ເບິ່ງບ້ານເຂົາເອົາບົດຮຽນ 22/01/2019

229 22 ມ.ກ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະຈຳ​ວັນ​ນີ້ ມີ​ຂ່າວ​ກ່ຽວ​ກັບ​ຜົນສຳເລັດ​ຂອງ​ທາງ​ການ​ຈີນ ໃນ​ການ​ປາບ​ໄພ​ສໍ້​ລາດ​ບັງ​ຫຼວງ ເລື່ອງ​ຣັດ​ເຊຍ ຫຼຸດຜ່ອນ​ການ​ເພິ່ງ​ພາ​ສະກຸນ​ເງິນ​ໂດ​ລາ​ສະຫະລັດ ແລະ ເລື່ອງ​ກົດໝາຍ​ຄວບ​ຄຸມ​ການ​ປະ​ທ້ວງ​ຢູ່ ຝຣັ່ງ.

    ທີ່ ສປ ຈີນ: ມີ​ຂ່າວ​ຕ່າງປະເທດ​ໃນ​ຕົ້ນ​ເດືອນ​ມັງກອນ​ປີ​ນີ້​ທີ່​ເວົ້າ ເລື່ອງ​ຜົນສຳເລັດ​ຄັ້ງ​ຍິ່ງ​ໃຫຍ່​ຂອງ ​ສປ ຈີນ ໃນ​ການ​ຕ້ານ​ໄພ​ສໍ້​ລາດ​ບັງ​ຫຼວງ​ທີ່​ພະນັກງານ​ຂັ້ນ​ສູງ​ຂອງ​ລັດ​ເປັນ​ໂຕ​ການ​ກໍ່​ຂຶ້ນ ແລະ ວ່າ​ໃນ​ຕໍ່​ໄປ​ທາງ​ການ​ຈີນ ຈະ​ເພີ່ມ​ຄວາມ​ເອົາໃຈໃສ່​ເພື່ອ​ຊອກ​ໃຫ້​ເຫັນ​ອາ​ຊະ​ຍາ​ກຳ​ຕ່າງໆ​ທີ່​ເກີດ​ຂຶ້ນ ໃນ​ຂົງເຂດ​ການ​ແກ້​ໄຂ​ຄວາມທຸກ​ຍາກ ການ​ຄວບ​ຄຸມ​ມົນ​ລະ​ພິດ ແລະ ການ​ປາບ​ປາມ​ກຸ່ມ​ແກ້ງ​ມາ​ເຟຍ ແນໃສ່​ກຳຈັດ​ໄພ​ສໍ້​ລາດ​ບັງ​ຫຼວງ​ລະດັບ​ຮາກ​ຖານ ນັບ​ແຕ່​ກອງ​ປະຊຸມ​ໃຫຍ່ ຄັ້ງ​ທີ 19 ຂອງ​ພັກ​ກອມ​ມຸຍ​ນິດ​ຈີນ ຈັດ​ຂຶ້ນ​ໃນ​ເດືອນ​ຕຸລາ ປີ 2017 ເປັນຕົ້ນ​ມາ ບັນຫາ​ການ​ສໍ້​ລາດ​ບັງ​ຫຼວງ​ທີ່​ພົວພັນ​ກັບ 3 ຂົງເຂດ​ທີ່​ກ່າວ​ມາ​ຂ້າງ​ເທິງ​ນັ້ນ (ຂົງເຂດ​ການ​ແກ້​ໄຂ​ຄວາມທຸກ​ຍາກ ການ​ຄວບ​ຄຸມ​ມົນ​ລະ​ພິດ ແລະ ບັນຫາ​ກຸ່ມ​ແກ້ງ​ມາ​ເຟຍ) ໄດ້​ກາຍເປັນ​ສະໜາມຮົບ​ທີ່​ໃຫຍ່​ທີ່​ສຸດ​ຂອງ​ປະເທດ.

