ຂ່າວຫຼ້າສຸດ

ກຽມຈັດແຂ່ງຂັນຖີບລົດ ໄບຟໍເຮີ ວຽງຈັນ 2019

465 17 ມ.ກ. 2019 ວົງຈອນກີລາ
ກຽມຈັດແຂ່ງຂັນຖີບລົດ ໄບຟໍເຮີ ວຽງຈັນ 2019

    ອີງ​ຕາມ​ຂໍ້​ມູນ​ຈາກ ເຟດ​ບຸກ ໄບ​ຟໍ​ເຮີ ວຽງ​ຈັນ 2019 ແຈ້ງ​ໃຫ້​ຊາບ​ວ່າ: ໃນ​ວັນ​ທີ 10 ມີ­ນາ​ຈະ​ມາ​ເຖິງ​ນີ້ ສະ­ຫະ­ພັນ​ລົດ­ຖີບ​ແຫ່ງ​ຊາດ​ລາວ ຮ່ວມ​ມື​ກັບ​ວາ­ລະ­ສານ ຂວັນ​ໃຈ ຈະ​ຈັດ­ການ​ແຂ່ງ­ຂັນ​ຖີບ​ລົດ ເພື່ອ​ເປັນ​ການ​ສືບ­ຕໍ່​ສົ່ງ­ເສີມ​ການ​ພັດ­ທະ­ນາ​ນັກ­ກີ­ລາ​ຖີບ​ລົດ ທີ່​ມີ​ພອນ​ສະ­ຫວັນ​ດີ­ເດັ່ນ​ຕິດ​ທີມ​ຊາດ ກຽມ​ສົ່ງ​ເຂົ້າ​ຮ່ວມ​ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ທີ່​ປະ­ເທດ​ຟີ​ລິບ​ປິນ ໃນ​ທ້າຍ​ປີ​ນີ້ ພ້ອມ​ທັງ​ເປັນ​ການ​ສົ່ງ­ເສີມ​ໃນ​ການ​ຢຸດ​ໃຊ້​ຄວາມ​ຮຸ່ນ​ແຮງ​ຕໍ່​ແມ່­ຍິງ (Bike For Her) ແລະ ອີກ​ດ້ານ​ໜຶ່ງ​ຍັງ​ເປັນ​ການ​ສົ່ງ­ເສີມ​ການ​ອອກ­ກຳ­ລັງ​ກາຍ​ເພື່ອ​ສຸ­ຂະ­ພາບ ແລະ ມິດ­ຕະ­ພາບ ແລກ­ປ່ຽນ​ບົດ­ຮຽນ​ໃຫ້​ບັນ­ດາ​ສະ­ໂມ­ສອນ​ຕ່າງໆ.

    ສຳ­ລັບ​ການ​ແຂ່ງ­ຂັນ​ຄັ້ງ​ນີ້ ມີ​ທັງ​ໝົດ 12 ລາຍ­ການ ໃນ​ນັ້ນ 11 ລາຍ­ການ ແມ່ນ​ການ​ແຂ່ງ­ຂັນ​ແບບ​ມື​ອາ­ຊີບ ແລະ ນັກ­ກີ­ລາ​ຈະ​ໄດ້​ເສຍ​ຄ່າ​ສະ­ໝັກ ຜູ້​ລະ 2 ແສນ​ກີບ ປະ­ເພດ​ລົດ​ກວກ ໄລ­ຍະ​ທາງ 90 ກິ­ໂລ­ແມັດ ມີ 3 ຮຸ່ນ ຄື: ຮຸ່ນ​ທົ່ວ​ໄປ ຮຸ່ນ​ອາ­ຍຸ 30-39 ປີ ແລະ ຮຸ່ນ​ອາ­ຍຸ 40 ປີ ປະ­ເພດ​ລົດ​ເທັນ​ເທີ​ຍິງ ໄລ­ຍະ​ທາງ 90 ກິ­ໂລ­ແມັດ ມີ 2 ຮຸ່ນ ຄື: ຮຸ່ນ​ອາ­ຍຸ​ບໍ່​ເກີນ 35 ປີ ແລະ ຮຸ່ນ​ອາ­ຍຸ 35 ປີ​ຂຶ້ນ​ໄປ ປະ­ເພດ​ລົດ​ກວກ ໄລ­ຍະ​ທາງ 90 ກິ​ໂລ ແມັດ​ຍິງ ມີ 2 ຮຸ່ນ ຄື: ຮຸ່ນ​ອາ­ຍຸ​ບໍ່​ເກີນ 35 ປີ ແລະ ຮຸ່ນ​ອາ­ຍຸ 35 ປີ​ຂຶ້ນ​ໄປ ແລະ ປະ­ເພດ​ລົດ​ເທັນ​ເທີ ໄລ­ຍະ​ທາງ 90 ກິ­ໂລ­ແມັດ​ຊາຍ ມີ 4 ຮຸ່ນ ປະ­ກອບ​ມີ ຮຸ່ນ​ທົ່ວ​ໄປ ຮຸ່ນ​ອາ­ຍຸ 30-39 ປີ ຮຸ່ນ​ອາ­ຍຸ 40-49 ປີ ແລະ ຮຸ່ນ 50 ປີ​ຂຶ້ນ​ໄປ ເຊິ່ງ​ທັງ 4 ປະ­ເພດ ນັກ­ກີ­ລາ​ຈະ​ແຂ່ງ­ຂັນ​ຈາກ​ຈຸດ​ເສັ້ນ​ໄຊ ໃນ​ຕົວ​ເມືອງ​ຂອງ​ນະ­ຄອນ­ຫຼວງ​ວຽງ​ຈັນ ມຸ່ງ​ໜ້າ​ໄປ​ທີ່​ເມືອງ​ສັງ​ທອງ ບ້ານ​ປາກ​ຕອນ ແລ້ວ​ໂຄ້ງ​ກັບ​ມາ​ຈຸດ​ເດີມ ຜູ້​ໃດ​ມາ​ຮອດ​ເສັ້ນ​ໄຊ​ກ່ອນ ຜູ້​ນັ້ນ​ຈະ​ໄດ້​ຂັນ​ຊະ­ນະ​ເລີດ​ໄປ​ຄອງ.

    ສ່ວນ​ລາຍ­ການ​ທີ 12 ແມ່ນ​ການ​ແຂ່ງ­ຂັນ​ຄາ​ລາ​ວານ​ຖີບ​ລົດ ລາຍ­ການ​ນີ້ ນັກ­ກີ­ລາ​ຈະ​ໄດ້​ເສຍ​ຄ່າ​ສະ­ໝັກ ຜູ້​ໜຶ່ງ 120.000 ກີບ ຈະ​ແຂ່ງ­ຂັນ​ພາຍ​ໃນ​ຕົວ​ເມືອງ ໃນ​ໄລ­ຍະ​ທາງ 13 ກິ­ໂລ­ແມັດ ໂດຍ​ຈະ​ມີ​ຂອງ​ລາ­ງວັນ​ເປັນ​ທີ່​ລະ​ລຶກ​ມອບ​ໃຫ້.

ຂ່າວທີ່ກ່ຽວຂ້ອງ