ເກີດ​ອຸບັດເຫດ​ຮ້າຍ​ແຮງ​ຢູ່​ໃນ​ປະເທດ​ຕ່າງໆ

636 22 ມ.ກ. 2019 ຂ່າວຕ່າງປະເທດ
ເກີດ​ອຸບັດເຫດ​ຮ້າຍ​ແຮງ​ຢູ່​ໃນ​ປະເທດ​ຕ່າງໆ

     ທີ່​ປະເທດ​ເມັກ​ຊິກ: ຂ່າວສານ Reuters ລາຍ​ງານ​ອ້າງ​ຕາມ​ການ​ລາຍ​ງານ ຂອງ​ລັດຖະມົນຕີ​ກະຊວງ​ສາທາລະນະ​ສຸກ​ເມັກ​ຊິກ ທີ່​ມີ​ອອກ​ມາ​ຢູ່​ໃນ​ກອງ​ປະຊຸມ​ຖະແຫຼງ​ຂ່າວ​ເມື່ອ​ວັນ​ທີ 20 ມັງກອນ ໃຫ້​ຮູ້​ວ່າ  ຈຳນວນ​ຜູ້​ເສຍ​ຊີວິດ​ຈາກ​ເຫດການ ທໍ່​ສົ່ງ​ນ້ຳມັນ​ເຊື້ອ​ໄຟ​ຂອງ​ກຸ່ມ​ບໍລິສັດ​ນ້ຳມັນ​ແຫ່ງ​ຊາດ​ເມັກ​ຊິກ (Pemex) ເກີດ​ລະເບີດ ຢູ່​ໃນ​ເຂດ​ຊຸມ​ຊົນ​ແຫ່ງ​ໜຶ່ງ ໃນ​ເຂດ​ທິດເໜືອ​ນະຄອນຫຼວງ ເມັກ​ຊິກ​ໂກ ຊີ​ຕີ ເມື່ອ​ຄ່ຳ​ຄືນ​ຂອງ​ວັນ​ທີ 18 ມັງກອນ​ທີ່​ຜ່ານ​ມາ ໄດ້​ເພີ່ມ​ຂຶ້ນ​ເປັນ 85 ຄົນ ແລະ​ມີ​ຜູ້​ບາດເຈັບ​ອີກ 66 ຄົນ.

    ກະຊວງ​ປ້ອງ​ກັນ​ປະເທດ​ເມັກ​ຊິກ ໄດ້​ສົ່ງ​ທະຫານ​ໄປ​ປະຕິບັດ​ໜ້າທີ່​ຢູ່​ໃນ​ບ່ອນເກີດ​ເຫດ ດັ່ງກ່າວ ແຕ່​ຫຼັງ​ຈາກ​ນັ້ນ​ໄດ້​ຖອຍ​ອອກ​ໄປ ຍ້ອນ​ຢ້ານ​ວ່າ​ຈະ​ເກີດ​ການ​ປະ​ທະ​ກັບ​ປະຊາຊົນ​ໃນ​ທ້ອງຖິ່ນ. ໃນ​ຂະນະ​ດຽວ​ກັນ ປະທານາທິບໍດີ​ເມັກ​ຊິກ ອັນ​ເດຣ​​ສ ມາ​ນູ​ແອ​​ລ ໂລ​ເປ​​ສ ໂອບ​ຣາ​ດໍ ໄດ້​ຊີ້​ນຳ​ໃຫ້ “ລັດຖະບານ​ໃຫ້​ຄວາມ​ຊ່ວຍເຫຼືອ​ທຸກ​ຢ່າງ ແກ່​ຜູ້​ປະສົບ​ເຄາະ​ຮ້າຍ​ຢູ່​ໃນ​ທີ່​ເກີດ​ເຫດ” ພ້ອມ​ກັນ​ນັ້ນ​ກໍ​ໃຫ້​ສັນຍາ ທີ່​ຈະ​ເພີ່ມ​ທະວີ​ມາດ​ຕະການ ເພື່ອ​ຢຸດຕິ​ການເຄື່ອນໄຫວ​ຂີ້ລັກ​ນ້ຳມັນ​ເຊື້ອ​ໄຟ.

    ໃນ​ໄລຍະ​ທີ່​ຜ່ານ​ມາ ທ່ານ ໂອບ​ຣາ​ດໍ ໄດ້​ເປີດ​ບັ້ນ​ປາບ​ປາມ​ຄັ້ງ​ໃຫຍ່ ຕໍ່​ການ​ກະທຳ​ຂີ້ລັກ​ນ້ຳມັນ​ເຊື້ອ​ໄຟ ທີ່​ເກີດ​ຂຶ້ນ​ແພ່​ຫຼາຍ ຊຶ່ງ​ໃນ​ປີ​ກາຍ ໄດ້​ສ້າງ​ຄວາມ​ເສຍ​ຫາຍ​ເປັນ​ມູນ​ຄ່າ​ກວ່າ 3 ຕື້ ໂດ​ລາ​ສະຫະລັດ.

