ວາງສີລາລຶກ ສ້າງໂຮງໝໍເຊດຖາທິຣາດຫຼັງໃໝ່

359 24 ມ.ກ. 2019 ຂ່າວໜ້າ​ໜຶ່ງ
ວາງສີລາລຶກ ສ້າງໂຮງໝໍເຊດຖາທິຣາດຫຼັງໃໝ່

    ພິ­ທີ​ວາງ​ສີ​ລາ​ລືກ ກໍ່­ສ້າງ​ອາ­ຄານ​ໂຮງ­ໝໍ​ເຊດ​ຖາ​ທິ​ຣາດ​ຫຼັງ​ໃໝ່ ແລະ ສະ­ໜອງ​ອຸ­ປະ­ກອນ​ການ​ແພດ​ໃຫ້​ໂຮງ­ໝໍ​ແຂວງ​ຈຳ­ປາ​ສັກ ຈາກ​ລັດ­ຖະ­ບານ​ຍີ່­ປຸ່ນ ໄດ້​ຈັດ​ຂຶ້ນ​ໃນ​ວັນ​ທີ 23 ມັງ­ກອນ 2019 ທີ່​ໂຮງ­ໝໍ​ດັ່ງ­ກ່າວ ບ້ານ​ດອນ​ກອຍ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ທ່ານ ໄພ​ວັນ ແກ້ວ​ປະ­ເສີດ ຜູ້­ອຳ­ນວຍ­ການ​ໂຮງ­ໝໍ​ເຊດ​ຖາ​ທິ​ຣາດ ທ່ານ ທາ​ເຄ​ຊິ ຮິ​ຄິ​ຮາ​ຣະ ເອກ​ອັກ​ຄະ​ຣາ​ຊະ​ທູດ​ຍີ່­ປຸ່ນ ປະ­ຈຳ​ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ໂຄງ­ການ​ກໍ່­ສ້າງ​ດັ່ງ­ກ່າວ ໄດ້​ຮັບ​ການ​ຊ່ວຍ­ເຫຼືອ​ລ້າ​ຈາກ​ລັດ­ຖະ­ບານ​ຍີ່­ປຸ່ນ ລວມ​ມູນ​ຄ່າ​ທັງ​ໝົດ 17.346.000 ໂດ​ລາ​ສະ­ຫະ­ລັດ ຫຼື ປະ­ມານ 148.628.438.738 ກີບ ເຊິ່ງ​ອາ­ຄານ​ດັ່ງ­ກ່າວ ເປັນ​ອາ­ຄານ​ສອງ​ຊັ້ນ ປະ­ກອບ​ມີ​ພະ​ແນກ​ສຸກ​ເສີນ ພະ​ແນກ​ລັງ­ສີ ພະ​ແນກ​ກວດ​ເຂດ​ນອກ ແລະ ອື່ນໆ ລວມ​ເນື້ອ­ທີ່​ທັງ​ໝົດ 3.749 ຕາ​ແມັດ ຄາດ​ວ່າ​ຈະ​ໃຫ້​ສຳ­ເລັດ ໃນ​ຕົ້ນ​ປີ 2020 ນອກ​ນັ້ນ ລັດ­ຖະ­ບານ​ຍີ່­ປຸ່ນ ຍັງ​ໄດ້​ສະ­ໜອງ​ອຸ­ປະ­ກອນ​ການ​ແພດ​ໃຫ້​ໂຮງ­ໝໍ​ເຊດ​ຖາ​ທິ​ຣາດ​ຕື່ມ​ອີກ ເຊິ່ງ​ລວມ​ມີ 74 ປະ­ເພດ ແບ່ງ​ອອກ​ເປັນ​ອຸ­ປະ­ກອນ​ຍ່ອຍ 347 ລາຍ­ການ ພ້ອມ​ນັ້ນ ຍັງ​ມີ​ຫ້ອງ​ເຝິກ­ອົບ­ຮົມ​ໃຫ້​ແກ່​ນັກ​ສຶກ​ສາ​ແພດ ແລະ ພະ­ນັກ­ງານ ພ້ອມ​ດຽວ​ກັນ​ນັ້ນ ລັດ­ຖະ­ບານ​ຍີ່­ປຸ່ນ ຍັງ​ຈະ​ໄດ້​ສະ­ໜອງ​ອຸ­ປະ­ກອນ​ການ​ແພດ ຈຳ­ນວນ​ໜຶ່ງ​ໃຫ້​ກັບ​ໂຮງ­ໝໍ​ແຂວງ​ຈຳ­ປາ​ສັກ ພາຍ​ໃຕ້​ໂຄງ­ການ “ປັບ­ປຸງ​ໂຮງ­ໝໍ​ເຊດ​ຖາ​ທິ​ຣາດ ແລະ ໂຮງ­ໝໍ​ແຂວງ​ຈຳ­ປາ​ສັກ”.

    ໂຄງ­ການ​ຊ່ວຍ­ເຫຼືອ​ດັ່ງ­ກ່າວ ເປັນ​ການ​ປະ­ກອບ­ສ່ວນ​ເຂົ້າ​ໃນ​ການ​ປັບ­ປຸງ​ຄຸນ​ນະ​ພາບ​ຂອງ​ການ​ບໍ­ລິ­ການ​ສຸ­ຂະ­ພາບ ແລະ ເພື່ອ​ສ້າງ​ຄວາມ​ເຂັ້ມ­ແຂງ ໃຫ້​ລະ­ບົບ​ສາ­ທາ­ລະ­ນະ​ສຸກ ໃນ ສປປ ລາວ ບັນ­ລຸ​ເປົ້າ​ໝາຍ​ທີ່​ວາງ​ໄວ້ ໂດຍ​ສະ­ເພາະ ວຽກ​ງານ​ການ​ບໍ­ລິ­ການ​ດ້ານ​ການ​ແພດ​ໃຫ້​ມີ​ຄວາມ​ວ່ອງ­ໄວ ທັນ​ສະ­ໄໝ ສາ­ມາດ​ຕອບ​ສະ­ໜອງ​ຕາມ​ຄວາມ​ຮຽກ­ຮ້ອງ​ຕ້ອງ­ການ​ຂອງ​ສັງ­ຄົມ ກໍ​ຄື ຄົນ​ເຈັບ​ທີ່​ເຂົ້າ​ມາ​ປິ່ນ­ປົວ​ຢູ່​ໂຮງ­ໝໍ​ດັ່ງ­ກ່າວ​ໄດ້​ຢ່າງ​ພຽງ­ພໍ ແລະ ມີ​ປະ­ສິດ­ທິ­ພາບ​ປະ​ສິດ­ທິ​ຜົນ.

ຂ່າວທີ່ກ່ຽວຂ້ອງ