ເບິ່ງບ້ານເຂົາເອົາບົດຮຽນ 23/01/2019

265 23 ມ.ກ. 2019 ຫົວຂໍ້ຂ່າວອື່ນໆ

    ສອງ​ເລື່ອງ​ທີ່​ຕ້ອງ­ການ​ໃຫ້​ຜູ້​ອ່ານ​ຮູ້​ໃນ​ວັນ​ນີ້ ໄດ້­ແກ່​ການ​ນຳ​ໃຊ້​ລະ­ບົບ​ດີ​ຈີ​ຕອລ ເພື່ອ​ບົ່ງ​ພະ­ຍາດ ແລະ ຈ່າຍ​ຢາ ຢູ່ ສ ເກົາ­ຫຼີ ແລະ ເລື່ອງ​ຊ່ອງ​ໂທລະ­ພາບ​ສຳ­ລັບ​ແມ່­ຍິງ​ອັບ​ກາ​ນິ​ສ​ຖານ.

    ທີ່ ສ ເກົາ­ຫຼີ: ມີ​ຂ່າວ​ໃນ​ທ້າຍ​ປີ 2017 ວ່າ ທາງ​ການ​ຂອງ ສ ເກົາ­ຫຼີ ໄດ້​ເລີ່ມ​ໃຊ້​ລະ­ບົບ​ສື່­ສານ​ດີ​ຈີ​ຕອລ (Digital) ເພື່ອ​ບົ່ງ­ມະ­ຕິ​ພະ­ຍາດ ເພື່ອ​ຕັດ​ຂັ້ນ​ຕອນ​ການ​ພົບ​ແພດ ແລະ ຫຍຸ້ງ​ນຳ​ເອ­ກະ­ສານ​ສັ່ງ-ຊື້​ຢາ ລາຍ​ລະ­ອຽດ​ຂອງ​ຂ່າວ (Vientiane Times 13/12/2017) ໃຫ້​ຮູ້​ວ່າ ຕາມ​ປົກ­ກະ­ຕິ​ແລ້ວ ຜູ້​ເຈັບ­ເປັນ​ຢູ່ ສ ເກົາ­ຫຼີ ຕ້ອງ​ໄດ້​ເຂົ້າ​ພົບ​ແພດ ຈາກ​ນັ້ນ ແພດ​ກໍ​ຈະ​ບົ່ງ­ມະ­ຕິ​ກ່ຽວ​ກັບ​ພະ­ຍາດ ແລ້ວ​ກໍ​ອອກ​ໃບ­ສັ່ງ­ຢາ ເຊິ່ງ​ພິມ​ໃສ່​ແບບ​ຟອມ​ສຳ­ເລັດ​ຮູບ ສົ່ງ​ໃຫ້​ຜູ້​ເຈັບ­ເປັນ ຕໍ່​ໄປ​ຜູ້​ເຈັບ­ເປັນ​ກໍ​ຈະ​ເອົາ​ໃບ­ສັ່ງ­ຢາ​ໄປ​ຍື່ນ​ໃຫ້​ຜູ້​ຈຳ­ໜ່າຍ​ຢາ ທາງ​ການ ສ ເກົາ­ຫຼີ ເຫັນ​ວ່າ​ລະ­ບົບ​ເດີມໆ​ແບບ​ນີ້ ເຮັດ​ໃຫ້​ທັງ​ແພດ ທັງ​ຄົນ​ເຈັບ​ເສຍ​ເວ­ລາ​ຫຼາຍ​ເກີນ​ໄປ ດັ່ງ­ນັ້ນ ຈຶ່ງ​ໄດ້​ເລີ່ມ​ນຳ​ໃຊ້​ລະ­ບົບ​ດີ​ຈີ​ຕອລ ເພື່ອ​ສັ່ງ​ຢາ ແນ­ໃສ່​ໃຫ້​ຄົນ​ເຈັບ​ສາ­ມາດ​ເຂົ້າ​ເຖິງ​ໂດຍ​ຜ່ານ​ມື​ຖື ຂ່າວ​ບອກ​ວ່າ​ໜ່ວຍ​ງານ​ອິນ​ເຕີ​ເນັດ ແລະ ຄວາມ​ໝັ້ນ­ຄົງ ໄດ້​ອອກ​ໜ້າ​ພາ​ທາງ​ໃນ​ການ​ສ້າງ​ລະ­ບົບ​ສັ່ງ​ຢາ​ທີ່​ແສນ​ສະ­ດວກ​ສະ­ບາຍ​ນີ້ ຮ່ວມ​ກັບ​ໂຮງ­ພະ­ຍາ­ບານ​ມະ­ຫາ­ວິ­ທະ­ຍາ­ໄລ​ເຊ​ອູນ ແລະ ສູນ​ການ​ແພດ​ຊຳ​ຊຸງ ເພື່ອ​ຄຸ້ມ​ຄອງ​ການ​ນຳ​ໃຊ້​ລະ­ບົບ​ດັ່ງ­ກ່າວ.

