ເຊີນມວນຊົນເຂົ້າຮ່ວມຊົມສວນສະໜາມ ສະຫຼອງວັນສ້າງຕັ້ງກອງທັບ 7 ພັນກວ່າຄົນ

685 18 ມ.ກ. 2019 ຂ່າວໜ້າ​ໜຶ່ງ
ເຊີນມວນຊົນເຂົ້າຮ່ວມຊົມສວນສະໜາມ ສະຫຼອງວັນສ້າງຕັ້ງກອງທັບ 7 ພັນກວ່າຄົນ

    ທ່ານ ພົນ​ເອກ ຈັນ​ສະ​ໜອນ ຈັນ​ຍາ​ລາດ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ໃຫ້​ສຳ­ພາດ​ໂອ­ກາດ​ທີ່​ເຂົ້າ​ຮ່ວມ​ການ​ເດີນ​ສະ­ໜາມ​ຫັດ​ແອບ​ທົດ​ລອງ ຄັ້ງ​ທີ 2 ເພື່ອ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ກອງ­ທັບ ຄົບ­ຮອບ 70 ປີ ໃນ​ວັນ​ທີ 17 ມັງ­ກອນ 2019 ທີ່​ວິ­ທະ­ຍາ­ຄານ​ກົມ​ມະ​ດຳ ວ່າ: ການ​ເດີນ​ສະ­ໜາມ​ຫັດ​ແອບ​ຄັ້ງ​ນີ້ ເປັນ​ຄັ້ງ​ສຸດ​ທ້າຍ​ຂອງ​ການ​ເຝິກ­ຊ້ອມ​ຂອງ​ອ້າຍ​ນ້ອງ​ທະ­ຫານ ທີ່​ໄດ້​ເຂົ້າ​ຮ່ວມ​ຂະ​ບວນ​ການ​ສວນ­ສະ­ໜາມ ເພື່ອ​ໃຫ້​ປະ­ຊາ­ຊົນ ພະ­ນັກ­ງານ-ລັດ­ຖະ­ກອນ ແລະ ພະ­ນັກ­ງານ​ນັກ­ຮົບ​ໄດ້​ເຫັນ​ທົ່ວ​ເຖິງ ເຊິ່ງ​ຜ່ານ​ການ​ເຝິກ­ຊ້ອມ​ເຫັນ​ວ່າ​ອ້າຍ​ນ້ອງ ໄດ້​ມີ​ຄວາມ​ພະ­ຍາ­ຍາມ ແລະ ທຸກ​ເຫຼົ່າ​ຮົບ​ໄດ້​ເຂົ້າ​ຮ່ວມ​ສະ­ແດງ​ໃຫ້​ເຫັນ ອ້າຍ​ນ້ອງ​ໄດ້​ມີ​ຄວາມ​ເບີກ­ບານ​ມ່ວນ­ຊື່ນ ມີ​ສຸ­ຂະ­ພາບ​ເຂັ້ມ­ແຂງ ແລະ ມີ​ລະ­ບຽບ​ວິ­ໄນ ພ້ອມ​ນັ້ນ ກໍ່​ໄດ້​ນຳ​ເອົາ​ພາ­ຫະ­ນະ​ເຕັກ­ນິກ​ການ​ທະ­ຫານ​ທີ່​ທັນ​ສະ­ໄໝ​ມາ​ຮັບ​ໃຊ້​ການ­ສະ­ແດງ ແນ­ໃສ່​ໃຫ້​ພັກ-ລັດ ແລະ ປະ­ຊາ­ຊົນ​ລາວ​ບັນ­ດາ­ເຜົ່າ​ໄດ້​ຮູ້ ແລະ ເຫັນ​ໄດ້​ເຖິງ​ການ​ເຕີບ​ໃຫຍ່​ຂະ­ຫຍາຍ­ຕົວ​ຂອງ​ກອງ­ທັບ​ປະ­ຊາ­ຊົນ​ລາວ ຕະ­ຫຼອດ​ໄລ­ຍະ 70 ປີ­ຜ່ານ­ມາ ທີ່​ໄດ້​ເຄື່ອນ​ໄຫວ​ກໍ່­ສ້າງ ການ​ສູ້​ຮົບ ແລະ ເຕີບ​ໃຫຍ່​ຂະ­ຫຍາຍ­ຕົວ​ເຂັ້ມ­ແຂງ ເພື່ອ​ກ້າວ​ເຂົ້າ​ສູ່​ເປັນ​ກອງ­ທັບ​ປະ­ຕິ­ວັດ​ທີ່​ມີ​ລະ­ບຽບ​ແບບ­ແຜນ ແລະ ທັນ​ສະ­ໄໝ ຕະ­ຫຼອດ​ໄລ­ຍະ​ດັ່ງ­ກ່າວ ແມ່ນ​ຕິດ​ພັນ​ກັບ​ການ​ຊ່ວຍ­ເຫຼືອ​ຂອງ​ປະ­ຊາ­ຊົນ ແລະ ການ​ສະ­ໜັບ­ສະ­ໜູນ​ບັນ­ດາ​ປະ­ເທດ​ເພື່ອນ​ມິດ​ຍຸດ​ທະ​ສາດ​ສັງ­ຄົມ​ນິ­ຍົມ ເຮັດ​ໃຫ້​ກາຍ­ເປັນ​ກອງ­ທັບ​ປະ­ຊາ­ຊົນ​ລາວ​ເປັນ​ກອງ­ທັບ​ປະ­ຊາ­ຊົນ ໂດຍ​ປະ­ຊາ­ຊົນ ແລະ ເພື່ອ​ປະ­ຊາ­ຊົນ​ຢ່າງ​ແທ້​ຈິງ.

