ກຳລັງ​ແຮງ​ງານ​ໃນ​ຍີ່ປຸ່ນ ຄາດ​ວ່າ​ຈະ​ຫຼຸດ​ລົງ 20% ພາຍ​ໃນ​ປີ 2040

242 21 ມ.ກ. 2019 ຂ່າວຕ່າງປະເທດ
ກຳລັງ​ແຮງ​ງານ​ໃນ​ຍີ່ປຸ່ນ ຄາດ​ວ່າ​ຈະ​ຫຼຸດ​ລົງ 20% ພາຍ​ໃນ​ປີ 2040

    ອະນຸ​ກຳມະການ​ກ່ຽວ​ກັບ​ນະໂຍບາຍ​ວຽກ​ເຮັດ​ງານ​ທຳ ທີ່​ຂຶ້ນ​ກັບ​ກະຊວງ​ສາທາລະນະ​ສຸກ ແຮງ​ງານ ແລະ ​ສະຫວັດດີ​ການ ຂອງ​ຍີ່ປຸ່ນ ໃຫ້​ຮູ້​ວ່າ ກຳລັງ​ແຮງ​ງານ​ຂອງ​ຍີ່ປຸ່ນ ພາຍ​ໃນ​ປີ 2040 ຄາດ​ວ່າ​ຈະ​ຫຼຸດ​ລົງ 20% ເມື່ອ​ທຽບໃສ່​ປີ 2017 ເນື່ອງ​ຈາ​ກວ່າ​ປະຊາກອນ​ຫຼຸດ​ລົງ ຖ້າ​ຫາ​ກວ່າ​ເສດຖະກິດ​ຂອງ​ປະເທດ​ນີ້​ບໍ່​ເຕີບ​ໂຕ ໃນ​ຂະນະ​ທີ່​ແມ່ຍິງ ແລະ ​ຄົນ​ອາຍຸ​ສູງ ຊອກ​ຫາ​ວຽກ​ເຮັດ​ງານ​ທຳ​ໄດ້​ຍາກ.

    ໃນ​ບົດ​ລາຍ​ງານ​ສະບັບ​ທຳ​ອິດ ກ່ຽວ​ກັບ​ຂະໜາດ​ຂອງ​ກຳລັງ​ແຮງ​ງານ​ຍີ່ປຸ່ນ ພາຍ​ໃນ​ປີ  2040 ນັ້ນ ອະນຸ​ກຳມະການ​ດັ່ງກ່າວ ໄດ້​ຮຽກຮ້ອງ​ໄປ​ຍັງ​ລັດຖະບານ​ຍີ່ປຸ່ນ ໃຫ້​ປະຕິບັດ​ນະໂຍບາຍ​ຕ່າງໆ​ຕື່ມ​ອີກ ເພື່ອ​ເພີ່ມ​ທະວີ​ການ​ສ້າງ​ວຽກ​ເຮັດ​ງານ​ທຳ ແລະ ​ສົ່ງເສີມ​ການ​ພັດທະນາ​ປັນຍາ​ທຽມ ຄື​ກັບ​ວ່າ​ເປັນ​ມາດ​ຕະການ​ຮັກສາ​ສະມັດ​ຕະ​ພາບ​ໃນ​ການ​ອອກແຮງ​ງານ.

    ການ​ຄົ້ນຄວ້າ​ດັ່ງກ່າວ ບໍ່​ໄດ້​ລວມ​ເຖິງ​ການ​ພັດທະນາ​ຂອງ​ກຳລັງ​ແຮງ​ງານ​ຕ່າງປະເທດ ຢູ່​ໃນ 14 ຂົງເຂດ ໃນ​ຍີ່ປຸ່ນ ອັນ​ປະກອບ​ດ້ວຍ​ການ​ກໍ່ສ້າງ ແລະ ​ການ​ດູ​ແລ​ສຸຂະພາບ ນັບ​ແຕ່​ເດືອນ​ເມສາ ປີ 2019 ເປັນຕົ້ນ​ໄປ.

    ອະນຸ​ກຳມະການ​ດັ່ງກ່າວ ໃຫ້ການ​ຄາດ​ຄະເນ​ວ່າ ກຳລັງ​ແຮງ​ງານ​ຢູ່​ໃນ​ຍີ່ປຸ່ນ ຈະ​ບັນລຸ  60,82 ລ້ານ​ຄົນ ພາຍ​ໃນ​ປີ 2025 ແລະ 52,45 ລ້ານ​ຄົນ ພາຍ​ໃນ​ປີ 2040 ນັບ​ວ່າ​ຫຼຸດ​ລົງ​ເມື່ອ​ທຽບໃສ່ 65,3 ລ້ານ​ຄົນ ໃນ​ປີ 2017. ໃນ​ນັ້ນ ກຳລັງ​ແຮງ​ງານ​ເພດ​ຊາຍ​ຂອງ​ຍີ່ປຸ່ນ ພາຍ​ໃນ​ປີ 2040 ຈະ​ຫຼຸດ​ລົງ 7,11 ລ້ານ​ຄົນ ທຽບໃສ່​ປີ 2017 ໃນ​ຂະນະ​ທີ່​ແຮງ​ງານ​ເພດ​ຍິງ ໃນ​ໄລຍະ​ເວລາ​ດຽວ​ກັນ ຈະ​ຫຼຸດ​ລົງ 5,75 ລ້ານ​ຄົນ.

    ໃນ​ຂະນະ​ດຽວ​ກັນ ຕົວ​ເລກ​ທີ່​ກະຊວງ​ສາທາລະນະ​ສຸກ ແຮງ​ງານ ແລະ ​ສະຫວັດດີ​ການ​ຂອງ​ຍີ່ປຸ່ນ ນຳ​ອອກ​ມາ​ເປີດເຜີຍ​ເມື່ອ​ບໍ່​ດົນ​ມາ​ນີ້ ຊີ້​ໃຫ້​ເຫັນ​ວ່າ ປະຊາກອນ​ຍີ່ປຸ່ນ ຫຼຸດ​ລົງ​ແບບ​ທຳ​ມະ​ຊາດ ທີ່ 448.000 ຄົນ ໃນ​ປີ 2018 ຊຶ່ງ​ເປັນ​ລະດັບ​ສູງ​ສຸດ​ໃນ​ປະຫວັດສາດ ຍ້ອນ​ວ່າ​ອັດຕາ​ສ່ວນ​ການ​ເກີດ​ຫຼຸດ​ລົງ.

ຂ່າວທີ່ກ່ຽວຂ້ອງ