ຂ່າວຫຼ້າສຸດ

ເສັ້ນເລືອດໃນສະໝອງແຕກ ໄພມືດທີ່ມັກຈະມາເວລາອາບນ້ຳ

334 23 ມ.ກ. 2019 ຫົວຂໍ້ຂ່າວອື່ນໆ

    ນອກ­ຈາກ​ຈະ​ເປັນ​ການ​ອະ­ນາ­ໄມ​ຮ່າງ­ກາຍ ລ້າງ​ສິ່ງ​ສົກ­ກະ­ປົກ ແລະ ເຮັດ​ໃຫ້​ຮ່າງ­ກາຍ​ໄດ້​ຮັບ​ຄວາມ​ຊຸ່ມ​ຊື່ນ ສົດ­ຊື່ນ​ແລ້ວ ຮ່າງ­ກາຍ ແລະ ຈິດ­ໃຈ​ໄດ້​ຜ່ອນ­ຄາຍ ການ​ອາບ­ນ້ຳ​ຍັງ​ເປັນ​ການ​ກະ​ຕຸ້ນ​ລະ­ບົບ​ການ​ໄຫຼ​ວຽນ​ຂອງ​ເລືອດ ຊ່ວຍ​ໃຫ້​ອົກ​ຊີ​ແຊນ​ພາຍ​ໃນ​ຮ່າງ­ກາຍ​ໃຫ້​ດີ​ຂຶ້ນ ເຮັດ​ໃຫ້​ຮ່າງ­ກາຍ​ແຂງ­ແຮງ ແລະ ເສີມ​ສ້າງ​ລະ­ບົບ​ພູມ​ຕ້ານ­ທານ​ໄດ້​ເປັນ​ຢ່າງ​ດີ ດັ່ງ­ນັ້ນ ຫາກ​ເຮົາ​ອາບ­ນ້ຳ​ທີ່​ຜິດ​ຂັ້ນ​ຕອນ ແລະ ວິ­ທີ ຈຶ່ງ​ສົ່ງ​ຜົນ​ຕໍ່​ການ​ເກີດ​ໂຣກ​ເສັ້ນ­ເລືອດ​ໃນ​ສະ­ໝອງ​ແຕກ ຢ່າງ​ທີ່​ພົບ​ເຫັນ​ຜູ້​ເສຍ​ຊີ­ວິດ​ສ່ວນ​ໃຫຍ່​ໃນ​ຫ້ອງ​ນ້ຳ.

    ຊຶ່ງ​ສາ­ເຫດ “ເສັ້ນ­ເລືອດ​ໃນ​ສະ­ໝອງ​ແຕກ” ເກີດ​ມາ​ຈາກ​ອຸນ­ຫະ­ພູມ​ຂອງ​ຮ່າງ­ກາຍ​ປັບ​ຕົວ­ຢ່າງ​ທັນ­ທີ ສົ່ງ​ຜົນ​ໃຫ້​ເລືອດ​ຂຶ້ນ​ໄປ ລ້ຽງ​ສະ­ໝອງ​ຢ່າງ​ວ່ອງ­ໄວ ເປັນ​ເຫດ​ໃຫ້​ເກີດ​ອາ­ການ​ຫຼອດ​ເລືອດ​ໃນ​ສະ­ໝອງ​ຈີກ​ຂາດ ເລືອດ​ອອກ​ໃນ​ສະ­ໝອງ ຈຶ່ງ​ບໍ່​ຄວນ​ເຂົ້າ​ຫ້ອງ​ນ້ຳ​ແລ້ວ​ອາບ­ນ້ຳ​ໂດຍ​ການ​ເລີ່ມ​ຈາກ​ຫົວ ແຕ່​ໃຫ້​ເລີ່ມ​ຈາກ​ຕີນ​ຂຶ້ນ ມາ​ເລື້ອຍໆ​ຈົນ​ເຖິງ​ຫົວ​ເປັນ​ສ່ວນ​ສຸດ​ທ້າຍ ເພາະ​ຫົວ­ໃຈ​ຫຼັກ​ຢູ່​ທີ່ “ອຸນ­ຫະ­ພູມ” ຂອງ​ນ້ຳ​ທີ່​ຈະ​ເປັນ​ຕົວ​ກະ​ຕຸ້ນ​ການ​ເຮັດ​ວຽກ​ຂອງ​ຕ່ອມ​ຕ່າງໆ​ໃນ​ຮ່າງ­ກາຍ ເຮັດ​ໃຫ້​ລະ­ບົບ​ການ​ໄຫຼ​ວຽນ​ຂອງ​ເລືອດ ລະ­ບົບ​ການ​ຫາຍ­ໃຈ​ເຮັດ​ວຽກ​ໄດ້​ຢ່າງ​ດີ ມີ​ປະ­ສິດ­ທິ­ພາບ ແລະ ຮ່າງ­ກາຍ​ສາ­ມາດ​ປັບ​ຕົວ​ໄດ້​ທັນ.

