ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 24/01/2019

320 24 ມ.ກ. 2019 ຫົວຂໍ້ຂ່າວອື່ນໆ

    ມື້­ນີ້​ພວກ​ເຮົາ​ພາ­ກັນ​ໄປ​ເບິ່ງ​ເລື່ອງ​ການ​ເກັບ​ພາ­ສີ​ນັກ​ທ່ອງ​ທ່ຽວ​ຢູ່​ມາ​ເລ​ເຊຍ ກົດ­ໝາຍ​ຫຼຸດ­ຜ່ອນ​ຈຳ­ນວນ​ນັກ­ໂທດ​ຢູ່​ອາ​ຣາ​ບີ ຊາ​ອຸ​ດິດ ແລະ ຂ່າວ​ການ​ນຳ​ໃຊ້​ກົດ­ໝາຍ​ຄວາມ​ໝັ້ນ­ຄົງ​ທາງ​ໄຊ​ເບີ​ຢູ່​ຫວຽດ­ນາມ.

    ທີ່ ມາ​ເລ​ເຊຍ: ຄຳ​ຂວັນ​ທ່ອງ​ທ່ຽວ​ທີ່​ຄ່ອງ​ຄື ແລະ ມີ​ຊື່​ສຽງ​ຂອງ​ມາ​ເລ​ເຊຍ​ນັ້ນ ຂຽນ​ເປັນ​ອັງ­ກິດ​ວ່າ: Malaysia Truly Asia ແປ​ເປັນ​ລາວ​ໄດ້​ຄວາມ​ໝາ­ຍວ່າ: ມາ​ເລ​ເຊຍ ທີ່​ນີ້​ຄື ເອ​ເຊຍ ແຕ່​ຖ້າ​ເບິ່ງ​ໃນ​ແງ່​ສຽງ​ສຳ­ຜັດ​ແລ້ວ ຟັງ​ເປັນ​ພາ­ສາ​ອັງ­ກິດ​ມ່ວນ​ກວ່າ ແຕ່​ເລິກ­ເຊິ່ງ ແລະ ມີ​ຄວາມ​ໝາຍ​ກວ່າ​ເນື້ອ​ໃນ​ຄຳ​ຂວັນ​ຕົວ​ຈິງ​ນັ້ນ ກໍ​ແມ່ນ​ຄວາມ​ຫຼາກ​ຫຼາຍ ແລະ ຄວາມ​ຄ່ອງ​ຕົວ​ໃນ​ການ​ປັບ​ປ່ຽນ​ຂອງ​ການ­ທ່ອງ­ທ່ຽວ​ໃນ​ປະ­ເທດ​ນີ້ ເພື່ອ​ໃຫ້​ເຂົ້າ​ກັບ​ສະ­ພາບ ແລະ ລົດ​ນິ­ຍົມ​ຂອງ​ນັກ​ທ່ອງ​ທ່ຽວ​ຕົວ​ຈິງ ເຊັ່ນ: ນະ­ໂຍ­ບາຍ​ຍົກ­ເວັ້ນ​ພາ­ສີ​ສຳ­ລັບ​ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ­ປະ­ເທດ ທີ່​ໄປ​ພັກ​ກັບ​ຄອບ­ຄົວ​ປະ­ຊາ­ຊົນ ເອີ້ນ​ເປັນ​ພາ­ສາ​ອັງ­ກິດ​ວ່າ: “ໂຮມ​ສະ​ເຕ” (Homestay) ນັບ​ແຕ່​ວັນ​ທີ 1 ສິງ­ຫາ ປີ 2017 ເປັນ­ຕົ້ນ​ມາ ມາ​ເລ​ເຊຍ​ໄດ້​ເລີ່ມ​ເກັບ​ພາ­ສີ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ ເງິນ​ພາ­ສີ​ດັ່ງ­ກ່າວ​ນຳ​ໃຊ້​ເພື່ອ​ພັດ­ທະ­ນາ​ຂະ­ແໜງ​ທ່ອງ​ທ່ຽວ​ຂອງ​ປະ­ເທດ ເຊັ່ນ: ພື້ນ­ຖານ​ໂຄງ​ລ່າງ ພາ­ຫະ­ນະ​ຮັບ​ໃຊ້ ແລະ ການ​ໂຄ­ສະ­ນາ​ອັດ­ຕາ​ພາ­ສີ​ນັກ​ທ່ອງ​ທ່ຽວ​ນັ້ນ ຂຶ້ນ​ກັບ​ລະ­ດັບ​ໂຮງ­ແຮມ ຫຼື ເຮືອນ​ພັກ​ທີ່​ນັກ​ທ່ອງ​ທ່ຽວ​ພັກ​ຂ້າມ​ຄືນ ເຊັ່ນ: ໂຮງ­ແຮມ 5 ດາວ ກໍ​ເກັບ​ສູງ​ແລ້ວ ກໍ​ຫຼຸດ​ລັ່ນ​ກັນ​ລົງ​ມາ​ຮອດ​ໂຮງ­ແຮມ ຫຼື ທີ່​ພັກ​ທີ່​ບໍ່​ໄດ້​ຈັດ​ລະ­ດັບ ສຳ­ລັບ​ອັດ­ຕາ​ສູງ​ສຸດ​ແມ່ນ 20 ຣິງ​ກິດ​ຕໍ່​ຄືນ ແລະ ຕ່ຳ​ສຸດ​ແມ່ນ 2,5 ຣິງ​ກິດ/ຄືນ ສ່ວນ​ນັກ​ທ່ອງ​ທ່ຽວ​ທີ່​ພັກ​ຢູ່​ເຮືອນ​ນຳ ຄອບ­ຄົວ​ປະ­ຊາ­ຊົນ​ນັ້ນ ບໍ່​ໄດ້​ເສຍ​ພາ­ສີ ແຕ່​ເຈົ້າ​ຂອງ​ສະ­ຖານ­ທີ່​ຄອບ­ຄົວ​ທີ່​ໃຫ້​ບໍ­ລິ­ການ​ນັກ​ທ່ອງ​ທ່ຽວ​ນັ້ນ ຕ້ອງ​ໄດ້​ຈົດ​ທະ­ບຽນ​ກັບ​ກະ­ຊວງ​ທ່ອງ​ທ່ຽວ ແລະ ວັດ­ທະ­ນະ­ທຳ ຢ່າງ​ເປັນ​ທາງ​ການ​ບໍ່​ແມ່ນ​ເຮັດ​ໃຜ​ເຮັດ​ລາວ ເພື່ອ​ເອົາ​ເງິນ​ເຂົ້າ­ຖົງ​ສ່ວນ​ຕົວ.

