ຂ່າວຫຼ້າສຸດ

ວິທີການປູກຜັກປອດສານພິດ ໃຫ້ໄດ້ຮັບຜົນດີ

397 24 ມ.ກ. 2019 ຫົວຂໍ້ຂ່າວອື່ນໆ

    ປັດ­ຈຸ­ບັນ​ພືດ​ຜັກ​ປອດ​ສານ­ພິດ​ກຳ­ລັງ​ເປັນ​ທີ່​ຕ້ອງ­ການ​ຂອງ​ຕະ­ຫຼາດ ແລະ ການ​ຜະ­ລິດ​ປູກ​ຜັກ​ປອດ​ສານ­ພິດ​ຕ້ອງ​ຜ່ານ​ຫຼາຍ​ຂະ​ບວນ​ການ ດັ່ງ­ນັ້ນ ຜູ້​ຜະ­ລິດ​ຕ້ອງ​ໄດ້​ຜ່ານ​ການ​ເຝິກ­ອົບ­ຮົມ​ດ້ານ​ເຕັກ­ນິກ​ການ​ປູກ ຕ້ອງ​ມີ​ພະ­ນັກ­ງານ​ວິ­ຊາ​ການ​ໃຫ້​ຄຳ​ປຶກ­ສາ ຫຼື ເຂົ້າ​ຮ່ວມ​ໃນ​ຂະ​ບວນ​ການ​ຜະ­ລິດ​ໂດຍ​ກົງ.

    ການ​ເລືອກ​ດິນ​ສຳ­ລັບ​ປູກ​ຜັກ​ປອດ​ສານ­ພິດ ຕ້ອງ​ເປັນ​ພູມ​ສັນ­ຖານ​ທີ່​ຮາບ​ພຽງ ກະ­ຈ່າງ​ແຈ້ງ ໃກ້​ກັບ​ແຫຼ່ງ​ນ້ຳ ອຸນ­ຫະ­ພູມ​ສະ­ເລ່ຍ​ຕໍ່​ປີ​ບໍ່​ຄວນ ຕ່ຳ​ກວ່າ 13 ອົງ­ສາ ຮັບ​ປະ​ປະ​ກັນ­ແສງ​ສະ­ຫວ່າງ​ໃຫ້​ຜັກ​ເພື່ອ​ການ​ຈະ­ເລີນ​ເຕີບ​ໂຕ ແລະ ຂະ­ຫຍາຍ­ຕົວ ດິນ​ທີ່​ປູກ​ຕ້ອງ​ມີ​ຊັ້ນ​ປູກ​ຕ່ຳ​ສຸດ 40 ຊັງ​ຕີ​ເມັດ ໃນ​ນີ້ ດິນ​ທີ່​ເໝາະ​ສົມ​ທີ່​ສຸດ​ແມ່ນ​ດິນ­ຊາຍ​ຂີ້​ມ້ອນ ດິນ​ໜຽວ​ອ່ອນ ດິນ​ສັນ ດິນ​ແຄມ​ແມ່­ນ້ຳ ແລະ ອື່ນໆ ທີ່​ມີ­ຄ່າ ph ແຕ່ 5,5-7,5 ເຂດ​ທີ່​ເລືອກ​ສຳ­ລັບ​ການ​ປູກ​ຜັກ​ປອດ​ສານ­ພິດ ຕ້ອງ​ເປັນ​ດິນ​ທີ່​ບໍ່​ໄດ້​ຮັບ​ຜົກ​ກະ­ທົບ​ຕໍ່​ສິ່ງ​ເສດ​ເຫຼືອ​ໂດຍ​ກົງ​ຈາກ​ໂຮງ­ງານ​ອຸດ­ສາ­ຫະ­ກຳ ໂຮງ­ໝໍ ໂຮງ​ຂ້າ​ສັດ ປ່າ­ຊ້າ ເສັ້ນ­ທາງ​ຄົມ­ມະ­ນາ­ຄົມ ພ້ອມ​ທັງ​ເປັນ​ດິນ​ທີ່​ຮັບ­ປະ­ກັນ​ມາດ­ຖານ​ສະ­ພາບ​ແວດ​ລ້ອມ ຕ້ອງ​ເປັນ​ດິນ​ທີ່​ໄດ້​ຮັບ​ການ​ກວດ­ກາ​ລະ­ດັບ​ມົນ​ລະ​ພິດ​ຕາມ​ທີ່​ໄດ້​ກຳ­ນົດ​ໄວ້ ແລະ ກະ­ທັນ­ຫັນ​ເມື່ອ​ສົງ­ໄສ​ວ່າ​ອາດ​ມີ​ຄວາມ​ອັນ­ຕະ­ລາຍ.