    ທີ່ ອັບ​ກາ​ນິ​ສ​ຖານ: ໃນ​ປີ 2002 ອຳ­ນາດ​ການ​ປົກ­ຄອງ​ພາຍ​ໃຕ້​ການ​ນຳ​ຂອງ​ກຸ່ມ ຕາ​ລິ​ບັນ ທີ່​ອັບ​ກາ​ນິ​ສ​ຖານ ໄດ້​ຖືກ​ໂຄ່ນ​ລົ້ມ ພາຍ​ໃຕ້​ລະ­ບອບ​ດັ່ງ­ກ່າວ ແມ່­ຍິງ​ຂອງ​ປະ­ເທດ​ນີ້ ຖືກ​ກົດ​ຂີ່​ໜິບ​ເຕັງ ບໍ່​ມີ​ສິດ​ສຽງ ປາກ​ບໍ່​ໄດ້​ໄອ​ບໍ່​ດັງ ສິດ­ທິ​ພື້ນ­ຖານ​ໃນ​ຄອບ­ຄົວ ແລະ ການ​ສຶກ​ສາ​ຖືກ​ຕັດ​ຮອນ​ລັດ­ຖະ­ບານ​ໃນ​ປັດ­ຈຸ­ບັນ​ຂອງ​ອັບ​ກາ​ນິ​ສ​ຖານ ໄດ້​ໃຊ້​ຄວາມ​ພະ­ຍາ­ຍາມ​ຢ່າງ​ກ້າ­ຫານ ແລະ ຕໍ່​ເນື່ອງ ເພື່ອ​ຟື້ນ​ຟູ​ສິດ­ທິ​ຂອງ​ແມ່­ຍິງ ເຖິງ​ວ່າ​ຕ້ອງ​ໄດ້ ຜ່ານ​ຜ່າ​ວົງ​ລ້ອມ​ຄອງ​ເດີມ​ດ້ານ​ຮີດ­ຄອງ​ປະ­ເພ­ນີ ກໍ​ຄື ການ​ກໍ່­ກວນ​ບຸກ​ໂຈມ​ຕີ​ຂອງ​ກຸ່ມ​ກໍ່​ການ​ຮ້າຍ ປັດ​ໄຈ​ທີ່​ຊ່ວຍ​ໃຫ້​ສິດ­ທິ​ຂອງ​ແມ່­ຍິງ​ປະ­ເທດ​ນີ້ ກະ​ດືບ​ຂຶ້ນ​ຢ່າງ​ຕັ້ງ­ໜ້າ​ນັ້ນ ກໍ​ຄື ການ​ເປີດ​ກວ້າງ​ການ​ນຳ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ​ໃນ​ຍຸກ​ດີ​ຈີ​ຕອລ ທີ່​ແມ່­ຍິງ​ມີ​ສິດ​ເຂົ້າ​ເຖິງ​ໃນ ທ້າຍ​ປີ 2017 ທາງ​ການ​ຂອງ​ປະ­ເທດ​ນີ້ ໄດ້​ສ້າງ­ຕັ້ງ​ສະ­ຖາ­ນີ​ໂທລະ­ພາບ​ດາວ​ທຽມ ດີ​ຈີ​ຕອລ ສຳ­ລັບ​ແມ່­ຍິງ​ໂດຍ​ສະ­ເພາະ​ໃສ່​ຊື່­ວ່າ: ຊານ​ທີ​ວີ (Zan TV ແປ​ວ່າ ໂທລະ­ພາບ​ແມ່­ຍິງ) ທີ່​ສາ­ມາດ​ກະ­ຈາຍ​ໄປ​ທົ່ວ​ໂລກ ຕະ­ຫຼອດ 24 ຊົ່ວ­ໂມງ ລາຍ­ການ​ໂທລະ­ພາບ​ລົງ​ເລິກ​ສົ່ງ­ເສີມ​ສິດ­ທິ​ອັນ​ຊອບ​ທຳ​ຂອງ​ແມ່­ຍິງ ພາຍ​ໃຕ້​ກົດ­ໝາຍ​ບັນ­ຫາ​ສຸ­ຂະ­ພາບ​ຈະ­ເລີນ​ພັນ ການ​ວາງ​ແຜນ​ຄອບ­ຄົວ ການ​ສຶກ​ສາ​ບັນ­ຫາ​ຄວາມ​ກ້າວ­ໜ້າ ແລະ ສິ່ງ​ທ້າ​ທາຍ​ປະ­ຈຳ​ວັນ​ທີ່​ແມ່­ຍິງ ຕ້ອງ​ໄດ້​ປະ​ເຊີນ​ທີ່​ເດັດໆ​ສຳ­ລັບ​ໂທລະ­ພາບ​ນີ້ ກໍ​ຄື “ເປັນ​ຂອງ​ແມ່­ຍິງ ເພື່ອ​ແມ່­ຍິງ ແລະ ດຳ­ເນີນ​ໂດຍ​ແມ່­ຍິງ​ເອງ”.

