ຂ່າວຫຼ້າສຸດ

ຣັດ​ເຊຍ ຈັບ​ກຸມ​ຜູ້ໂດຍສານ​ທີ່​ຂູ່​ຈີ້​ເຮືອບິນ​ຂອງ​ສາຍ​ການບິນ ອາ​ເອ​ໂຣ​ໂຟຼດ

629 24 ມ.ກ. 2019 ຂ່າວຕ່າງປະເທດ
ຣັດ​ເຊຍ ຈັບ​ກຸມ​ຜູ້ໂດຍສານ​ທີ່​ຂູ່​ຈີ້​ເຮືອບິນ​ຂອງ​ສາຍ​ການບິນ ອາ​ເອ​ໂຣ​ໂຟຼດ

      ສຳນັກ​ຂ່າວສານ Ria Novosti ຂອງ​ຣັດ​ເຊຍ ລາຍ​ງານ​ວ່າ ກອງ​ກຳລັງ​ທີ່​ກ່ຽວຂ້ອງ ໄດ້​ຈັບ​ກຸມ​ຜູ້ໂດຍສານ​ຄົນ​ໜຶ່ງ ທີ່​ຂູ່​ຈີ້​ເຮືອບິນ ໝາຍ​ເລກ​ຖ້ຽວ​ບິນ SU 1515 ຂອງ​ສາຍ​ການບິນ ອາ​ເອ​ໂຣ​ໂຟຼດ (Aeroflot) ຂອງ​ຣັດ​ເຊຍ ທີ່ຢູ່​ລະຫວ່າງ​ການ​ປະຕິບັດ​ຖ້ຽວ​ບິນ​ຈາກ​ນະຄອນ ຊູ​ກູດ ໃນ​ເຂດ​ຊີ​ເບຣີ ໄປ​ຍັງ​ນະຄອນ​ຫຼວງ​​ມົສ​ກູ. ເຫດການ​ນີ້ ເກີດ​ຂຶ້ນ​ໃນ​ວັນ​ທີ 22 ມັງກອນ​ນີ້ ໂດຍ​ທີ່​ບໍ່​ໄດ້​ມີ​ຜູ້ໂດຍສານ ແລະ​ຈຸ​ບິນ​ຄົນ​ໃດ ໄດ້​ຮັບ​ບາດເຈັບ.

    ກ່ອນ​ໜ້າ​ນັ້ນ ເຮືອບິນ​ໝາຍ​ເລກ​ຖ້ຽວ​ບິນ SU 1515 ໄດ້​ບິນ​ລົງ​ຈອດ​ທີ່​ນະຄອນ ຄັນ​ຕີ - ມາ​ຊີ​ຢິ​​ສກ໌ ຊຶ່ງ​ສາເຫດ​ກໍ​ແມ່ນ​ເປັນ​ຍ້ອນ​ວ່າ​ຜູ້ໂດຍສານ​ຊາຍ​ຄົນ​ໜຶ່ງ ທີ່​ດື່ມ​ເຫຼົ້າ​ຈົນ​ເມົາ ຂູ່​ວ່າ​ເຂົາ​ມີ​ອາວຸດ​ຕິດ​ຕົວ ແລະ​ໄດ້​ພະຍາຍາມ​ໝົ້ນ​ເຂົ້າ​ໄປ​ໃນ​ຫ້ອງ​ຂັບ​ຂອງ​ນັກ​ບິນ. ຜູ້ໂດຍສານ​ຄົນ​ນີ້ ໄດ້​ສະເໜີ​ໃຫ້​ປ່ຽນ​ທິດ​ທາງ​ບິນ ແຕ່​ຈຸ​ບິນ​ໄດ້​ປອບ​ໃຈ​ເຂົາ ວ່າ​ຂໍ​ບິນ​ລົງ​ນະຄອນ ຄັນ​ຕີ-ມາ​ຊີ​ຢິ​​ສກ໌ ເພື່ອ​ເຕີມ​ນ້ຳມັນ. ຫຼັງ​ຈາກ​ທີ່​ເຮືອບິນ​ບິນ​ລົງ​ຈອດ​ແລ້ວ ເປົ້າ​ໝາຍ​ດັ່ງກ່າວ​ກໍ​ຖືກ​ຈັບ​ກຸມ.

    ໃນ​ອີກ​ເຫດການ​ໜຶ່ງ ກະຊວງ​ປ້ອງ​ກັນ​ປະເທດ​ຣັດ​ເຊຍ ແຈ້ງ​ໃຫ້​ຮູ້​ວ່າ ເຮືອບິນ​ຖິ້ມ​ລະເບີດ ຍຸດ​ທະ​ສາດ TU-22M3 ລຳ​ໜຶ່ງ ຕ້ອງ​ໄດ້​ບິນ​ລົງ​ຈອດ​ສຸກ​ເສີນ​ໃນ​ວັນ​ທີ 22 ມັງກອນ​ນີ້ ໃນ​ສະພາບ​ທີ່​ປະສົບ​ເຫດ​ຂັດຂ້ອງ ຈາກ​ທີ່​ມີ​ພາຍຸ​ຫິມະ​ຢູ່​ໃນ​ພື້ນ​ທີ່​ແຂວງ ມວກ​ມານ​​ສກ໌ ສົ່ງ​ຜົນ​ໃຫ້ ສະມາຊິກ​ໃນ​ຈຸ​ບິນ ເສຍ​ຊີວິດ 2 ຄົນ ແລະ ບາດເຈັບ​ອີກ 2 ຄົນ.

ຂ່າວທີ່ກ່ຽວຂ້ອງ