ຂ່າວຫຼ້າສຸດ

ປູກໝາກໂມຂາຍ ສ້າງໃຫ້ຄອບຄົວມີລາຍຮັບເພີ່ມ

121 29 ມ.ກ. 2019 ຂ່າວໜ້າ​ໜຶ່ງ
ປູກໝາກໂມຂາຍ ສ້າງໃຫ້ຄອບຄົວມີລາຍຮັບເພີ່ມ

    ປະ­ຊາ­ຊົນ​ບ້ານ​ດົງ​ໂພນ​ແຮ່ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ແມ່ນ​ມີ​ຫຼາຍ​ຄອບ­ຄົວ​ທີ່​ເຮັດ​ອາ­ຊີບ​ການ​ຜະ­ລິດ​ປູກ­ຝັງ​ມາ​ແຕ່​ເຄົ້າ​ແຕ່​ເດີມ ແລະ ມາ​ຮອດ​ປັດ­ຈຸ­ບັນ​ນີ້​ປະ­ຊາ­ຊົນ​ບ້ານ​ດັ່ງ­ກ່າວ​ກໍ່​ຍັງ​ເຮັດ​ອາ­ຊີບ​ການ​ຜະ­ລິດ​ເປັນ​ຫຼັກ ແລະ ຄ້າ­ຂາຍ​ຈຳ­ນວນ​ໜຶ່ງ ຍ້ອນ​ວ່າ​ປະ­ຊາ­ຊົນ​ບ້ານ​ດົງ​ໂພນ​ແຮ່​ແມ່ນ​ມີ​ມູນ­ເຊື້ອ​ດຸ­ໝັ່ນ​ຂະ­ຫຍັນ​ພຽນ​ໃນ​ການ​ອອກ­ແຮງ​ງານ​ເພີ່ມ​ພູນ​ຜະ­ລິດ­ຜົນ​ສ້າງ​ໃຫ້​ຄອບ­ຄົວ​ມີ​ຢູ່​ມີ​ກິນ ມີ​ເສດ­ຖະ­ກິດ​ທີ່​ດີ​ຂຶ້ນ ແລະ ມີ​ລາຍ​ຮັບ​ຈາກ​ການ​ຂາຍ​ຜົນ​ຜະ­ລິດ​ສິນ­ຄ້າ​ຕ່າງໆ​ມາ​ໝູນ​ໃຊ້​ໃນ​ຊີ­ວິດ​ຄອບ­ຄົວ ແລະ ເປັນ​ທຶນ​ເພື່ອ​ສົ່ງ­ເສີມ​ການ​ສຶກ​ສາ​ໃຫ້​ລູກ​ໄດ້​ຮ່ຳ­ຮຽນ​ຢ່າງ​ເປັນ​ປົກ­ກະ­ຕິ.

    ວັນ​ທີ 24 ມັງ­ກອນ 2019 ທ່ານ​ນາງ ພອນ​ມະ­ນີ ມາດ​ໄຊ​ເຄນ ປະ­ຊາ­ຊົນ​ບ້ານ​ດົງ​ໂພນ​ແຮ່ ໄດ້​ໃຫ້​ສຳ­ພາດ​ວ່າ: ຄອບ­ຄົວ​ຂອງ​ຕົນ​ໄດ້​ເຮັດ​ອາ­ຊີບ​ການ​ຜະ­ລິດ​ເຮັດ​ນາ ແລະ  ປູກ​ໝາກ­ໂມ​ຂາຍ​ມາ​ໄດ້ 30 ກວ່າ​ປີ​ແລ້ວ ແລະ ມີ​ຄວາມ​ມັກ​ໃນ​ອາ­ຊີບ​ປູກ­ຝັງ​ຈຶ່ງ​ໄດ້​ສືບ­ຕໍ່​ເຮັດ​ຈົນ​ມາ​ຮອດ​ປັດ­ຈຸ­ບັນ​ນີ້ ເນື່ອງ​ຈາກ​ວ່າ­ການ​ປູກ​ໝາກ­ໂມ​ຂາຍ​ແມ່ນ​ມີ​ລາຍ​ຮັບ​ດີ ເຮັດ​ໃຫ້​ຄອບ­ຄົວ​ຂອງ​ຕົນ​ມີ​ຢູ່​ມີ​ກິນ ສາ­ມາດ​ເພິ່ງ​ຕົນ​ເອງ​ໄດ້ ແລະ ເຮັດ​ໃຫ້​ເສດ­ຖະ­ກິດ​ໃນ​ຄອບ­ຄົວ​ດີ​ຂຶ້ນ.

