ຂ່າວຫຼ້າສຸດ

ອາຫານທີ່ຄວນຫຼີກລ່ຽງ ເພື່ອຫຼຸດບັນຫາກິ່ນຕົວແຮງ

392 28 ມ.ກ. 2019 ຫົວຂໍ້ຂ່າວອື່ນໆ

    ບັນ­ຫາ​ກິ່ນ​ຕົວ​ແຮງ ໃຜ​ບໍ່​ເຄີຍ​ເປັນ​ອາດ​ບໍ່​ຮູ້ ແຕ່​ຮູ້​ວ່າ​ຖ້າ​ເມື່ອ​ໃດ​ຫາກ​ພົບ​ຄົນ​ກິ່ນ​ຕົວ​ແຮງ ຕ້ອງ​ກັ້ນ​ຫາຍ­ໃຈ ຫຼື ຍ່າງ​ໜີ ແຕ່​ສຳ­ລັບ​ເຈົ້າ​ຂອງ​ກິ່ນ​ເອງ​ຄົງ​ຄິດ​ອີກ​ແບບ ສຳ­ລັບ​ຄົນ​ທີ່​ມີ​ກິ່ນ​ກາຍ​ສ່ວນ​ຫຼາຍ​ຮູ້​ຕົວ​ເອງ​ດີ ແລະ ອາດ​ກຳ­ລັງ​ຫາ​ວິ­ທີ​ແກ້​ບັນ­ຫາ ເຊິ່ງ​ອາດ​ລອງ​ມາ​ແລ້ວ​ຫຼາຍ​ວິ­ທີ ແຕ່​ຍັງ​ບໍ່​ດີ​ຈັກ​ເທື່ອ ມື້­ນີ້​ຄໍ​ລ່ຳ​ສາ­ລະ​ໜ້າ​ຮູ້ ມີ​ວິ­ທີ​ການ​ປັບ​ການ​ກິນ​ມາ​ນຳ​ສະ­ເໜີ ເພື່ອ​ແກ້​ບັນ­ຫາ​ກິ່ນ​ຕົວ​ນີ້​ໃຫ້​ໝົດ​ໄປ​ດັ່ງ­ນີ້.

   - ຫຼີກ​ລ່ຽງ​ອາ­ຫານ​ເຜັດ ທີ່​ເຮັດ​ໃຫ້​ເຫື່ອ​ອອກ​ຫຼາຍ ເຊັ່ນ: ພິກ​ໄທ ໝາກ­ເຜັດ.

   - ຫຼີກ​ລ່ຽງ​ທາດ​ເຫຼົ້າ ແລະ ຄາ​ເຟ​ອິນ ເຮັດ​ໃຫ້​ເຫື່ອ​ອອກ​ຫຼາຍ​ຂຶ້ນ.

   - ຫຼີກ​ລ່ຽງ​ອາ­ຫານ​ທີ່​ເຮັດ​ໃຫ້​ເຫື່ອ​ມີ​ກິ່ນ​ເພີ່ມ​ຂຶ້ນ ເຊັ່ນ: ຢາ­ພື້ນ­ເມືອງ​ທີ່​ມີ​ກິ່ນ​ແຮງ ກະ­ທຽມ ຫົວ ຫອມ​ບົ່ວ ຫົວ​ສີ​ໄຄ ຂ່າ ຜັກ ໝາກ​ໄມ້ ທີ່​ມີ​ກິ່່ນ​ແຮງ ເຊັ່ນ: ກະ​ລ່ຳ ໝາກ­ປີ.

   - ຫຼຸດ​ອາ­ການ​ທີ່​ກະ​ຕຸ້ນ​ໃຫ້​ຕ່ອມ​ໄຂ­ມັນ​ຜະ­ລິດ​ໄຂ­ມັນ​ອອກ​ມາ​ຫຼາຍ: ໂດຍ​ສະ­ເພາະ ໄຂ­ມັນ​ທີ່​ມາ​ຈາກ​ຕ່ອມ Apocrine sweat gland ທີ່​ກະ­ຈາຍ​ຢູ່​ຕາມ​ຂີ້­ແຮ້ ຂາ​ໜີບ ໂດຍ​ຫຼີກ​ລ່ຽງ​ອາ­ຫານ​ມັນ ອາ­ຫານ​ຈືນ ຊ໊ອກ​ໂກ​ແລັດ.

