ຊາວ​ອິນ​ເດຍ​ຫຼາຍ​ລ້ານ​ຄົນ ເຂົ້າ​ຮ່ວມ​ເຫດການ​ທາງ​ສາສະໜາ​ທີ່​ໃຫຍ່​ທີ່​ສຸດ​ໃນ​ໂລກ

     Kumbh Mela ຊຶ່ງ​ເປັນ​ເທດສະການ​ທາງ​ສາສະໜາ​ທີ່​ໃຫຍ່​ທີ່​ສຸດ​ໃນ​ໂລກ​ນັ້ນ ໄດ້​ເລີ່ມ​ຂຶ້ນ​ໃນ​ວັນ​ທີ 15 ມັງກອນ​ນີ້ ແລະ​ ມີ​ກຳນົດ​ສິ້ນ​ສຸດ​ລົງ​ໃນ​ວັນ​ທີ 4 ມີນາ​ໜ້າ​ນີ້ ໂດຍ​ມີ​ຜູ້​ສະແຫວງ​ບຸນ​ຫຼັ່ງໄຫຼ​ກັນ​ໄປ​ທີ່​ນະຄອນ​ເກົ່າ​ແກ່ ອາ​​ລ​ລາ​ຮາ​ບັດ  (Allahabad) ຂອງ​ອິນ​ເດຍ ເພື່ອ​ແຊ່​ຕົນ​ລົງ​ໄປ​ໃນ​ແມ່ນ້ຳ​ສັກສິດ​ສາຍ​ຕ່າງໆ. ບັນດາ​ຜູ້​ຈັດ​ຕັ້ງ​ງານ​ດັ່ງກ່າວ ໃຫ້ການ​ຄາດ​ຄະເນ​ວ່າ ພາຍ​ໃນ​ເວລາ 48 ຊົ່ວໂມງ​ຕໍ່ໜ້າ ຈະ​ມີ​ຊາວ​ຮິນ​ດູ ກວ່າ 100 ລ້ານ​ຄົນ ຈາກ​ທົ່ວ​ປະເທດ​ອິນ​ເດຍ ເດີນທາງ​ໄປ​ຍັງ​ນະຄອນ ອາ​ລາ​ຮາ​ບັດ ທີ່​ຂຶ້ນ​ກັບ​ລັດ ອຸດ​ຕຣາ ປຣາ​ເດ​​ສ (ພາກ​ເໜືອ​ອິນ​ເດຍ) ເພື່ອ​ເຂົ້າ​ຮ່ວມ​ເທດສະການ​ດັ່ງກ່າວ.

    ຕົວ​ເມືອງ​ຊົ່ວຄາວ ອັນ​ປະກອບ​ມີ​ຕະຫຼາດ ຮ້ານ​ອາຫານ ແລະ​ຖະໜົນ​ຫົນທາງ ໄດ້​ເກີດ​ຂຶ້ນ​ຢູ່​ລຽບ​ຕາມ​ແຄມ​ແມ່ນ້ຳ ໃນ​ຂະນະ​ທີ່​ຜູ້​ສະແຫວງ​ບຸນ ກໍ​ຕັ້ງ​ຄ້າຍ​ໄປ​ທົ່ວ​ບໍລິເວນ​ທີ່​ມີ​ຂະໜາດ​ກວ້າງ 45​ກມ2 ທີ່​ຈັດ​ສະເພາະ​ໃຫ້​ແກ່​ເທດສະການ Kumbh Mela. ອຳນາດ​ການ​ປົກຄອງ​ທ້ອງຖິ່ນ ໄດ້​ກະຈາຍ​ການ​ປະຕິບັດ​ໜ້າທີ່​ຂອງ​ຕຳຫຼວດ​ເກືອບ 30.000 ຄົນ ເພື່ອ​ຮັບປະກັນ​ຄວາມ​ສະຫງົບ ກໍ​ຄື​ເພື່ອ​ປ້ອງ​ກັນ​ກໍລະນີ​ເກີດ​ເຫດການ​ຢຽບ​ກັນ.

    ນະຄອນ ອາ​ລາ​ຮາ​ບັດ ຕັ້ງ​ຢູ່​ຈຸດ​ຄົບ​ກັນ​ຂອງ​ແມ່ນ້ຳ​ສາມ​ສາຍ ໄດ້ແກ່ ເອ​ຣາ​ວະ​ດີ ອາ​ມູ​ນາ ແລະ ຊາ​ຣາ​ສວາ​ຕີ. ໃນ​ຄວາມ​ເຂົ້າໃຈ​ຂອງ​ຊາວ​ຮິນ​ດູ ກໍ​ແມ່ນ​ຈຸດ​ຄົບ​ກັນ​ຂອງ​ແມ່ນ້ຳ ຖື​ວ່າ​ມີ​ຄວາມ​ສັກສິດ​ເປັນ​ພິເສດ ແລະ​ຊາວ​ຮິນ​ດູ ເຊື່ອ​ວ່າການ​ລົງ​ອາບນ້ຳ​ຢູ່​ທີ່​ນີ້ ໃນ​ລະຫວ່າງ​ເທດສະການ Kumbh Mela ເປັນ​ການ​ຊ່ວຍ​ລ້າງ​ໂທດ ແລະ ​ຊ່ວຍ​ກູ້​ວິນ​ຍານ. ຕາມ​ມູນເຊື້ອ​ແລ້ວ ເທດສະການ Kumbh Mela ຈັດ​ຂຶ້ນ​ສາມ​ປີ​ຕໍ່​ເທື່ອ ແລະ ​ຈັດ​ຂຶ້ນ​ໝູນວຽນ​ລະຫວ່າງ 4 ນະຄອນ​ທີ່​ມີ​ຄວາມ​ສັກສິດ ໄດ້ແກ່ ອາ​ລາ​ຮາ​ບັດ ຮາ​ຣິດ​ວາ ນາ​ຊິກ ແລະ ອູ​ຈຽນ.

   ເມື່ອ​ປີ 2017 ເທດສະການ​ດັ່ງກ່າວ ໄດ້​ຮັບ​ການ​ຮັບ​ຮູ້​ຈາກ​ອົງການ​ສຶກ​ສາ ວິທະຍາສາດ ແລະ​ວັດທະນະທຳ ຂອງ​ສະຫະ​ປະຊາ​ຊາດ (UNESCO) ວ່າ​ເປັນ​ມໍລະດົກ​ວັດທະນະທຳ​ນາມ​ປະ​ທຳ (ໄຮ້​ຕົນ​ໂຕ).