ລັດຖະບານຍີ່ປຸ່ນ ເລັ່ງພັດທະນາລົດໃຫຍ່ບິນໄດ້

276 24 ມ.ກ. 2019 ຫົວຂໍ້ຂ່າວອື່ນໆ

    ສິ່ງ​ປະ­ດິດ​ໃນ​ຝັນ​ຂອງ​ມະ­ນຸດ​ເຮົາ ເມື່ອ​ເວົ້າ​ເຖິງ​ກາ​ຕູນ ໂດ​ຣາ​ເອ​ມອນ ຢ່າງ​ໜຶ່ງ​ກໍ​ຄື ຄອບ​ເຕີ​ໄມ້­ໄຜ່ ທີ່​ເຮັດ​ໃຫ້​ເຮົາ​ເດີນ­ທາງ​ໄປ​ໃສ​ກໍ​ໄດ້​ຕາມ​ທີ່​ໃຈ​ຕ້ອງ­ການ ໂດຍ​ບໍ່​ຕ້ອງ​ກັງ­ວົນ​ເຖິງ​ການ​ຈະ­ລາ­ຈອນ​ທີ່​ຕິດ​ຂັດ​ຢູ່​ຖະ­ໜົນ​ເບື້ອງ​ລຸ່ມ ແລະ ສິ່ງ​ປະ­ດິດ​ນີ້ ໄດ້​ກາຍ­ເປັນ​ແຮງ​ບັນ­ດານ​ໃຈ​ສຳ­ຄັນ​ຂອງ​ລັດ­ຖະ­ບານ​ຍີ່­ປຸ່ນ ທີ່​ຈະ​ພັດ­ທະ­ນາ​ໂຄງ­ການ ລົດ​ໃຫຍ່​ບິນ​ໄດ້ ຫຼື flying cars ພາຍ​ໃຕ້​ກະ­ຊວງ​ເສດ­ຖະ­ກິດ ການ​ຄ້າ ແລະ ອຸດ­ສາ­ຫະ­ກຳ​ຍີ່­ປຸ່ນ.

    ທ່ານ ຟູ​ມິ​ອາ​ກິ ເອ​ບິ​ອາ​ຣາ ຫົວ­ໜ້າ​ໂຄງ­ການ​ລົດ​ໃຫຍ່​ບິນ​ໄດ້ ບອກ​ວ່າ ນີ້​ເປັນ​ການ​ເປີດ​ໂຄງ­ການ​ໃໝ່​ທີ່​ເຮັດ​ໃຫ້​ຍີ່­ປຸ່ນ​ບໍ່​ຫຼ້າ ຫຼັງ​ຈາກ​ປະ­ເທດ​ອື່ນ​ໃນ​ການ​ພັດ­ທະ­ນາ​ຄັ້ງ​ສຳ­ຄັນ​ນີ້ ໂດຍ​ໄດ້​ຮ່ວມ​ມື​ກັບ​ບໍ­ລິ­ສັດ​ຊັ້ນ​ແນວ​ໜ້າ​ຢ່າງ​ໜ້ອຍ 20 ແຫ່ງ ເຊັ່ນ: ສາຍ​ການ­ບິນ All Nippon Airways ບໍ­ລິ­ສັດ​ດ້ານ​ອຸ­ປະ­ກອນ​ເອ​ເລັກ​ໂຕຣ​ນິກ NEC Corp ບໍ­ລິ­ສັດ ສະ​ຕາດ​ອັບ Cartivator ທີ່​ໄດ້​ຮັບ​ທຶນ​ສະ­ໜັບ­ສະ­ໜູນ​ຈາກ​ບໍ­ລິ­ສັດ ໂຕ​ໂຢ​ຕາ ມໍ​ເຕີ ແລະ ຜູ້​ໃຫ້​ບໍ­ລິ­ການ​ລົດ​ໂດຍ­ສານ​ຜ່ານ​ແອບ​ພລິ​ເຄ​ຊັ່ນ Uber.