    ນ້ຳ​ທີ່​ໃຊ້​ຫົດ​ຕ້ອງ​ເປັນ​ນ້ຳ​ໃສ​ທີ່​ມາ​ຈາກ​ແຫຼ່ງ​ບໍ່​ເປັນ​ມົນ​ລະ​ພິດ​ຈາກ​ຈຸ​ລະ​ຊີບ ແລະ ບັນ­ດາ​ສານ­ພິດ ຮັບ­ປະ­ກັນ​ຄຸນ​ນະ​ພາບ ບໍ່​ຄວນ​ໃຊ້​ນ້ຳ​ເສຍ​ຈາກ​ໂຮງ­ງານ​ອຸດ­ສາ­ຫະ­ກຳ ໂຮງ­ໝໍ​ເຂດ​ທີ່­ຢູ່​ອາ­ໄສ​ຂອງ​ປະ­ຊາ­ຊົນ ຟາມ​ລ້ຽງ­ສັດ ນ້ຳ​ຝຸ່ນ​ສົດ (ນ້ຳ​ຝຸ່ນ​ທີ່​ບໍ່​ທັນ​ໄດ້​ປຸງ​ແຕ່ງ) ນ້ຳ​ຍ່ຽວ​ຫົດ​ໂດຍ​ເດັດ­ຂາດ.

    ຝຸ່ນ​ທີ່​ນຳ​ໃຊ້​ເຂົ້າ​ໃນ​ການ​ປູກ​ຜັກ​ປອດ​ສານ­ພິດ ຕ້ອງ​ເປັນ​ຝຸ່ນ​ທີ່­ຢູ່​ໃນ​ສາ­ລະ­ບານ​ຝຸ່ນ​ທີ່​ໄດ້​ຮັບ​ອະ­ນຸ­ຍາດ​ໃນ​ທ້ອງ­ຖິ່ນ ຝຸ່ນ​ອົງ­ຄະ​ທາດ​ທີ່​ໄດ້​ຜ່ານ ການ​ປັບ­ປຸງ​ຕ້ອງ​ຮັບ­ປະ­ກັນ​ບໍ່​ໃຫ້​ເກີດ​ມົນ​ລະ​ພິດ​ທາງ​ເຄ​ມີ ຈຸ​ລະ​ຊີບ​ທີ່​ເປັນ​ຜົນ​ຮ້າຍ ບໍ່​ຄວນ​ນຳ​ໃຊ້​ບັນ­ດາ​ຝຸ່ນ​ທີ່​ພາ­ໃຫ້​ເກີດ​ມົນ​ລະ​ພິດ ຄື: ຝຸ່ນ​ຄອກ​ສົດ ຝຸ່ນ​ທີ່​ປຸງ​ແຕ່ງ​ຈາກ​ສິ່ງ​ເສດ​ເຫຼືອ​ທີ່​ໃຊ້​ໃນ​ຊີ­ວິດ​ປະ­ຈຳ​ວັນ ໂດຍ​ບໍ່​ຜ່ານ​ການ​ກວດ­ກາ ແລະ ຝຸ່ນ​ຈາກ​ໂຮງ­ງານ​ອຸດ­ສາ­ຫະ­ກຳ.

    (ຮຽບ​ຮຽງ​ຈາກ​ເອ­ກະ­ສານ​ແນະ­ນຳ​ເຕັກ­ນິກ​ການ​ຜະ­ລິດ​ກະ­ສິ­ກຳ-ປ່າ­ໄມ້ ຂອງ​ສູນ​ກາງ​ຊາວ​ໜຸ່ມ ປປ ລາວ).

ຂ່າວທີ່ກ່ຽວຂ້ອງ