ເອັມພອຍມາກ-ມິນິບິ໊ກຊີ ຮ່ວມມືກັນໃຫ້ບໍລິການສະດວກຊື້ທັນສະໄໝ

296 24 ມ.ກ. 2019 ຂ່າວໜ້າ​ໜຶ່ງ
ເອັມພອຍມາກ-ມິນິບິ໊ກຊີ ຮ່ວມມືກັນໃຫ້ບໍລິການສະດວກຊື້ທັນສະໄໝ

    ເອັມ​ພອຍ​ມາກ ຮ່ວມ​ກັບ​ແຟນ​ຊາຍ​ມິ​ນິ​ບິ໊ກ​ຊີ ພັດ­ທະ­ນາ​ຮູບ​ແບບ​ຮ້ານ​ສະ­ດວກ​ຊື້ ເພື່ອ​ເພີ່ມ​ຄວາມ​ສາ­ມາດ​ໃນ​ການ​ມອບ​ສິນ­ຄ້າ ແລະ ບໍ­ລິ­ການ​ທີ່​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ຜູ້​ບໍ­ລິ­ໂພກ​ໃນ​ນະ­ຄອນ­ຫຼວງ​ວຽງ​ຈັນ ໂດຍ​ຈະ​ປັບ​ຮູບ​ແບບ​ເອັມ​ພອຍ​ມາກ​ໃຫ້​ທັນ​ສະ­ໄໝ ມີ​ສິນ­ຄ້າ ແລະ ບໍ­ລິ­ການ​ທີ່​ຫຼາຍ​ຂຶ້ນ ດ້ວຍ​ຮູບ​ແບບ​ແຟນ​ຊາຍ​ມິ​ນິ​ບິ໊ກ​ຊີ ທັງ 42 ສາ­ຂາ ພາຍ​ໃນ​ໄຕ​ມາດ​ທຳ​ອິດ ປີ 2019.

    ທ່ານ​ນາງ ວິ­ພາ​ດາ ດວງ​ຣັດ​ຕະ​ນາ ປະ­ທານ​ກຳ­ມະ­ການ​ບໍ­ລິ­ຫານ​ບໍ­ລິ­ສັດ ເອັມ​ພອຍ​ມາກ​ການ​ຄ້າ ຈຳ­ກັດ​ໃຫ້​ຮູ້​ວ່າ: ເອັມ​ພອຍ​ມາກ ເປັນ​ຮ້ານ​ສະ­ດວກ​ຊື້​ຂອງ​ຄົນ​ລາວ ເຊິ່ງ​ດຳ­ເນີນ​ທຸ­ລະ​ກິດ​ມາ​ຫຼາຍ​ກວ່າ 13 ປີ ໂດຍ​ເລັ່ງ​ເຫັນ​ໂອ­ກາດ​ທີ່​ຈະ​ພັດ­ທະ­ນາ​ທຸ­ລະ​ກິດ ເພື່ອ​ໃຫ້​ກ້າວ​ທັນ​ກັບ​ຮູບ​ແບບ​ການ​ດຳ­ລົງ​ຊີ­ວິດ​ຂອງ​ຜູ້​ບໍ­ລິ­ໂພກ ຈຶ່ງ​ໄດ້​ຮ່ວມ​ມື​ກັບ​ແຟນ​ຊາຍ​ມິ​ນິ​ບິ໊ກ​ຊີ ໜຶ່ງ​ໃນ​ຮູບ​ແບບ​ທຸ­ລະ​ກິດ​ຂາຍ­ຍ່ອຍ​ຂອງ​ບໍ­ລິ­ສັດ ບິ໊ກ​ຊີ​ຊູ​ເປີ້​ເຊັນ​ເຕີ້ ຈຳ­ກັດ (ມະ­ຫາ­ຊົນ) ຮ້ານ​ຄ້າ​ຍ່ອຍ​ໃນ​ກຸ່ມ​ບີ​ເຈ​ຊີ ເພື່ອ​ນຳ​ນະ​ວັດ­ຕະ​ກຳ ແລະ ປະ­ສົບ​ການ​ຄວາມ​ຊ່ຽວ­ຊານ​ໃນ​ການ​ພັດ­ທະ­ນາ​ລະ­ບົບ​ການ​ບໍ­ລິ­ຫານ​ຈັດ­ການ​ຮ້ານ ຮູບ​ແບບ​ການ​ຈັດ​ວາງ​ສິນ­ຄ້າ ຄວາມ​ຫຼວງ­ຫຼາຍ​ຂອງ​ສິນ­ຄ້າ​ອຸ­ປະ­ໂພກ-ບໍ­ລິ­ໂພກ (4.500 ລາຍ­ການ) ລວມ​ເຖິງ​ບໍ­ລິ­ການ​ໃໝ່ໆ ເພື່ອ​ສະ­ໜອງ​ຄວາມ​ຕ້ອງ­ການ​ຂອງ​ລູກ​ຄ້າ​ໃນ​ລາວ ເຊິ່ງ​ຈະ​ສາ­ມາດ​ສ້າງ​ອາ­ຊີບ​ໃຫ້​ຄົນ​ລາວ 500 ຄົນ ຕື່ມ​ອີກ.