    ແນວ​ຄິດ​ລົດ​ໃຫຍ່​ບິນ​ໄດ້​ທີ່​ຈະ​ເກີດ​ຂຶ້ນ​ນັ້ນ ຄື ຍົນ​ທີ່​ຂັບ​ເຄື່ອນ​ດ້ວຍ​ພະ­ລັງ­ງານ​ໄຟ­ຟ້າ ຫຼື ໃຊ້​ພະ­ລັງ­ງານ​ໄຮ​ບຣິດ ເປັນ​ຍົນ​ບໍ່​ມີ​ຄົນ​ຂັບ ແລະ ສາ­ມາດ​ຂຶ້ນ​ບິນ ແລະ ລົງ​ຈອດ​ໃນ​ແນວ​ຊື່​ໄດ້ ຫຼື​ທີ່​ເອີ້ນ​ວ່າ EVtol ເຊິ່ງ​ມີ​ຈຸດ​ເດັ່ນ​ທີ່​ການ​ຂຶ້ນ​ລົງ​ຂອງ​ຍົນ ແຕ່​ດີ​ກວ່າ​ເຮລິ​ຄອບ​ເຕີ ທີ່​ຕົ້ນ​ທຶນ​ການ​ບຳ­ລຸງ​ຮັກ­ສາ​ສູງ ສຽງ​ດັງ​ໃນ​ການ­ບິນ ແລະ ຕ້ອງ​ໃຊ້​ນັກ​ບິນ​ອາ­ຊີບ​ໃນ​ການ​ຄວບ​ຄຸມ.

    ຢ່າງ­ໃດ​ກໍ​ຕາມ ຫຼາຍ​ຄົນ​ເຊື່ອ​ວ່າ ລົດ​ໃຫຍ່​ບິນ​ໄດ້​ຄົງ​ຍັງ​ບໍ່­ເກີດ​ຂຶ້ນ​ໃນ​ໄລ­ຍະ​ເວ­ລາ​ອັນ​ໃກ້​ຈາກ​ຂໍ້​ຈຳ­ກັດ​ຫຼາຍ​ຢ່າງ ເຊັ່ນ: ກົດ­ໝາຍ​ຄວບ​ຄຸມ​ລົດ​ໃຫຍ່​ບິນ​ໄດ້ ບັນ­ຫາ​ເລື່ອງ​ແບດ​ເຕີ​ຣີ ລວມ​ທັງ​ການ​ຄວບ​ຄຸມ​ຄວາມ​ປອດ​ໄພ​ໃນ​ການ​ຈະ­ລາ­ຈອນ​ທາງ​ອາ­ກາດ​ຮູບ​ແບບ​ໃໝ່.

    ສຳ­ລັບ​ຮູບ​ແບບ​ຂອງ​ລົດ​ໃຫຍ່​ບິນ​ໄດ້ ໃນ​ມຸມ​ມອງ​ຂອງ​ທ່ານ ເອ​ບິ​ອາ​ຣາ ນັ້ນ ອາດ​ບໍ່​ແມ່ນ​ເໝືອນ​ກັບ​ກາ​ຕູນ ຫຼື ຮູບ­ເງົາ​ຍອດ​ນິ­ຍົມ​ຢ່າງ​ກັນ​ດ້ຳ ຫຼື ໂດ​ຣາ​ເອ​ມອນ ຫຼື​ຮູບ­ເງົາ Back to the Future ແຕ່​ສິ່ງ​ທີ່​ເຂົາ​ຫວັງ​ຈະ​ໃຫ້​ເປັນ​ເໝືອນ​ກັບ​ລົດ​ໃຫຍ່​ໃນ​ຮູບ­ເງົາ Blade Runner ທີ່​ຮູບ​ໂສມ​ເໝືອນ​ລົດ​ໃຫຍ່​ທົ່ວ​ໄປ ໂດຍ​ໃຊ້​ສັກ­ກະ​ຍະ​ພາບ​ຂອງ​ປະ­ເທດ​ຜູ້​ຜະ­ລິດ​ລົດ​ໃຫຍ່​ອັນ​ດັບ​ຕົ້ນໆ​ຂອງ​ໂລກ ໃນ​ການ​ໃຊ້​ວັດ​ສະ​ດຸ​ທີ່​ນ້ຳ­ໜັກ​ເບົາ​ພໍ​ສຳ­ລັບ​ການ​ຂຶ້ນ​ບິນ​ໄດ້.

