ຄະນະຜູ້ແທນມົງໂກນ ຢ້ຽມຢາມສູນພັດທະນາກະສິກຳ ພັນເພັດ

243 22 ມ.ກ. 2019 ຂ່າວໜ້າ​ໜຶ່ງ
ຄະນະຜູ້ແທນມົງໂກນ ຢ້ຽມຢາມສູນພັດທະນາກະສິກຳ ພັນເພັດ

    ຄະ­ນະ​ຜູ້​ແທນ​ສະ­ພາ​ຄູ​ຣານ​ໃຫຍ່​ມົງ​ໂກນ ນຳ​ໂດຍ​ທ່ານ yondon perenlein BAATARBILEG ປະ­ທານ​ຄະ­ນະ​ກຳ­ມາ​ທິ​ການ​ນະ­ໂຍ­ບາຍ​ສັງ­ຄົມ ສຶກ​ສາ ວັດ­ທະ­ນະ­ທຳ ແລະ ວິ­ທະ­ຍາ­ສາດ ປະ­ທານ​ຄະ­ນະ​ມິດ­ຕະ­ພາບ​ລັດ​ຖະ​ສະ­ພາ​ມົງ​ໂກນ-ລາວ ຢ້ຽມ­ຢາມ​ບໍ­ລິ­ສັດ ພັນ​ເພັດ​ພັດ­ທະ­ນາ​ກະ­ສິ­ກຳ ຈຳ­ກັດ​ຜູ້​ດຽວ ໃນ​ວັນ​ທີ 19 ມັງ­ກອນ 2019 ຢູ່​ບໍ­ລິ­ສັດ​ດັ່ງ­ກ່າວ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ໃນ​ໂອ­ກາດ​ມາ​ຢ້ຽມ­ຢາມ ແລະ ເຮັດ​ວຽກ​ກັບ​ສະ­ພາ​ແຫ່ງ​ຊາດ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ທອງ​ສະ­ຫວັນ ມີ​ບຸນ ປະ­ທານ​ບໍ­ລິ­ສັດ ພັນ​ເພັດ​ພັດ­ທະ­ນາ​ກະ­ສິ­ກຳ ຈຳ­ກັດ​ຜູ້​ດຽວ ມີ​ທ່ານ ບຸນ​ຂວາງ ຄຳ​ບຸນ​ເຮືອງ ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ປະ­ທານ​ບໍ­ລິ­ສັດ ໄດ້​ລາຍ​ງານ​ສະ­ພາບ​ການ​ດຳ­ເນີນ​ທຸ­ລະ​ກິດ​ຂອງ​ບໍ­ລິ­ສັດ ໃນ​ການ​ຊຸກ­ຍູ້-ສົ່ງ­ເສີມ​ຊາວ​ກະ­ສິ­ກອນ​ເຂດ​ເມືອງ​ຫາດ​ຊາຍ​ຟອງ ເຮັດ​ການ​ຜະ­ລິດ​ປູກ​ເຂົ້າ 2 ລະ­ດູ​ຕໍ່​ປີ ເພື່ອ​ບໍ­ລິ­ໂພກ ແລະ ເປັນ​ສິນ­ຄ້າ​ສະ­ໜອງ​ພາຍ​ໃນ​ດ້ວຍ​ນະ­ໂຍ­ບາຍ 2+3 ເຊິ່ງ​ບໍ­ລິ­ສັດ​ໄດ້​ຮັບ​ການ​ສ້າງ­ຕັ້ງ​ປີ 2008 ມີ​ສູນ​ພັດ­ທະ­ນາ​ກະ­ສິ­ກຳ​ຢູ່​ບ້ານ​ນາ​ໄຫ ເນື້ອ­ທີ່ 30 ກວ່າ​ເຮັກ­ຕາ ເພື່ອ​ເປັນ​ສູນ​ສາ­ທິດ​ໃຫ້​ກະ­ສິ­ກອນ ແລກ­ປ່ຽນ​ບົດ­ຮຽນ​ໃນ​ການ​ນຳ​ໃຊ້​ກົນ​ຈັກ​ທັນ​ສະ­ໄໝ​ເຂົ້າ​ໃນ​ການ​ຜະ­ລິດ ແລະ ການ​ລົບ​ລ້າງ​ໄຮ່­ນາ​ນ້ອຍ​ເປັນ​ໄຮ່­ນາ​ໃຫຍ່ ເພື່ອ​ໃຫ້​ເຂົາ­ເຈົ້າ​ນຳ­ໄປ​ຈັດ​ຕັ້ງ​ຜັນ​ຂະ­ຫຍາຍ​ຢູ່​ທ້ອງ­ຖິ່ນ​ຂອງ​ຕົນ​ເອງ ປັດ­ຈຸ­ບັນ ບໍ­ລິ­ສັດ​ໄດ້​ກາຍ­ເປັນ​ຕົວ​ແບບ​ການ​ຜະ­ລິດ​ກະ­ສິ­ກຳ​ແຫ່ງ​ຊາດ ໄລ­ຍະ​ຜ່ານ​ມາ​ມີ​ຊາວ​ກະ­ສິ­ກອນ​ຫຼາຍ​ທ້ອງ­ຖິ່ນ ການ​ນຳ​ຂັ້ນ​ສູງ ນັກ­ທຸ­ລະ­ກິດ ແລະ ແຂກ​ຕ່າງ­ປະ­ເທດ​ມາ​ຢ້ຽມ­ຢາມ ສະ­ເພາະ​ຄະ­ນະ​ຜູ້​ແທນ​ປະ­ເທດ​ມົງ​ໂກນ ມາ​ຢ້ຽມ­ຢາມ​ບໍ­ລິ­ສັດ​ຄະ­ນະ​ນີ້ ເປັນ​ຄະ­ນະ​ທີ 2 ເຊິ່ງ​ມີ​ຄວາມ​ສົນ­ໃຈ​ດ້ານ​ການ​ຜະ­ລິດ​ກະ­ສິ­ກຳ​ປະ­ເພດ​ເຂົ້າ ເນື່ອງ​ຈາກ​ມົງ​ໂກນ​ເປັນ​ປະ­ເທດ​ທີ່​ມີ​ອາ­ກາດ​ໜາວ​ເຢັນ ບໍ່​ສາ­ມາດ​ປູກ­ຝັງ​ພືດ​ບາງ​ຊະ­ນິດ ເຮັດ​ໃຫ້​ສິນ­ຄ້າ​ກະ­ສິ­ກຳ​ສ່ວນ​ຫຼາຍ​ນຳ​ເຂົ້າ​ມາ​ຈາກ​ຕ່າງ­ປະ­ເທດ ຈຶ່ງ​ມີ​ຄວາມ​ສົນ­ໃຈ​ບໍ­ລິ­ສັດ ພັນ​ເພັດ​ພັດ­ທະ­ນາ​ກະ­ສິ­ກຳ ທີ່​ຜະ­ລິດ​ເຂົ້າ​ໄດ້​ຈຳ­ນວນ​ຫຼາຍ ແລະ ເປັນ​ກະ­ສິ­ກຳ​ສະ­ອາດ ເປັນ​ທີ່​ຕ້ອງ­ການ​ຂອງ​ປະ­ເທດ​ມົງ​ໂກນ.

