ເປີດນຳໃຊ້ອາຄານປິ່ນປົວພະຍາດລວມ ໂຮງໝໍ 103

306 21 ມ.ກ. 2019 ຂ່າວໜ້າ​ໜຶ່ງ
ເປີດນຳໃຊ້ອາຄານປິ່ນປົວພະຍາດລວມ ໂຮງໝໍ 103

    ພິ­ທີ​ມອບ-ຮັບ ແລະ ເປີດ​ນຳ​ໃຊ້​ໂຄງ­ການ​ກໍ່­ສ້າງ​ອາຄານ​ປິ່ນ­ປົວ​ພະ­ຍາດ​ລວມ​ໂຮງ­ໝໍ 103 ກອງ­ທັບ​ປະ­ຊາ­ຊົນ​ລາວ ໂດຍ​ການ​ຊ່ວຍ­ເຫຼືອ​ລ້າ​ຈາກ​ກະ­ຊວງ​ປ້ອງ​ກັນ​ປະ­ເທດ ສປ ຈີນ ຈັດ​ຂຶ້ນ​ວັນ​ທີ 19 ມັງ­ກອນ 2019 ທີ່​ນະ­ຄອນ­ຫຼວງ​ວຽງ​ຈັນ ກ່າວ​ມອບ​ໂດຍ​ທ່ານ ພົນ​ຕີ ຫຼີ​ຊິ່ງ​ເຈຍ ຮອງ​ຫົວ­ໜ້າ​ກົມ​ໃຫຍ່​ພະ­ລາ­ທິ­ການ ຄະ­ນະ​ກຳ­ມະ­ການ​ທະ­ຫານ​ສູນ​ກາງ ແຫ່ງ ສປ ຈີນ ແລະ ກ່າວ​ຮັບ​ໂດຍ​ທ່ານ ພົ​ຈວ ຄຳ​ເພັດ ສີ​ຊາ​ນົນ ຮອງ​ຫົວ­ໜ້າ​ກົມ​ໃຫຍ່​ພະ­ລາ­ທິ­ການ​ກອງ­ທັບ​ປະ­ຊາ­ຊົນ​ລາວ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ພົນ​ເອກ ຈັນ​ສະ​ໜອນ ຈັນ​ຍາ​ລາດ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ແລະ ທ່ານ ພົນ​ເອກ ທະ­ຫານ​ເຮືອ ໝຽວ ຫົວ​ກຳ­ມະ­ການ​ທະ­ຫານ​ສູນ​ກາງ ຫົວ­ໜ້າ​ກົມ​ວຽກ​ງານ​ການ­ເມືອງ ຄະ­ນະ​ກຳ­ມະ­ການ​ທະ­ຫານ​ສູນ​ກາງ ແຫ່ງ ສປ ຈີນ ຕະ­ຫຼອດ​ຮອດ ນາຍ ແລະ ພົນ­ທະ­ຫານ​ຂັ້ນ​ສູງ​ຂອງ​ສອງ​ປະ­ເທດ​ລາວ-ຈີນ ແລະ ພະ­ນັກ­ງານ​ແພດ​ໝໍ​ເຂົ້າ​ຮ່ວມ.

