ຂ່າວຫຼ້າສຸດ

ໃນທຸກ 2 ມີ​ມະຫາ​ເສດຖີ​ເພີ່ມ​ຂຶ້ນ​ຕື່ມ​ອີກ 1 ຄົນ

518 23 ມ.ກ. 2019 ຂ່າວຕ່າງປະເທດ
ໃນທຸກ 2  ມີ​ມະຫາ​ເສດຖີ​ເພີ່ມ​ຂຶ້ນ​ຕື່ມ​ອີກ 1 ຄົນ

     ບົດ​ລາຍ​ງານ​ໃໝ່​ຫຼ້າ​ສຸດ ຂອງ Oxfam International ທີ່​ເປັນ​ອົງການ​ບໍ່​ຂຶ້ນ​ກັບ​ລັດຖະບານ ໃຫ້​ຮູ້​ວ່າ ຄົນ​ລ້ຳ​ລວຍ​ມີ​ຄວາມ​ລ້ຳ​ລວຍ​ເພີ່ມ​ຂຶ້ນ ໃນ​ຂະນະ​ທີ່​ຄົນ​ທຸກ​ຍາກ​ທີ່​ສຸດ​ໃນ​ໂລກ ພັດ​ທຸກ​ຍາກ​ລົງ​ໄປ​ອີກ ແລະ​ທ່າ​ອ່ຽງ​ຄວາມ​ບໍ່​ສະເໝີພາບ​ໃນ​ດ້ານ​ລາຍ​ຮັບ​ນີ້ ໄດ້​ເຖິງ​ຂັ້ນ​ວ່າ​ມີ​ຄວາມ​ໜ້າ​ກັງວົນ​ເປັນ​ຢ່າງ​ຍິ່ງ ທ່າມກາງ​ທີ່​ພື້ນຖານ​ເສດຖະກິດ​ໂລກ​ພວມ​ເປີດ​ກວ້າງ.

    Oxfam ໃຫ້​ຮູ້​ວ່າ ຊັບ​ສິນ​ຂອງ​ບັນດາ​ເສດຖີ ໄດ້​ເພີ່ມ​ຂຶ້ນ 12% ໃນ​ປີ​ກາຍ ໃນ​ຂະນະ​ທີ່​ປະລິມານ​ຊັບ​ສິນ ທີ່​ມີ​ຢູ່​ໜ້ອຍ​ຂອງ 3,8 ຕື້​ຄົນ ທີ່ຢູ່​ໃນ​ປະເພດ​ທຸກ​ຍາກ​ທີ່​ສຸດ​ໃນ​ໂລກ ພັດ​ສູນຫາຍ​ໄປ 11%.

    ການ​ຄົ້ນຄວ້າ​ຂອງ Oxfam ຍັງ​ສະແດງ​ໃຫ້​ເຫັນ​ວ່າ ໃນ​ແຕ່​ລະ​ມື້ ຍອດ​ຊັບ​ສິນ​ຂອງ​ບັນດາ​ມະຫາ​ເສດຖີ​ໃນ​ໂລກ ເພີ່ມ​ຂຶ້ນ​ຕື່ມ 2,5 ຕື້​ໂດ​ລາ​ສະຫະລັດ ແລະ 2 ມື້​ໃດ ແມ່ນ​ມີ​ເສດຖີ 1 ຄົນ ເຂົ້າ​ໄປ​ເພີ່ມ​ຢູ່​ໃນ​ກຸ່ມ​ຊັ້ນ​ເຊີງ​ມະຫາ​ເສດຖີ.

    ຕົວ​ເລກ​ຕ່າງໆ​ດັ່ງກ່າວ ຖືກ​ນຳ​ອອກ​ມາ​ເປີດເຜີຍ​ຢູ່​ໃນ​ເວທີ​ປາ​ໄສ​ເສດຖະກິດ​ໂລກ ຢູ່​ທີ່ ດາວ​​ົສ (ປະເທດ​ສະ​ວິດ). ເວທີ​ປາ​ໄສ​ດັ່ງກ່າວ ເປັນ​ບ່ອນ​ເຕົ້າໂຮມ​ກັນ ຂອງ​ບັນດາ​ມະຫາ​ເສດຖີ​ໃນ​ໂລກ ເຊັ່ນ ບີ​​ລ ເກດ ຜູ້​ຮ່ວມ​ກໍ່​ຕັ້ງ Microsoft ດັ່ງນີ້​ເປັນຕົ້ນ.

    ໃນ​ຂະນະ​ດຽວ​ກັນ Oxfam ໃຫ້​ຮູ້​ວ່າ ລະດັບ​ພາສີ​ສູງ​ສຸດ ຊຶ່ງ​ຄົນ​ລ້ຳ​ລວຍ ເຈົ້າ​ທຶນ​ໃຫຍ່ ຢູ່​ໃນ​ບັນດາ​ປະເທດ​ພັດທະນາ ຕ້ອງ​ໄດ້​ຈ່າຍ ໄດ້​ຫຼຸດ​ລົງ​ຈາກ 62% ໃນ​ປີ 1970 ມາ​ຍັງ​ເຫຼືອ 38% ໃນ​ປີ 2013. ຕາມ​ການ​ຄິດໄລ່​ຂອງ Oxfam ແລ້ວ​ກໍ​ແມ່ນ ການ​ຂຶ້ນ​ພາສີ 0,5% ຕໍ່​ບັນດາ​ຜູ້​ທີ່​ລ້ຳ​ລວຍ​ທີ່​ສຸດ​ໃນ​ໂລກ ຈະ​ເປັນ​ການ​ຊ່ວຍ​ໃຫ້​ເກີດ​ຄ່າ​ໃຊ້​ຈ່າຍ​ພຽງພໍ ສຳລັບ​ເດັກນ້ອຍ 262 ລ້ານ​ຄົນ ຊຶ່ງ​ປັດຈຸບັນ​ບໍ່​ໄດ້​ເຂົ້າ​ໂຮງຮຽນ​ນັ້ນ ສາມາດ​ທີ່​ຈະ​ມີ​ໂອກາດ​ໄປ​ເຂົ້າ​ໂຮງຮຽນ​ໄດ້ ພ້ອມ​ກັນ​ນັ້ນ​ກໍ​ສາມາດ​ຊ່ວຍເຫຼືອ​ຊີວິດ​ຂອງ 3,3 ລ້ານ​ຄົນ ໃຫ້​ພົ້ນ​ຈາກ​ການ​ເສຍ​ຊີວິດ ຍ້ອນ​ບັນດາ​ພະຍາດ​ທີ່​ສາມາດ​ປ້ອງ​ກັນ​ໄດ້.

ຂ່າວທີ່ກ່ຽວຂ້ອງ