ເບິ່ງບ້ານເຂົາເອົາບົດຮຽນ 30/01/2019

329 30 ມ.ກ. 2019 ຫົວຂໍ້ຂ່າວອື່ນໆ

    ມື້­ນີ້ ເລື່ອງ​ທີ່​ຄວນ​ເບິ່ງ​ໄວ້​ເປັນ​ບົດ­ຮຽນ​ປະ­ກອບ​ດ້ວຍ​ຂ່າວ ການ​ເກັບ​ພາ­ສີ​ນັກ​ທ່ອງ​ທ່ຽວ​ຢູ່ ນູ​ແວນ​ເຊ​ລັງ ຂ່າວ​ທາງ​ການ​ຈີນ ຕັດ­ສິນ​ລົງ­ໂທດ​ຈຳ​ຄຸກ​ນັກ​ປະ­ພັນ​ຍິງ​ຄົນ​ໜຶ່ງ ເປັນ​ເວ­ລາ 10 ປີ ຍ້ອນ​ຄວາມ​ຜິດ​ທີ່​ໄດ້​ພິມ​ປື້ມ​ກ່ຽວ​ກັບ​ການ​ມີ​ເພດ​ສຳ­ພັນ ຢ່າງ​ເປີດ​ແປນ​ຂອງ​ກຸ່ມ​ຜູ້​ຮັກ​ຮ່ວມ​ເພດ ແລະ ການ​ແກ້​ໄຂ​ສະ­ພາບ​ຂາດ­ແຄນ​ແຮງ​ງານ​ຢູ່​ຍີ່­ປຸ່ນ.

    ທີ່ ນູ​ແວນ​ເຊ​ລັງ (ນິວ​ຊີ​ແລນ): ລະ­ຫວ່າງ​ກາງ​ປີ 2018 ມີ​ຂ່າວ​ວ່າ ທາງ​ການ​ນູ​ແວນ​ເຊ​ລັງ ໄດ້​ຕົກ­ລົງ​ແຜນ​ເກັບ​ພາ­ສີ​ນັກ​ທ່ອງ​ທ່ຽວ​ຕ່າງ­ປະ­ເທດ ສູງ​ສຸດ 35 ໂດ​ລາ​ນິວ​ຊີ​ແລນ ຕໍ່​ຄົນ (1 ໂດ​ລາ​ສະ­ຫະ­ລັດ​ແລກ​ໄດ້ 1,25 ໂດ​ລາ​ນູ​ແວນ​ເຊ​ລັງ) ໂດຍ​ຈະ​ເລີ່ມ​ເກັບ​ນັບ​ແຕ່​ກາງ​ປີ 2019 ນີ້​ເປັນ­ຕົ້ນ​ໄປ ຮູບ​ການ​ເກັບ​ຈະ​ເຮັດ​ພ້ອມໆ​ກັບ​ການ​ອອກ​ວີ​ຊາ​ເລີຍ ນັກ​ທ່ອງ​ທ່ຽວ​ປະ­ເທດ​ດຽວ ທີ່​ຈະ​ຖືກ​ຍົກ­ເວັ້ນ​ການ​ເກັບ​ພາ­ສີ ກໍ​ຄື ພົນ­ລະ­ເມືອງ​ອົດ​ສະ​ຕຣາ​ລີ ເພາະ​ເປັນ​ປະ­ເທດ​ແຖວ​ໜ້າ­ທີ່​ມີ​ຄົນ​ໄປ​ທ່ຽວ​ນູ​ແວນ​ເຊ​ລັງ​ຫຼາຍ​ທີ່​ສຸດ ທາງ​ການ​ຂອງ​ປະ­ເທດ​ນີ້ ຄາດ​ວ່າ​ເງິນ​ພາ­ສີ​ທີ່​ຈະ​ເກັບ​ໄດ້​ຈະ​ເຮັດ​ໃຫ້​ຖົງ​ງົບ­ປະ­ມານ​ແຫ່ງ​ຊາດ​ຕຶ່ງ​ຂຶ້ນ​ດ້ວຍ​ເມັດ​ເງິນ ຈຳ­ນວນ 80 ລ້ານ​ໂດ​ລາ​ຕໍ່​ປີ ເງິນ​ຈຳ­ນວນ​ນີ້ ຈະ​ຖອກ​ເທ​ເຂົ້າ​ພັດ­ທະ­ນາ​ໂຄງ​ສ້າງ​ພື້ນ­ຖານ ເພື່ອ​ຮອງ​ຮັບ​ນັກ​ທ່ອງ​ທ່ຽວ ແລະ ເພື່ອ​ອະ­ນຸ​ຮັກ​ສະ­ຖານ­ທີ່​ທ່ອງ​ທ່ຽວ​ທາງ​ທຳ​ມະ​ຊາດ​ໃຫ້​ຍືນ​ຍົງ ປີ 2019 ໄດ້​ຖືກ​ປະ­ກາດ​ໃຫ້​ເປັນ​ປີ​ທ່ອງ​ທ່ຽວ ນູ​ແວນ​ເຊ​ລັງ-ຈີນ.