    ເອັມ​ພອຍ​ມາກ​ແບບ​ໃໝ່ ໃນ​ຮູບ​ແບບ​ແຟນ​ຊາຍ​ມິ​ນິ​ບິ໊ກ​ຊີ ຈະ​ເພີ່ມ​ຄວາມ​ສະ­ດວກ​ສະ­ບາຍ​ເຊັ່ນ: ບ່ອນ​ນັ່ງ​ຮັບ​ປະ­ທານ​ອາ­ຫານ ຈຳ­ໜ່າຍ​ອາ­ຫານ​ສຳ­ເລັດ​ຮູບ ແລະ ອື່ນໆ ພ້ອມ​ນີ້ ກໍ​ຈະ​ໄດ້​ເພີ່ມ​ສິນ­ຄ້າ​ເຂົ້າ​ຕື່ມ​ໂດຍ​ສະ­ເພາະ​ໃນ​ກຸ່ມ​ເຄື່ອງ­ໃຊ້​ໄຟ­ຟ້າ​ຂະ­ໜາດ​ນ້ອຍ ເຄື່ອງ​ສຳ­ອາງ ຮັບ​ຊື້​ສິນ­ຄ້າ​ທ້ອງ­ຖິ່ນ​ທີ່​ຜະ­ລິດ​ໃນ​ລາວ ມາ​ຈຳ­ໜ່າຍ​ພາຍ​ໃນ​ຮ້ານ ເປັນ­ຕົ້ນ ເຂົ້າ­ໜົມ ຊາ ກາ­ເຟ ອາ­ຫານ​ສຳ­ເລັດ​ຮູບ ເຄື່ອງ­ໃຊ້​ຄົວ​ເຮືອນ ສິນ­ຄ້າ​ທາງ​ການ​ກະ­ເສດ ຫຼື ສິນ­ຄ້າ​ແປ​ຮູບ​ທາງ​ການ​ກະ­ເສດ ທີ່​ໄດ້​ຮັບ​ການ​ຮັບ­ຮອງ​ມາດ­ຕະ­ຖານ​ກະ­ສິ­ກຳ​ທີ່​ດີ​ລາວ (Lao Gap) ແລະ ກະ­ສິ­ກຳ​ອິນ​ຊີ​ລາວ (Laos Organic Certified) ລວມ​ເຖິງ​ໂຄງ­ການ​ໃຫ້​ຄວາມ​ຮູ້ ແລະ ພັດ­ທະ­ນາ​ທັກ​ສະ­ການ​ບໍ­ລິ­ຫານ​ຈັດ­ການ​ທຸ­ລະ​ກິດ​ຄ້າ​ຂາຍ­ຍ່ອຍ​ສະ­ໄໝ​ໃໝ່ ໃຫ້​ພະ­ນັກ­ງານ ແລະ ນັກ​ສຶກ​ສາ​ເຝິກ​ງານ​ທີ່​ມາ​ເຂົ້າ​ຮ່ວມ​ໂຄງ­ການ​ກັບ​ບໍ­ລິ­ສັດ.

ຂ່າວທີ່ກ່ຽວຂ້ອງ