    ທີ່​ປະເທດ​ອີ​ຕາ​ລີ: ເຈົ້າ​ໜ້າທີ່​ກ່ຽວຂ້ອງ ແຈ້ງ​ໃຫ້​ຮູ້ເມື່ອ​ວັນ​ທີ 19 ມັງກອນ​ນີ້​ວ່າ ໄດ້​ເກີດ​ອຸບັດເຫດ​ເຮືອ​ສູບ​ລົມ ຊຶ່ງ​ບັນທຸກ​ຜູ້​ຍ້າຍ​ຖິ່ນ​ຖານ 120 ຄົນ ຈົມ​ລົງ​ໃນ​ທະເລ​ເມ​ດີ​ເຕ​ຣາ​ເນ ຫ່າງ​ຈາກ​ແຄມ​ຝັ່ງ​ທະເລ​ລີ​ບີ 50 ​ກມ ໃນ​ວັນ​ທີ 19 ມັງກອນ​ນີ້ ໂດຍ​ກອງທັບ​ເຮືອ​ອີ​ຕາ​ລີ ຊ່ວຍເຫຼືອ​ຜູ້​ໄດ້​ຮັບ​ເຄາະ​ຮ້າຍ​ຂຶ້ນ​ມາ​ໄດ້​ພຽງ 3 ຄົນ.

    ໂຄສົກ​ຂອງ​ອົງການ​ຍ້າຍ​ຖິ່ນ​ຖານ​ສາກົນ (OIM) ໃຫ້​ຮູ້​ວ່າ ໃນ​ເບື້ອງ​ຕົ້ນ ເຮືອ​ດັ່ງກ່າວ​ບັນທຸກ​ຜູ້​ຍ້າຍ​ຖິ່ນ​ຖານ 120 ຄົນ ອອກ​ເດີນທາງ​ຈາກ​ປະເທດ​ລີ​ບີ ໃນ​ນັ້ນ​ມີ​ແມ່ຍິງ 10 ຄົນ (ໜຶ່ງ​ໃນ​ນັ້ນ​ພວມ​ຖືພາ​ມານ) ແລະ​ລວມ​ເຖິງ​ເດັກນ້ອຍ​ອີກ 2 ຄົນ. ໃນ​ເວລາ​ນີ້ ຍັງ​ມີ ຜູ້​ຫາຍ​ສາບ​ສູນ​ຢູ່ 117 ຄົນ.

    ໃນ​ຊຸມ​ມື້​ຫຼັງໆ​ມາ​ນີ້ ອົງການ​ຂ້າ​ຫຼວງ​ໃຫຍ່​ສະຫະ​ປະຊາ​ຊາດ ກ່ຽວ​ກັບ​ຜູ້​ລີ້​ໄພ (UNHCR) ກໍ​ໄດ້​ແຈ້ງ​ໃຫ້​ຮູ້ ກ່ຽວ​ກັບ​ເຫດການ​ກຳປັ່ນ​ຈົມ​ນ້ຳ​ອີກ​ລາຍ​ໜຶ່ງ ຊຶ່ງ​ເກີດ​ຂຶ້ນ​ຢູ່​ທາງ​ທິດຕາເວັນຕົກ​ທະເລ​ເມ​ດີ​ເຕ​ຣາ​ເນ ທີ່​ໄດ້​ເປັນ​ເຫດ​ໃຫ້​ຜູ້​ຍ້າຍ​ຖິ່ນ​ຖານ ເສຍ​ຊີວິດ 53 ຄົນ

    ທີ່​ປະເທດ​ໂບ​ລີ​ວີ: ເຈົ້າ​ໜ້າທີ່​ຕຳຫຼວດ​ແຈ້ງ​ໃຫ້​ຮູ້​ວ່າ ມີ​ຜູ້​ເສຍ​ຊີວິດ​ຢ່າງ​ໜ້ອຍ 22 ຄົນ ແລະ​ບາດເຈັບ 30 ກວ່າ​ຄົນ ຈາກ​ອຸບັດເຫດ​ລົດ​ບັດ​ສອງ​ຄັນ​ຕຳ​ກັນ ເມື່ອ​ວັນ​ທີ 19 ມັງກອນ​ນີ້ ຢູ່​ຕາມ​ເສັ້ນທາງ​ດ່ວນ ໂອ​ຣູ​ໂຣ-ໂປ​ໂຕ​ຊີ (ທາງ​ທິດຕາເວັນຕົກ​ສ່ຽງ​ໃຕ້ ໂບ​ລີ​ວີ).

    ໃນ​ອີກ​ເຫດການ​ໜຶ່ງ ຊຶ່ງ​ເກີດ​ຂຶ້ນ​ໃນ​ວັນ​ທີ 20 ມັງກອນ ມີ​ລາຍ​ງານ​ຜູ້​ເສຍ​ຊີວິດ​ຢ່າງ​ໜ້ອຍ 11 ຄົນ ແລະ​ ບາດເຈັບ​ອີກ 20 ກວ່າ​ຄົນ ເມື່ອ​ລົດ​ໂດຍສານ​ຄັນ​ໜຶ່ງ ຊຶ່ງ​ບັນທຸກ​ຄະນະ​ນັກ​ກິລາ ແລ່ນ​ພຸ່ງ​ຕຳ​ກັບ​ຮ່ອມ​ພູ​ແຄບ​ແຫ່ງ​ໜຶ່ງ ຢູ່​ທາງ​ພາກ​ໃຕ້​ປະເທດ​ໂບ​ລີ​ວີ.

ຂ່າວທີ່ກ່ຽວຂ້ອງ