    ທີ່ ອາ​ຣາ​ບີ ຊາ​ອຸ​ດິດ: ເມື່ອ​ເກືອບ 3 ປີ­ຜ່ານ­ມາ ມີ​ຂ່າວ​ວ່າ ທາງ​ການ​ອາ​ຣາ​ບີ ຊາ​ອຸ​ດິດ ຊອກ​ວິ­ທີ​ແກ້​ໄຂ​ບັນ­ຫາ​ຄຸກ​ແອ​ອັດ​ຍັດ​ບຽດ​ຍ້ອນ​ມີ​ນັກ­ໂທດ​ຫຼາຍ​ເກີນ​ໄປ ຄື ມີ​ຫຼາຍ​ກວ່າ 47 ພັນ​ຄົນ (ສະ­ຖິ­ຕິ​ໃນ​ເວ­ລາ​ນັ້ນ) ເພື່ອ​ປັບ­ປຸງ​ສະ­ພາບ​ຂອງ​ຄຸກ​ທີ່​ມີ​ຈຳ­ນວນ​ໜ້ອຍ​ກວ່າ​ຈຳ­ນວນ​ນັກ­ໂທດ​ນັ້ນ ທາງ​ການ​ຂອງ​ປະ­ເທດ​ນີ້ ຈຶ່ງ​ໄດ້​ເລີ່ມ​ຮ່າງ​ກົດ­ໝາຍ​ໃນ​ປີ 2014 ເພື່ອ​ຫຼຸດ​ຈຳ­ນວນ​ນັກ­ໂທດ​ລົງ​ໃຫ້​ເຫຼືອ​ພຽງ 50% ກົດ­ໝາຍ​ນີ້​ປະ­ກາດ​ໃຊ້ ໃນ​ປີ 2015 ເປັນ­ຕົ້ນ​ມາ ໂດຍ​ໄດ້​ກາຍ­ເປັນ​ພື້ນ­ຖານ ສຳ­ລັບ​ການ​ຕັດ­ສິນ​ໂທດ​ການ​ກະ­ທຳ​ຜິດ ຄື ກຳ­ນົດ​ໃຫ້​ມີ​ລະ­ບົບ​ຄວບ​ຄຸມ​ການ​ປະ­ພຶດ ຫຼື ລະ­ບົບ​ດັດ​ສ້າງ​ຜູ້​ທີ່​ມີ​ຄວາມ​ຜິດ​ນັ້ນ​ເບົາ­ບາງ ເຊັ່ນ: ການ​ອາ​ລະ​ວາດ​ຕ່ອຍ​ຕີ​ກັນ ຫຼື ການ​ໃຊ້​ຄວາມ​ຮຸນ​ແຮງ​ຢູ່​ຕາມ​ສະ­ຖານ­ທີ່​ສາ­ທາ­ລະ­ນະ ໃນ​ເມື່ອ​ກ່ອນ​ບໍ່​ວ່າ​ຈະ​ເປັນ​ໂທດ​ໜັກ ຫຼື ໂທດ​ເບົາ­ບາງ ກໍ​ລ້ວນ​ແຕ່​ຖືກ​ຕັດ­ສິນ​ໃຫ້​ຕິດ​ຄຸກ​ເທົ່າ​ນັ້ນ ຢູ່ ສປປ ລາວ ພວກ​ເຮົາ​ການ “ຂ້າ​ພະ­ຍາດ​ເອົາ​ຄົນ” ແມ່ນ​ນະ­ໂຍ­ບາຍ​ຫຼັກ​ໃນ​ການ​ດັດ​ສ້າງ​ໃຫ້​ຜູ້​ກະ­ທຳ​ຜິດ​ກາຍ­ເປັນ​ພົນ­ລະ­ເມືອງ​ດີ​ຂອງ​ຊາດ.