   - ຫຼຸດ­ຜ່ອນ​ກິນ​ຊີ້ນ​ສັດ: ມີ​ການ​ວິ­ໄຈ​ທີ່​ພິມ​ອອກ ວາ­ລະ­ສານ Chemical Senses ຂອງ​ມະ­ຫາ­ວິ­ທະ­ຍາ­ໄລ Oxford ພົບ​ວ່າ ຖ້າ​ຫາກ​ກິນ​ຊີ້ນ​ແດງ ຈະ​ເຮັດ​ໃຫ້​ກິ່ນ​ຕົວ​ແຮງ​ຂຶ້ນ.

   - ເພີ່ມ​ການ​ກິນ​ຜັກ ແລະ ໝາກ​ໄມ້​ໃຫ້​ຫຼາຍ: ເພື່ອ​ໃຫ້​ໄດ້​ໄຍ​ອາ­ຫານ​ທີ່​ພຽງ­ພໍ​ຕໍ່​ການ​ຍ່ອຍ ແລະ ດີ​ທ໊ອກ​ລຳ​ໄສ້​ແບບ​ທຳ​ມະ​ຊາດ.

   - ຫຼຸດ​ນ້ຳ­ໜັກ: ຫາກ​ນ້ຳ­ໜັກ​ຕົວ​ເອງ​ຫຼາຍ​ເກີນ​ໄປ​ຄວນ​ຫຼຸດ​ທັນ­ທີ ເພາະ​ການ​ຫຼຸດ​ນ້ຳ­ໜັກ​ຊ່ວຍ​ຫຼຸດ​ການ​ຂັບ​ເຫື່ອ ແລະ ສານ​ໄຂ­ມັນ​ຈາກ​ຕ່ອມ Apocrine sweat gland ໄດ້ ແລະ ຊ່ວຍ​ຫຼຸດ​ຄວາມ​ສ່ຽງ​ຂອງ​ການ​ເປັນ​ພະ­ຍາດ ທີ່​ອາດ​ເຮັດ​ໃຫ້​ເຮົາ​ມີ​ກິ່ນ​ຕົວ.

   - ຫາກ​ເປັນ​ພະ­ຍາດ​ເບົາ­ຫວານ ພະ­ຍາດ​ຕັບ ຫຼື ພະ­ຍາດ​ກ່ຽວ​ກັບ​ໝາກ​ໄຂ່­ຫຼັງ ຄວນ​ປິ່ນ­ປົວ ສຸ­ຂະ­ພາບ​ຕາມ​ແພດ​ສັ່ງ ແລະ ກຳ­ນົດ​ອາ­ຫານ​ແນະ­ນຳ​ຕາມ​ແພດ​ສັ່ງ ເພາະ​ຖ້າ​ຫາກ​ຮ່າງ­ກາຍ​ເຮົາ​ຊຸດ­ໂຊມ​ລົງ ອາດ​ເຮັດ​ໃຫ້​ຮ່າງ­ກາຍ​ມີ​ກິ່ນ​ທີ່​ບໍ່​ປະ­ສົງ​ໄດ້.

    ນອກ­ຈາກ​ອາ­ຫານ​ທີ່​ກ່າວ​ມາ​ນັ້ນ­ແລ້ວ ຄວນ​ເນັ້ນ​ເລື່ອງ​ການ​ທຳ​ຄວາມ​ສະ­ອາດ​ຮ່າງ­ກາຍ ເຄື່ອງ­ນຸ່ງ​ຫົ່ມ ແລະ ການ​ພັກ­ຜ່ອນ​ໃຫ້​ພຽງ­ພໍ ຮູ້­ຈັກ​ວິ­ທີ​ການ​ຮັບ​ມື​ກັບ​ຄວາມ​ຕຶງ​ຄຽດ ສຳ­ລັບ​ການ​ກິນ​ປ້ອງ​ກັນ​ກິ່ນ​ຕົວ​ແຮງ​ແມ່ນ​ຄວນ​ກິນ​ອາ­ຫານ​ໃຫ້​ຄົບ 5 ໝູ່ ອອກ­ກຳ­ລັງ​ກາຍ​ຢ່າງ​ສະ​ໝ່ຳ​ສະ­ເໝີ ເພື່ອ​ຮັກ­ສາ​ນ້ຳ­ໜັກ​ໃຫ້​ຢູ່​ໃນ​ເກນ​ປົກ­ກະ­ຕິ ເຊິ່ງ​ເປັນ​ປັດ​ໄຈ​ປ້ອງ​ກັນ​ເຊື້ອ​ພະ­ຍາດ​ຕ່າງໆ​ໄດ້.

ຂ່າວທີ່ກ່ຽວຂ້ອງ