    ໃນ​ເວ­ລາ​ເລື່ອງ​ນີ້​ພວມ​ເປັນ​ຂ່າວ​ດັງ​ຢູ່​ນັ້ນ ອັບ​ກາ​ນິ​ສ​ຖານ ມີ​ໂທລະ­ພາບ​ທັງ​ໝົດ​ເກືອບ 80 ຊ່ອງ ເຊິ່ງ​ສ່ວນ​ໃຫຍ່​ຍັງ​ຕ້ອງ​ໄດ້​ອາ­ໄສ​ການ​ຊ່ວຍ­ເຫຼືອ​ດ້ານ​ທຶນ­ຮອນ​ຈາກ​ພາຍ​ນອກ ຍ້ອນ​ວ່າ ພື້ນ­ຖານ​ເສດ­ຖະ­ກິດ​ຍັງ​ໄດ້​ຮັບ​ຜົນ​ກະ­ທົບ​ຈາກ​ການ​ໂຈມ​ຕີ​ຂອງ​ລັດ­ທິ​ກໍ່​ການ​ຮ້າຍ​ໃນ​ໂລກ​ປັດ­ຈຸ­ບັນ ມີ​ຫຼາຍ​ສິ່ງ​ຫຼາຍ​ຢ່າງ​ທີ່​ຈັດ​ເປັນ​ສະ­ເພາະ​ໃຫ້​ແມ່­ຍິງ ໂດຍ​ແມ່­ຍິງ​ເອງ ເຊັ່ນ: ກຳ­ລັງ​ຕຳ­ຫຼວດ​ເພດ​ຍິງ​ທີ່​ເຮັດ​ວຽກ​ປົກ​ປ້ອງ​ແມ່­ຍິງ ນັກ​ກົດ­ໝາຍ​ແມ່­ຍິງ ລົດ​ໂດຍ­ສານ​ສຳ­ລັບ​ແມ່­ຍິງ ຮ້ານ​ອາ­ຫານ​ທີ່​ໃຫ້​ບໍ­ລິ­ການ​ແມ່­ຍິງ​ໂດຍ​ສະ­ເພາະ ແລະ ມີ​ຖ້ຽວ​ບິນ​ສຳ­ລັບ​ແມ່­ຍິງ​ທີ່​ອິນ​ເດຍ​ໄດ້​ບິນ​ບໍ­ລິ­ການ​ທົດ​ລອງ​ມາ​ແລ້ວ.

ຂ່າວທີ່ກ່ຽວຂ້ອງ