    ການ​ລົງ​ມາ​ຢ້ຽມ­ຢາມ​ບໍ­ລິ­ສັດ​ຄັ້ງ​ນີ້ ສອງ​ຝ່າຍ​ຍັງ​ໄດ້​ແລກ­ປ່ຽນ ແລະ ປຶກ­ສາ​ຫາ­ລື​ກັນ ເພື່ອ​ພ້ອມ​ກັນ​ກ້າວ​ໄປ​ສູ່​ການ​ຮ່ວມ​ມື​ກັນ​ໃນ​ອະ­ນາ­ຄົດ ເຊິ່ງ​ຝ່າຍ​ມົງ​ໂກນ​ຍິນ​ດີ​ເຊື້ອ​ເຊີນ​ເອົາ​ບໍ­ລິ­ສັດ​ໄປ​ຢ້ຽມ­ຢາມ​ປະ­ເທດ​ມົງ​ໂກນ ສ່ວນ​ຝ່າຍ​ບໍ­ລິ­ສັດ​ກໍ​ແຈ້ງ​ໃຫ້​ຄະ­ນະ​ຜູ້​ແທນ​ວ່າ ບໍ­ລິ­ສັດ​ມີ​ທ່າ­ແຮງ​ດ້ານ​ການ​ຜະ­ລິດ​ທີ່​ມີ​ເນື້ອ­ທີ່​ຈຳ­ນວນ​ຫຼາຍ ແຕ່​ຍັງ​ຂາດ​ດ້ານ​ທຶນ­ຮອນ ແລະ ຕະ­ຫຼາດ​ຮອງ​ຮັບ ຖ້າ​ມີ​ການ​ຮ່ວມ​ມື​ກັບ​ຕ່າງ­ປະ­ເທດ​ດ້ານ​ການ​ຕະ­ຫຼາດ​ຮັບ​ຊື້​ຈະ​ເຮັດ​ໃຫ້​ບໍ­ລິ­ສັດ ແລະ ຊາວ​ກະ­ສິ­ກອນ​ມີ​ລາຍ​ຮັບ​ຈາກ​ການ​ຂາຍ​ເຂົ້າ​ອອກ​ໄປ​ຕະ­ຫຼາດ​ຕ່າງ­ປະ­ເທດ ສ່ວນ​ຝ່າຍ​ພາກ​ລັດ ກໍ​ຄື​ກະ­ຊວງ​ກະ­ສິ­ກຳ ແລະ ປ່າ­ໄມ້ ກໍ​ຍິນ​ດີ​ສະ­ໜັບ­ສະ­ໜູນ​ບໍ­ລິ­ສັດ​ໃນ​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ ໂດຍ​ສ້າງ​ເງື່ອນ­ໄຂ​ໃຫ້​ບໍ­ລິ­ສັດ ມີ​ໂອ­ກາດ​ໄດ້​ພົບ​ປະ​ກັບ​ການ​ນຳ ແລະ ນັກ­ທຸ­ລະ­ກິດ​ຕ່າງ­ປະ­ເທດ ເພື່ອ​ກ້າວ​ໄປ​ສູ່​ການ​ຮ່ວມ​ມື.

ຂ່າວທີ່ກ່ຽວຂ້ອງ