    ທີ່ ຫວຽດ­ນາມ: ຂ່າວ​ໃນ​ວັນ​ທີ 3 ເດືອນ​ມັງ­ກອນ​ນີ້ ໃຫ້​ຊາບ​ວ່າ: ກົດ­ໝາຍ​ຄວາມ​ໝັ້ນ­ຄົງ​ທາງ​ອິນ​ເຕີ​ເນັດ (ໄຊ​ເບີ) ຂອງ​ຫວຽດ­ນາມ ໄດ້​ມີ​ຜົນ​ບັງ­ຄັບ​ໃຊ້ ນັບ​ແຕ່​ວັນ​ທີ 1 ເດືອນ​ມັງ­ກອນ​ປີ​ນີ້​ເປັນ­ຕົ້ນ​ໄປ ສ່ວນ​ໜຶ່ງ​ຂອງ​ເນື້ອ​ໃນ​ທີ່​ສຳ­ຄັນ​ຂອງ​ກົດ­ໝາຍ ກໍ​ຄື ການ​ກຳ­ນົດ​ໃຫ້​ບັນ­ດາ​ບໍ­ລິ­ສັດ​ດ້ານ​ເຕັກ​ໂນ​ໂລ​ຊີ​ຕ້ອງ​ລຶບ ຫຼື ປິດ​ກັ້ນ​ເນື້ອ­ທີ່​ລັດ­ຖະ­ບານ​ຫວຽດ­ນາມ ເຫັນ​ວ່າ ສົ່ງ​ຜົນ​ກະ­ທົບ​ທາງ​ລົບ​ຕໍ່​ຄວາມ​ໝັ້ນ­ຄົງ​ຂອງ​ຊາດ ພ້ອມ​ດຽວ​ກັນ​ນັ້ນ ບັນ­ດາ​ບໍ­ລິ­ສັດ​ທີ່​ກ່ຽວ­ຂ້ອງ ລວມ​ທັງ​ເຟດ​ບຸກ ແລະ ກູ​ເກິນ ຕ້ອງ​ມອບ​ຂໍ້​ມູນ​ອັນ­ຕະ­ລາຍ​ທັງ​ໝົດ​ໃຫ້​ລັດ­ຖະ­ບານ ຕ້ອງ​ມີ​ສຳ­ນັກ​ອັນ​ຖາ­ວອນ ແລະ ລະ­ບົບ​ຈັດ​ເກັບ​ຂໍ້​ມູນ ພາຍ​ໃນ​ປະ­ເທດ.

ຂ່າວທີ່ກ່ຽວຂ້ອງ