    ທ່ານ​ນາງ ພອນ​ມະ­ນີ ກ່າວ​ຕື່ມ​ອີ​ກວ່າ: ຕົນ​ໄດ້​ປູກ​ໝາກ­ໂມ​ໃນ​ເນື້ອ​ທີ 3 ໄລ່ ສາ­ມາດ​ປູກ​ໄດ້​ທັງ​ລະ­ດູ­ແລ້ງ​ແຕ່​ເດືອນ​ມັງ­ກອນ-ເດືອນ​ມີ­ນາ  ແລະ ລະ­ດູ­ຝົນ​ແຕ່​ເດືອນ​ກໍ­ລະ­ກົດ-ເດືອນ​ພະ­ຈິກ ໃຊ້​ເວ­ລາ​ຢູ່ 2-3 ເດືອນ ນັບ​ແຕ່​ມື້​ປູກ​ຈົນ​ຮອດ​ມື້​ເກັບ​ກ່ຽວ​ຜົນ​ຜະ­ລິດ ສ່ວນ​ວິ­ທີ​ການ​ປູກ​ແມ່ນ​ຈະ​ແຕກ​ຕ່າງ​ກັນ ເພາະ​ໝາກ­ໂມ​ເປັນ​ພືດ​ທີ່​ຕ້ອງ­ການ​ນ້ຳ​ຫຼາຍ​ເພື່ອ​ລໍ່​ລ້ຽງ​ລຳ­ຕົ້ນ​ໃຫ້​ຈະ­ເລີນ​ເຕີບ​ໂຕ​ຢ່າງ​ເຕັມ​ສ່ວນ ໜ່ວຍ​ໝາກ​ຈະ​ໃຫຍ່​ດີ​ກວ່າ​ຍາມ​ແລ້ງ ຖ້າ​ປູກ​ໃນ​ລະ­ດູ­ຝົນ​ແມ່ນ​ມີ​ຄວາມ​ເໝາະ​ສົມ​ທີ່​ສຸດ ແລະ ລາຍ​ຮັບ​ກໍ່​ໄດ້​ດີ​ກວ່າ ສະ­ເລ່ຍ 1 ໄລ່​ຈະ​ມີ​ລາຍ​ຮັບ​ປະ­ມານ 15 ລ້ານ​ກີບ ຖ້າ​ປູກ 3 ໄລ່ ລາຍ​ຮັບ 30 ກວ່າ​ລ້ານ​ກີບ ແຕ່​ຖ້າ​ປູກ​ໃນ​ລະ­ດູ­ແລ້ງ​ແມ່ນ​ຕ້ອງ​ໄດ້​ເອົາ­ໃຈ­ໃສ່​ໃນ​ການ​ຫົດ​ນ້ຳ ແລະ ໃສ່​ຝຸ່ນ​ບົວ­ລະ­ບັດ​ຮັກ­ສາ​ບໍ່​ໃຫ້​ແມງ­ໄມ້​ມາ​ຕອມ ເພ້ຍ​ຂຶ້ນ ຫຼື ມີ​ລົມ​ພັດ​ແຮງ ເຮັດ​ໃຫ້​ເຄືອ​ຂວ່າຍ​ກັນ​ຢູ່ ສົ່ງ​ຜົນ​ຈະ​ເຮັດ​ໃຫ້​ພືດ​ເຕີບ​ໂຕ​ຊ້າ ແລະ ຜົນ​ຜະ­ລິດ​ກໍ​ຈະ​ບໍ່​ໄດ້​ເຕັມ ສ່ວນ​ລາຍ​ຮັບ​ສະ­ເລ່ຍ​ກໍ​ຕົກ​ຢູ່​ປະ­ມານ 10 ລ້ານ​ກີບ​ຕໍ່ 1 ໄລ່ ສ່ວນ​ຕົ້ນ​ທຶນ​ທີ່​ໃຊ້​ໃນ​ການ​ຜະ­ລິດ​ກໍ​ຕົກ​ຢູ່​ປະ­ມານ​ເກືອບ 2 ລ້ານ​ຕໍ່ 1 ໄລ່ ເລີ່ມ​ແຕ່​ຂັ້ນ​ຕອນ​ກະ­ກຽມ​ປູກ​ສຳ­ເລັດ​ຈົນ​ຮອດ​ຍາມ​ເກັບ​ກ່ຽວ​ຜົນ​ຜະ­ລິດ ໃຊ້​ເວ­ລາ 2-3 ເດືອນ ສ່ວນ​ລາ­ຄາ​ຂາຍ​ແມ່ນ​ອີງ​ຕາມ​ຂະ­ໜາດ​ຂອງ​ໜ່ວຍ ຖ້າ​ໜ່ວຍ​ໃຫຍ່​ກໍ​ຈະ​ຂາຍ​ໃນ​ລາ­ຄາ 15.000 ກີບ ຮອງ​ລົງ​ມາ​ກໍ່ 10.000 ກີບ 8.000 ກີບ 5.000 ກີບ ແລະ 2.000 ກີບ ສ່ວນ​ຫຼາຍ​ຈະ​ມີ​ແມ່​ຄ້າ​ມາ​ເກັບ​ຊື້​ກັບ​ສວນ ເພື່ອ​ໄປ​ຂາຍ​ຕໍ່​ຕາມ​ຕະ­ຫຼາດ ນອກ​ນີ້ ຖ້າ​ປີ​ໃດ​ຜົນ​ຜະ­ລິດ​ດີ ກໍ​ຈະ​ສົ່ງ​ຜົນ​ໃຫ້​ລາຍ​ຮັບ​ໄດ້​ດີ ແລະ ມີ​ຄວາມ​ພູມ­ໃຈ ເພາະ­ວ່າ​ຕົນ​ໄດ້​ຢຶດ​ຖື​ອາ­ຊີບ​ນີ້​ເປັນ​ຫຼັກ ແລະ ເຮັດ​ໃຫ້​ຄອບ­ຄົວ​ມີ​ຄວາມ​ອົບ​ອຸ່ນ​ດີ​ຂຶ້ນ.