    ທີ່​ຜ່ານ​ມາ ບໍ­ລິ­ສັດ​ຊັ້ນ​ແນວ​ໜ້າ​ທົ່ວ​ໂລກ ພະ­ຍາ­ຍາມ​ຊຸກ­ຍູ້​ເພື່ອ​ໃຫ້​ເປັນ​ເຈົ້າ​ທຳ​ອິດ​ໃນ​ການ​ພັດ­ທະ­ນາ​ລົດ​ໃຫຍ່​ບິນ​ໄດ້ ເຊັ່ນ: ກູ​ເກິ້​ລ ໂບ​ອິ້ງ ບໍ­ລິ­ສັດ “ອີ້​ຫາງ” ແລະ ກີ​ລີ່ ຂອງ​ຈີນ ບໍ­ລິ­ສັດ​ໂຟກ​ສະ​ວາ​ເກນ​ຂອງ​ເຢຍ​ລະ​ມັນ ແລະ ໂຕ​ໂຢ​ຕ້າ ມໍ​ເຕີ ທີ່​ລົງ­ທຶນ 375.000 ໂດ​ລາ ກັບ​ບໍ­ລິ­ສັດ ສະ​ຕາດ​ອັບ ສັນ­ຊາດ​ຍີ່­ປຸ່ນ Cartivator ພັດ­ທະ­ນາ​ລົດ​ໃຫຍ່​ບິນ​ໄດ້ ໂດຍ​ສະ­ເພາະ ແລະ ລົງ­ທຶນ 500 ລ້ານ​ໂດ​ລາ ກັບ​ບໍ­ລິ­ສັດ Uber ໃນ​ການ​ພັດ­ທະ­ນາ​ລົດ​ຂັບ​ເຄື່ອນ​ອັດ­ຕະ­ໂນ­ມັດ.

    ທາງ​ດ້ານ Uber ທີ່​ພັດ­ທະ­ນາ​ລະ­ບົບ UberAir ຫຼື ແທັກ​ຊີ່​ບິນ​ໄດ້​ຕົວ​ຕົ້ນ​ແບບ​ຂອງ​ອູ​ເບີ ທີ່​ມີ​ຈຸດ​ຢູ່​ນະ­ຄອນ­ຫຼວງ​ໂຕ​ກຽວ​ຂອງ​ຍີ່­ປຸ່ນ ເປັນ​ອີກ​ໜຶ່ງ​ເມືອງ​ໃຫຍ່​ທີ່ Uber ຈະ​ທົດ​ສອບ​ການ​ໃຫ້​ບໍ­ລິ­ການ​ແທັກ​ຊີ​ບິນ​ໄດ້​ເປັນ​ແຫ່ງ​ທຳ​ອິດ ໃນ​ປີ 2020 ຊຶ່ງ Uber ຕັ້ງ​ເປົ້າ​ວ່າ​ຈະ​ເລີ່ມ​ໃຫ້​ບໍ­ລິ­ການ​ໃນ​ເສັ້ນ­ທາງ​ຂອງ 2 ສະ­ໜາມ​ບິນ​ໃຫຍ່​ໃນ​ນະ­ຄອນ­ຫຼວງ​ໂຕ​ກຽວ ຢ່າງ​ສະ­ໜາມ​ບິນ​ນາ­ນາ​ຊາດ​ນາ​ຣິ​ຕະ ແລະ ອາ​ເນ​ດະ ຫຼັງ​ຈາກ​ທີ່​ຜ່ານ​ການ​ທົດ​ສອບ​ດ້ານ​ຄວາມ​ປອດ​ໄພ​ແລ້ວ ເຊັ່ນ​ດຽວ​ກັບ​ນະ­ຄອນ­ຫຼວງ​ປາ​ຣີ​ສ​ຂອງ​ຝຣັ່ງ ນະ​ຄອນ​ລອສ​ແອງ​ເຈ​ລີ​ສ ໃນ​ລັດ​ກາ​ລິ​ຟໍ​ເນຍ ແລະ ດັນ​ລັສ ໃນ​ລັດ​ເທັກ​ຊັສ ໃນ​ສະ­ຫະ­ລັດ ລວມ​ທັງ​ເມືອງ​ໃຫຍ່​ຫຼາຍ​ແຫ່ງ​ໃນ​ອົດ​ສະ​ຕຣາ​ລີ ບຣາ​ຊິນ ແລະ ອິນ​ເດຍ ແລະ ເລີ່ມ​ໃຫ້​ບໍ­ລິ­ການ​ທາງ​ການ​ຄ້າ ໃນ​ປີ 2023.

