ສ ອາ​ເມ​ຣິ​ກາ ແຈ້ງ​ໃຫ້​ຮູ້​ເຖິງ​ເວລາ​ການ​ຖອນ​ອອກ​ຈາກ​ສົນທິສັນຍາ INF

480 18 ມ.ກ. 2019 ຂ່າວຕ່າງປະເທດ
ສ ອາ​ເມ​ຣິ​ກາ ແຈ້ງ​ໃຫ້​ຮູ້​ເຖິງ​ເວລາ​ການ​ຖອນ​ອອກ​ຈາກ​ສົນທິສັນຍາ INF

     ໜັງສືພິມ ໂຟ​ກາ​​ສ ອອນ​ລາຍ (Focus Online) ລາຍ​ງວານ​ວ່າ ສ ອາ​ເມ​ຣິ​ກາ ໄດ້​ແຈ້ງ​ອອກ​ມາ​ຢ່າງ​ເປັນ​ທາງ​ການ ເຖິງ​ການ​ທີ່​ຈະ​ຖອນ​ອອກ​ຈາກ​ສົນທິສັນຍາ ບັນດາ​ກອງ​ກຳລັງ ນີວ​ເຄລຍ​ຂະໜາດ​ກາງ  (INF) ໃນ​ວັນ​ທີ 2 ກຸມພາ​ໜ້າ​ນີ້.

    ນາງ ອັນ​ເດຣ ທອມ​ສັນ ຮອງ​ລັດຖະມົນຕີ​ການ​ຕ່າງປະເທດ ສ ອາ​ເມ​ຣິ​ກາ ຜູ້​ຮັບຜິດຊອບ ບັນຫາ​ການ​ຄວບ​ຄຸມ​ອາວຸດ ແລະ​ ຄວາມ​ໝັ້ນຄົງ​ສາກົນ ມີ​ແຈ້ງ​ການ​ດັ່ງກ່າວ​ອອກ​ມາ ເມື່ອ​ວັນ​ທີ 16 ມັງກອນ​ນີ້ ຕໍ່​ບັນດາ​ປະເທດ​ສະມາຊິກ ຂອງ​ອົງການ​ສົນທິສັນຍາ​ປ້ອງ​ກັນ​ອັດ​ລັງ​ຕິກ​ເໜືອ (NATO).

    ເຈົ້າ​ໜ້າທີ່​ດັ່ງກ່າວ​ເວົ້າ​ວ່າ ການ​ປຶກສາ​ຫາລື​ກັບ​ບັນດາ​ເຈົ້າ​ໜ້າທີ່​ຣັດ​ເຊຍ ເພື່ອ​ຮັກສາ INF ໄວ້​ນັ້ນ ເປັນ​ເລື່ອງ​ທີ່ “ໝົດ​ຫວັງ” ແລະ​ ໃຫ້​ທັດສະນະ​ວ່າ ຣັດ​ເຊຍ​ສືບຕໍ່​ລະເມີດ​ບັນດາ​ຈຸດ​ທີ່​ສຳຄັນ​ຢູ່​ໃນ INF ໃນ​ຂະນະ​ດຽວ​ກັນ ຣັດ​ເຊຍ​ກໍ​ບໍ່​ໄດ້​ຊີ້​ແຈງ​ວ່າ​ຈະ​ດັດແກ້​ສົນທິສັນຍາ​ດັ່ງກ່າວ​ຄື​ແນວໃດ ໃນ​ອະນາຄົດ.

    ຂໍ້​ມູນ​ດັ່ງກ່າວ​ມີ​ອອກ​ມາ​ພຽງ​ໜຶ່ງ​ມື້ ຫຼັງ​ຈາກ​ທີ່​ການ​ເຈລະຈາ ລະຫວ່າງ​ຄະນະ​ຜູ້​ແທນ ຂອງ​ຣັດ​ເຊຍ ແລະ ສ ອາ​ເມ​ຣິ​ກາ ເພື່ອ​ກອບ​ກູ້ INF ຊຶ່ງ​ຈັດ​ຂຶ້ນ​ທີ່​ນະຄອນ​ເຊີ​ແນວ (ປະເທດ​ສະ​ວິດ) ບໍ່​ປະສົບ​ຄວາມ​ສຳເລັດ ເມື່ອ​ທັງ​ສອງ​ຝ່າຍ​ສືບຕໍ່​ຕິຕຽນ​ຊຶ່ງ​ກັນ​ແລະ​ກັນ.

    ໃນ​ວັນ​ທີ 16 ມັງກອນ​ນີ້​ເຊັ່ນ​ກັນ ທ່ານ ແຊກ​ເກ ລາບ​ຣອບ ລັດຖະມົນຕີ​ການ​ຕ່າງປະເທດ ຣັດ​ເຊຍ ກ່າວ​ຢູ່​ໃນ​ກອງ​ປະຊຸມ​ຖະແຫຼງ​ຂ່າວ ກ່ຽວ​ກັບ​ຜົນ​ການເຄື່ອນໄຫວ​ດ້ານ​ການ​ທູດ​ຂອງ​ຣັດ​ເຊຍ ໃນ​ປີ 2018 ໃຫ້​ຮູ້​ວ່າ ຣັດ​ເຊຍ​ພ້ອມ​ທີ່​ຈະ​ສືບຕໍ່​ພະຍາຍາມ​ເພື່ອ​ຮັກສາ INF ເອົາ​ໄວ້.

ຂ່າວທີ່ກ່ຽວຂ້ອງ