    ສຳ­ລັບ​ການ­ສະ­ແດງ​ຄັ້ງ​ນີ້ ມີ​ຄວາມ​ແຕກ​ຕ່າງ​ຈາກ​ການ­ສະ­ແດງ​ສະ­ເຫຼີມ­ສະ­ຫຼອງ​ວັນ­ຊາດ​ທີ 2 ທັນ­ວາ ຄົບ­ຮອບ 40 ປີ ເນື່ອງ​ຈາກ​ໄດ້​ເພີ່ມ​ການ­ສະ­ແດງ​ຂອງ​ພາ­ຫະ­ນະ ແລະ ຍຸດ​ໂທ​ປະ­ກອນ​ທີ່​ໃຊ້​ເຂົ້າ​ໃນ​ການ​ຕໍ່­ສູ້ ແລະ ອື່ນໆ ປັດ­ຈຸ­ບັນ ການ​ສວນ­ສະ­ໜາມ​ຂອງ​ແຕ່​ລະ​ກ້ອນ​ກຳ­ລັງ​ແມ່ນ​ມີ​ຄວາມ​ພ້ອມ ແລະ ເປັນ​ລະ­ບຽບ​ຕາມ​ແຜນ­ທີ່​ຄະ­ນະ​ຮັບ­ຜິດ­ຊອບ​ວາງ​ໄວ້ ເຊິ່ງ​ການ­ສະ­ແດງ​ຢ່າງ​ເປັນ​ທາງ​ການ​ຈະ​ໄດ້​ຈັດ​ຂຶ້ນ​ວັນ​ທີ 20 ມັງ­ກອນ 2019 ທີ່​ວິ­ທະ­ຍາ­ຄານ​ກົມ​ມະ​ດຳ ໂດຍ​ໄດ້​ເຊີນ​ມວນ​ຊົນ​ມາ​ຮ່ວມ​ນັບ​ແຕ່​ການ​ນຳ​ພັກ-ລັດ ການ​ນຳ​ກະ­ຊວງ ອົງ­ການ​ທຽບ​ເທົ່າ ອຳ­ນາດ​ການ​ປົກ­ຄອງ​ທ້ອງ­ຖິ່ນ ພະ­ນັກ­ງານ ນາຍ ແລະ ພົນ­ທະ­ຫານ 3 ພັນ​ກວ່າ​ຄົນ ມວນ​ຊົນ​ນະ­ຄອນ­ຫຼວງ​ວຽງ​ຈັນ ແລະ ແຂວງ​ວຽງ​ຈັນ 3 ພັນ​ກວ່າ​ຄົນ ທັງ​ໝົດ​ສະ­ເລ່ຍ​ທັງ​ອ້າຍ​ນ້ອງ​ທະ­ຫານ​ມີ 7 ພັນ​ກວ່າ​ຄົນ.

ຂ່າວທີ່ກ່ຽວຂ້ອງ