ຍີ່ປຸ່ນ ປະກາດ​ລາຍ​ຮັບ​ຂອງ​ສ່ວນ​ບຸກຄົນ​ທີ່​ໄດ້​ຮັບ​ການ​ດັດແກ້​ນັບ​ແຕ່​ສົກ​ການ​ເງິນ 2012 ເປັນຕົ້ນ​ມາ

327 28 ມ.ກ. 2019 ຂ່າວຕ່າງປະເທດ
ຍີ່ປຸ່ນ ປະກາດ​ລາຍ​ຮັບ​ຂອງ​ສ່ວນ​ບຸກຄົນ​ທີ່​ໄດ້​ຮັບ​ການ​ດັດແກ້​ນັບ​ແຕ່​ສົກ​ການ​ເງິນ 2012 ເປັນຕົ້ນ​ມາ

     ກະຊວງ​ສາທາລະນະ​ສຸກ ແຮງ​ງານ ແລະ ​ສະຫວັດດີ​ການ​ຂອງ​ຍີ່ປຸ່ນ ໄດ້​ປະກາດ​ຕົວ​ເລກ​ສະຖິຕິ​ອອກ​ມາ​ເມື່ອ​ວັນ​ທີ 23 ມັງກອນ​ນີ້ ຊຶ່ງ​ໄດ້​ຮັບ​ການ​ດັດແກ້​ກ່ຽວ​ກັບ​ລາຍ​ຮັບ​ຂອງ​ສ່ວນ​ບຸກຄົນ ນັບ​ແຕ່​ສົກ​ການ​ເງິນ 2012 ເປັນຕົ້ນ​ມາ ຫຼັງ​ຈາກ​ທີ່​ກວາດ​ພົບ​ການ​ລະເມີດ​ກົດ​ຂໍ້​ບັງຄັບ ແກ່ຍາວ​ມາ​ເກືອບ 15 ປີ ເຮັດ​ໃຫ້​ລັດຖະບານ​ຍີ່ປຸ່ນ ຕ້ອງ​ໄດ້​ອູດ​ໜູນ ແລະ ​ຈ່າຍ​ຄ່າ​ຊົດ​ເຊີຍ ໃຫ້​ແກ່​ຜູ້​ອອກແຮງ​ງານ​ທີ່​ໄດ້​ຮັບ​ເງິນເດືອນ​ຕ່ຳ ປະມານ 20 ລ້ານ​ຄົນ.

    ຫຼັງ​ຈາກ​ທີ່​ໄດ້​ຮັບ​ການ​ດັດແກ້​ບັນດາ​ຂໍ້​ມູນ​ການ​ສຳ​ຫຼວດ​ກ່ຽວ​ກັບ​ແຮງ​ງານ ນັບ​ແຕ່​ສົກ​ການ​ເງິນ 2012 ເປັນຕົ້ນ​ມາ ຊຶ່ງ​ກະຊວງ​ສາທາລະນະ​ສຸກ ແຮງ​ງານ ແລະ​ສະຫວັດດີ​ການ​ຍີ່ປຸ່ນ ຍັງ​ຄົງ​ເກັບ​ຮັກສາ​ໄວ້ ເຫັນ​ວ່າ​ລາຍ​ຮັບ​ສະເລ່ຍ​ຂອງ​ຜູ້​ອອກແຮງ​ງານ ເມື່ອ​ໄລ່​ຕາມ​ເດືອນ​ຂອງ​ຜູ້​ອອກ​ແຮ​ງານ​ຄົນ​ໜຶ່ງ ເພີ່ມ​ຂຶ້ນ​ຕື່ມ 1,2 ຈຸດ​ສ່ວນ​ຮ້ອຍ.  ກະຊວງ​ດັ່ງກ່າວ ໃຫ້​ຮູ້​ວ່າ ຂໍ້​ມູນ​ຕ່າງໆ​ຈາກ​ການ​ສຳ​ຫຼວດ ໃນ​ໄລຍະ​ແຕ່​ປີ 2004 ຮອດ​ປີ 2011 ໄດ້​ຖືກ​ທຳລາຍ​ໄປ​ແລ້ວ ດ້ວຍ​ເຫດຜົນ​ວ່າ​ຂໍ້​ມູນ​ເຫຼົ່ານັ້ນ​ບໍ່​ໄດ້​ຮັບ​ການ​ສະເໜີ​ໃຫ້​ເກັບ​ຮັກສາ. ເຖິງ​ຢ່າງໃດ​ກໍ​ຕາມ ຄະນະ​ກຳມະການ​ການ​ສືບສວນ​ຂອງ​ກະຊວງ​ດັ່ງກ່າວ ໃຫ້​ຮູ້​ວ່າ ຂໍ້​ມູນ​ດັ່ງກ່າວ​ຄວນ​ເກັບ​ຮັກສາ​ໄວ້ ຕາມ​ຂໍ້ຄວາມ​ໃນ​ກົດໝາຍ​ທີ່​ກ່ຽວຂ້ອງ​ເຖິງ​ສະຖິຕິ ແລະ​ການ​ຄຸ້ມ​ຄອງ​ຂໍ້​ມູນ​ສາທາລະນະ.

