ມີ 180 ຮ້ານເຂົ້າຮ່ວມຈຳໜ່າຍໃນເທສະການອາຫານລາວ

383 24 ມ.ກ. 2019 ຂ່າວໜ້າ​ໜຶ່ງ
ມີ 180 ຮ້ານເຂົ້າຮ່ວມຈຳໜ່າຍໃນເທສະການອາຫານລາວ

    ເທ​ສະ­ການ​ອາ­ຫານ​ລາວ ປະ­ຈຳ​ປີ 2019 ມີ​ຮ້ານ​ວາງ­ສະ­ແດງ ແລະ ຂາຍ​ອາ­ຫານ ເຄື່ອງ​ດື່ມ ຢາ​ສະ​ໝຸນ​ໄພ ເຄື່ອງ​ຫັດ­ຖະ­ກຳ ຈາກ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ຮ່ວມ 180 ຮ້ານ ເຊິ່ງ​ປີ​ນີ້​ຈັດ​ຂຶ້ນ​ເປັນ​ປີ​ທີ 14 ຢູ່​ສວນ​ເຈົ້າ​ອະ­ນຸ­ວົງ ບ້ານ​ວັດ​ຈັນ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ເລີ່ມ​ແຕ່​ເວ­ລາ 8:00-22:00 ໂມງ.

    ເທ​ສະ­ການ​ດັ່ງ­ກ່າວ ຈັດ​ຂຶ້ນ​ວັນ​ທີ 23-26 ມັງ­ກອນ 2019 ໂດຍ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ຮ່ວມ​ກັບ​ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ ໂດຍ​ເປັນ​ປະ­ທານ​ຂອງ​ທ່ານ​ນາງ ອິນ​ລາ​ວັນ ແກ້ວ​ບຸນ​ພັນ ປະ­ທານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ທ່ານ​ນາງ ຈັນ­ທະ​ຈອນ ວົງ​ໄຊ ປະ­ທານ​ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ ເປັນ​ກຽດ​ເຂົ້າ​ຮ່ວມ​ຂອງ​ທ່ານ​ນາງ ຄຳ​ເມີງ ວໍ­ລະ​ຈິດ ພັນ​ລະ​ຍາ​ທ່ານ​ປະ­ທານ​ປະ­ເທດ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ຈັນ­ທະ​ຈອນ ວົງ​ໄຊ ກ່າວ​ວ່າ: ເທ​ສະ­ການ​ອາ­ຫານ​ລາວ ໄດ້​ຈັດ​ຂຶ້ນ​ທຸກໆ​ປີ ເພື່ອ​ປະ­ກອບ­ສ່ວນ​ອະ­ນຸ​ຮັກ​ຮີດ­ຄອງ​ປະ­ເພ­ນີ ແລະ ວັດ­ທະ­ນະ­ທຳ​ອັນ​ດີ­ງາມ​ທີ່​ເປັນ​ເອ­ກະ­ລັກ​ຂອງ​ຄົນ​ລາວ ໄວ້​ໃຫ້​ຄູ່​ຊາດ​ລາວ​ຕະ­ຫຼອດ​ໄປ ທັງ​ເປັນ​ການ​ເຜີຍ­ແຜ່​ສິ່ງ​ຍອດ​ຍິ່ງ​ຂອງ​ລາວ ຕໍ່​ນັກ​ທ່ອງ​ທ່ຽວ​ໃນ​ອາ​ຊຽນ ແລະ ໃນ​ໂລກ ໂດຍ​ສະ­ເພາະ​ການ​ຕ້ອນ­ຮັບ​ການ­ທ່ອງ­ທ່ຽວ ລາວ-ຈີນ ປີ 2019 ເພື່ອ​ສ້າງ​ໂອ­ກາດ​ໃຫ້​ແມ່­ຍິງ ຜູ້​ປະ­ກອບ​ການ​ຂະ­ແໜງ­ການ​ປຸງ​ແຕ່ງ­ອາ­ຫານ​ຢູ່​ທ້ອງ­ຖິ່ນ ຕ່າງ​ແຂວງ ແລະ ຜູ້​ລົງ­ທຶນ ສ້າງ​ໂອ­ກາດ​ໃຫ້​ແມ່­ຍິງ​ໄດ້​ສະ­ແດງ​ຄວາມ​ສາ­ມາດ ຫົວ­ຄິດ​ປະ­ດິດ​ສ້າງ ແລະ ສະ­ຕິ​ປັນ­ຍາ​ຂອງ​ຕົນ​ໃນ​ການ​ປຸງ​ແຕ່ງ­ອາ­ຫານ​ລາວ ທັງ​ເປັນ​ການ​ແລກ­ປ່ຽນ​ບົດ­ຮຽນ​ໃນ​ການ​ປຸງ​ແຕ່ງ­ອາ­ຫານ​ລາວ​ທີ່​ມີ​ລົດ​ຊາດ​ດີ ເປັນ​ທຳ​ມະ​ຊາດ ສົ່ງ­ເສີມ​ແມ່­ຍິງ​ຜູ້​ປະ­ກອບ​ການ​ຂະ­ແໜງ­ການ​ຜະ­ລິດ​ກະ­ສິ­ກຳ ຫັດ­ຖະ­ກຳ ແລະ ອຸດ­ສາ­ຫະ­ກຳ​ປຸງ​ແຕ່ງ​ໂຮງ­ແຮມ ແລະ ຮ້ານ​ອາ­ຫານ ມີ​ບົດ­ບາດ​ໃນ​ການ​ສ້າງ​ຜະ­ລິດ​ຕະ​ພັນ​ຂອງ​ຕົນ​ໃຫ້​ເປັນ​ສິນ­ຄ້າ ຕອບ​ສະ­ໜອງ​ຄວາມ​ຕ້ອງ­ການ​ຂອງ​ຕະ­ຫຼາດ ເພື່ອ​ໃຫ້​ບັນ­ລຸ​ເປົ້າ​ໝາຍ​ຫຼຸດ​ພົ້ນ​ຄວາມ­ທຸກ​ຍາກ.