    ທີ່​ສຳ­ຄັນ ອຸນ­ຫະ­ພູມ​ຂອງ​ນ້ຳ​ນັ້ນ​ບໍ່​ຄວນ​ເກີນ 38-40 ອົງ­ສາ​ເຊ ເນື່ອງ​ຈາກ​ເຮັດ​ໃຫ້​ຫົວ­ໃຈ​ຕ້ອງ​ເຮັດ​ວຽກ​ຫຼາຍ​ຂຶ້ນ​ໃນ​ການ​ຂະ­ຫຍາຍ​ເສັ້ນ­ເລືອດ ເພື່ອ​ຈະ​ຊ່ວຍ​ໃຫ້​ຮ່າງ­ກາຍ​ເຢັນ​ລົງ ແລະ ຄວນ​ເວັ້ນ​ໄລ­ຍະ​ການ​ອາບ ຫຼັງ​ຮັບ​ປະ­ທານ​ອາ­ຫານ​ກໍ​ຄວນ​ຈະ​ເວັ້ນ​ໄລ­ຍະ​ຈັກ 2-3 ຊົ່ວ­ໂມງ ເພາະ​ຮ່າງ­ກາຍ​ຈະ​ເສຍ​ສົມ​ດຸນ ເຮັດ​ໃຫ້​ອຸນ­ຫະ­ພູມ​ໃນ​ຮ່າງ­ກາຍ​ຫຼຸດ​ລົງ ແລະ ພູມ​ຕ້ານ­ທານ​ອ່ອນ​ແຮງ.

    ວິ­ທີ​ການ​ປ້ອງ​ກັນ​ໂຣກ​ເສັ້ນ­ເລືອດ​ໃນ​ສະ­ໝອງ​ແຕກ ຈຶ່ງ​ຄວນ​ອາບ­ນ້ຳ​ທີ່​ອຸນ­ຫະ­ພູມ​ສະ­ເລ່ຍ​ຢູ່​ທີ່ 27-34 ອົງ­ສາ​ເຊ (ນ້ຳ​ອຸ່ນ) ຫຼື ບໍ່​ຄວນ​ອຸ່ນ​ເກີນ​ອຸນ­ຫະ­ພູມ​ຂອງ​ຮ່າງ­ກາຍ 2 ອົງ­ສາ ຈະ​ເຮັດ​ໃຫ້​ຮ່າງ­ກາຍ​ສະ­ອາດ​ຫຼາຍ​ທີ່​ສຸດ ເພາະ​ຄວາມ​ອຸ່ນ​ຂອງ​ນ້ຳ​ຈະ​ເຂົ້າ​ໄປ ເປີດ​ຮູ​ຂົນ ເຮັດ​ໃຫ້​ຜິວ​ຫາຍ­ໃຈ​ໄດ້​ຫຼາຍ​ຂຶ້ນ ຂັບ​ຂອງ​ເສຍ​ທີ່​ຄ້າງ​ຢູ່​ຕາມ​ຜິວ​ໄດ້​ຫຼາຍ​ຂຶ້ນ ແລະ ຍິ່ງ​ຖ້າ​ໄດ້​ອາບ­ນ້ຳ​ອຸ່ນ​ກ່ອນ​ນອນ​ກໍ​ຈະ​ເປັນ​ຜົນ​ດີ​ຕໍ່​ສຸ­ຂະ­ພາບ ເພາະ​ຈະ​ເຮັດ​ໃຫ້​ນອນ​ຫຼັບ​ສະ­ບາຍ​ໄດ້​ດີ​ຍິ່ງ​ຂຶ້ນ ຫຼື ອຸນ­ຫະ­ພູມ​ຂອງ​ນ້ຳ​ທີ່ 21-27 ອົງ­ສາ​ເຊ (ນ້ຳ​ເຢັນ) ຈະ​ເຮັດ​ໃຫ້​ຜິວ​ເຢັນ​ສະ­ບາຍ ສົດ­ຊື່ນ ຫຼຸດ​ອາ­ການ​ອ່ອນ­ເພຍ ປຸກ​ປະ­ສາດ​ສຳ­ຜັດ ເຮັດ​ໃຫ້​ກ້າມ­ຊີ້ນ​ສົດ­ຊື່ນ ແລະ ຍັງ​ເປັນ​ຜົນ​ດີ​ຕໍ່​ລະ­ບົບ​ການ​ຫາຍ­ໃຈ ຫຼັງ​ອາບ­ນ້ຳ​ໃຊ້​ຝ່າ­ມື​ຕົບ​ເບົາໆ​ໃຫ້​ທັງ​ຕົວ ເພື່ອ​ກະ​ຕຸ້ນ​ເຊລ​ຜິວ ແລະ ຍັງ​ເປັນ​ການ​ຜ່ອນ­ຄາຍ​ກ້າມ­ຊີ້ນ​ໄດ້​ອີກ​ດ້ວຍ.

