ສປຊ ຍອມຮັບ​ວ່າ​ຍັງ​ບໍ່​ຮັບປະກັນ​ຢ່າງ​ດີ​ໃຫ້​ແກ່​ອະນາຄົດ​ຂອງ​ເດັກນ້ອຍ

369 18 ມ.ກ. 2019 ຂ່າວຕ່າງປະເທດ
ສປຊ ຍອມຮັບ​ວ່າ​ຍັງ​ບໍ່​ຮັບປະກັນ​ຢ່າງ​ດີ​ໃຫ້​ແກ່​ອະນາຄົດ​ຂອງ​ເດັກນ້ອຍ

     ທ່ານ​ນາງ ມີ​ແຊລ ບາ​ຊີ​ເລດ ຂ້າ​ຫຼວງ​ໃຫຍ່​ດ້ານ​ສິດທິ​ມະນຸດ​ຂອງ​ສະຫະ​ປະຊາ​ຊາດ (​ສປຊ) ກ່າວ​ຢູ່​ໃນ​ວາລະ​ປະຊຸມ​ຄັ້ງ​ທີ 80 ຂອງ​ຄະນະ​ກຳມະການ ​ສປຊ ກ່ຽວ​ກັບ​ສິດທິ​ຂອງ​ເດັກນ້ອຍ  ຊຶ່ງ​ຈັດ​ຂຶ້ນ​ທີ່​ນະຄອນ​ເຊີ​ແນວ (ປະເທດ​ສະ​ວິດ) ເນື່ອງ​ໃນ​ໂອກາດ​ການ​ກຳເນີດ​ກົດ​ບັດ​ວ່າ​ດ້ວຍ​ສິດທິ​ເດັກນ້ອຍ​ຄົບຮອບ 30 ປີ ວ່າ​ໂລກ​ຍັງ​ບໍ່​ຮັບປະກັນ​ເປັນ​ຢ່າງ​ດີ ໃຫ້​ແກ່​ອະນາຄົດ​ຂອງ​ເດັກນ້ອຍ ໃນ​ເມື່ອ​ວ່າ​ສະພາບ​ເດັກນ້ອຍ​ເສຍ​ຊີວິດ​ຕັ້ງແຕ່​ຍັງ​ນ້ອຍໆ ເປັນ​ຜູ້​ໄດ້​ຮັບ​ເຄາະ​ຮ້າຍ​ຈາກ​ຄວາມທຸກ​ຍາກ ເປັນ​ຜູ້​ທີ່​ຖືກ​ຂາຍ ແລະ ​ໄປ​ເປັນ​ຂ້າ​ທາດ ຍັງ​ຄົງ​ເກີດ​ຂຶ້ນ​ຢູ່​ໃນ​ບາງ​ປະເທດ​ສະມາຊິກ ທີ່​ໄດ້​ລົງ​ນາມ​ໃນ​ກົດ​ບັດ​ດັ່ງກ່າວ.

   ເຖິງ​ວ່າ​ໄດ້​ມີ​ການ​ບັນລຸ​ຄວາມ​ກ້າວໜ້າ​ທີ່​ສຳຄັນ ຊຶ່ງ​ກົດ​ບັດ​ດັ່ງກ່າວ​ນຳ​ມາ ເຊັ່ນ​ວ່າການ​ປົກ​ປ້ອງ​ເດັກນ້ອຍ​ໄດ້​ກາຍເປັນ​ກົດໝາຍ​ຢູ່​ໃນ​ຫຼາຍ​ປະເທດ​ກໍ​ຕາມ ແຕ່​ທ່ານ​ນາງ ມີ​ແຊລ ບາ​ຊີ​ເລດ ກໍ​ເວົ້າ​ວ່າ ບໍ່​ແມ່ນ​ວ່າ​ທຸກໆ​ປະເທດ ພະຍາຍາມ​ສຸດ​ຄວາມ​ສາມາດ ເພື່ອ​ຮັບປະກັນ​ໃຫ້​ເດັກນ້ອຍ​ໄດ້​ມີ​ຊີວິດ ແລະ​ພັດທະນາ.

