ສະມາຄົມກີລາ ນວ-ແຂວງອຸດອນ ແຂ່ງຂັນບານເຕະມິດຕະພາບ

332 21 ມ.ກ. 2019 ວົງຈອນກີລາ
ສະມາຄົມກີລາ ນວ-ແຂວງອຸດອນ ແຂ່ງຂັນບານເຕະມິດຕະພາບ

    ກິດ­ຈະ­ກຳ​ແຂ່ງ­ຂັນ​ເຕະ­ບານ​ມິດ­ຕະ­ພາບ​ລະ­ຫວ່າງ​ທີມ VIP ສະ­ມາ­ຄົມ​ກີ­ລາ-ກາຍ­ຍະ­ກຳ ນະ­ຄອນ­ຫຼວງ​ວຽງ​ຈັນ (ນວ) ແລະ ທີມ​ການ​ກີ­ລາ​ແຫ່ງ​ຊາດ​ໄທ (ກກທ) ປະ­ຈຳ​ແຂວງ​ອຸ­ດອນ​ທາ­ນີ ໄດ້​ຈັດ​ຂຶ້ນ​ວັນ​ທີ 15 ມັງ­ກອນ 2019 ທີ່​ສະ­ໜາມ​ກີ­ລາ​ແຫ່ງ​ໃໝ່ ແຂວງ​ອຸ­ດອນ​ທາ­ນີ ມີ​ທ່ານ ສີ​ວິ​ໄຊ ຈິນ­ດາ​ຫຼວງ ຮອງ​ເຈົ້າ­ແຂວງ​ອຸ­ດອນ​ທາ­ນີ ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ແລະ ພາກ­ສ່ວນ​ທີ່​ກ່ຽວ­ຂ້ອງ​ທັງ 2 ຝ່າຍ​ເຂົ້າ​ຮ່ວມ.

    ການ​ເຂົ້າ​ຮ່ວມ​ແຂ່ງ­ຂັນ​ເຕະ­ບານ​ມິດ­ຕະ­ພາບ​ຄັ້ງ​ນີ້ ໄປ​ຕາມ​ຄຳ​ເຊື້ອ​ເຊີນ​ຂອງ​ການ​ກີ­ລາ​ແຫ່ງ​ຊາດ​ໄທ ປະ­ຈຳ​ແຂວງ​ອຸ­ດອນ​ທາ­ນີ ໃນ​ໂອ­ກາດ​ເປີດ​ນຳ​ໃຊ້​ສຳ­ນັກ­ງານ​ການ​ກີ­ລາ​ແຫ່ງ​ຊາດ​ໄທ ແຂວງ​ອຸ­ດອນ​ທາ­ນີ ແລະ ສະ­ໜາມ​ກີ­ລາ​ແຂວງ​ແຫ່ງ​ໃໝ່​ຂອງ​ແຂວງ​ດັ່ງ­ກ່າວ​ຢ່າງ​ເປັນ​ທາງ​ການ ເຊິ່ງ​ການ​ແຂ່ງ­ຂັນ​ຄັ້ງ​ນີ້ ຜົນ​ປາ­ກົດ​ວ່າ​ທີມ​ສະ­ມາ­ຄົມ​ກີ­ລາ-ກາຍ­ຍະ­ກຳ ນວ ຫຼິ້ນ​ໄດ້​ດີ​ກວ່າ ບຽດ​ເອົາ​ຊະ­ນະ​ທີມ​ການ​ກີ­ລາ​ແຫ່ງ​ຊາດ​ໄທ ປະ­ຈຳ​ແຂວງ​ອຸ­ດອນ​ທາ­ນີ​ໄປ​ໄດ້ 1-0 ປະ­ຕູ ເຊິ່ງ​ຕະ­ຫຼອດ​ໄລ­ຍະ​ການ​ແຂ່ງ­ຂັນ ເຕັມ​ໄປ​ດ້ວຍ​ບັນ­ຍາ­ກາດ​ຟົດ­ຟື້ນ​ເບີກ­ບານ​ມ່ວນ­ຊື່ນ ແລະ ມີ​ຄວາມ​ໝາຍ​ສຳ­ຄັນ ນັກ­ກີ­ລາ​ທັງ 2 ຝ່າຍ​ຫຼິ້ນ​ກັນ​ດ້ວຍ​ນ້ຳ­ໃຈ​ນັກ­ກີ­ລາ ຮູ້​ໄດ້​ຮູ້​ເສຍ ແລະ ຮູ້​ໃຫ້​ອະ­ໄພ ສົມ​ກັບ​ວ່າ­ການ​ແຂ່ງ­ຂັນ​ກີ­ລາ​ເຕະ­ບານ ເພື່ອ​ມິດ­ຕະ­ພາບ​ຢ່າງ​ແທ້​ຈິງ.

ຂ່າວທີ່ກ່ຽວຂ້ອງ