​ການ​ເຮັດ​ວຽກ​ໄປ​ບາງ​ສ່ວນ.

    ກຳແພງ​ກີດ​ກັນ ລະຫວ່າງ​ເມັກ​ຊິກ ກັບ ສ ອາ​ເມ​ຣິ​ກາ ທີ່​ຖື​ວ່າ​ສາມາດ​ສະກັດ​ກັ້ນ​ຜູ້​ເຂົ້າ​ໄປ​ຕັ້ງ​ຖິ່ນ​ຖານ 144.000 ຄົນ ທີ່​ມາ​ຈາກ​ອາ​ເມ​ຣິກ​ກາ​ກາງ ແລະ ​ເພີ່ມ​ລາຍ​ຮັບ​ໃຫ້​ແກ່​ຜູ້​ອອກແຮງ​ງານ​ທີ່​ມີ​ສີມື​ຕ່ຳ​ຂຶ້ນ​ຕື່ມ 58 ເຊັນ/ປີ ໃນ​ຂະນະ​ທີ່​ປະຊາຊົນ​ຄົນ​ອາ​ເມ​ຣິ​ກັນ ຈະ​ຕ້ອງ​ໄດ້​ຈົກ​ເງິນ​ອອກ​ມາ 15 ໂດ​ລາ​ສະຫະລັດ ເພື່ອ​ສ້າງ​ກຳແພງ​ດັ່ງກ່າວ.

    ໃນ​ຂະນະ​ດຽວ​ກັນ ບົດ​ລາຍ​ງານ​ຂອງ​ຫ້ອງການ​ງົບປະມານ​ຂອງ​ສະພາ​ແຫ່ງ​ຊາດ (CBO) ຂອງ ສ ອາ​ເມ​ຣິ​ກາ ທີ່​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 28 ມັງກອນ​ນີ້ ຊີ້​ອອກ​ວ່າ ເສດຖະກິດ ສ ອາ​ເມ​ຣິ​ກາ ໄດ້​ຮັບ​ຄວາມ​ເສຍ​ຫາຍ​ປະມານ 11 ຕື້ ໂດ​ລາ​ສະຫະລັດ ຍ້ອນ​ການ​ທີ່​ລັດຖະບານ​ປິດ​ການ​ເຮັດ​ວຽກ​ໄປ​ບາງ​ສ່ວນ ໃນ 5 ອາທິດ​ທີ່​ຜ່ານ​ມາ. ເຖິງ​ຢ່າງໃດ​ກໍ​ຕາມ CBO ໃຫ້ການ​ຄາດ​ຄະເນ​ວ່າ ພື້ນຖານ​ເສດຖະກິດ ສ ອາ​ເມ​ຣິ​ກາ ທີ່​ມີ​ຂະໜາດ​ໃຫຍ່​ສຸດ​ໃນ​ໂລກ​ນັ້ນ​ຈະ “ແກ້​ໄຂ” ໄດ້ 8 ຕື້​ໂດ​ລາ​ສະຫະລັດ ເມື່ອ​ລັດຖະບານ​ເປີດ​ການ​ເຮັດ​ວຽກ​ຄືນໃໝ່.

 

ຂ່າວທີ່ກ່ຽວຂ້ອງ