    ເມື່ອ​ເວົ້າ​ເຖິງ​ໂຄງການ​ດຳເນີນ​ງານ 2030 ດ້ວຍ 17 ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ຊຶ່ງ​ຜູ້ນຳ​ປະເທດ​ຕ່າງໆ ຮັບຮອງ​ເອົາ​ເມື່ອ​ເດືອນ​ກັນຍາ ປີ 2015 ນັ້ນ ທ່ານ​ນາງ ມີ​ແຊລ ບາ​ຊີ​ເລດ ໃຫ້​ທັດສະນະ​ວ່າ ການ​ປະຕິບັດ​ຄຳ​ສັນຍາ​ນີ້ ຍັງ​ບໍ່​ບັນລຸ​ປະສິດທິພາບ. ຕົວຢ່າງ​ວ່າ ກອງ​ທຶນ​ສຳລັບ​ເດັກນ້ອຍ​ຂອງ ​ສປຊ (UNICEF) ໃຫ້ການ​ຄາດ​ຄະເນ​ວ່າ ເດັກນ້ອຍ​ໃນ​ໄວ​ຕ່ຳ​ກວ່າ 5 ປີ ຈະ​ເສຍ​ຊີວິດ​ປະມານ 60 ລ້ານ​ຄົນ ໃນ​ໄລຍະ​ປີ 2017-2030 ຍ້ອນ​ບັນດາ​ສາເຫດ​ທີ່​ສາມາດ​ຫຼີກ​ລຽງ​ໄດ້.

ກ່ຽວ​ກັບ​ບັນ​ທີ່​ວ່າ​ເດັກນ້ອຍ​ຖືກ​ຄ້າຂາຍ ແລະ ​ຕ້ອງ​ເປັນ​ຂ້າ​ທາດ​ນັ້ນ ທ່ານ​ນາງ ມີ​ແຊລ ບາ​ຊີ​ເລດ ໃຫ້​ຮູ້​ວ່າ ມີ​ເດັກ​ໃນ​ໄວ​ບໍ່​ເຖິງ​ກະສຽນ ຈຳນວນ 5,5 ລ້ານ​ຄົນ ຖືກ​ບັງຄັບ​ອອກແຮງ​ງານ​ຄື​ກັບ​ວ່າ​ເປັນ​ຂ້າ​ທາດ​ຢູ່​ໃນ​ເຮືອນ ຖືກ​ກາຍເປັນ​ຂ້າ​ທາດ​ທາງ​ເພດ ແລະ ​ຖືກ​ບັງຄັບ​ໃຫ້​ແຕ່ງດອງ​ຕັ້ງແຕ່​ອາຍຸ​ຍັງ​ນ້ອຍ.

ໃນ​ຂະນະ​ດຽວ​ກັນ ສະຖິຕິ​ຂອງ ​ສປຊ ໃນ​ປີ 2016 ໃຫ້​ຮູ້​ວ່າ ມີ​ເດັກນ້ອຍ​ເພດ​ຊາຍ ແລະ​ເດັກນ້ອຍ​ເພດ​ຍິງ 20.000 ກວ່າ​ຄົນ ຕ້ອງ​ໄດ້​ເຂົ້າ​ຮ່ວມ​ຢູ່​ໃນ​ບັນດາ​ກຸ່ມ​ປະກອບ​ອາວຸດ ຄື​ກັບ​ວ່າ​ເດັກນ້ອຍ​ເຫຼົ່ານັ້ນ ເປັນ​ນັກຮົບ ຫຼື​ຄື​ກັບ​ວ່າ​ເປັນ​ຂ້າ​ທາດ.

ຂ່າວທີ່ກ່ຽວຂ້ອງ