ຜັນຂະຫຍາຍມະຕິເຂົ້າສູ່ການຈັດຕັ້ງປະຕິບັດພຶດຕິກຳຕົວຈິງ

317 17 ມ.ກ. 2019 ຂ່າວໜ້າ​ໜຶ່ງ
ຜັນຂະຫຍາຍມະຕິເຂົ້າສູ່ການຈັດຕັ້ງປະຕິບັດພຶດຕິກຳຕົວຈິງ

    ກອງ​ປະ­ຊຸມ​ເຊື່ອມ​ຊຶມ​ມະ­ຕິ​ກອງ​ປະ­ຊຸມ​ຄົບ​ຄະ­ນະ ຄັ້ງ​ທີ 7 ຂອງ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ສະ­ໄໝ​ທີ 10 ຂອງ​ໜ່ວຍ​ນະ­ຄອນ­ຫຼວງ​ວຽງ​ຈັນ (ນວ) ແຂວງ​ວຽງ​ຈັນ ແລະ ແຂວງ​ໄຊ​ສົມ­ບູນ ອັດ​ລົງ​ດ້ວຍ​ຜົນ­ສຳ­ເລັດ​ຢ່າງ​ຈົບ­ງາມ ພາຍ­ຫຼັງ​ດຳ­ເນີນ​ມາ 2 ວັນ ຢູ່​ຫ້ອງ​ວ່າ­ການ ນວ ໂດຍ​ພິ­ທີ​ປິດ​ກອງ​ປະ­ຊຸມ​ດັ່ງ­ກ່າວ ຈັດ​ຂຶ້ນ​ວັນ​ທີ 15 ມັງ­ກອນ 2019 ໂດຍ​ເປັນ​ປະ­ທານ​ຂອງ​ສະ­ຫາຍ ສິນ​ລະ​ວົງ ຄຸດ​ໄພ­ທູນ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເຈົ້າ​ຄອງ ນວ ມີ​ບັນ­ດາ​ກຳ­ມະ­ການ​ສູນ​ກາງ​ພັກ ຄະ­ນະ​ພັກ-ຄະ­ນະ​ນຳ ພະ­ນັກ­ງານ​ຫຼັກ​ແຫຼ່ງ​ຈາກ ນວ ແຂວງ​ວຽງ​ຈັນ ແລະ ແຂວງ​ໄຊ​ສົມ­ບູນ ເຂົ້າ​ຮ່ວມ.

    ໄລ­ຍະ​ການ​ດຳ­ເນີນ​ກອງ​ປະ­ຊຸມ​ດັ່ງ­ກ່າວ ຜູ້​ເຂົ້າ​ຮ່ວມ​ໄດ້​ພ້ອມ​ກັນ​ຄົ້ນ­ຄວ້າ ເຊື່ອມ​ຊຶມ​ຍົກ​ໃຫ້​ເຫັນ​ພຶດ­ຕິ​ກຳ​ຕົວ​ຈິງ ໃນ​ການ­ຈັດ­ຕັ້ງ​ຜັນ​ຂະ­ຫຍາຍ 2 ເອ­ກະ­ສານ ເປັນ­ຕົ້ນ ມະ­ຕິ​ວ່າ​ດ້ວຍ​ການ​ເພີ່ມ​ທະ­ວີ​ການ​ນຳ­ພາ​ແກ້​ໄຂ​ຄວາມ​ຫຍຸ້ງ­ຍາກ​ດ້ານ​ເສດ­ຖະ­ກິດ-ການ​ເງິນ ແລະ ສ້າງ​ຄວາມ​ເຂັ້ມ­ແຂງ​ຂອງ​ການ​ຄຸ້ມ​ຄອງ​ມະ­ຫາ​ພາກ ແລະ ມະ­ຕິ​ວ່າ​ດ້ວຍ​ການ​ປັບ­ປຸງ​ຮາກ​ຖານ​ການ­ເມືອງ​ຂອງ​ລະ­ບອບ​ປະ­ຊາ­ທິ­ປະ­ໄຕ​ປະ­ຊາ­ຊົນ ໃຫ້​ເຂັ້ມ­ແຂງ ແລະ ໜັກ​ແໜ້ນ ມີ​ການ​ແບ່ງ​ກຸ່ມ​ຄົ້ນ­ຄວ້າ ສົມ​ທຽບ​ການ​ປະ­ຕິ­ບັດ​ວຽກ​ງານ​ການ­ເຄື່ອນ­ໄຫວ​ຕົວ​ຈິງ ຍົກ​ໃຫ້​ເຫັນ​ຈຸດ​ດີ ຈຸດ​ອ່ອນ ຂໍ້­ຄົງ­ຄ້າງ​ໃນ​ແຕ່​ລະ​ຂອດ​ວຽກ​ງານ​ຂະ­ແໜງ­ການ​ໃນ​ແຕ່​ລະ​ແຂວງ ປະ­ກອບ​ຄຳ​ຄິດ​ຄຳ​ເຫັນ​ຢ່າງ​ກົງ​ໄປ​ກົງ​ມາ ເພື່ອ​ຊອກ​ຫາ​ທາງ​ອອກ​ທີ່​ຖືກ­ຕ້ອງ​ສອດ­ຄ່ອງ ບົນ​ຈິດ­ໃຈ​ຖື​ເອົາ​ຜົນ​ປະ­ໂຫຍດ​ຂອງ​ປະ­ຊາ­ຊົນ ແລະ ປະ­ເທດ​ຊາດ​ເປັນ​ກົກ ຊອກ​ທາງ​ອອກ​ທີ່​ດີ​ໃຫ້­ການ​ສືບ­ຕໍ່​ນຳ­ພາ​ຈັດ​ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ X ຂອງ​ພັກ ໃຫ້​ປາ­ກົດ​ຜົນ​ເປັນ​ຈິງ.