    ທີ່ ສປ ຈີນ: ໜັງ­ສື­ພິມ ເດິ​ເນ​ເຊິນ (The Nation 20 ພະ­ຈິກ 2018) ໄດ້​ສະ­ເໜີ​ຂ່າວ​ຍ່ອຍ​ກ່ຽວ​ກັບ​ທາງ​ການ​ຈີນ​ຕັດ­ສິນ​ລົງ­ໂທດ​ຈຳ​ຄຸກ ນັກ​ປະ­ພັນ​ຍິງ​ຄົນ​ໜຶ່ງ​ເປັນ​ເວ­ລາ 10 ປີ ຍ້ອນ​ຄວາມ​ຜິດ​ທີ່​ໄດ້​ພິມ​ປື້ມ​ກ່ຽວ​ກັບ​ການ​ມີ​ເພດ​ສຳ­ພັນ​ຢ່າງ​ເປີດ​ແປນ​ຂອງ​ກຸ່ມ​ຜູ້​ຮັກ​ຮ່ວມ​ເພດ ນັກ​ປະ­ພັນ​ທີ່​ໃສ່​ນາມ​ປາກ­ກາ​ວ່າ “ທຽນ​ຢີ” (Tianyi) ຄົນ​ນີ້​ໄດ້​ປະ­ພັນ​ເລື່ອງ​ຍາວ ຊື່­ວ່າ: “ກົງ​ຊານ” ທີ່​ມີ​ເນື້ອ​ໃນ​ຍົວະ​ຍວນ ເລື່ອງ​ເພດ​ສຳ­ພັນ​ລະ­ຫວ່າງ​ກຸ່ມ​ຮັກ​ຮ່ວມ​ເພດ ເຊິ່ງ​ເປັນ​ເລື່ອງ​ທີ່​ທາງ​ການ​ຈີນ​ເກືອດ​ຫ້າມ ນະ­ວະ​ນິ­ຍາຍ​ດັ່ງ­ກ່າວ ໄດ້​ເວົ້າ​ລະ­ອຽດ​ກ່ຽວ​ກັບ​ການ​ມີ​ເພດ​ສຳ­ພັນ ລະ­ຫວ່າງ​ອາ­ຈານ​ກັບ​ນັກ​ສຶກ​ສາ​ຊາຍ ນອກ­ຈາກ​ນັ້ນ ນັກ​ປະ­ພັນ ທຽນ​ຢີ ຍັງ​ໄດ້​ເຜີຍ­ແຜ່​ປື້ມ​ເລື່ອງ​ໂປ້ ຈຳ­ນວນ 7.000 ເຫຼັ້ມ ເຊິ່ງ​ສ່ວນ​ໃຫຍ່​ພົວ­ພັນ​ກັບ​ການ​ມີ ເພດ​ສຳ­ພັນ​ຂອງ​ກຸ່ມ​ຮັກ​ຮ່ວມ​ເພດ ເຊິ່ງ​ເຮັດ​ໃຫ້​ຜູ້​ປະ­ພັນ​ໄດ້​ເງິນ​ກຳ­ໄລ​ສູງ​ເຖິງ 150.000 ຢວນ ການ​ເຜີຍ­ແຜ່​ເລື່ອງ​ໂປ້​ເປືອຍ​ທີ່​ຍົ້ວ​ຍວນ ຊວນ​ຕັນ­ຫາ​ທາງ​ເພດ​ຢູ່ ສປ ຈີນ ນັ້ນ ເປັນ​ສິ່ງ​ຜິດ​ກົດ­ໝາຍ ດັ່ງ­ນັ້ນ ບໍ່​ແປກ​ທີ່​ນັກ​ປະ­ພັນ ທຽນ​ຢີ ຖືກ​ລົງ­ໂທດ​ຢ່າງ​ສະ​ສົມ.