    ທ່ານ​ນາງ ຍ່ອຍ​ຄຳ ສາ­ມາດ​ສົງ­ຄາມ ນາຍ­ບ້ານ​ດົງ​ໂພນ​ແຮ່ ໄດ້​ກ່າວ​ວ່າ: ພາຍ​ໃນ​ບ້ານ​ໄດ້​ມີ​ປະ­ຊາ­ຊົນ​ຫຼາຍ​ກວ່າ 40 ຄອບ­ຄົວ​ທີ່​ເຮັດ​ອາ­ຊີບ​ປູກ​ໝາກ­ໂມ ແລະ ພືດ​ຜັກ​ມາ​ໄດ້​ຫຼາຍ​ປີ ໂດຍ​ຫຼັກໆ​ແລ້ວ​ແມ່ນ​ປູກ​ໝາກ­ໂມ​ຂາຍ ພ້ອມ​ກັນ​ນັ້ນ ບ້ານ​ກໍ​ໄດ້​ມີ​ການ​ເອົາ­ໃຈ­ໃສ່​ຊຸກ­ຍູ້​ສົ່ງ­ເສີມ​ໃຫ້​ປະ­ຊາ­ຊົນ ເຮັດ​ການ​ຜະ­ລິດ​ເປັນ​ສິນ­ຄ້າ ເພື່ອ​ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ພາຍ​ໃນ​ບ້ານ​ນັບ​ມື້​ດີ​ຂຶ້ນ.

ຂ່າວທີ່ກ່ຽວຂ້ອງ