    ແຕ່​ແນວ​ຄິດ​ລົດ​ໃຫຍ່​ບິນ​ໄດ້ ບໍ່​ໄດ້​ຖືກ​ໃຈ​ບໍ­ລິ­ສັດ​ເຕັກ​ໂນ​ໂລ​ຊີ​ທຸກ​ແຫ່ງ​ຢ່າງ​ຫຼ້າ​ສຸດ ທ່ານ ອີ​ລອນ ມັສ ຜູ້​ບໍ­ລິ­ຫານ Tesla ໄດ້​ສະ­ແດງ​ຄວາມ​ເຫັນ​ວ່າ ພຽງ​ແຕ່​ໂດຣນ​ຂອງ​ຫຼິ້ນ ຍັງ​ມີ​ສຽງ​ດັງ​ເວ­ລາ​ຂັບ​ເຄື່ອນ ດັ່ງ­ນັ້ນ ການ​ຜະ­ລິດ​ໂດຣນ​ໂດຍ ສານ​ໄຮ້​ສຽງ ຂະ­ນະ​ທີ່​ຕ້ອງ​ບັນ­ທຸກ​ນ້ຳ­ໜັກ​ຫຼາຍ​ກວ່າ​ເປັນ​ພັນ​ເທົ່າ​ນັ້ນ ເປັນ​ສິ່ງ​ທີ່​ບໍ່​ໜ້າ​ເປັນ​ໄປ​ໄດ້​ງ່າຍ.

    ທັງ​ນີ້ ເປົ້າ​ໝາຍ​ຂອງ​ຍີ່­ປຸ່ນ​ໃນ​ການ​ພັດ­ທະ­ນາ​ລົດ​ໃຫຍ່​ບິນ​ໄດ້​ນັ້ນ ຄື ການ​ພັດ­ທະ­ນາ​ລົດ​ຕົ້ນ​ແບບ​ທີ່​ສາ­ມາດ​ບິນ​ຂຶ້ນ​ໄປ​ຈູດ​ທວນ­ໄຟ ໃນ​ພິ­ທີ​ເປິດ​ການ​ແຂ່ງ­ຂັນ​ມະ​ຫະ​ກຳ​ກີ­ລາ​ແຫ່ງ​ມວນ​ມະ­ນຸດ­ຊາດ ໂອ​ລິມ​ປິກ 2020 ທີ່​ນະ­ຄອນ­ຫຼວງ​ໂຕ​ກຽວ​ຂອງ​ຍີ່­ປຸ່ນ​ໃຫ້​ໄດ້.

ຂ່າວທີ່ກ່ຽວຂ້ອງ