    ເທ​ສະ­ການ​ອາ­ຫານ​ລາວ​ຄັ້ງ​ນີ້ ມີ​ຮ້ານ​ອາ­ຫານ 140 ຮ້ານ ຮ້ານ​ຫັດ­ຖະ­ກຳ ກະ­ສິ­ກຳ 20 ຮ້ານ ຈາກ​ປະ­ເທດ​ອາ​ຊຽນ ແລະ ສະ­ຖານ­ທູດ 2 ຮ້ານ ຈາກ​ປະ­ເທດ​ໄທ 18 ຮ້ານ ຄາດ​ວ່າ​ຈະ​ມີ​ຍອດ​ເງິນ​ໝູ­ນວຽນ 4 ຕື້​ກີບ ແລະ ຈະ​ສາ­ມາດ​ດຶງ​ດູດ​ມວນ​ຊົນ​ເຂົ້າ​ທ່ຽວ​ຊົມ 80.000 ຄົນ ນອກ​ນີ້ ພາຍ​ໃນ​ງານ​ຈະ​ມີ​ການ​ເຝິກ­ອົບ­ຮົມ​ການ​ປຸງ​ແຕ່ງ­ອາ­ຫານ​ພື້ນ­ເມືອງ​ລາວ ເຂົ້າ­ໜົມ​ຫວານ ຄວາມ​ຮູ້​ກ່ຽວ​ກັບ​ການ​ເຂົ້າ​ເຖິງ​ແຫຼ່ງ​ທຶນ ແລະ ການ​ລິ​ເລີ່ມ​ເຮັດ​ທຸ­ລະ​ກິດ​ຂະ­ໜາດ​ນ້ອຍ.

ຂ່າວທີ່ກ່ຽວຂ້ອງ