    ທ່ານ ຫຼີ​ຊິ່ງ​ເຈຍ ກ່າວ​ວ່າ: ສອງ​ປະ­ເທດ​ລາວ-ຈີນ ມີ​ສາຍ​ນ້ຳ ແລະ ແຜ່ນ­ດິນ​ຕິດ​ຈອດ​ກັນ ເປັນ​ປະ­ເທດ​ບ້ານ​ໃກ້​ເຮືອນ​ຄຽງ ປະ­ຊາ­ຊົນ​ສອງ​ຊາດ​ມີ​ມູນ­ເຊື້ອ​ໄປ­ມາ­ຫາ­ສູ່​ກັນ​ແຕ່​ຍາວ​ນານ ໂດຍ​ສະ­ເພາະ​ແມ່ນ ໄລ­ຍະ​ການ​ຕໍ່­ສູ້​ຍາດ​ເອົາ​ຄວາມ​ເປັນ​ເອ­ກະ­ລາດ​ມາ​ໃຫ້​ປະ­ເທດ​ຊາດ ແລະ ປົດ​ປ່ອຍ​ປະ­ຊາ­ຊົນ​ແມ່ນ​ໄດ້​ມີ​ການ​ຕໍ່­ສູ້​ຄຽງ​ບ່າ​ຄຽງ​ໄຫຼ່ ໃຫ້​ຄວາມ​ຊ່ວຍ­ເຫຼືອ​ສະ­ໜັບ­ສະ­ໜູນ​ເຊິ່ງ​ກັນ ແລະ ກັນ ສ້າງ​ຄວາມ​ສາ­ມັກ­ຄີ​ອັນ​ແໜ້ນ​ແຟ້ນ ແລະ ມິດ­ຕະ­ພາບ​ອັນ​ເລິກ­ເຊິ່ງ​ຕໍ່​ກັນ ປັດ­ຈຸ­ບັນ​ໃນ​ສະ­ພາບ​ການ​ທີ່​ສາ­ກົນ ແລະ ຂົງ­ເຂດ​ພາກ​ພື້ນ​ມີ​ການ​ປ່ຽນ­ແປງ​ຢ່າງ​ບໍ່​ຢຸດ​ຢັ້ງ ສອງ​ພັກ ສອງ​ລັດ​ຈີນ-ລາວ ຕ້ອງ​ໄດ້​ຮ່ວມ​ກັນ​ປະ​ເຊີນ​ໜ້າ​ກັບ​ຫຼາຍ​ສິ່ງ​ທ້າ​ທາຍ ໂດຍ​ພາຍ​ໃຕ້​ການ​ນຳ­ພາ​ຂອງ​ເລ­ຂາ­ທິ­ການ​ໃຫຍ່ ທ່ານ ສີ ຈິ້ນ​ຜິງ ແລະ ເລ­ຂາ­ທິ­ການ​ໃຫຍ່ ທ່ານ ບຸນ​ຍັງ ວໍ­ລະ​ຈິດ ຈະ​ຕ້ອງ​ມຸ່ງ​ໝັ້ນ​ເພື່ອ​ອະ­ນາ­ຄົດ ມີ​ການ​ຮ່ວມ​ມື​ຮອບ­ດ້ານ ສົ່ງ­ເສີມ​ການ​ເປັນ​ຄູ່​ຮ່ວມ​ມື​ຍຸດ​ທະ​ສາດ​ຮອບ­ດ້ານ ແລະ ການ​ພັດ­ທະ­ນາ​ແບບ​ໝັ້ນ­ຄົງ ເຂັ້ມ­ແຂງ​ຢ່າງ​ຕໍ່​ເນື່ອງ​ຂອງ​ສອງ​ປະ­ເທດ ເຊິ່ງ​ໂຄງ­ການ​ຊ່ວຍ­ເຫຼືອ​ໂຮງ­ໝໍ 103 ກອງ­ທັບ​ປະ­ຊາ­ຊົນ​ລາວ ແມ່ນ​ວິ­ທີ​ທາງ​ທີ່​ສຳ­ຄັນ​ຂອງ​ກອງ­ທັບ​ລາວ-ຈີນ ໃນ​ການ­ຈັດ­ຕັ້ງ​ຜັນ​ຂະ­ຫຍາຍ​ມະ­ຕິ​ຕົກ­ລົງ​ທີ່​ເປັນ​ເອ­ກະ​ພາບ​ຮ່ວມ​ກັນ ຂອງ​ການ​ນຳ​ສອງ​ຝ່າຍ​ທີ່​ວ່າ​ເປັນ​ໝາກ­ຜົນ​ທີ່​ເປັນ​ຫຼັກ​ໝາຍ ບອກ​ໃຫ້​ຮູ້​ເຖິງ​ການ​ຮ່ວມ​ມື​ແລກ­ປ່ຽນ​ຂອງ​ສອງ​ກອງ­ທັບ ຈະ​ຕ້ອງ​ໄດ້​ມີ​ການ​ພັດ­ທະ­ນາ​ຢ່າງ­ຮອບ­ດ້ານ ທັງ​ເປັນ​ການ​ຕື່ນ​ຕົວ​ເອົາ­ໃຈ­ໃສ່​ຊຸກ­ຍູ້​ສົ່ງ­ເສີມ ແລະ ສົ່ງ​ຜົນ​ຢ່າງ​ກວ້າງ​ໄກ ເລິກ­ເຊິ່ງ ກວ້າງ­ຂວາງ​ຕໍ່​ຄວາມ​ສຳ­ພັນ​ແບບ​ບ້ານ​ໃກ້​ເຮືອນ​ຄຽງ​ທີ່​ດີ​ຂອງ​ສອງ​ປະ­ເທດ ພ້ອມ​ທັງ​ເຊື່ອ​ໝັ້ນ​ວ່າ​ສອງ​ກອງ­ທັບ​ຈີນ-ລາວ ຈະ​ຖື​ເອົາ​ການ​ເປີດ​ນຳ​ໃຊ້​ຕຶກ​ປິ່ນ­ປົວ​ພະ­ຍາດ​ໂຮງ­ໝໍ 103 ຫຼັງ​ນີ້​ເປັນ​ເວ­ທີ​ສຳ­ຄັນ​ທາງ​ດ້ານ​ໂອ­ກາດ ແລະ ຊ່ອງ​ທາງ ຈົດ​ຈຳ​ກຳ​ແໜ້ນ​ພາ­ລະ­ກິດ​ມອບ​ໝາຍ​ຂອງ​ຜູ້­ນຳ​ສອງ​ພັກ ສອງ​ລັດ​ຈີນ-ລາວ ເພີ່ມ​ທະ­ວີ​ການ​ຊີ້​ນຳ-ນຳ­ພາ​ວຽກ​ງານ​ການ­ເມືອງ​ໄປ​ຕື່ມ​ອີກ​ບາດ­ກ້າວ​ໜຶ່ງ ສ້າງ​ເປັນ​ກົນ​ໄກ​ການ​ແລກ­ປ່ຽນ​ທີ່​ມີ​ຄວາມ​ສົມ­ບູນ ລົງ​ເລິກ​ການ​ຮ່ວມ​ມື​ໃຫ້​ເປັນ​ຮູບ​ປະ​ທຳ ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ​ອັນ​ເປັນ​ມູນ­ເຊື້ອ​ມາ​ແຕ່​ຍາວ​ນານ ຊຸກ­ຍູ້​ສົ່ງ­ເສີມ​ຄວາມ​ສຳ­ພັນ​ຂອງ​ສອງ​ພັກ ສອງ​ລັດ ສອງ​ກອງ­ທັບ​ຈີນ-ລາວ ກ້າວ​ສູ່​ຈຸດ​ເລີ່ມ​ຕົ້ນ​ອັນ​ໃໝ່ ໄດ້​ຮັບ​ໝາກ­ຜົນ​ອັນ​ໃໝ່ ແລະ ສ້າງ​ໂສມ​ໜ້າ​ອັນ​ໃໝ່​ໃຫຍ່​ຫຼວງ​ກວ່າ​ເກົ່າ.

