ລົດ TAXI ພະລັງງານໄຟຟ້າ ແຫ່ງອະນາຄົດ

385 22 ມ.ກ. 2019 ຫົວຂໍ້ຂ່າວອື່ນໆ

    ກຸ່ມ​ສື່​ຈີນ​ລາຍ​ງານ​ເມື່ອ​ວັນ​ທີ 2 ພະ­ຈິກ 2018 ທີ່​ຜ່ານ​ມາ​ວ່າ ບໍ­ລິ­ສັດ​ສຽງ​ເຊິງ​ແທັກ​ຊີ່ (Qiangsheng Taxi Company) ຜູ້​ໃຫ້​ບໍ­ລິ­ການ​ແທັກ​ຊີ່ ໄດ້​ນຳ​ແທັກ​ຊີ່​ພະ­ລັງ­ງານ​ໄຟ­ຟ້າ​ອອກ​ໃຫ້​ບໍ­ລິ­ການ​ໃນ​ຊ່ຽງ​ໄຮ້​ແລ້ວ.

    ລາຍ​ງານ​ລະ­ບຸ​ວ່າ ນອກ­ຈາກ​ແທັກ​ຊີ່​ພະ­ລັງ­ງານ​ໄຟ­ຟ້າ​ຈະ​ເປັນ​ມິດ​ຕໍ່​ສິ່ງ­ແວ­ດລ້ອມ​ແລ້ວ ຍັງ​ໄດ້​ຕິດ​ຕັ້ງ​ເຕັກ​ໂນ​ໂລ​ຊີ​ສະ­ໄໝ​ໃໝ່ ເຊັ່ນ: ໃຊ້​ລະ­ບົບ​ເຕັກ​ໂນ​ໂລ​ຊີ​ການ​ກວດ​ຈັບ ແລະ ຮູ້​ຈຳ​ໃບ​ໜ້າ (Facial Recognition) ເພື່ອ​ກວດ​ສອບ​ຢືນ­ຢັນ​ຕົວ​ຄົນ​ຂັບ​ລົດ ຫາກ​ໃບ​ໜ້າ​ບໍ່​ກົງ​ກັບ​ຂໍ້​ມູນ​ທີ່​ບັນ­ທຶກ​ໄວ້ ກໍ​ຈະ​ບໍ່​ສາ­ມາດ​ເລີ່ມ​ອອກ​ລົດ​ໄດ້.

    ນອກ­ຈາກ​ນີ້ ລົດ​ແທັກ​ຊີ່​ອັດ​ສະ​ລິ​ຍະ​ຍັງ​ໄດ້​ຮັບ​ການ​ຕິດ​ຕັ້ງ​ລະ­ບົບ​ການ​ສັ່ງ​ການ​ດ້ວຍ​ສຽງ ໂດຍ​ຄົນ​ຂັບ​ສາ­ມາດ​ໃຊ້​ຄຳ​ເວົ້າ​ສັ່ງ​ເປິດ​ເພງ ປັບ​ສຽງ​ລຳ​ໂພງ ເປິດ​ປ່ອງ­ຢ້ຽມ​ລົດ ແລະ ຍັງ​ມີ​ລະ­ບົບ​ນຳ​ທາງ​ຈີ​ພີ​ເອ​ສ (GPS) ທີ່​ສາ­ມາດ​ແນະ­ນຳ​ໃຫ້​ຫຼີກ​ລ່ຽງ​ເສັ້ນ­ທາງ​ທີ່​ມີ​ການ​ຈະ­ລາ­ຈອນ​ຄັບ­ຄັ່ງ​ໄດ້​ອີກ​ດ້ວຍ.

    ທ່ານ ຫຼີ່ ໝິນ ໂຄ­ສົກ​ຂອງ​ບໍ­ລິ­ສັດ ສຽງ ເຊິງ ເປິດ​ເຜີຍ​ວ່າ ປັດ­ຈຸ­ບັນ ມີ​ແທັກ​ຊີ່​ອັດ​ສະ​ລິ​ຍະ​ອອກ​ໃຫ້​ບໍ­ລິ­ການ​ແລ້ວ 100 ຄັນ ເຊິ່ງ​ບໍ­ລິ­ສັດ​ຈະ​ຂະ­ຫຍາຍ​ການ​ໃຫ້​ບໍ­ລິ­ການ​ຫຼາຍ​ຂຶ້ນ​ໃນ​ອະ­ນາ­ຄົດ.

    “ນີ້​ເປັນ​ການ​ປັບ​ຕົວ​ເຂົ້າ​ກັບ​ຍຸກ​ສະ­ໄໝ ແລະ ເປັນ​ການ​ສ້າງ​ປະ­ສົບ​ການ​ແປກ​ໃໝ່​ໃຫ້​ກັບ​ຜູ້­ໂດຍ­ສານ” ທ່ານ ຫຼີ່ ກ່າວ ທັງ​ນີ້ ລາຍ​ງານ​ສຳ​ຫຼວດ​ຂອງ​ແມັກ ຄິນ​ຊີ (McKinsey) ເປີດ­ເຜີຍ​ວ່າ ເມື່ອ​ປີ 2017 ຕະ­ຫຼາດ​ລົດ­ໄຟ​ຟ້າ​ຈີນ​ຂະ­ຫຍາຍ­ຕົວ 72% ເມື່ອ​ທຽບ​ກັບ​ປີ 2016 ໂດຍ​ເປັນ​ຜູ້­ນຳ​ທີ່​ແຂງ​ແກ່ນ​ໃນ​ການ­ຈຳ­ໜ່າຍ​ຂະ­ນະ​ນີ້ ເປັນ​ປະ­ເທດ​ທີ່​ມີ​ຕະ­ຫຼາດ​ໃຫຍ່​ດ້ານ​ຍານ­ພາ­ຫະ­ນະ​ໄຟ­ຟ້າ​ໃຫຍ່​ກວ່າ​ເອີ​ຣົບ ແລະ ສະ­ຫະ­ລັດ​ອາ​ເມ​ຣິ​ກາ​ລວມ​ກັນ.

ຂ່າວທີ່ກ່ຽວຂ້ອງ