ຂ່າວຫຼ້າສຸດ

ຜູ້​ຍ້າຍ​ຖິ່ນ​ຖານ​ຖືກ​ໂຈມ​ຕີ​ຢູ່​ໃນ​ກົວ​ເຕ​ມາລາ

472 30 ມ.ກ. 2019 ຂ່າວຕ່າງປະເທດ
ຜູ້​ຍ້າຍ​ຖິ່ນ​ຖານ​ຖືກ​ໂຈມ​ຕີ​ຢູ່​ໃນ​ກົວ​ເຕ​ມາລາ

      ອົງການ​ທີ່​ກ່ຽວຂ້ອງ​ຂອງ​ເມັກ​ຊິກ ແຈ້ງ​ໃຫ້​ຮູ້ເມື່ອ​ວັນ​ທີ 27 ມັງກອນ​ນີ້​ວ່າ ຜູ້​ຍ້າຍ​ຖິ່ນ​ຖານ​ຊາວ​ຮອນ​ດູ​​ຣັສ ແລະ ແອ​​ລ ຊາ​ລວາ​ດໍ ຢ່າງ​ໜ້ອຍ 3.000 ຄົນ ໄດ້​ພາກັນ​ລຸ​ຫຼັ່ງ​ເຂົ້າ​ໄປ​ໃນ​ປະເທດ​ເມັກ​ຊິກ ຫຼັງ​ຈາກ​ທີ່​ພວກ​ເຂົາ​ຖືກ​ໂຈມ​ຕີ​ຢູ່​ໃນ​ເມືອງ ເຕ​ກຸນ ອູ​ມານ ຂອງ​ກົວ​ເຕ​ມາລາ ທີ່​ຕິດ​ກັບ​ຊາຍ​ແດນ​ເມັກ​ຊິກ.

    ເຫດການ​ດັ່ງກ່າວ​ເກີດ​ຂຶ້ນ​ໃນ​ຕອນ​ແລງ​ຂອງ​ວັນ​ທີ 27 ມັງກອນ ເມື່ອ​ມີ​ຊາວ​ກົວ​ເຕ​ມາລາ​ກຸ່ມ​ໜຶ່ງ​ປະມານ 500 ຄົນ ໃຊ້​ໄມ້ຄ້ອນ ແລະ​ກ້ອນ​ຫີນ ໂຈມ​ຕີ​ຜູ້​ຍ້າຍ​ຖິ່ນ​ຖານ ທີ່​ພັກ​ຢູ່​ໃນ​ສະໜາມ​ຫຼວງ​ໃນ​ເມືອງ​ດັ່ງກ່າວ ເພື່ອ​ລໍຖ້າ​ຮັບ​ບັດ​ເຂົ້າ​ເມືອງ ຫຼື​ບັດ​ອາ​ໃສ​ຊົ່ວຄາວ​ຢູ່​ໃນ​ເມັກ​ຊິກ. ຫຼັງ​ຈາກ​ຖືກ​ໂຈມ​ຕີ​ແລ້ວ ຜູ້​ລີ້​ໄພ​ເຫຼົ່ານັ້ນ ກໍ​ໄດ້​ຂ້າມ​ຂົວ​ແຫ່ງ​ໜຶ່ງ​ທີ່​ໃຊ້​ເປັນ​ຊາຍ​ແດນ  ເພື່ອ​ເຂົ້າ​ໄປ​ໃນ​ປະເທດ​ເມັກ​ຊິກ.

     ແຫຼ່ງ​ຂ່າວ​ໃນ​ທ້ອງຖິ່ນ​ໃຫ້​ຮູ້​ວ່າ ປະຊາຊົນ​ໃນ​ເມືອງ ເຕ​ກຸນ ອູ​ມານ ໄດ້​ສະແດງ​ອອກ​ເຖິງ​ຄວາມ​ໂກດ​ແຄ້ນ ແລະ ​ກ່າວ​ປະນາມ​ຜູ້​ລີ້​ໄພ ວ່າ​ຕ້ອງ​ຮັບຜິດຊອບ​ຕໍ່​ສະພາບ​ຂາດ​ຄວາມ​ສະຫງົບ ແລະ​ຄວາມ​ເປັນ​ລະບຽບ​ຮຽບ​ຮ້ອຍ ຢູ່​ໃນ​ເມືອງ​ນີ້.

    ສະ​ຖາ​ບັນ​ຍ້າຍ​ບ່ອນຢູ່​ອາ​ໃສ​ຂອງ​ເມັກ​ຊິກ ໃຫ້​ຮູ້​ວ່າ ປັດຈຸບັນ​ນີ້ ມີ​ຜູ້​ຍ້າຍ​ຖິ່ນ​ຖານ​ຊາວ​ອາ​ເມ​ຣິ​ກາ​ກາງ​ຢ່າງ​ໜ້ອຍ 10.000 ຄົນ ຊຶ່ງ​ຕົ້ນຕໍ​ແມ່ນ​ຊາວ​ຮອນ​ດູ​​ຣັສ ພວມ​ຕັ້ງ​ຄ້າຍ​ຢູ່​ຕາມ​ແຄມ​ຝັ່ງ​ແມ່ນ້ຳ ຊູ​ເຈຍ​ເຕ ທີ່​ເປັນ​ຊາຍ​ແດນ​ລະຫວ່າງ​ກົວ​ເຕ​ມາລາ ກັບ​ເມັກ​ຊິກ ແລະ ​ຢູ່​ໃນ​ເຂດ​ອາ​ໃສ​ຊົ່ວຄາວ ໃນ​ເມືອງ ຮີ​ດາ​​ລ​ໂກ ໃນ​ເຂດ​ພາກ​ໃຕ້​ລັດເຊຍ​ປາ​​ສ ຂອງ​ເມັກ​ຊິກ ເພື່ອ​ປະກອບ​ເອກະສານ​ອາ​ໃສ​ຊົ່ວຄາວ ຫຼື​ບັດ​ເຂົ້າ​ເມືອງ ດ້ວຍ​ເຫດຜົນ​ທາງ​ດ້ານ​ມະນຸດສະທຳ.

ຂ່າວທີ່ກ່ຽວຂ້ອງ