    ສະ­ຫາຍ ສິນ​ລະ​ວົງ ຄຸດ​ໄພ­ທູນ ໄດ້​ສະ­ແດງ​ຄວາມ​ຊົມ­ເຊີຍ​ການ​ນຳ​ທຸກ​ຂັ້ນ​ທີ່​ເອົາ­ໃຈ­ໃສ່​ຕິດ­ຕາມ​ຄົ້ນ­ຄວ້າ ພິ­ຈາ­ລະ­ນາ ເຊື່ອມ​ຊຶມ​ປະ­ກອບ​ຄຳ​ຄິດ​ຄຳ​ເຫັນ ເຮັດ​ໃຫ້​ກອງ​ປະ­ຊຸມ​ຄັ້ງ​ນີ້​ມີ​ບັນ­ຍາ­ກາດ ຊີ້​ໃຫ້​ເຫັນ​ເຖິງ​ຄວາມ​ເຂົ້າ­ໃຈ ເຊື່ອມ​ຊຶມ​ມະ­ຕິ​ດັ່ງ­ກ່າວ ສະ­ແດງ​ອອກ​ໃນ​ການ­ຈັດ­ຕັ້ງ​ເຄື່ອນ​ໄຫວ​ວຽກ​ງານ​ຕົວ​ຈິງ ແມ່ນ​ສອດ­ຄ່ອງ​ກັບ​ແນວ­ທາງ ແລະ ທິດ​ຊີ້​ນຳ​ຂອງ​ຂັ້ນ​ເທິງ ພ້ອມ​ນີ້ ກໍ່​ຍັງ​ມີ​ວຽກ​ງານ​ບາງ​ຂອດ​ທີ່​ຈະ​ຕ້ອງ​ສືບ­ຕໍ່​ສຸມ​ໃສ່​ປັບ­ປຸງ​ແກ້​ໄຂ ເຊິ່ງ​ສະ­ຫາຍ​ໄດ້​ເນັ້ນ​ໃຫ້​ຖື​ເອົາ 5 ທັດ­ສະ­ນະ 6 ທິດ​ທາງ 9 ມາດ​ຕະ­ການ ເປັນ​ບ່ອນ​ອີງ​ໃນ​ການ​ແກ້​ໄຂ​ບັນ­ຫາ ເປັນ­ຕົ້ນ ຂອບ​ເຂດ​ໃດ​ບ່ອນ​ໃດ​ທີ່​ຍັງ​ອ່ອນ­ແອ ຕ້ອງ​ມີ​ການ​ກວດ­ກາ ປັບ­ປຸງ​ລະ­ບົບ​ການ­ເມືອງ​ໃນ​ຂັ້ນ​ຮາກ​ຖານ​ໃຫ້​ເປັນ​ລະ­ບົບ​ຄົບ​ຊຸດ ໂດຍ​ສະ­ເພາະ ການ​ແກ້​ໄຂ​ຄວາມ​ຫຍຸ້ງ­ຍາກ​ຂອງ​ອົງ­ການ​ປົກ­ຄອງ​ກ່ຽວ​ກັບ​ບັນ­ຫາ​ການ​ເງິນ ຕ້ອງ​ແກ້​ໃຫ້​ເປັນ​ນິ­ຕິ​ກຳ ກົດ­ໝາຍ ເປັນ​ບ່ອນ​ອີງ​ໃນ​ການ​ຄຸ້ມ​ຄອງ ພ້ອມ​ທັງ​ໄດ້​ເນັ້ນ​ໃຫ້​ຄະ­ນະ​ນຳ​ຫັນ 2 ມະ­ຕິ​ດັ່ງ­ກ່າວ ເຂົ້າ​ສູ່​ການ​ປະ­ຕິ­ບັດ​ຕົວ​ຈິງ ຈັດ​ຕັ້ງ​ຜັນ​ຂະ­ຫຍາຍ​ເຂົ້າ​ສູ່​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ຕົນ ພ້ອມ​ທັງ​ມີ​ການ​ກວດ­ກາ​ປະ​ເມີນ​ຜົນ ທີ່​ສຳ­ຄັນ​ຕ້ອງ​ເຊື່ອມ​ສານ​ເຂົ້າ​ກອງ​ປະ­ຊຸມ​ໃຫຍ່ 3 ຂັ້ນ ເມືອງ ແລະ ແຂວງ ເພື່ອ​ຫັນ​ສູ່​ພຶດ­ຕິ​ກຳ​ຕົວ​ຈິງ​ໃນ​ການ­ຈັດ­ຕັ້ງ​ຜັນ​ຂະ­ຫຍາຍ​ຢ່າງ​ມີ​ປະ​ສິດ­ທິ​ຜົນ.

ຂ່າວທີ່ກ່ຽວຂ້ອງ