    ສຳ­ລັບ​ການ​ກໍ່­ສ້າງ​ຕຶກ​ດັ່ງ­ກ່າວ​ມີ​ເນື້ອ­ທີ່​ປະ­ມານ 24.756 ຕາ​ແມັດ ລວມ​ມີ 9 ຊັ້ນ ປະ­ກອບ​ມີ​ຕຶກ​ປິ່ນ­ປົວ​ພະ­ຍາດ​ລວມ ໃນ​ນີ້ ມີ​ການ​ປິ່ນ­ປົວ​ທົ່ວ​ໄປ ຂະ­ແໜງ​ຜ່າ­ຕັດ ແລະ ພາກ­ສ່ວນ​ນອນ​ປິ່ນ­ປົວ ນອກ​ນັ້ນ ຍັງ​ມີ​ຕຶກ​ຊ່ຽວ­ຊານ​ຈີນ ແລະ ບັນ­ດາ​ສິ່ງ​ອຳ­ນວຍ​ຄວາມ​ສະ­ດວກ​ອື່ນໆ ທີ່​ປະ­ກອບ​ຢູ່​ນອກ​ອາ­ຄານ ລວມ​ມູນ​ຄ່າ​ການ​ກໍ່­ສ້າງ​ທັງ​ໝົດ 197.000.000 ຢວນ.

ຂ່າວທີ່ກ່ຽວຂ້ອງ