ໄຊເຊດຖາ ສຸມໃສ່ຈັດສັນຄວາມບໍ່ເປັນລະບຽບຮຽບຮ້ອຍ

225 22 ມ.ກ. 2019 ຂ່າວໜ້າ​ໜຶ່ງ
ໄຊເຊດຖາ ສຸມໃສ່ຈັດສັນຄວາມບໍ່ເປັນລະບຽບຮຽບຮ້ອຍ

    ຫ້ອງ­ການ​ໂຍ­ທາ​ທິ​ການ ແລະ ຂົນ­ສົ່ງ (ຍທຂ) ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ (ນວ) ຈັດ​ກອງ​ປະ­ຊຸມ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ ວຽກ​ງານ​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ ຖອດ​ຖອນ​ບົດ­ຮຽນ ການ​ເຮັດ​ທົດ​ລອງ ປະ­ຈຳ​ປີ 2018 ແລະ ວາງ​ທິດ​ທາງ​ແຜນ­ການ­ເຄື່ອນ­ໄຫວ ປະ­ຈຳ​ປີ 2019 ຂຶ້ນ​ວັນ​ທີ 17 ມັງ­ກອນ 2019 ໂດຍ​ມີ​ທ່ານ ພຸດ​ທະ​ພອນ ໂຄດ​ປັນ­ຍາ ຮອງ​ເຈົ້າ­ເມືອງ​ໄຊ​ເຊດ​ຖາ ທ່ານ ທະ­ວີ​ໄຊ ໄຊ​ປະ­ເສີດ ຫົວ­ໜ້າ​ຫ້ອງ­ການ ຍທຂ ເມືອງ​ໄຊ​ເຊດ​ຖາ ພ້ອມ​ດ້ວຍ​ຄະ­ນະ​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ເມືອງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ທະ­ວີ​ໄຊ ໄຊ​ປະ­ເສີດ ກ່າວ​ວ່າ: ການ​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ ເປັນ​ວຽກ​ທີ່​ເຮັດ​ບໍ່​ແລ້ວ​ເປັນ​ຈັກ​ເທື່ອ ເປັນ​ວຽກ​ທີ່​ຕ້ອງ​ໄດ້​ເອົາ­ໃຈ­ໃສ່ ແລະ ປະ­ຕິ­ບັດ​ຢ່າງ​ຕໍ່​ເນື່ອງ ປີ 2018 ການ​ນຳ ນວ ໄດ້​ອອກ​ຂໍ້​ຕົກ­ລົງ​ວ່າ​ດ້ວຍ​ການ​ເປີດ​ຂະ​ບວນ​ການ​ຮັກ​ຊາດ ແລະ ພັດ­ທະ­ນາ ຕິດ​ພັນ​ກັບ​ຂະ​ບວນ​ການ​ຮັກ ນວ ໄລ­ຍະ​ປີ 2017-2020 ແລະ ຂໍ້​ຕົກ­ລົງ​ວ່າ​ດ້ວຍ​ການ​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ຕົວ​ເມືອງ ແລະ ຊານ­ເມືອງ ເຊິ່ງ​ໄດ້​ເປັນ​ຄູ່​ມື ແລະ ບ່ອນ​ອີງ​ໃຫ້​ຄະ­ນະ​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ 7 ເມືອງ​ໄດ້​ເຄື່ອນ​ໄຫວ​ຢ່າງ​ຕັ້ງ­ໜ້າ ປັດ­ຈຸ­ບັນ ຍັງ​ສືບ­ຕໍ່​ເຄື່ອນ​ໄຫວ​ໃຫ້​ໄດ້​ຮັບ​ໝາກ­ຜົນ​ມີ​ເມືອງ​ໄຊ​ເຊດ​ຖາ ສີ​ສັດ­ຕະ​ນາກ ຈັນ­ທະ​ບູ​ລີ ຫາດ​ຊາຍ​ຟອງ ໄຊ​ທາ­ນີ ແລະ ນາ​ຊາຍ​ທອງ ລວມ 21 ເສັ້ນ­ທາງ ຜ່ານ​ມາ​ໄດ້​ເຮັດ​ທົດ​ລອງ​ຢູ່​ເສັ້ນ­ທາງ​ເຈົ້າ­ຟ້າ​ງຸ່ມ ເຊິ່ງ​ເມືອງ​ໄຊ​ເຊດ​ຖາ​ໄດ້​ເຂົ້າ​ຮ່ວມ ແລະ ຖອດ​ຖອນ​ບົດ­ຮຽນ​ເພື່ອ​ມາ​ຜັນ​ຂະ­ຫຍາຍ ໂດຍ​ໄດ້​ຮັບ­ຮອງ​ເອົາ 2 ເສັ້ນ­ທາງ​ຄື: ເສັ້ນ­ທາງ​ແຕ່​ວົງ­ວຽນ ຫາ 4 ແຍກ​ໄຟ​ແດງ​ຫໍ​ປະ­ຊຸມ​ແຫ່ງ​ຊາດ ແລະ ເສັ້ນ­ທາງ​ແຕ່ 3 ແຍກ​ຂົວ​ຮ່ອງ​ແຊງ ຫາ ໂພນ​ທັນ.