    ສ່ວນ​ໃນ​ກໍ­ລະ­ນີ​ຂອງ​ການ​ອາບ­ນ້ຳ​ໃນ​ອ່າງ ຫຼັງ​ຈາກ​ແຊ່​ຕົວ​ແລ້ວ ຄວນ​ລ້າງ​ຕົວ​ອີກ​ຄັ້ງ​ດ້ວຍ​ນ້ຳ​ເຢັນ ຄວນ​ໃຊ້​ຄວາມ​ແຮງ​ຂອງ​ຝັກ​ບົວ​ເປິດ​ສີດ​ວົນ​ລົງ​ເທິງ​ຜິວ ໄລ່​ຈາກ​ຕີນ​ຂຶ້ນ​ມາ​ໜ້າ​ທ້ອງ ມື ແຂນ​ຈົນ​ມາ​ເຖິງ​ຫົວ­ໃຈ ນ້ຳ​ເຢັນ​ຈະ​ຊ່ວຍ​ກະ​ຊັບ​ຮູ​ຂົນ ເລັ່ງ​ໃຫ້​ເກີດ​ການ​ໄຫຼ​ວຽນ​ຂອງ​ເລືອດ​ໄດ້​ດີ​ຍິ່ງ​ຂຶ້ນ ແລະ ຍັງ​ສາ­ມາດ​ຫຼຸດ​ເຊວ​ລູ​ໄລ ແລະ ຊະ​ລ້າງ​ພິດ​ເທິງ​ຜິວ​ອອກ.

    ແຕ່​ນອກ­ຈາກ​ການ​ອາບ­ນ້ຳ​ທີ່​ຖືກ​ວິ­ທີ​ແລ້ວ ເຮົາ​ຍັງ​ຕ້ອງ​ຄວນ​ຫຼຸດ​ປັດ​ໄຈ​ສ່ຽງ ເຊັ່ນ: ຮັບ​ປະ­ທານ​ອາ­ຫານ​ໃຫ້​ມີ​ປະ­ລິ­ມານ​ໄຂ­ມັນ​ບໍ່​ດີ​ໜ້ອຍ​ລົງ ຫຼຸດ ລະ ເລີກ​ການ​ສູບ­ຢາ ກິນ​ອາ­ຫານ​ໃຫ້​ຄົບ 5 ໝູ່ ອອກ­ກຳ­ລັງ​ກາຍ​ຢ່າງ​ສະ​ໝ່ຳ​ສະ­ເໝີ ພັກ­ຜ່ອນ​ໃຫ້​ພຽງ­ພໍ ເຮັດ​ຈິດ­ໃຈ​ໃຫ້​ຜ່ອງ​ໃສ ບໍ່​ເຄັ່ງ​ຄຽດ ແລະ ກວດ​ສຸ­ຂະ­ພາບ​ເປັນ​ປະ­ຈຳ.

- ວ. ດາລາວົງ - ນໍາສະເໜີ

ຂ່າວທີ່ກ່ຽວຂ້ອງ