    ທີ່ ຣັດ​ເຊຍ: ທ່າມກາງ​ເມກ​ໝອກ​ປົກ​ຄຸມ​ສາຍ​ພົວພັນ ລະຫວ່າງ ສ ອາ​ເມ​ຣິ​ກາ ກັບ ຣັດ​ເຊຍ ທີ່​ຍັງ​ບໍ່​ທັນ​ຄີ່​ຄາຍ​ຢູ່​ນີ້ ກໍ​ມີ​ຂ່າວ​ວ່າ ທະນາຄານ​ກາງ​ຣັດ​ເຊຍ (RCB) ໄດ້​ຫຼຸດຜ່ອນ​ການ​ນຳ​ໃຊ້​ສະກຸນ​ເງິນ​ໂດ​ລາ​ສະຫະລັດ ລົງ​ເກືອບ 80% ຄື​ຍັງ​ເຫຼືອ​ພຽງ 24,4% ແຕ່​ພ້ອມ​ດຽວ​ກັນ​ນັ້ນ ການ​ນຳ​ໃຊ້​ສະກຸນ​ເງິນ​ເອີ​ໂຣ​ຂອງ​ສະຫະພາບ​ເອີ​ຣົບ (ອີ​ຢູ-EU) ແລະ ເງິນ​ສະກຸນ​ເງິນ​ຢວນ​ຂອງ ​ສປ ຈີນ ຜັດ​ເພີ່ມ​ຂຶ້ນ 32% ແລະ 14,7% ຕາມ​ລຳດັບ ນີ້​ແມ່ນ​ສະຖິຕິ​ຜ່ານ​ມາ​ເຖິງ​ເດືອນ​ມິຖຸນາ ປີ 2018 ຣັດ​ເຊຍ​ໄດ້​ລົງທຶນ​ເຂົ້າ​ສະກຸນ​ເງິນ​ຢວນ ຫຼາຍ​ກວ່າ 44 ຕື້​ໂດ​ລາ​ສະຫະລັດ ເພີ່ມ​ຂຶ້ນ 3 ເທົ່າ ເມື່ອ​ທຽບ​ກັບ​ການ​ລົງທຶນ​ໃສ່​ເງິນ​ໂດ​ລາ​ສະຫະລັດ ສ່ວນ​ການ​ລົງທຶນ​ໃສ່​ສະກຸນ​ເງິນ​ເອີ​ໂຣ​ນັ້ນ ໄດ້​ເພີ່ມ​ຂຶ້ນ 45% ການ​ລົງທຶນ​ເຂົ້າ​ສະກຸນ​ເງິນ​ໂດ​ລາ​ສະຫະລັດ ນັ້ນ​ຫຼຸດ​ລົງ​ເຄິ່ງ​ໜຶ່ງ ການ​ທີ່​ທະນາຄານ​ກາງ​ຣັດ​ເຊຍ​ຫຼຸດຜ່ອນ​ການ​ນຳ​ໃຊ້​ສະກຸນ​ເງິນ​ໂດ​ລາ​ສະຫະລັດ ນັ້ນ​ແມ່ນ​ມາດ​ຕະການ​ໜຶ່ງ​ໃນ​ການ​ຫຼຸດຜ່ອນ​ການ​ເພິ່ງ​ພາ​ຕໍ່​ເງິນ​ສະກຸນ​ນີ້ ທ່າມກາງ​ການ​ຂວ້ຳ​ບາດ​ຂອງ ສ ອາ​ເມ​ຣິ​ກາ ຕໍ່​ລະບົບ​ເງິນ​ຂອງ​ຣັດ​ເຊຍ.

    ທີ່ ຝຣັ່ງ: ໃນ​ວັນ​ທີ 8 ເດືອນ​ມັງກອນ​ນີ້ ທ່ານ ເອ​ດົວ ຟີ​ລິບ ນາຍົກລັດຖະມົນຕີ​ຝຣັ່ງ ໄດ້​ໃຫ້​ຮູ້​ວ່າ ລັດຖະບານ​ຝຣັ່ງ ກຳລັງ​ຮ່າງ​ກົດໝາຍ​ສະບັບ​ໜຶ່ງ ເພື່ອ​ຄວບ​ຄຸມ​ການ​ປະ​ທ້ວງ​ທີ່​ຜິດ​ກົດໝາຍ ໂດຍ​ມີ​ການ​ກຳນົດ​ໂທດ​ຕໍ່​ຜູ້​ຝ່າຝືນ​ກົດ​ລະບຽບ​ໃນ​ການ​ຈັດ​ກິດຈະກຳ​ປະ​ທ້ວງ ຫຼື ຈັດການ​ໂຮມ​ຊຸມນຸມ​ດັ່ງກ່າວ ພ້ອມ​ດຽວ​ກັນ​ນັ້ນ ທາງ​ການ​ຝຣັ່ງ ກໍ​ມີ​ແຜນ​ກະກຽມ​ກຳລັງ​ເຈົ້າ​ໜ້າທີ່​ປະມານ 8 ໝື່ນ​ຄົນ ເພື່ອ​ຮັກສາ​ຄວາມ​ສະຫງົບ ຄວາມ​ເປັນ​ລະບຽບ​ຮຽບ​ຮ້ອຍ​ຂອງ​ສັງຄົມ​ໃນ​ທົ່ວ​ປະເທດ ການ​ກະກຽມ​ດັ່ງກ່າວ​ກຳນົດ ເຮັດ​ສຳເລັດ​ແຕ່​ວັນ​ທີ 12 ມັງກອນ ປີ​ນີ້​ເປັນຕົ້ນ​ມາ ນັບ​ແຕ່​ວັນ​ທີ 17 ເດືອນ​ພະຈິກ ປີ 2018 ຜ່ານ​ມາ​ພວກ​ແນວ​ຮ່ວມ ເສື້ອ​ສວມ​ນອກ (ເສື້ອ​ກັກ) ສີເຫຼືອງ​ໄດ້​ດຳເນີນ​ການ​ປະ​ທ້ວງ ໃນ​ວັນ​ເສົາ​ຂອງ​ທຸກໆ​ອາທິດ​ຢ່າງ​ເປັນ​ລະບົບ ການ​ປະ​ທ້ວງ​ດັ່ງກ່າວ​ໄດ້ແກ່​ຍາວ​ມາ​ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 6 ຄົນ ບາດເຈັບ​ກວ່າ 1.400 ຄົນ ສ້າງ​ສະພາບ​ກົນ​ລະ​ຫົນ​ໃນ​ສັງຄົມ ແລະ ສົ່ງ​ຜົນ​ກະທົບ​ຕໍ່​ເສດຖະກິດ​ຂອງ​ຊາດ.

ຂ່າວທີ່ກ່ຽວຂ້ອງ