    ເສັ້ນ­ທາງ​ແຕ່​ວົງ­ວຽນ​ຫາ 4 ແຍກ​ໄຟ​ແດງ​ຫໍ​ປະ­ຊຸມ​ແຫ່ງ​ຊາດ ມີ 504 ເປົ້າ​ໝາຍ ໃນ​ນີ້ ເທີບ-ເງີບ 494 ເທີບ ປະ­ຕິ­ບັດ​ໄດ້ 445 ເທີບ ຍັງ​ຄ້າງ 59 ເທີບ ປ້າຍ 381 ປ້າຍ ປະ­ຕິ­ບັດ​ໄດ້ 169 ປ້າຍ ຍັງ 212 ປ້າຍ ກຳ­ແພງ-ຮົ້ວ 30 ກຳ­ແພງ ປະ­ຕິ­ບັດ​ໄດ້ 12 ກຳ­ແພງ ຍັງ 18 ກຳ­ແພງ ວາງ​ເຄື່ອງ​ຊະ­ຊາຍ 486 ຮ້ານ ປະ­ຕິ­ບັດ​ໄດ້ 377 ຮ້ານ ຍັງ 109 ຮ້ານ ສ່ວນ​ເສັ້ນ­ທາງ​ແຕ່ 3 ແຍກ​ຂົວ​ຮ່ອງ​ແຊງ​ຫາ​ໂພນ​ທັນ ມີ 276 ເປົ້າ​ໝາຍ ໃນ​ນີ້​ເທີບ-ເງີບ 130 ເທີບ ປະ­ຕິ­ບັດ​ໄດ້ 36 ເທີບ ຍັງ 94 ເທີບ ປ້າຍ 218 ປ້າຍ ປະ­ຕິ­ບັດ​ໄດ້ 6 ປ້າຍ ຍັງ 212 ປ້າຍ ກຳ­ແພງ-ຮົ້ວ 117 ກຳ­ແພງ ປະ­ຕິ­ບັດ​ໄດ້ 4 ກຳ­ແພງ ຍັງ 113 ກຳ­ແພງ ວາງ​ເຄື່ອງ​ຊະ­ຊາຍ 188 ຮ້ານ ປະ­ຕິ­ບັດ​ໄດ້ 19 ຮ້ານ ຍັງ 169 ຮ້ານ ນອກ​ນີ້ ຍັງ​ຢຶດ​ລົດ​ຈອດ​ຂາຍ­ເຄື່ອງ​ບໍ່​ເປັນ​ລະ­ບຽບ 12 ຄັນ ຊາມ​ຫອຍ ປາ ຄັນ­ຮົ່ມ ໝາກ​ໄມ້ ຊິງ​ຊັ່ງ ແລະ ປ້າຍ​ຈຳ­ນວນ​ໜຶ່ງ ສຳ­ລັບ​ແຜນ­ການ​ຕໍ່­ໜ້າ​ຈະ​ຜັນ​ຂະ­ຫຍາຍ​ອີກ 4 ເສັ້ນ­ທາງ​ຄື: ເສັ້ນ­ທາງ​ໜອງ​ບອນ ເສັ້ນ­ທາງ 23 ສິງ­ຫາ ເສັ້ນ­ທາງ​ໄກ­ສອນ ພົມ­ວິ­ຫານ ແລະ ເສັ້ນ­ທາງ​ດົງ​ປາຍ​ນາ.

ຂ່າວທີ່ກ່ຽວຂ້ອງ