    ການ​ດັດແກ້​ຂໍ້​ມູນ​ໃນ​ຂອບ​ຂະໜາດ​ໃຫຍ່ ຢ່າງ​ບໍ່​ເຄີຍ​ມີ​ມາ​ກ່ອນ​ເທື່ອ​ນີ້ ມີ​ຂຶ້ນ​ຫຼັງ​ຈາກ​ທີ່ ກະຊວງ​ສາທາລະນະ​ສຸກ ແຮງ​ງານ ແລະ​ ສະຫວັດດີ​ການ​ຍີ່ປຸ່ນ ຍອມຮັບ​ວ່າ ໄດ້​ປະກາດ​ຕົວ​ເລກ​ການ​ສຳ​ຫຼວດ​ແຮງ​ງານ​ປະຈຳ​ເດືອນ ໂດຍ​ທີ່​ບໍ່​ເກັບ​ກຳ​ຂໍ້​ມູນ​ພຽງພໍ ໃນ​ໄລຍະ​ເວລາ 15 ປີ. ກະຊວງ​ດັ່ງກ່າວ​ໄດ້​ຮັບ​ການ​ສະເໜີ ໃຫ້​ດຳເນີນ​ການ​ສຳ​ຫຼວດ​ກັບ​ບັນດາ​ວິ​ສາ​ຫະ​ກິດ​ທັງ​ໝົດ​ຢູ່​ໃນ​ຍີ່ປຸ່ນ ທີ່​ມີ​ພະນັກງານ​ແຕ່ 500 ຄົນ​ຂຶ້ນ​ໄປ. ແຕ່​ເຖິງ​ຢ່າງໃດ​ກໍ​ຕາມ ກະຊວງ​ດັ່ງກ່າວ ເກັບ​ກຳ​ຂໍ້​ມູນ​ໄດ້​ພຽງ 1/3 ໃນ​ຈຳນວນ​ວິ​ສາ​ຫະ​ກິດ​ຄື​ແນວ​ນັ້ນ 1.400 ແຫ່ງ ຢູ່​ໃນ​ພື້ນ​ທີ່​ນະຄອນຫຼວງ​ໂຕ​ກຽວ ນັບ​ແຕ່​ປີ 2004 ເປັນຕົ້ນ​ມາ ດັ່ງນັ້ນ​ຈຶ່ງ​ເປັນ​ການ​ລະເມີດ​ກົດໝາຍ​ວ່າ​ດ້ວຍ​ສະຖິຕິ.

    ລະດັບ​ລາຍ​ຮັບ​ປະຈຳ​ເດືອນ​ທັງ​ໝົດ ນັບ​ແຕ່​ປີ 2012 ເປັນຕົ້ນ​ມາ ໄດ້​ຮັບ​ການ​ປັບ​ຂຶ້ນ​ຢ່າງ​ໜ້ອຍ 0,2% ຈຸດ. ສ່ວນ​ລະດັບ​ການ​ດັດແກ້​ສູງ​ສຸດ ແມ່ນ​ມີ​ຂຶ້ນ​ໃນ​ເດືອນ​ມິຖຸນາ ປີ 2016 ດ້ວຍ​ລາຍ​ຮັບ​ສະເລ່ຍ​ທີ່​ໄດ້​ຮັບ​ການ​ດັດແກ້​ແມ່ນ​ຈາກ 431.262 ເຢນ ຂຶ້ນ​ເປັນ 436.518 ເຢນ (ເທົ່າ​ກັບ 3.980 ໂດ​ລາ​ສະຫະລັດ).

    ການ​ຂາດ​ຂໍ້​ມູນ ນຳໄປ​ສູ່​ຕົວ​ເລກ​ເງິນເດືອນ ໃນ​ທົ່ວ​ປະເທດ​ຍີ່ປຸ່ນ ໄດ້​ຮັບ​ການ​ຄິດໄລ່​ຢູ່​ໃນ​ລະດັບ​ຕ່ຳ​ກວ່າ​ຕົວ​ຈິງ. ດັ່ງນັ້ນ ລັດຖະບານ​ຍີ່ປຸ່ນ ຈຶ່ງ​ບໍ່​ໄດ້​ຈ່າຍ​ໃຫ້​ແກ່​ປະຊາຊົນ 20 ລ້ານ​ຄົນ ລວມ​ເປັນ​ມູນ​ຄ່າ 56 ຕື້​ເຢນ ຍ້ອນ​ວ່າ​ຕົວ​ເລກ​ດັ່ງກ່າວ ໄດ້​ຖືກ​ນຳ​ໃຊ້​ເປັນ​ພື້ນຖານ ເພື່ອ​ຕັດສິນ​ລະດັບ​ສະຫວັດດີ​ການ ອັນ​ປະກອບ​ດ້ວຍ​ປະກັນ​ໄພ​ຫວ່າງ​ງານ ການ​ຊົດ​ເຊີຍ​ໃຫ້​ແກ່​ຜູ້​ອອກແຮງ​ງານ ແລະ ​ອື່ນໆ.

ເລື່ອງ​ດັ່ງກ່າວ ຍັງ​ເຮັດ​ໃຫ້​ລັດຖະບານ​ຍີ່ປຸ່ນ ຕ້ອງ​ໄດ້​ປັບ​ໃຫ້​ງົບປະມານ​ສົກ 2019 (ເລີ່ມ​ແຕ່​ເດືອນ​ເມສາ 2019 ເປັນຕົ້ນ​ໄປ) ມີ​ຄວາມ​ສົມ​ດຸນ ເພື່ອ​ແກ້​ໄຂ​ບັນດາ​ບັນຫາ​ທີ່​ເກີດ​ຂຶ້ນ.

ຂ່າວທີ່ກ່ຽວຂ້ອງ