    ທີ່ ຍີ່­ປຸ່ນ: ບັນ­ຫາ​ທ້າ​ທາຍ​ໜຶ່ງ​ທີ່ ຍີ່­ປຸ່ນ ພວມ​ປະ​ເຊີນ​ຢູ່​ໃນ​ປັດ­ຈຸ­ບັນ​ນີ້ ກໍ​ຄື ການ​ຂາດ­ແຄນ​ແຮງ​ງານ ຍ້ອນ​ອັດ­ຕາ​ການ​ເກີດ​ໃນ​ປະ­ເທດ​ນີ້ ຕົກ­ຕ່ຳ​ມາ​ຕິດ­ຕໍ່​ກັນ​ຫຼາຍໆ​ປີ ບັນ­ຫາ​ທີ່​ເປັນ​ເງົາ​ຕາມ​ມາ​ກັບ​ອັດ­ຕາ​ການ​ເກີດ​ໜ້ອຍ ກໍ​ຄື ການ​ເພີ່ມ​ຂຶ້ນ​ຂອງ​ຄົນ​ເຖົ້າ​ຈົນ​ເກືອບ​ຈະ​ລົ້ນ​ປະ­ເທດ ດັ່ງ­ນັ້ນ ຈຶ່ງ​ບໍ່​ເປັນ​ເລື່ອງ​ແປກ​ທີ່​ທາງ​ການ​ຍີ່­ປຸ່ນ ໄດ້​ມີ​ນະ­ໂຍ­ບາຍ​ນຳ​ເຂົ້າ​ແຮງ​ງານ​ຕ່າງ­ປະ­ເທດ ເພື່ອ​ສະ­ໜອງ​ໃຫ້​ບັນ­ດາ​ໂຮງ​ຈັກ ໂຮງ­ງານ​ຂາດ­ແຄນ​ແຮງ​ງານ​ທີ່​ສຸດ ສຳ­ລັບ​ຢູ່​ພາຍ​ໃນ​ປະ­ເທດ​ເອງ ນະ­ໂຍ­ບາຍ​ການ​ນຳ​ໃຊ້​ແຮງ​ງານ​ຜູ້​ເຖົ້າ ກໍ​ພວມ​ໄດ້​ຮັບ​ການ​ຕ້ອນ­ຮັບ​ເປັນ​ຢ່າງ​ດີ ລວມ​ທັງ​ການ​ນຳ​ໃຊ້​ລະ­ບົບ​ເຂົ້າ​ບຳ­ນານ​ດ້ວຍ​ຄວາມ​ສະ­ໝັກ​ໃຈ ຍົກ​ຕົວ­ຢ່າງ ເລີ່ມ​ແຕ່​ປີ 2015 ມາ ບໍ­ລິ­ສັດ​ຫຼາຍ​ແຫ່ງ ໄດ້​ຕົກ­ລົງ​ວ່າ​ຈ້າງ​ແຮງ​ງານ​ຜູ້​ເຖົ້າ ແຕ່​ອາ­ຍຸ 65 ປີ ຫຼື ສູງ​ກວ່າ​ນັ້ນ​ໃຫ້​ສືບ­ຕໍ່​ເຮັດ​ວຽກ ໃນ​ເດືອນ​ເມ­ສາ ປີ 2015 ບໍ­ລິ­ສັດ​ປຸກ​ສ້າງ​ເຮືອນ “ໄຕ​ວະ” (Daiwa) ໄດ້​ຮັບ­ຮອງ​ເອົາ​ລະ­ບົບ​ເຮັດ​ວຽກ​ແບບ ບໍ່​ມີ​ກຳ­ນົດ​ອາ­ຍຸ​ບຳ­ນານ ພາຍ​ໃຕ້​ລະ­ບົບ​ດັ່ງ­ກ່າວ ພະ­ນັກ­ງານ​ອາ­ຍຸ 65 ປີ ຫຼື ສູງ​ກວ່າ​ນັ້ນ ຍັງ​ສາ­ມາດ​ເຮັດ​ສັນ­ຍາ​ສືບ­ຕໍ່​ເຮັດ​ວຽກ​ເປັນ​ຕອນ 4 ວັນ​ຕໍ່​ອາ­ທິດ ໂດຍ​ມີ​ອັດ­ຕາ​ເງິນ­ເດືອນ​ຕາຍ​ຕົວ 200.000 ເຢັນ (ເທົ່າ​ກັບ 1.673 ໂດ​ລາ​ສະ­ຫະ­ລັດ) ແລະ ໃນ​ສົມ​ມະ​ນາ​ບຸນ­ຄຸນ (ໂບ​ນັດ Bonus) ໃນ​ຈຳ­ນວນ​ເຄິ່ງ​ໜຶ່ງ​ຂອງ​ໂບ​ນັດ​ຂອງ​ພະ­ນັກ­ງານ​ປະ­ຈຳ ຂ່າວ​ບອກ​ວ່າ ໃນ​ຈຳ­ນວນ​ພະ­ນັກ­ງານ 30 ຄົນ ໃນ​ໄວ​ບຳ­ນານ​ໃນ​ເດືອນ​ມີ­ນາ 2015 ນັ້ນ ທາງ​ບໍ­ລິ­ສັດ ໄຕ​ວະ ໄດ້​ຮັບ​ເອົາ 9 ຄົນ ສືບ­ຕໍ່​ເຮັດ​ວຽກ​ຕື່ມ​ໃນ​ເດືອນ​ເມ­ສາ​ປີ​ດຽວ​ກັນ​ນີ້ ທາງ​ບໍ­ລິ­ສັດ​ການ​ຄ້າ​ເຄື່ອງ​ຈັກ​ຕາງ​ມື​ແຫ່ງ​ໜຶ່ງ ໄດ້​ປັບ​ຂຶ້ນ​ອາ­ຍຸ​ບຳ­ນານ​ຂອງ​ພະ­ນັກ­ງານ​ຈາກ 63 ປີ ເປັນ 65 ປີ ແລະ ສາ­ມາດ​ເຮັດ​ວຽກ​ຕໍ່​ຫຼັງ​ບຳ­ນານ​ໄດ້​ແຕ່ 65-70 ປີ.

ຂ່າວທີ່ກ່ຽວຂ້ອງ