ຂ່າວຫຼ້າສຸດ

ກຸ່ມ “ຜ້າ​ແດງ” ເດີນ​ຂະ​ບວນ​ສະໜັບສະໜູນ​ລັດຖະບານ​ຝຣັ່ງ

342 29 ມ.ກ. 2019 ຂ່າວຕ່າງປະເທດ
ກຸ່ມ “ຜ້າ​ແດງ” ເດີນ​ຂະ​ບວນ​ສະໜັບສະໜູນ​ລັດຖະບານ​ຝຣັ່ງ

      ວັນ​ທີ 27 ມັງກອນ​ນີ້ ຊາວ​ຝຣັ່ງ​ຫຼາຍ​ພັນ​ຄົນ ໄດ້​ເຂົ້າ​ຮ່ວມ​ການ​ເດີນ​ຂະ​ບວນ​ຂອງ​ກຸມ​ທີ່​ເອີ້ນ​ວ່າ “ຜ້າ​ແດງ” ໄປ​ທົ່ວ​ຖະໜົນ​ສາຍ​ຕ່າງໆ​ໃນ​ນະຄອນຫຼວງ​ປາ​ຣີ (ຝຣັ່ງ) ເພື່ອ​ສະແດງ​ອອກ​ເຖິງ ຄວາມ​ຄັດຄ້ານ​ຕໍ່​ເຫດການ​ຮຸນ​ແຮງ​ທີ່​ເກີດ​ຂຶ້ນ​ຈາກ​ການ​ປະ​ທ້ວງ ຂອງ​ຝ່າຍ​ເສື້ອ​ເຫຼືອງ ທີ່​ດຳເນີນ​ມາ​ເປັນ 11 ອາທິດ​ແລ້ວ​ນັ້ນ.

    ຕຳຫຼວດ​ໃນ​ນະຄອນຫຼວງ​ປາ​ຣີ ໃຫ້ການ​ຄາດ​ຄະເນ​ວ່າ ມີ​ຜູ້​ເຂົ້າ​ຮ່ວມ​ການ​ເດີນ​ຂະ​ບວນ​ປະມານ 10.500 ຄົນ ໂດຍ​ທີ່​ພວກ​ເຂົາ​ໄດ້​ພາກັນ​ພັນ​ຄໍ​ດ້ວຍ​ຜ້າ​ສີແດງ ແລະ ​ຊູ​ປ້າຍ​ຄຳ​ຂວັນ ທີ່​ມີ​ເນື້ອ​ຄວາມ ຕິຕຽນ​ກະແສ​ຄວາມ​ຮຸນ​ແຮງ ຢູ່​ໃນ​ການ​ປະ​ທ້ວງ​ຂອງ​ຝ່າຍ​ເສື້ອ​ເຫຼືອງ. ຜູ້​ເຂົ້າ​ຮ່ວມ​ການ​ເດີນ​ຂະ​ບວນ ຂອງ​ຝ່າຍ “ຜ້າ​ແດງ” ຍັງ​ສະແດງ​ຄວາມ​ສະໜັບສະໜູນ​ຕຳຫຼວດ ແລະ​ລັດຖະບານ ພາຍ​ໃຕ້​ການ​ນຳພາ​ຂອງ​ປະທານາທິບໍດີ ເອມ​ມາ​ນູ​ແອ​​ລ ມາກ​ຣົງ.

    ກ່ອນ​ໜ້າ​ນັ້ນ ການ​ເດີນ​ປະ​ທ້ວງ​ຂອງ​ຝ່າຍ “ເສື້ອ​ເຫຼືອງ” ໄດ້​ກັບ​ມາ​ເກີດ​ຂຶ້ນ​ອີກ ໃນ​ວັນ​ທີ 26 ມັງກອນ ຢູ່​ທົ່ວ​ປະເທດ​ຝຣັ່ງ ໂດຍ​ໄດ້​ດຶງ​ດູດ​ຜູ້​ເຂົ້າ​ຮ່ວມ​ປະມານ 69.000 ຄົນ ແລະ​ ສະເພາະ ໃນ​ນະຄອນຫຼວງ​ປາ​ຣີ ມີ​ຜູ້​ເຂົ້າ​ຮ່ວມ 4.000 ຄົນ.

ຂ່າວທີ່ກ່ຽວຂ້ອງ